Romans 5

Ánutuna áfusaa andeeqáranaki márirafa.

Maasá qeeqá írirana Ánutunasaa rusíseeqa márianara dóo maqee sía Ánutuna áranaqaranaki áanóo iranaki máridaqa Ánutufa narí andeeqáranaki quqáqisóofaqa minára dóo maqee miná asooáranaki ámiqiranaki máridaqa. Ánutuna ásauku mundírana maasá karaambáiqa Yísufa minánnai kai mi-asooáranaki máridaqa. Yísufa maasára kúqiranannai faqa maasá qeeqá Yísuna ufasáa írirana rusísaunnanannai faqa Yísufa maasá maréeqee Ánutuna káqi áfaariranaki quqásaifaqa maasá maqee minakí kikíqiqa máridaqa. Minakí máridaqa, kásooqaqee innaarúnai aréenarana náida qímiannoo minára íridaqa asasídaqa áfeesidaqa susúidaqa.

Sía minára kai asasídaqa maqee márianaki ummaara oosana oosanakina máridaqa minakí faqa asasídaqa. Mandáinaina ummaara dárinaqa mi-ummaaráfa sía ámiqimasee dáruannoo minásaaqari afeeka marasée sía dauní Ánutuna ufamáu fírarana kudoosaápaanaura. Maasá óosana óosana ummaarakina sía umooqukída káqi fímaría̱nanoo Ánutufa miná qíqafamaseenoo eedóo qíannoo. Miná eedóo qíra ufa fannoo quándaki maasá qifeeqárainaqa maasá Ánutuna narí aréenarana qímianínnanara asasamásee áfeesidaqa máridaqa. Mi-asasirána áfeesirafa sía qisaurírana qímiannoo Ánutufa narí náaquqara maraquna káqi qímimarífa máridanoo. Ánutufa narí náaquqara maraqunannái maasá naunduráki nammáriara foora narí áidirana maasá naunduráki adíaqimaqeenoo narí aréenarana náida qímiannoo.

Óoqai maasá Ánutuna andeeqáranara sía amanaikíqa óorudupiqa máriafananoo Ánutuna andeeqára áukuanasaa Yísufa maasá mandóosana máree máriafanausara maasára kuqunnímaqanau. Faiqí moó fannoo sía moo fásiqara qimudáoo qímasee miná ámaaqa maqasée fífau kúquannoo, ábee sía fee faiqí moó fannoo moo fásiqara ámiqira fasiqara qimudáoo qímasee miná ámaaqa maqasée kúquannoo fee. Yísufa sía maasára ámiqirausee qímaseenoo maasá qímaaqa maqaséenoo kúqinau. Maasá qeeqá mandáinainaki káqi máriafananoo ásauku mundírafa maasára kuqunnímaqanau. Míqunannai Ánutufa narí káaqa maasára ámuqisirana áidirana kooroomáseenoo maasá uqaqífiqanau. Ásauku mundírafa maasá mandáinaina naríara máreenoo kúqinoo narí fidíka téeqinoo maasá mandáinaina ákiaqara taikóonannoo Ánutufa minánnai maasá daundurákinaana maréeqee narí andeeqáranaki innaarúna mara quqáqisánau. Ánutufa miná kúqiranara irisée taikára fáasaana narí áranaqaranakinaana kúqaa uqanna asumu maréeqeenoo quqáqisáannoo.

10 Maasá Ánutuna namuqáa márufanoo mifá narí ámaaku maasá mandáinaina árirana mároonara iriséenoo miná kúqiranannai áqoondi kámma quqáqisáifaqa máridaqa. Ásauku mundírafa kúqunannai Ánutuna áqoondi kámambi máridaqa kafáa Yísuna káqi máriranannai mifá taikára aukuana Ánutuna áranaqaranakinaana kúqaa uqanna maasá miná áqoondiuqa maréeqee ásumu máriranaki quqáqisáannoo. 11 Sía miná kai, Ánutufa maasá áqoondi kámma qímaqoonara irisée Ánutunara dúfi dúfi qídaqa asasídaqa. Ánutuna ásauku mundírafa Yísufa maasá karaambáiqa minánnai maasá Ánutuna áqoondi kíqa asasídaqa.

Adamanasáaqaraafa kúqirafa Yísunasaaqaraafa fíndifirafa.

12 Óoqai indaarú moodáa fasiqasáaqaraafa Adamanasáaqaraafa maa-maqa maaqánaki áaqarafa áninau. Dóo mi-aaqarána ákiaqara kúqirafa moodáa kari ani márinau. Moodáa fasiqa Adamanasáaqari aiqáma maa-maqána afaaqasása mária fasiqa anaaseesa mifá áaqoona ákiaqara misásaa faqa kúqirafa rafáaqa fínoo márufa máridanoo. 13 Aiqámausa áaqoonara rafáaqafinoo máridanoo Mooseena sándufa sía ani márukamuqoo áaqarafa dóo ani márufa máridanoo. Mi-aukuanná mi-fasannái sándufa ákara rirana sía márunara Ánutufa sía misá rukíaranara írinau. 14 Indaarúqaa fasiqa Adamana sáaqari mi-kamusaqá kúqirafa ániufanoo míni Mooseena raqúraminau. Mi-kamusaqá misá áaqarana Ánutufa sía írinau, kúqirafa káqi kai aiqáma máqannaa káqi kai rafáaqafunnimaqanoo márinau. Sía aiqámausa Adamana aanna rámasee Ánutuna óokinaa ufa rukíaqau. Náriki moo áaqarafa káqi márunara kúqirafa káqi kai rafáaqafunnimaqanoo márinau. Adamafa kásooqaqee kambíqaanina fasiqana Yísuna kíkiqusirafa márinau.

15 Miqandá sía amana amana kái máridaqa Ánutuna káqi nímira ainaina Yísufa sía Adamana áaqarafara foora máridanoo, mifá áaduma máridanoo. Dínni kúqaa faiqí moómoosa mi-moodaa fasiqána Adamana áaqaranaki kúqiqau. Miná dínni Ánutuna káqi áfaarirafa Adamana áaqarana úraaqáranoo máridanoo. Ánutuna káqi nímira náaru márirafa moómoosa nímufa moodáa fasiqannai áfaaramandee náaru márirana nímufa mifá faqa Adamana áaqarana úraaqárarafa máridanoo. Mi-moodaa fasiqáfa Ánutuna ásauku mundírafa Yísufa máridanoo.

16 Ánutufa áfaaramandee náaru márirana nímianinnafa moodáa fasiqa Adamana miná áaqarana úraaqáranoo máridanoo. Mi-ooreeqarána faqa mi-uriqaráfa faqa miqandá rainárafa maaqímminoo máridanoo, dínni mi-moodaa fasiqána narí moodáa kari áaqamásoona akiaqara Ánutufa nímaarusira ufa quqáqoofa máridanoo miná dínni faiqí ánaasee moómoosaki áaqarafa kambíqafi marufanoo Ánutufa sía minára nárinau, káqi narí áfaarinoo níminoo qinau, dóo andeeqárausa máriafanoo nímaarusira ufa dóo taikéenoo fee qinau. 17 Qinée kúqaa ánoona ufa qímannimianaura. Kúqaa moodáa fasiqa faiqi Adamana miná áaqarana ákiaqara kúqirafa kambíqeenoo aiqáma maa-maqa maaqána afaaqasása máriasa kúqirafa óosana araséenoo mandá rakisira rakísinnimaqaidanoo márifa máridanoo. Mi-ufána dínni kúqaa moodáa fasiqasáaqaraa aináinirafa ásauku mundírafa Yísufa miná aináinirafa Adamana úraaqáranoo máridanoo. Faiqí ánaasee Ánutuna rairaaíra áfaarirana faqa miná káqi nímira andeeqárana faqa máree maríasa misá Yísufa ásauku mundíranannai sía Adamana kúqiranaki márifaranoo innaarúnai káqi máriranaki afeekaíkirausa márifaranoo.

18 Dínni moodáa fasiqa Adamana óosana maaqímminoo máridanoo, mi-moodaa fasiqána áaqaranasaa faiqí ánaasee aiqámausa kúqira ufa ámeemaanai máridaqa. Miná dínni miqí kai másee moo fásiqa Yísuna moodáa kari andeeqáina akiaqara kúqira ufakinaana idukúeeqeenoo káqi máriranaki quqáidanoo. 19 Dínni moodáa fasiqa ufa rukíarana ákiaqara faiqí ánaasee moómoo áaqaranaki áqufiqau. Miná dínni miqí kai másee moodáa fasiqa Yísufa Ánutuna ufamáu fírana ákiaqara moómoo fasiqa ánaasee Ánutuna andeeqárausaikiqa márifaranoo. Minára qinée Pauroosa qíqa, (Yísufa óoqeenaa Adamana kíkiqusirafa márinau foo qídaqa.)

(Mooseefa sía kambíqoo kamuqoo miná sándufa sía márufanoo faiqí ánaasee nári mandáinainara mána mána ímariqau.)

20 Ánutufa narí sándufa nímaarusira ufa Mooseenasáa nímufaqa nári mandáinainara írufanoo firaanáikinau, miqínoo firaanáikianífeera Ánutufa áminau. Faiqí ánaasee mandáinaina firaaqóo óoru fímarufanoo Ánutuna áfaarirafa miná áakaarinni óoraaqareenoo óoriqaranoo márinau. 21 Dínni áaqarafa kúqiranannai aiqáma maasá rafáaqa fídanoo miná dínni miqí kai másee Ánutuna áfaarirafa Yísuna andeeqáranannai maasá rakísiqímaqaidanoo qífiqeeqeenoo innaarúna asumu máriranaki quqáqisáidanoo. Ánutuna ásauku mundírana maasá karaambáiqa Yísunannai qífiqeeqee quqáidanoo.

Copyright information for `BJR