Romans 7

Mandóosanakíqari maqee Yísuna fíndifiranaki máridaqa.

Óo qiní qíkaqaafasaa Roomma máqannaa máriasa qinée Pauroosa maqee ufa qímannimirara ínnee ámiqimasee írimaru úfana qímannianaura. Faiqí ánaasee sándufa faqa Mooseena sándufa faqa faiqí ánaasee kúqiqa mi-sandufána sía írifaranoo. Káqi máru kamuqoo misá miná irisée miná ámeemaanai máridaqa. Nimundára fasiqa anaaseera foora sánda ufa ámeemaanai máridaqa. Mi-anaaseená afaaqi káqi márinanoo mi-anaaseefá narí afaaqindíri sánda ufa ámeemaanai máridanoo narí afaaqisáa atooqánoo máriannoo, afaaqi kuqu fínanoo miná ánaaqa fannoo káqi fífau máriannoo sía sándufa ámeemaanai máriannoo sía narí afaaqisáa atooáannoo. Mi-anaaseená afaaqi káqi márinanoo quándaki moo fásiqa márainnanara qúmmuarimari anaasee fee qifáranoo. Miná afaaqi kuqufínanoo sándufasaaqaraafa dóo idukínoo máridanoo, quándakinoo moo fásiqa márainnanara sía minára úmmuarimari anaasee fee qifáranoo.

Dóo ínnee qiní qíkaqaafasaa ínnee faqa Mooseena sándufa ámeemaanai máriasa dóo ínnisaimbaqa qifaaqa fannoo Yísuna sáimbaqa kúqinau. Dóo mi-kuqiránakiqari miná Yísuna namufaqa fíndifiqa mináindikiqa Ánutuna aináiniranaki andeeqásee ánoona ainaina ímarinakina máriaqeera máriafanoo. Óoqai maasá qeeqá faiqí faiqi íriranamau mánoo manaa íqa fímariafananoo Mooseena sándufa aniréenoo maasá mandá oosana afáurammeeqee mara uqéera kikíqa máseenoo quándakinoo maréeqeenoo kúqirana ámeemaanai quqáqisánau. Minára Mooseena sándufa nímaarusira ufa fannoo maasá karafúsara foora rumbáqimaqanau.

Dóo maqee íriaqa, maasá Yísuna faqa kúqiara foora iqá máridaqa maasá karafúsa rumbáqa márianasaaqari idukúaki máridaqa sía kafáa óoqeenaa máriranaki fuanáura. Maasá Mooseena sándufamau fúannana mifá maasá mandáinaina mara uqéera quqáannoo minára mi-maú sía fuanáura, fúkamau Ánutuna maraquna aatata fuanáura.

Sándufa fannoo paqúrimma qímifaqa qeeqá mandáinaina káqi máraidaqa.

Minára maasá Mooseena sándufara mandáinainafée qianáuree. Óo sía miqínoo máridanoo. Mooseena sándufa ínnee moosá aináinara sía nímuqusianifee qídanoo sía miqínoo márinaqa qinée moosá aináinara qímuqusímarína miná áaqee unóo qunára sía irini mána mána kaimmúnaiqini. Minára Mooseena sándufakinaafa dóo kooroomándee mandáinainara qímaqimifaqa qisauríqa. Mooseena sándufa fannoo moosá aináinara sía nímuqusiaqee qinoo márifanoo qiní mandá irirafa irisée quándakinoo firaaqóo moosá aináinara ámuqusidanoo. Minára sándufa sía máru kamuqoo mandóosanara óonumafi irirafa kúqinoo márufaqa mána mána ímariafannana.

Mooseena sándufa sía máru aukuana sía faiqí ánaasee nárufaqa sía kúqiara foora ímariqau káqi máridaqara foora ímariqau. Mooseena sándufa nímaarusira ufa kambíqafufaqa misá naundurái mandá óosana uqéera níminoo nárinau. Miqímandaifanoo Ánutuna káqi márira nímira ufa fannoo kúqirana kai níminoo. 11 Misá naunduráki mári mandainaina fannoo misá nárírara rakísinoo márifanoo Ánutuna sándufa aniraifanoo miná qumáreenoo minánnai misá naru quqéenoo.

12 Mooseena sándufa faqa Ánutuna naamúaqira ufa faqa andeeqárafa náaquqarafa ámiqirafa máridanoo. 13 Ámiqira ainaina fannoo fee misá kuqá nárínoo fee qianáuree. Óo sía miqínoo máridanoo. Misá naundurákinaa mandáinaina fannoo kai ámiqira ainaina mara máreenoo minánnai misá nárinoo. Miqí mándainanoo misá naundurákinaa ánoona mandaínaina akooqóo kooroo íanifeera miqínoo. Dóo mi-mandainaináfa Mooseena sándufa sáaqari innooqéenoo firaanáikinoo máridanoo.

Maasá qiqá daunduráindaraa írirafa óonu rarisee ani rarisee idanoo.

14 Qinée Mooseena sándufara kúqaa innaarúnaindaraa ainainee qídaqa. Qiní daundurákinaa mandainaina fannoo aináinira fasiqara foora qiní feefaurúmmeeqeenoo naráramandunna quqáqisáqaisa miná rumbára saikáki máridaqa. 15 Qinée mi-saikánaki máridaqa qeeqá áuqee marúnna saikóosanara faqa sía íridaqa. Qinée ámiqira oosanara dídimarina márararee qídaqa sía máraidaqa. Qinée dapi mandá óosana fídiaqaaira oosana kai máraidaqa. 16 Qiní írirafa qíkooqéemari mandoosanna máraidaqa Mooseena sándufa fannoo qiníara áaqee máriifoo qímasaifanoo qiní írirafa faqa miná írirafa faqa moodáaqoo apínoo márifaqa. Óo Mooseena sándufara ánoona máriifoo qídaqa.

17 Miqídaqa sía qeeqá maraqunafáu mi-manda oosanná máraidau. Mandaínaina fannoo qiní daundurái márifa mifá qiní qifeeqáraifaqa mi-manda ainainná máraidaqa. 18 Qeeqá daundurákinaafa ámiqira oosanna máraannee qifaqa qiní írirafa anúqidanoo sía amanaikídanoo. Miná íridaqa maaqí qídaqa qiqá faiqí faiqi qímuqusaki ámiqiroosanna sía minakí márifanoo fee qídaqa. 19 Ámiqiroosanna áuqararee qímasaidaqa miqóoqari quándakifaqa qíkooqéemari mandoosanná kai áuqaidaqa. 20 Qinée qiní qíkooqéemari mandainaina áuqaananoo sía qeeqáfau áuqaidau qiní daundurákinaa mandáinaina fannoo miná áuqaidanoo.

21 Qinée ámiqira ainaina íraree qúnanoo mandáinaina kai qiní dóorinni aniraifaqa miná kaimma áuqaidaqa. Mi-sandáfa kai qiní daundurái írirana qímidanoo. 22 Qiní qímuqusa óokina Ánutuna sándufara asasídanoo qiqá qifaaqáki mári manda ainaina mifá kai qiní raíneeqeenoo narí rumbáranaki quqáidanoo. 24 Qiqá mandá qifaaqa fannoo qiqá daundurá maréeqeenoo kúqiranaki quqáidanoo. Óo qinée nánaree káaqa mandáinainaki máridee firaaqóo dóori runídee. Qeeqá qifaaqa qimana námufaqa kúqiranaki fúananoo yáfee anirée minakínaana qiní qimana maréeqee káqi náaru máriranaki quqáqisáannoo fee.

25 Óo dúfi dúfi Ánutufa narí ásauku mundírana Yísuna maasá karaambáiqannai qiní maréeqeenoo náaru máriranaki quqáqisáannoo. Dóo maqee qinée minára maaqí qídaqa. Qiní márirafa maaqímminoo máridanoo qeeqá qímuqusa daundurákinaa írirafa Yísunannai kai Ánutuna sándufamau fídaqa qeeqá faiqí faiqi mandá nírana márirana mandáinaina sándamau fídaqa.

Copyright information for `BJR