Romans 8

Ánutuna maraquna fannoo maasá daunduráki dadaaqifaqa andeeqásee máridaqa.

Maasá Ánutuna ásauku mundírana Yísuna faqa moodáanaki márifanoo Ánutuna maraquna fannoo káqi márirana níminoo kúqirana mandá sánda faqa mandá óosana faqa minakí márunnana idukúqisaifaqa máridaqa. Minára maqee ásauku mundírana Yísuna faqa moodáanaki máriasa sía Ánutuna kúqira ufa ámeemaanai máridaqa.

Mooseena sándufa nímaarusira ufa sía amana maasá uqéereeqeenoo maasá faiqí faiqi maasá márirafa kudoosaápaunanoo minára sía maasá uqéeraqiseenoo. Mooseena sándufa kadíqo̱ofanoo miqóo Ánutufa moo óosanannai ánoonaikinau. Mifá narí ámaaku aqiqoonánnai maasá faiqí faiqi naundurákinaa mandainaina árinau. Yísufa faiqí faiqi naundurákinaa manda ainaina maráquanifeera narí faiqí faiqi fooqáanaikámasee aqiqoofanoo qúminau.

Maasákiqari akaqáusa sía faiqí faiqi íriranamau fímariasa Ánutuna maraquna sándufamau fímariasa maasára Ánutufa qíqafeenoo sía maasá andeeqárafa Mooseena sándufa amana óoru máridanoo, óoreeqanoo máridanoo. Ánutufa miná qáfamaseenoo maasá andeeqárafa Mooseena sándufa amana kai óoru fúa̱nífee qímasee narí ámaaku aqiqoofanoo qúminau. Faiqí faiqi naundurákinaa mandá íriranamau fímariasa nári naundurákinaa írirafa náriqa rafáaqafunnisáifaqa mi-maú fídaqa. Ánutuna maraquna ufamáu fímariasa maraquna áidimari ainainafa misá nitikúraki kéeqafi rakísi qumáraifaqa mi-maú fídaqa.

Faiqí faiqi nídimari manda ainaináfa aní átikuraki rakísinana kúqirannai ubeekanóo máridanoo kafáa miná dínni Ánutuna maraquna fannoo narí áidirafa aní átikuraki rakísinana mifá aní maréeqeenoo káqi máriranaki faqa asooáranaki faqa ubeekáma amaqáannoo. Faiqí faiqi mandá nídirafa nitikúraki rakísimarisa Ánutuna namuqáakammiqa máridaqa, sía Ánutuna sándufamau fídaqa, fídaqau sía amanaíkiaqini. Nári faiqí faiqi íriranamau fímariasa sía amana Ánutuna áidiramau fifáranoo.

Ínnee Roomma máqusai máriasa qiní qíkaqaafasaauqa ínnee sía miqímariasa Ánutuna maraquna fannoo ínnikina márifaqa ínnee sía faiqí íriranamau fímariasa máriafanoo ínnee maraquna ufamáu fímariasa máriafanoo. Ásauku mundírana maraquna síaifa sía mináindi máridanoo.

10 Ásauku mundírafa ínni naundurái namummáqainaqa miná maraquna fannoo ínni nifaaqa mandáinaina fannoo nárinoo márinnana sía minára íridanoo qáfaidanoo Yísuna kúqiranara iriséenoo káqi márirana ínni nimana káqi nímidanoo. 11 Ánutuna maraquna fannoo Yísufa kúqiranakinaana marafíndifinau. Yísuna mara fíndifu maraqunafá kai ínni faiqí nifaaqa kúqiqa márifanoo kásooqaqee mi-kuqirána uqéereeqeenoo káqi márirana nímiannoo, narí maraquna ínniki márinnanannái miqíannoo.

12 Óo qiní qíkaqaafasaauqa maasá moo úmmaara ámeemaanai máridaqa maasá faiqí faiqi mandá nídirana ámeemaanai sía máridaqa. Yísuna maraquna úmmaara ámeemaanai máridaqa. 13 Ínnee maqee faiqí faiqi íriranamau fíqa dóo kúqifaranoo. Ánutuna maraquna ufa irisée minánnai ínnee ínneeqa mandá óosana kúqaruséeqa ínnee sía kúqifaranoo káqi márifaranoo. 14 Ánutuna maraquna fannoo nífiqee fímarisa Ánutuna faiqi námu máridaqa. 15 Ánutufa narí nímimari maraqunafa sía ínni mandá rumbáranaki quqáseenoo rufíarana nímiannoo, mifá sía miqídanoo maaqímmiannoo ínni maréeqeenoo ínni Ánutuna faiqi námu kámmasainaqa miná afeekannái kai qifaaqa quqásee maasá Ánutunara maasá qíkoonée qídaqa. 16 Ánutuna maraquna fannoo anirée maasá qeeqá maraquna minásaa ootúpamásaannanara maasá maraquna qímamida maaqí qídanoo ínnee Ánutuna faiqi námu máriafanoo fee qídanoo.

17 Ánutufa narí faiqí ánaaseera ámiqi amiqira áinaina afeeda máqimaqáina maasá miná faiqi námu márianara minára maasá mifá innaarúnai quqánnimaqáqai qumiasana kásooqaqee máraanaura. Ánutufa narí ásauku mundírana ámaqaqai qumiasana faqa máridanoo mifá miná faqa maasá mirínni innaarúnai náida qímiannoo. Maqee mária aukuana ásauku mundírana kúqira aupurarana dadaaqí máraananoo innaarúnai miná káaqa aréenarana faqa náida qímiannoo.

Maasá aupúraranaki máridaqa Yísuna káaqa qárana áfeesida máridaqa.

18 Maqee mári aukuana Yísuna kúqu aupurarana dadaaqí márainafa faqa maasá óosana oosana ummaara márainnana faqa káqikaafa máridanoo, kásooqaqee innaarúnai narí aréenarana náida qímianínafa qáfaananoo firaafá uqanna máriannoo sía maqee aupúraranara qianáura fífau ainainara foora máridanoo.

19 Ánutufa áuqu quqóo ainaináusa innaarúnaindaraana faqa maqásaaqaraana faqa mi-ainaináusa aiqáma moodáanaki káaqa aupúrarana máraidaqa Ánutuna faiqi námu faiqí faiqi misá kúqiranakiqari fíndifiranara áfeesidaqa. Misá káaqa firaaqóo minára áfeesida máridaqa. Maasá Ánutuna faiqi námu sáimbaqa putaa íranakiqari idukúaqee qímasee káaqa áfeesidaqa. 20 Innaarúnai faqa maqásaa faqa mári ainaináfa aiqáma putaa ínoo mandáikinoo rakéeinoo madaapeekámmidanoo. Sía narí kai miqídanoo Ánutufa narí qímaqoomáu fídanoo miqídanoo. Ánutufa mináuqa faqa faiqí nárira ufa ámeemaanai quqáqoosa máridaqa madaapeekídaqa. Mi-putaaira mariráfa qumaarándanoo máridanoo miná aufadára ufa faqa máridanoo maaqímminoo máridanoo. 21 Aiqáma mári ainainafa narí putaa kíqari kásooqaqee idukúfuannoo. Idukúfinoo Ánutuna faiqi námu nári idukíranaki faqa idaaqíra aréenaranaki faqa kéeqafi moodáanaki márifaranoo.

22 Óosanasaaqari aiqáma Ánutufa áuquqoo ainainafa ánaasee inaamúnai aupúraida ikíraqée maríanara foora maqee putaa írafa ummaarándanoo máridanoo. 23 Sía áuquqoo ainainafa kai aupúraidanoo maasá faqa qeeqá faiqí faiqi mandá márira nírana aupúrarana aupúraidaqa, kásooqaqee Ánutufa firaa qumiasana maasá innaarúnai qímiannoo, maqee óosana arasée nímira ainaina narí maraquna nimiqoosá máridaqa. Maasá Ánutunara áfeesidaqa aupúraidaqa mifá maasá aiqáma qipatasáa márirana íriranakinaana idukúsainaqa narí faiqi námu kámambiqa innaarúna ququsaki máriaqeera minára qeeqá faiqí faiqi mandá márira nírana aupúraranara aupúraida áfeesida máridaqa.

24 Maasá Yísunasaa írirana rusíseeqa minára asasammásee áfeesidaqa minánnai innaarúna asumu márirana máreeqa. Asasamándee áfeesimaría ainaináfa aniráinaqa qáfamasee maasá sía áfeesianaura. Sía moó fannoo narí qáfeemari ainainara áfeesidanoo, dóo ani máridanoo. 25 Maasá sía qafaa ainaina kambíqaannoommifoo qídaqa ubiqáfi reendeenámandee asasamásee áfeesidaqa.

26 Miqíkai ínoo Ánutuna maraquna fannoo aniréenoo maasá Yísuna saqárikiranara kudoosaápee máriasa dadaaqídanoo. Maasá nána innaaru fee qianáuree qímasaidaqa nána ainaina kíkiqususaidaqee innaaru qianáuree qímarufanoo Ánutuna maraquna fannoo maasá óoreeqara innaaru qírana qáfeenoo innaarúnai óoru maasára Ánutunai firaaqóo dadaaqídanoo pisoopísoo mándee innaaru qídanoo, faiqí faiqi ufa sía amanaikífanoo ammaqásaidanoo firaaqóo Ánutufinnai maasára innaaru qídanoo. 27 Ánutuna maraquna fannoo Ánutuna faiqí ánaaseera Ánutunnai firaaqóo pisoopísoo mandee innaaru qídanoo, sía fífau, Ánutuna íriramau kai misára innaaru qídanoo. Ánutufa faiqí nímuqusaki mári ainainara fáasai qáfee márifa márinara maraquna ireefándinna ainainara faqa fáasai íridanoo moodáa írirana márinara maraquna maasára iréemari ainainara íridanoo.

28 Maasá maa-iriranná íridaqa faiqí faiqikinaana narí asumu máriaqeera qímasee narí rusandeesámumandee mároosa Ánutunara nídimárisara Ánutufa misásaa rakísidanoo óosana oosana ummaara mandainainna misásaa quqéemarina misá dadaaqída fee qídanoo misásaa quqáidanoo. 29 Ánutufa faiqí faiqikinaana rusandeesámumandee mároosa sía fífaufau máranau. Misá narí ámaaku Yísunaikámambi mifára foora máriaqeera misá rusandeesámumasee maréeqeenoo útaaqamánnimaqásoofaqa máriqau. Miqímasainanoo Ánutuna ámaaku fannoo moómoosa maqásaaqaraasa miná ákaqaafasaara foora máridaqa mifá misá óoqu faiqí nífasaafara foorá máfinoo márianifeera útaaqamma ámaqanau. 30 Ánutufa narí maraqoosá náaramasoofaqa aniroofanoo maréeqeenoo narí máriranaki quqánau. Ánutufa sía fífau náarama quqánau, náaramasee narí áfusaa andeeqáranaki quqánau, minakí quqáseenoo innaarúnai káaqa aréenarana faqa náida níminau.

Sía moo áinaina maasá Yísunasaaqaraana amana rakée íannoo.

31 Maasá maa-ufána aiqáma irisée Ánutunara náqi fee qianáuree. Ánutufa maasá dadaaqímarifa márinanoo yáfee maasá amana rafáaqa fúannoo. Sía amana moó fannoo maasa amana rafáaqa fúannoo. 32 Ánutufa sía narí ámaakuara írinau káqi maasára qimudáoo qímasee kúqiranaki quqánau. Mifá narí ámaaku uqanna rirímma káqi qíminau nána ainainee moo áinaina sía qímiannoo, aiqáma ainaina káqi áfaarida qímiannoo.

33 Yáfee Ánutufa rusandeesámumasee mároo fasiqa ánaaseera mandáinainara qímammaree nífairiannoo fee sía moó fannoo miqíannoo Ánutufa narí uqanna misára mandáinaina síaisee qídanoo.

34 Yáfee moó fannoo miná faiqi námu kúqira ufa nímiannoo fee. Sía moó fannoo amana miqíannoo. Ánutuna ásauku mundírafa Yísufa dóo kuqufufanóo Ánutufa kúqiranakinaana mara fíndifumásee káqi máriranaki quqásaifanoo dóo maqee Ánutuna aaqá ásauku uqannai máridanoo maasára Ánutuna óorisaa innaaru qídanoo.

35 Yáfee moó fannoo ásauku mundírana ámuqusiranakinaana maasá rakéemasee káqinni quqáannoo fee. Sía uqanna moó fannoo amanaikíannoo. Amanée mandáinaina óosana óosana fannoo miná ámuqusiranakinaana rakée íannoo fee qímuqusimari ummaara fee amanée Yísuna ámuqusiranakinaana rakée íannoo fee Yísuna ufasáara nárirafa mifée amana rakée íannoo fee. Áararée márinee amanée rakée íannoo fee kudikíra fee rakée íanno fee áriranara deedaqírafa amanée rakée íannoo fee kúqirafa amanée miná ámuqusiranakinaana rakée íannoo fee. Sía moo áinaina amana rakée íannoo. 36 Tamummáqara fasiqa ákaraki minára maaqí qídanoo.

Maasá Ánutuna ufamáu fímariasa faasaambáasaana aiqáma kari Ánutunasaara dáriranara eeráiridaqa. Ánutuna ufa síaisa misá maasá kúqiranaki fímaria sipsipausara foora maasá máaqimma qídaqa, kuqá dáriraridaqa.
37 Tamummáqara fasiqauqa miqí qímaqoofaqa qinée Pauroosa mi-aiqama ainaináusara qinée maaqí qídaqa. Sía moo mánda ainaina fannoo Yísufa maasára ámuqusiranakinaana ani mara rakée íannoo mi-mandainaina oosanna oosannáfa maasá dárirari marifánoo mi-dariranná sía rafáaqafuannoo. Maasára ámuqusimarifa ásauku mundírafa maasá maréeqee úriqararanaki quqáqaisa máridaqa.

38 Qinée Pauroosa maa-ainainnára ámiqimandee mapukúsee íridaqa, sía moo ínnaarunaindaraa rakísira fee moo áfeeka fee maqee mári ainainá fée kásooqaqee kambíqaaninna ainainá fée kúqa dáriranee káqi máriranee. 39 Innaarúnai mári ainainá fée maa-maqánasaa mári ainainá fée, Ánutufa áuqu quqáqoo ainainakiqari sía amana moo áinaina fannoo Ánutuna ámuqusiranakinaana ani qumáree rakee íannoo. Ánutuna ásauku mundirafa Yísufa maasá karaambáiqa fannoo maasá maréeqeenoo minakí quqáqaisa máridaqa sía moo áinaina fannoo minakínaana ani qumáree rakée íannoo.

Copyright information for `BJR