aWok Pris 18:5
bLo 30:12-13
cLo 30:14
dAisaia 28:16
eJoel 2:32
fAisaia 52:7
gAisaia 53:1
hBuk Song 19:4
iLo 32:21
jAisaia 65:1
kAisaia 65:2

Romans 10

O izal zaiar, izal dabeleu gusig Uwait nug izal Zuda zaiar unum agal igul eg ebuan igaramau, gonun, izan go en auracanem. Iz petak abiu, ag Uwait nugau ougab siksikabun salau gusig macanemen, bo, ag gonugau abu suban i abe macanemen. Uwait nug duair tub gonugau ameg ebu naliu usalabun tapai muraneu, ag igul go suban i abiu. Ag agal igul atai macanemen, go nug Uwait nugau ameg ebu ag duailel naliu darem abai maranemen. Ag igul go guzenanemen, gonun, ag Uwait nugau naliu dabun abu semoracanemen. Kristus go kasai ze nugau empip oun. Duair in go gonugau ougab Kristus en petak amau, go petak Uwait nugau ameg ebu naliu damau.

Yesus nug duailel unum igarabun aleun.

Zuda duailel ag Uwait nugau ameg ebu naliu dabun abu suban abe mab tam. Moses nug duailel ag kasai ze sesamoraimai, Uwait nug dual dabun ze en guzenai sikut wai meun,

“Du in go nug kasai ze unum sesamoraimai, kasai ze ginampet tub utab tam, go kasai ze go nug isanuraba, umkoskos awau damau.” a 
Kolital Moses nug duailel agal oiagab petak aimai, Uwait nugau ameg ebu naliu dabun ze en guzenai sikut wai meun,

“Ag guzenai i dabilan, ‘In nug Mesgai wag simau?’” (Iz guzenai anem, einen, in nug Mesgai wag simai, Kristus em ebu imai nuabun guzenamau.)
Ag koli guzenai i dabilan, “In nug noumemen dudu agal uzan numau?” b 
(In nug uzan go noimai, Kristus noumeun imai zuabun guzenamau.) Ag guzenai i dabilan, einen, Kristus go Mesgai wageim ig waigeb aleun. Go noumeun, koli waseun.
Moses nug guzenai aneun,

“Uwait nugau Ze ag abai ereg dareu. Go agal oiagsau ebu mui oiagab oug mui dareu.” c 
Gonun, ag ze go iau ze mabun iborain, ag gonugau zebigeg suban abe mabun iborain. Guzenaimai, ag tutak tutak agal oiagab Kristus en petak abun ze iguan gusig awaranem.
Ag duailel ipal Kristus en awaraimai, guzenai awaran, “Yesus go igual Dubanou Ban.” Agal dabeleu eim “Uwait nug Yesus noumeun koli asai meun” oiagab petak amamen. Ag guzenai awaraimai, ag guzenai oiagab petak ebi go nug ag agal igul eg ebuan igaramau. 10 Petak pet, na nait ounab Kristus en petak amau, Uwait nug na naliu aizamau. Na duailel ipal Yesus go izal Dubanou Ban guzenai awaramam, Uwait nug nait igul eg ebuan imaizamau. 11 Ig abiu go petak, einen, Uwait nugau ze nug guzenai aneu,

“Duair in go en gonugau ougab petak amau, go aiu i numau. Einen, Uwait nug duair go gonugau ameg ebu naliu dareu amau.” d 
12 Go Uwait nugau ze nug guzenai aneun, “Duair in”, eun. Go ug sag tuguiai i aurab, gonun, ig abiu Zuda duailel mui emgasag ipal ebuan duailel ag Uwait nugau ameg ebu tutak pet darem. Yesus go ig duailel unum igual Dubanou Ban tutak. Duair in Dubanou Ban nug isanurabun auramau, go subantal isanaramau. 13 Ig abiu go petak, einen, Uwait nugau ze nug guzenai aneu,

“Duair in Dubanou Ban guzenai auramau, ‘Dubanou Ban, izal igul eg ebuan imailen,’ guzenai auraba, duair go Dubanou Ban nug igaramau.” e 
14 Bo, Zuda duair tub nug guzenai ailabun iborain. “Duailel ag agal oiagab Dubanou Ban en petak ab tam, Uwait nug agal igul eg ebuan igarabun erunai auramamen? Duailel ag Uwait nugau Ze duab tam, ag agal oiagab erunai petak amamen? Duailel ipal ag waugab beteimai, Uwait nugau Ze awarab tam, ag gonugau ze erunai dumamen? 15 Uwait nug duailel go gonugau Ze Naliupet awarabun palautarab tam, ag ze go igual duailel erunai awaramamen? Gonun, Zuda duailel goagal oiagab Kristus en petak ab tam, ag ze a tam.” Zuda du tub nug guzenai ailabun iboin, bo, iz go koli guzenai auranai, “Bo, Uwait nug dudu ipal palautarena, agen ag Zuda duailel gonugau ze awaremen. Einen, Uwait nugau ze eim guzenai aneun, ‘Ig dudu agen Uwait nugau Ze Naliupet aigabun alai dareu uligaraimai, igual oigeb siksikaneu.’” f 

16 Bo, Zuda duailel ag unum ag Uwait nugau Ze Naliupet doimai, sesamorab tam. Ag don, Aisaia nug aneun,

“Dubanou, duailel inen iguanag nait ze awaremun en agal oiagab petak amau?” g 
17 Igul go enai, duailel amegai Kristus nugau ze duacanem, gonun, goagal oiagab petak anemen. Du tub nug Kristus nugau ze duailel awarina, go ze go doimai, Kristus nug ag isanarabun aleun ag abiu mamamen. 18 Iz ag guzenai kanabarem, “Zuda duailel ag petak Uwait nugau ze duabun tam ta?” Tam pet. Ag gonugau ze domenin. Uwait nugau ze nug guzenai aneun,

“Uwait nug dudu palautarena, agal oiagsau nug gonugau ze macanemenin ze go em unum iboreun. Ze go em unum betei iboramau.” h 
19 Iz koli ag guzenai kanabarem, “Israel duailel ag ze gonugau bigeg abe mab tam ta?” Tam, ag abe memen. Amegai Moses nug Uwait nugau Ze guzenai aneun,

“Izan emgasag ipal ebuan duailel ag getal izal duailel tamacag ebu igaraimai, suban gumaranai, gonun, ag, Zuda duailel, agen agal em wabun oiagab aleu. Go emgasag ipal ebuan duailel ag iz abe milab tam, bo, iz go emgasag ipal ebuan duailel isanaremin, goagen ag en banban aiagsisilamau.” i 
20 Moses nug sag ze go anab tam. Aisaia nug han go Uwait nugau Ze wagemab tam, go nug guzenai ze meun,

“Duailel ipal ag iz itanilabun salau mab tam, ag iz peilamamen. Duailel ipal ag iz en kanabai awarab tam, izanag ag waiagab alai.” j 
21 Bo, Aisaia nug Uwait nugau Ze Zuda duailel en guzenai aneun,

“Ziwas umkoskos ag iz waiab alabun gumarai dacanem. Bo, ag izal ze en agzozou ze alalaimai, sesamorab tam, ag semoromenin.” k 
Copyright information for `BMH