Romans 4

Abarahaamafa Ánutunasaa narí írirana rusínau.

Ínnee Roomma máqannaasaki Yuda máqannaa akaqáusa máridaqa. Maasá Yuda máqannaa qikeekú qikaakú Abarahaamafa náqaafeeinau. Mifá andeeqára máriranannai fee Ánutuna áfusaa andeeqárafa máridanooféeinau. Sía minánnaifau miqínau Abarahaamafa miqínoo máridanoofau Ánutuna áfusaa narí andeeqáranara asasini. Sía amana narí ásasírafa márinau, Mooseena ákarakinaa ufa minára maaqí qínoo máridanoo.

Ánutufa Abarahaamánara qinau anée moómoosa níkausaikina márinnaranoo.
Miqí qunára Abarahaamafa iriséenoo óo kúqaa kambíqaannoo fee qímasee narí írirana Ánutuna mi-ufánasaa rusíseenoo afaaqa quqásee kísaaqasaa rakísi marínau. Ánutufa miná qáfamaseenoo Abarahaamanara óo Abarahaamafa qiní ufasáa aní írirana rusímarianafa máriananoo andeeqárafa máriananoo fee qinau, minára Abarahaamafa sía narí andeeqáranara narásasírafa márinau.

Faiqí moó fannoo moo fásiqa aináinamá isáinanoo aináina ákoofa miná feefaurú ámiannoo. Áminanoo sía káqi fífau qímiifoo qíannoo, narí miná aináina kadáapirina ákiaqara áminoo. Faiqí moó fannoo sía narí kadáapiriranasaa andeeqárana máraidanoo káqi narí írirana Ánutuna ufasáa mundímarina Ánutufa miqí marí fasiqana káqi maréeqeenoo narí áfusaa andeeqáranaki quqáidanoo. Ánutufa faiqí faiqi áaqee maríasara andeeqárausee qímarifa máridanoo faiqí ánaaseeuqa sía náriqa kadáapirifa, káqi mi-ufánasaa nári írirana rusísainna fasiqa anaaseesa Ánutufa narí andeeqáranaki mara quqánnisáannoo. Ánutufa áaqee marú fasiqa anaaseesa sía nárínau, misára andeeqára fasiqa anaaseera foora káqi maréeqee narí andeeqáranaki quqánau. Dafidifa minára maaqí qímasee ákara rinau.

Ánutufa mandáinaina ákiaqara minínnisoo fasiqa anaaseesá firaaqóo asasídaqa. Nári mandáinaina Ánutufa rafáaqafusoonara asasídaqa.
Ánutufa nári mandáinaina ákiaqara sía irisée náruannoo, miná ákiaqara aunúsee sía kafáa minára ufa qíannoo. Miqíra fasiqa anaaseeuqa minára irisée asasídaqa. Dóo Dafidifa miqímmasee ákara rinau.
Dafidifa mi-asasiráusara Yuda máqannaasará kai fee fée qinau. Sía miqínoo máridanoo. Ánaamuru máriasa faqa asasifándia foo qinau. Qinée Pauroosa fáasai Mooseena ákarakinaana Abarahaamanara qúnafa maaqímminoo máridanoo. Abarahaamafa Ánutuna ufa irisée narí írirana minásaa rusísoonara Ánutufa minára kai irisée miná maréeqeenoo narí ándeeqáranaki quqánau. 10 Yáiree fee Ánutufa narí andeeqaranaki quqánoo fee inau. Abarahaamana fáinanduqu sooqóo fee miqínau sía fáinanduquaqoo fee miqínau. Sía fáinanduqira qoo mi-fasannái maréeqee quqánau. Abarahaamáfa Ánutuna ufasáa narí írirana rusísoonara Ánutufa maréeqeenoo narí andeeqáranaki quqáseenoo miná kooroo íanifeera Abarahaamanara fáinanduquannee qufanoo miqínau. Miqí kai ínoo Abarahaamafa aiqáma Ánutuna ufasáa írirana rusíranannai Ánutuna andeeqáranaki kéeqee marúsa níkoofaikinoo márinau. Miqí kai ínoo sía fáinanduqirausa nári írirana Ánutuna ufasáa rusísoosa Abarahaamáfa misá níkoofaikinau.

12 Sía fáinanduqirausa faqa fáinanduqirausa faqa níkoofaikinoo márinau. Fáinanduqirausa Yuda máqannaasa sía minára irisée Ánutuna andeeqáranaki kéeqaidaqa, misá nári nikeekú nikaakú Abarahaamafa máriundée kai íqa sía nári fáinanduqiranara iriséeqa nári írirana Ánutuna ufasáa rusísoosa Ánutuna andeeqáranaki kéeqeefaranoo. Abarahaamafa sía fáinanduqiraqoo narí írirana Ánutuna ufasáa rusínau. Maqee fáinanduqirafa mifá máriundéemmiaqa.

Abarahaamafa narí írirana Ánutuna sáa rusísoonara qíma afeekaíkirana máranau.

13 Ánutufa maa-maqa maaqánara Abarahaamafa narí áiku ásauku sáimbaqa maqa máaqa fee qínoo qímafeekaíkinau. Sía Abarahaamafa Ánutuna sándufamau andeeqásee finoofau miná akiaqara maqa máaqara qíma afeekaikírana márano̱ofáuinau. Mifá Ánutufa ufasáa narí írirana rusísoonara minára kai Ánutufa miná maréeqeenoo narí áfusaa andeeqáranaki quqáseenoo maqára qímafeekaíkinau. 14 Ánutufa narí nímianinna ainaina Kannaana máqa maaqa faqa asumu márirana faqa narí sándufamau kadáapirumasee fímariasa kai níminanoofau faiqí nári írirafa miná ufasáa mundírafa fífau kámambuannoo Ánutuna ufa qíma afeekaikíra ufa faqa fífau máridanoo sía dadaaqíannoo. 15 Sándufa fannoo Ánutuna áranaqarana maréeqeenoo faiqísaa quqáidanoo. Sándufa márinnaqoo kai sándufa rukíarafa máriannoo. Sándufa sía márinnaqoo miná rukíarafa faqa sía miqóo máriannoo.

16 Qinée Pauroosa Abarahaamanara kafáa qídaqa. Ánutufa nímianinna ainainara Kannaana máqa maaqa faqa asumu márirana faqa qíma afeekaikírafa Abarahaamafa Ánutuna ufasáa írirana rusísoona minásaa mundínoo máridanoo. Miqíunara Ánutufa nímianinna ainaina maa-maqána faqa asuma márifandínnana faqa Abarahaamana narí áiku ásauku faqa misásaa óonu aruakínausa faqa káqi nímira ainainara foora máriannoo. Sía Ánutuna ufaki kadáapirumasee fímariasaindí kai mi-ainaináusa márifaranoo Abarahaamána aanna rée maríasa, Ánutuna ufasáa káqi írirana rusímariasa misáindi faqa mi-ainaináusa máriannoo. Maasá Ánutuna ufasáa rusímariasa níkoofa Abarahaamafa máridanoo. Maasá miná aanna rée maríasa kai miná áiku ásauku máridaqa.

17 Ánutuna óoqeenaa ákara minára faqa maaqí qinoo máridanoo.

Qinée aní Abarahaamana maréeqeeqa moómoo máqannaasa níkoofaikíaneera quqéeqa.
Dóo maasá mi-ufána iriséeqa maaqímmidaqa, Abarahaamafa narí írirana rusísoo Ánutufa narí qímafeekaíkunara ánoonee qídanoo. Mi-Anutúfa kúqirausakinaana maréeqee káqi máriranaki quqée marífa máridanoo miná úfa fannoo qufanoo sía máru ainaináfa kambíqanau.
18 Abarahaamafa náuraiqi kúqiara foora ínoo márufanoo Ánutufa moómoo maqannaa níkoofaikíaneera qímamufanoo Abarahaamafa miná ufasáa írirana rusíseenoo sía asasíaqaa íraqoo asasammáseenoo áfeesinau.

Minára mifá kúqaa moómoo maqannaa níkoofaikamámbinau.
Óoqeenaa ákara minára maaqímminoo máridanoo.

Anísaa aniaruakínausa moómoo márifaranoo.
19 Ánutufa mi-ufána Abarahaamana qímamu aukuana kúqirana adeedí rámasee wan handeeréeta aukuana adeedí rámasee márinoo narí ánaaqa Saraqana faqa faiqi máqara áukuana óoqai uqanna taikáfufanoo márunara ámiqimasee iriséenoo, Ánutufa faiqi ánaaqiara qímamunara iriséenoo sía Ánutuna ufa afaimmá quqánau, káqi miná írirafa miná ufasáa írirana rusísee kúqaa kambíqaannoo fee qímaseenoo márinau. 20 Abarahaamafa narí Ánutunasaa narí írirana rusíqoofa sía quqásee finau, sía mifá Ánutuna ufara qaara aundura írinau. Abarahaamafa narí írirana Ánutunasaa rusísoofanoo quándakinoo Abarahaamana afeeka ámufanoo faiqi kambíqaaninnanara Ánutunara asasinau. 21 Ánutufa qímamu úfanara Abarahaamafa afeekaikámandeenoo Ánutunara kúqaa afeeka máridanoo qímiannoo fee qímasee asasinau. Ánutufa Abarahaamana mi-irirána qáfamaseenoo dóo minára Abarahaamana maréeqeenoo andeeqára fasiqa fee qinau, Abarahaamafa narí írirana Ánutunasaa rusísoonara minára andeeqárafée qinau.

23 Andeeqára fee qu úfafa sía Abarahaamanara kaifau miqí qímasee ákara rinau, maasára faqa ákara rinau. Maasá Karaambáiqa Yísufa kúqiranakinaana uqéeroonasaa írirana rusímarinau maasára faqa ákara rinau. Maasá Ánutufa maréeqeenoo andeeqára fasiqa ánaasee kíaninausa maasárammákara rinau. 25 Ánutufa Yísuna maréeqeenoo maasá áaqee marúnnanara faiqí nísaukuki nimisoofaqa kúqaríqau. Maasá Ánutuna áfusaa andeeqárausa máriaqee qímasee kúqiranakinaana Yísuna uqéeranau.

Copyright information for `BJR