Romans 15

Sía aneenná áidiramau fúa.

Maasá Yísuna saqárikiranaki afeekaíki maríasa quándaki uréeqarausa qumaara dínni ati dadaaqí akumáraa, sía maasá qeeqá dídiranamau kai fúa. Maasá náadu náadu qeeqá qíkaqaafasaa narí Yísuna saqárikirana dadaaqíananoo afeekaíkiani. Sía aneennára íria, aneenná ákaqaafasaa ámiqi ámiqianifeera minára irisée dadaaqía. Ásauku mundírafa rirímma, sía narí áidiramau fínoo, narí ákoona Ánutuna áidiramau fínoo tamummáqara fasiqa minára maaqí qímasee ákara rinau.

Faiqí ánaasee Ánutuna áqira ufa mandúfa qímarifa qinísaa áqufinoo.
Tamummáqara fasiqa mi-ufána qímasee ákara rinau.

Aiqáma tamummaqara fasiqauqa ákarakinaa ufa sía fífau ákara riqau maasá naamúaqidee qímasee ákara ríqau, maasá mi-akaránakinaa ufa dadaaqídaqa fuki faakí qírana faqa ubiqáfi márirana faqa marasée miqandánnai Yísunara asasammásee áfeesirana máraaqeera ákara riqau. Ánutufa ubiqáfi márirana ákoofa faqa dadaaqíra fuki faakí qírana ákoofa faqa máridanoo. Miqí mári Ánutufa ínni dadaaqínaqa ínnee ásauku mundírana Yísuna aanna rámaseeqa ínnikina sía áanóo irafa máriannoo moodáa irirafa máriannoo. Moodáa irirafa ínnikina márinaqa aiqámausa moodáa ufa kai qímasee ásauku mundírana maasá karaambáiqa Yísuna ákoona Ánutuna amooqiaqa.

Ánaamuru misá Isaraee máqannaa faqa Ánutunara dúfi dúfi qifáranoo.

Ásauku mundírafa ínni qumároonara irisée ínnee naríara naríara áqoondikifaqa faiqí ánaasee ínni níndafamásee ámiqira oosana máraidammiafoo qímaseeqa ínni Ánutuna amooqiaqéera. Ánutufa narí qímaqoo ufamáu fúanifee qímasee ásauku mundírafa Yuda máqannaa mara fírira faiqiara foora aináinammánnimaqara faiqi kámambinoo márinau. Ánutufa Abarahaamana áiku ásauku faqa qíma afeekaikámmasoonara kambíqaanifeera qímasoofanoo ásauku mundírafa Yuda máqannaasa aináinammánnimaqara faiqi kámambinau. Ánaamuru máriasa aniréeqa Ánutufa misára ámuqusufanoo nífauaranara faqa Ánutuna áuqu uqéerasee amooqiaqéera ásauku mundírafa minára faqa Yuda máqannaasa aináinammánnimaqara faiqi kinau. Tamummáqarausa ákarakinaana minára maaqí qinau.

Qinée ánaamuru namufaqa máridaqa misá sáimbaqa aníara dúfi dúfi qianáura.
Miqóoqari ánauqu uqéeraseeqa idí ráida aní amooqianáura.
10 Tamummáqarausa ákarakinaafa moó maaqí qídanoo.

Ínnee ánaamuru máriasa Ánutufa útaaqama nímaqee márisa Yuda máqannaasa sáimbaqa dúfi dúfi qímasee asasíaqa.
11 Moo támummáqarafa maaqí qinau.

Aiqáma ánaamuru máriasa karaambáiqa amooqiaqa.
Aiqáma maqannaasa firaaqóo miná amooqiaqa.
12 Kafáa moo támummaqarafa maaqí qinau.

Yeeseena átiki moó kambíqaannoo, mifá fíndifinoo ánaamuru rakísiannoo, misá quándaki nári írirana minakí rusífaranoo.
Tamummaqarausa úfa Yísunara miqímmiqau.

13 Ánutufa maasá innaarúnaira áfeesirana óosanafaqaafa máridanoo, mifá kai ínnee miná saqárikiranannai aiqáma asasírana faqa asooárana faqa ínnikina qumbíqannimaqaannoo, Ánutuna náaquqara andeeqara maraquna afeeka fannoo ínni dadaaqínanoo innaarúnaira asasammásee áfeesirafa mi-asasiráfa qumbiqéenoo téeqiannoo.

Pauroofa afeeka ufa Roomma máqannaasa ákara rúmannimaqoonara qinau.

14 Óo qiní qíkaqaafasaauqa qinée Pauroosa ínni Roomma máqusai máriasara qídaqa. Qinée ínniara ámiqirafa faqa írirana faqa qumbiqárausee qídaqa ínnee Roomma máqusanaasa ámiqira írirana narí uqafíqee narí uqafíqee qímariasa amana máriafanoo.

15 Ínnee miqí márifaqa qinée maa-pasánakina sía reendeenámandee ínni náaqoo áuqeeqa óosana oosana ainainara ínni náaqoo firaaqóo áuqeeqa. 16 Ánutufa ámiqira ainainirana qiní qíminau. Qinée ásauku mundírana Yísuna saikáki quqáqisáifaqa máridaqa ánaamuru qímannimiranaki máridaqa.

(Mooseena úqiqaana maaqakina Ánutuna aanáiqikira fasiqauqa sipsípa ánaaqi ámiqiraná kai faiqí ánaaseendi mara máree míni óoninnai áuqira qaindásaa quqásee arusée aandáu̱ tatúfirana Ánutuna suqá ámimariqau.)

Qinée ánaamuru faqa Ánutuna faqa aanáiqikirausara foora márunnanara maa-akaránaki afeeka ufa ínni nímiqa, káqiqeesa márifaqau sía afeeka ufa qímannimini íreeda kai qímannimini ínni aanáiqikirausa máridaqara afeeka ufa qímannimidaqa. Ánutuna náaquqara andeeqara maraquna fannoo ánaamuru máriasara Ánutunaindi fee qímasee misáuqa márirana nírana Ánutuna áidirana amana kái máriaqeera minára kai Ánutunai aanáiqikirausaikidaqa máridaqa.
17 Qinée ásauku mundírana Yísunasaa moodáanaki kámambi máridaqa maqásaa mi-saikánaki márunanoo dídimarifaqa asasídaqa. 18 Ásauku mundírafa náaquqara maraquna qímifanoo dadaaqífaqa qeeqá úfannai faqa qeeqá kadáapiriranannai faqa sía faiqí máraaqaa ira ainainannái faqa mináuqannai qinée ánaamuru Ánutuna ufa qímannimimariafanaqa íriqa mi-maú fídaqa, ásauku mundírafa dadaaqinára firaaqóo qifaaqa quqásee afeekaikámándee qímannimianaura. Qinée miqídaqa ámiqira fasaasa ufa ásauku mundíranara aiqáma ufatia qímannimiqa Yeerusaree máqusa dínni Iririkumma máqusa dínni mi-qambaana saqanná máriasa aiqámausa qímannimimaree fífainídaqa.

20 Ásauku mundírana áufakiana sía írimariasa kai qímannimiqa, qeeqá ufa moóna ufa ámuaaqa rusíanoora sáina sía írimariasa kai qímannimia, óoqai indaarú dóo qinée mi-iriramaú fídaqa. Mi-maú fídaqa tamummáqara fasiqa ufamáu fídee qídaqa. 21 Óoqai mi-tamummaqara fasiqána ufa minára maaqí qinoo máridanoo.

Sía minára qímannimusa miná qáfeefaranoo.
Sía írusa minára náaqoo írifaranoo.

Pauroofa Roomma máqusai fíraree qímasee qímaqoo ufafa.

22 Qinée Pauroosa moómoo kari ínni Roomma máqusai fuanéerunanoo óosana óosana aináinirafa rafáaqafufaqa dóo maqee maa-saqá sáika taikásee moómoo aukuana ínnee iannai fuanée qímarunausa dóo maqee qúsasaa fíraridaqa. Qinée Sipeena máqusai fídaqa ínni Roomma máqusanaasa faqa namummáqeeqa ínni faqa asasammásee marikámmásaanaqa ínnee Sipeena máqusai fuannána qíku áuqirana dadaaqiaqée qídaqa.

25 Ínni maqúsai fuani qúnausa dóo maqee Yeerusaree máqusai fuanáura óonureeqa óonurandee áiqareeqa ínni maqúsai fuanáuranoo. Yeerusaree máqusai óoru fídaqa miqóo Ánutuna ufa írimariasa dadaaqianáura. 26 Maseedoonia máqa maaqakinaasa faqa Kirisa máqa maaqakinaasa faqa Yísuna ufa írimariasa náriqa munnimma aiqámausa rúaummásaafaqa Yeerusareenni Ánutuna ufa írimarusa aináina náranara sárauirausa mi-munnimmána nímiraree qímasee qinísaa saafaqa máree óoru fírarammidaqa. 27 Maseedoonia máqa maaqaki máriasa faqa Kirisa máqa maaqaki máriasa faqa náriqá kai rúaummásee Yeerusaree máqusanaasa nímiraree qídaqa, sía qinéefau qiqau. Indaarú Yuda máqannaasa nári innaarúnai fíra ámiqira ufa Yísuna ufara ánaamuru náida nimisoonara mi-aikána nárinoo márina mi-aikána tatíqa maqásaa ámiqi ámiqira ainainara munnimma nímifaranoo. Ánaamuru máriasa miqíaqaana andeeqára oosana máridanoo.

28 Qinée maaqóoqaraasa suqúseeqa nímira munnimma máreeqa Yeerusaree máqannaasa aiqáma uqanna munnimma nimiséeqa óorurandeeqa ínni Roomma máqannaa faqa qumu máridaqa asasídaqa ámiqidaqa márianaura, dóo marikíqa Sipeena máqa maaqaki óonuree misá faqa Yísunara qímannimianauranoo. 29 Qinée ínni Roomma máqannaa iannai óonuree maa-ainainnára íridaqa. Qinée ásauku mundírana afaaqóoqa qíranasaa fídaqa miná ámiqi ámiqirana ínni nímianaura.

30 Óo qiní qíkaqaafasaa qinée Pauroosa afeekaikámasee ínni qímannimidaqa. Ínnee qiníara Ánutufinnai innaaru qíranannai qiní dadaaqiaqa, Ínneeqa nímuqusa óokiqari afeekaikámándee qiníara innaaruqiaqa. Ínnee faqa qinée faqa ásauku mundírafa Yísufa maasá karaambáiqa minásaa atooqáfi márunausa máridaqa minára irisée qiníara innaaru qiaqa. Ánutuna náaquqara andeeqara maraquna fannoo naríara náriara nímuqusirana maasá firaaqóo qímuna ínnee minára faqa iriséeqa qiníara innaaru qiaqa.

31 Qinée maindári Yeerusareenní óoruree misá nímiraree qia múnnimmana nímianaqa Ánutuna ufa írimariasa minára asasiaqéera innaaru qiaqa. Miqóo Yeerusareenni qinée márianaqa ínnee Ánutunara innaaru qímaqimaqáaqa Yeerusareenni máriasa Ánutuna ufa sía írimariasa qiní dárirarammidammia. Ínnee misára innaaru qiqa qiní sía dáruaqee innaaru qiaqa. 32 Qinée Yeerusaree máqusaindari ámiqimandee óorurandee qumuráananoo Ánutufa qínnanara ínni Roomma máqannaasa faqa káqikaaqóo idooámaseeqa asasammáseeqa áiqaree fuanáura. 33 Ánutufa maasá asooára óosana fannoo ínni aiqáma Roomma máqannaa faqa máriani. Kúqaa.

Copyright information for `BJR