Romans 11

Ánutufa Isaraee máqannaa asumu máriaqeera akaqáusa kai máraannoo.

Qinée Pauroosa kafáa Isaraee máqannaara iráidaqa, kúqaa fee Ánutufa Isaraee máqannaasara qáoo qímasee minínnisanau. Óo sía uqanna minnísanau. Qinée Pauroosa Isaraee máqannaa faqa máridaqa qinée Abarahaamana áiku ásauku marúnausa máridaqa, qinée Yakooboona ámaaku Beesaminna áti máridaqa márunnanara Ánutufa sía narí Isaraee máqannaara qáoo qímasee minnísanau. Óoqai óosanaraseenoo maa-maqa maaqánakina rusandeesámumandee maróosa máriafanoo. Óoqeenaa tamummaqarausa ákarakinaana Eeriaafa Isaraee máqannaasara nífairidanoo níqidanoo afeekaikámándee Ánutunara innaaru qínoo qinau.

Óo karaambáiqa Isaraee máqannaasa aní ufara minníseeqa fúrufariqa aní tamummáqara fasiqauqa kuqá náruseeqa aní aandáu̱ tatúfira óoni qáindauqa rapéepaamma áqiqa. Qinée Eeriaasa qeeqáraa kai aní ufamáu fímarunaqa misá minára irisée qiní faqa kuqá dáriraree qímariafaqa aní qímamidaqa.
Eeriaafa miqí qímasoofanoo Ánutufa qímaminoo qinau,

Óo sía aneennára kai qiní ufamáu fímarianafa máriananoo. Qinée qísauku dínni taikásee dínni óonu qaaraqánda tauséenna fasiqa anaasee moómoosa uqanna útaaqamáqaunausa máridaqa sía únna Ánutuna Baaranara innaaru qímariasa qiníara kai innaaru qímariasa máridaqa.
Eeriaana áukuana miqínoo márinau maqee áukuana Isaraee máqannaasaki miqímminoo máridanoo, Ánutufa misákinaana akaqáusa útaaqamásoofanoo narí ámuqusiranannai útaaqamásoosa máridaqa. Minamúsa Ánutufa sía misá nírana márirana óosana qáfamasee ámiqira fee qímasee útaaqamannimaqanau, narí ámuqusiranannai kai misá útaaqamánnimaqanau. Ánutufa faiqí útaaqamánnimaqara oosana fannoo misá nímariana misá máriranasaa múndinoo márinanoofau sía ánoona ámuqusiranasaa múndinoo márini, minásaa kai mundínoo máridanoo.

Isaraee máqannaasara nánee fee qianáuree, maaqí qianáura, Isaraee máqannaasakinaana akaqáusa Ánutufa útaaqamánnimaqáqoosa kai Ánutufa náaroo úfana irisée mifínnai fiqau. Aiqáma tia náaqooki óoni ititárausa máridaqa sía nári randée marú aanna paqúriqau. Tamummáqara fásiqausa misára maaqí qiqau.

Ánutufa nímuqusaki faqa nitikúraki faqa ummaararárana nimisoofaqa mi-kamúqooqari aunduarídaqa kudoosaápaida máridaqa nífu qáfaida sía qáfaidaqa, náaqooki faqa sía íridanoo.
Dafidifa faqa maaqí qímasee misára ákara rinau.

Misá qoomáqa sakasée óoqu marififanoo namuqáa aniréeqa misá ititáannoo. Misá miqóo kurídiqa nári mandáinaina ákiaqara máreefara.
10 Misá sía qáfaaqee qímasee Ánutufa misá nífusaa ititáannoo. Nári ummaara fannoo aiqáma kari nári nitaufakaaqa máriraiká kai ídanoo nitaufaka saaeémminoo máridanoo.
Miqímasee Dafidifa misára ákararinau.

11 Qinée Pauroosa Isaraee máqannaara maaqí qímasee iráidaqa, Yuda máqannaasa Yísunasaa farindámaki sáamuriqa kurídiranaki taikáranaki áqufiqee iqau. Sía uqanna miqíqau. Isaraee máqannaa áaqoonara Ánutuna asumu márirafa ánaamurusaa áqufinau, Yuda máqannaasa ánaamuruara rairaiqiaqéera miqínau. 12 Yuda máqannaasa áaqaranara Ánutuna firaa amiqi amiqirana ánaamuru aiqáma maqa afaaqasása máriasa níminau. Yuda máqannaasasáaqaraana ánaamuru ámiqi ámiqirana máraqau, kásooqaqee taikára áukuana Yuda máqannaasa Ánutufa aiqáma maréeqeenoo ánaamuru nímuna ákiaqara firaa amiqi amiqiranaki úriqararanaki Yuda máqannaasa quqáannoo.

Ánutufa Isaraee máqannaasa minníseenoo ánaamuru aniréeqa Ánutuna áqoondikiqau.

13 Qinée Pauroosa Yuda máqannaara ínni qímannimiseeqa kafáa maqee ínniara ánaamuru qímannimidaqa, Ánutufa ánaamuru qímannimiranara diqiqoosá máridaqa ínniki aináinímarúnnanara asasídaqa. 14 Ánaamuru qímannimí marúnaqa Yuda máqannaa ínniara Ánutuna ufara íridammiafoo qímasee rairai qímasee misá faqa irisée írirana mi-ufánasaa rusíaqeera asasídaqa. 15 Yuda máqannaasa Ánutufa minínnísoofaqa ánaamuru anirée Ánutuna áqoondikiqau. Kásooqaqee Ánutufa quándaki Yuda máqannaa kafáa márainaqa kúqiranakiqari fíndifíara foora ifáranoo.

16 Maasá Yuda máqannaasa Ánutuna ámira ainainara maaqí qídaqa. Ínnee féemu adíana kai ráqeeqee Ánutuna ámifanoo mi-feemúfa aiqáma mináindikakaimminóo máriannoo, kafáa ínnee saqári óosana ámifanoo mi-saqarífa mináindikai máriannoo. 17 Dóo qinée mi-iriranamaú fídaqa minára maaqí qídaqa. Oorifa sáqari asumu sáunara foora máridanoo. Asumu sáqari ámmuqu akaqáfa raqánoo márifanoo káasau oorifa saqari ásaana ráqeeqee minakína míni ookáamandee ummaqúsainanoo minakíqari kambíqaannoo. Ínnee ánaamuruara káasau oorifara foora máriafanoo. Yuda máqannaasa oorifa sáqari asumu óosana máridaqa. Ánutufa ínni ánaamuru máriasa káasau oorifa ásaanara foora asumu oorifa minakí ookáamasaifanoo kambíqafifaqa ínnee maqee Yuda máqannaa akaqáusa faqa misáindi óosana ámiqi ámiqiranasaaqaraana animáree máriafanoo. Ínnee ánaamuru máriasa asumu oorifa ámmuqu raqáranaki ínnee ookáairausa máriafanoo, sía misára raqára ásaanara fídiaqaa iaqa. Ínnee náqimaseeqee nóori uqéeraseeqa ínneeqara ámiqirausee qídee ínnee ámmuqu máriafanoo, sía ámmuqu fannoo saqári óosana poodúqaidanoo, óosana fannoo ámmuqu poondúqaidanoo, minára sía ínnee óosana máriasara Yuda máqannaasara fídiaqaa iaqa.

19 Ínnee minára irisée maaqí qifáranoo Ánutufa maasá ánaamuara iriséenoo asumu saqari ámmuqu raqáfufanoo maasára kai íridanoo fee qifáranoo. 20 Qinée Pauroosa minára maaqí qídaqa Ínnee dóo kúqaa qiafanóo, Ánutufa Isaraee máqannaa sía írirana miná ufasáa rusímarufanoo aadána ásaanara foora ráqanau, ínnee írirana miná ufasáa rusímarunara ínni maréeqee minakí ookáa inau. Ínnee minára irisée sía nóori uqéeraaqa, rufíaaqa.

21 Ánutufa mi-saqarína naríndi Yuda máqannaasara sía ámuqusinau sía Yísunara irisoonara káqi ateekánau ínnee faqa rufíaaqa káqinni faqa ateekáannoo, káasaummia. 22 Maanára ámiqimasee íria sía aunúaqa Ánutufa narí qaara oosana maaqímminoo máridanoo miná dínni káaqa faiqí anaaseera ámuqusirafa máridanoo kafáa miná dínni mandá ainainara áanoo irafa máridanoo. Mifá mandáinainaki sáamurimariasara áanoo irafa kai máridanoo, ínnee káqi miná áfaariranaki maqee maqee fímarifanoo mifá ínni nífauamáseenoo ámiqi ámiqiannoo, minnísaifanoo ínni faqa Yuda máqannaara foora aadána asaanara foora ínni raudá áqusaannoo. 23 Yuda máqannaasa náriqa dapi nírana minnísee quándaki kafáa aniráifanoo Ánutufa misá qumáree nári nímaaqaki kafáa ookáa íannoo, Ánutufa miná faqa amanaikámiannoo.

24 Asumu saqari ásaana ateekásee narí ámaaqakina ookáamandainanoo dauní ururáannoo, mi-oosanáfa sía kadáapirirafa máridanoo. Káasau saqari ásaana ateekásee asumu máraqa nua oosanaki ookáa ínanoo sía dauní dauni kambíqaannoo kadáapiruannoo. Minára irisée Ánutufa Yuda máqannaasa oorifa sáqari ásaanara foora raqáqa máriasa amana maréeqee narí ámaaqakina kaifáa ookáa ínoo sía kadáapiruannoo. Ínnee ánaamuru máriasa káasau oorifa sáqariara foora máriafanoo asumu saqarikína ínnee ookáamaqaifaqa máriafanoo. Ínnee sía Ánutufa kafáa Yuda máqannaa ookáa íanínnanara sía amaneé qiaqa, dóo Ánutufa amaná sía kadáapi máridanoo, káqimma ookáa íannoo.

Ánutufa ánaamuru náaree marasée miqóo Yuda máqannaa naundurá quandáannoo.

25 Óo qiní qíkaqaafasaauqa moo kúkeeqara ufa ínniara íriaqeera qímannimianaura, ínnee maa-ufána iriséeqa ínneeqa nóori uqéerarana mara maqáruseeqa miqóoqari reendeenámandee márifaranoo. Mi-anoona ufáfa maaqímminoo máridanoo. Isaraee máqannaasa náaqooki óoni ititárafa sía náaruara miqínoo máriannoo. Ánutufa qinoo ánaamuru márinausakiqari qinée qeeqá qíafanausa misá kái Yísufinnai írirana ubeekáifaqa Yuda máqannaa náaqooki óoni ititárana tatúsaanaqa misá faqa ánifaranoo. 26 Maaqímmasee aiqáma Isaraee máqannaasa Ánutuna asumu márirana máreefaranoo. Tamummáqara fasiqauqa maa-ufamaú máreefaranoo.

Asumu máree márifa Sioona máqusai moo áuqu Yeerusaree mi-maqusánaindari anirée asumu márirana
nímiannoo. Mifá Yakooboona áiku ásauku miná átiuqa máriasa mandáinaina aiqáma rukánnisaannoo.
27 Mi-karí qinée Ánutusa Yuda máqannaasa áaqarana ákiaqara mara áqunniseeqa qinée Ánutusa qeeqá moodáanakikirafa ufa Abarahaamana faqa Isakeena faqa Yakooboona faqa ufa qíafannana mi-karí mi-ufána ánoona dóo ánoonaikiannoo.
Tamummáqarausa ufa miqínoo márinara qinée Pauroosa maaqí qídaqa.

28 Yuda máqannaasa Yísuna ámiqira fasaasa ufa minnísoonara Ánutuna úfaasu namuqáa kámmiqa máridaqa. Sía fífau, ínni ánaamuru máriasara iriséenoo Ánutufa miqímmá nímaqasoofaqa miqídaqa. Ánutufa Abarahaamana Isakeena Yakooboonara iriséenoo, aiqáma ánaamurukinaana rusandeesámumandee mároonara iriséenoo misásaa aruakínausa misá ámiqi ámiqimmá nímaqoonara iriséenoo Isaraee máqannaasara qiní qíqoondi fée qídanoo. 29 Ánutufa narí rusandeesámumasee máree maríasara faqa narí ámiqi ámiqimma nímaqée maríasara faqa sía qaara iriranaikídanoo andeeqáidanoo sía káaqa Isaraee máqannaa namuqáakinoo, úfaasu kai.

30 Ínnee ánaamuru márusa óoqai ufa rukíee marúsa máriafanoo dóo maqee Yuda máqannaasa ufa rukíoonara faqa ínnee miná ufa írunara Ánutuna nífauarana máree maríasa máriafanoo. 31 Miqí kaimmásee ínnee ánaamuru Ánutuna nífauarana máree máriafanoo Yuda máqannaasa faqa Ánutuna nífauarana máraaqeera ufa rukíaranaki quqásoofaqa máriafanoo. 32 Ánutufa aiqáma maqannaasa narí nífauara óosana uqannífiqaanifeera aiqáma maqannaasa ufa rukíarana ámeemaanai mara quqásoofaqa Ánutuna nífauarana oosana qáfaaqeera.

Pauroofa Ánutuna amooqu úfafa.

33 Óo Ánutuna írirafa aináina fáifa firaaqóo máridanoo. Miná írirafa faqa áuqarafa faqa firaaqóo farúmmara foorá meemái unaurínoo máridanoo. Miná naamúaqira ufa óosana yáfee miná íriannoo fee, sía amanaikídaqa. Miná nírana yáfee íriannoo fee. 34 Tamummáqara fasiqauqa minára maaqí qiqau.

Yáfee karaambáiqa írirana fáasai íriannoo fee yáfee fuki faakí íannoo fee.
35 Yáfee moo áinainara qufíqeenoo qímianifee qímasee ámiannoo fee. Sía moó fannoo amanaikíannoo.
Dóo tamummáqara fasiqa ufa miqímminoo máridanoo qinée Pauroosa minára maaqí qídaqa.

36 Náqimásee moó fannoo Ánutuna moo áinaina ámiannoo fee narí kai aiqáma ainaina áuqufa mináindi kai máridanoo. Aiqáma ainaina minásaa qaraafa kai afeekaíkinoo máridanoo. Aiqáma aréenarafa náaru náaru Ánutunaindi kai máriannoo. Kúqaa.

Copyright information for `BJR