c28Ef 4.11

1 Corinthians 12

Nup memegö mötmöt kalem mieŋgö könaŋini

O urumeleŋ alaurupni, nöŋön Uŋa Töröŋaŋgö mötmöt kalemŋi kalemŋi miaŋgö keugöra gukmaulem malbepuköra mötzal. Urumeleŋgö kopa malgeri, nalö miaŋgöreŋ inöŋ me wainöŋ eŋguaŋgiriga tandö lopioŋ omaŋi waikŋini memba möpöseiba malget. Mewö me mewö jaŋjuŋ anda laŋ malgeri, mi ölöp mötze.

Miaŋgöra iŋini keu ki mötmegöra jizal: Anutugö Uŋaŋan kun sölölöhöiga “Jisös qesuahözal,” keu mi qahö jiza. Mewöyök Uŋa Töröŋan azi me ambi kun qahö sölölöhöm waŋgiza ewö, yaŋön mönö “Jisösnöŋ Kembu ak niŋgiza,” keu mi jimamgö osiza.

Nup memegö mötmöt kalemŋi mi könaŋi könaŋi akzemö, Uŋa Töröŋan mönö mohot akza. Urumeleŋ könagesö welen qem eŋgibingöra nup könaŋi könaŋi memakzinmö, Kembunöŋ mönö mohot akza. Welen qem eŋgibingöra Anutunöŋ kukösumŋi körek neŋgöra mendeŋ neŋgiiga amqeba köhöiba nup meinga ölŋi könaŋi könaŋi asuhumakza. Ölŋi pakpak mi Anutugöreŋök kamakzapmö, Anutunöŋ mönö mohot akza.

Uŋa Töröŋan könagesö urunini naŋgöi köhöibingöra möta nup memegö mötmöt kalemŋi indeliga ölŋan mönö mohot mohot neŋgöreŋ kewö me kewö asuhumakza: Uŋa Töröŋan kungö uruŋe geba Anutu nam köliga mötkutukutu keu jijigö kalemŋi waŋgiza. Uŋa mohot miaŋönök mönö kun sölölöhöiga mötmöt qainŋi kun möt yaközawaŋgö kalemŋi buŋa qem aŋguza.

Kunöŋ Uŋa mohot mi qekötahöba mötnaripkö kalemŋi buŋa qem aŋguza. Toroqeba kunöŋ Uŋa Töröŋi miyöhök qekötahöba mem ölö-ölöwakö kalemŋi kalemŋi buŋa qem aŋguza.

10 Kungöra aŋgöletot memegö ösumŋi waŋgiza. Kungöra Anutugö kezapqetok keu jijigö kalemŋi waŋgiza. Kungöra uŋa aka öme mendeŋbingö kalemŋi waŋgiiga uŋa ölöpŋan me ömewöröme kunöŋ sölölöhöiga maljawi, mi ölöp kewörakza. Kungöra keuŋi keuŋi qainŋi kun jijigö kalemŋi waŋgiza. Toroqeba kunöŋ keu qainŋi kun jiiga kungöra mi meleŋmapkö kalemŋi waŋgiza. 11 Nup memegö mötmöt kalem pakpak mi Uŋa Töröŋi mohot miaŋönök mönö sölölöhöba möri dop köljawaŋgö dop mendeŋniga körek neŋön nanŋök nanŋök buŋa qem aŋguba maljin. Mewö. a 

Kraistkö ölŋi mohotmö, kitipurupŋi gwötpuk.

12 Silenini mohot akzapmö, töndup miaŋgö uruŋe silegö kitipurupŋi mi gwötpuk akze. Kitipŋi pakpak mi gwötpuk akzemö, töndup mi mindiriba sile mohot akze. Kraistkö ölŋan mewöyök mönö miaŋgö dop akza. 13 Miaŋgö könaŋi kewö: Uŋa mohotnöŋ mönö körek nini sölölöhöba melun mem neŋgiiga Kraistkö ölŋi mohot akzin. Nini Juda me kantri tosatŋaŋgö toŋi maljini, nanini nupnini memakzini me tonini öne welen qem eŋgimakzini, mi töndup körek nini mönö Uŋa miyök buŋa qem aŋguinga urunine geiga möt waŋgizin.

14 Sileninan mönö sile kitipŋi mohotkö dop qahö akzapmö, miaŋgö uruŋe kitipurupŋi mi gwötpuk akze. 15 Könaninan kewö jibawak, “Ni böröya qahö. Miaŋgöra sile qahö toroqeba maljal.” Mewö jibawak ewö, miaŋgöra mönö töndup sile mosöta nanŋök qahö malbawak. 16 Kezapninan kewö jibawak, “Ni jeya qahö. Miaŋgöra sile qahö toroqeba maljal.” Mewö jibawak ewö, miaŋgöra mönö töndup sile mosöta nanŋök qahö malbawak.

17 Sileninan jömuk je akawak ewö, keu mötmötkö kezapninan mönö denike tatpawak? Mewöyök jömukŋanök kezap akawak, mewö wörön mötmötkö söŋgöröninan mönö denike tatpawak?

18 Nanŋök nanŋök qahöpmö, Anutunöŋ sile kitip mohot mohot mi areŋgöba möri dop köljawaŋgö dop mindirim eŋgiiga sile mohot akze. 19 Sile kitip pakpak mi kitip mohot akeak ewö, mönö denöwö sile mohot akawak? 20 Mewö qahöpmö, sile kitipnini mi gwötpukmö, silenöŋ mönö mohok akza.

21 Miaŋgöra jenöŋ börögöra kewö jimamgö osiza, “Ni göhöra qahö osizal.” Mewöyök nöröpnöŋ könagöra “Ni göhöra qahö osizal,” mewö jimamgö osiza. 22 Simbisembel qahöpmö, sile kitipnini möringa lölöwöröŋi akzei, mieŋön qahöwaketka jebuk malbingö osibin. 23 Sile kitipnini möringa qetbuŋaŋini eretŋi akzei, mi mönö esuhuinga qetbuŋaŋinambuk akze. Sile kitipnini möringa gamuŋinambuk akzei, mi mönö törörök esuhuinga ambazip jeŋine dop kölja.

24 Sile kitipnini aukŋe kondelbingö gamu qahö mötzini, mi mönö qahö esuhuinga dop kölja. Mewö ahakzinmö, Anutunöŋ sile kitipŋi kitipŋi mindiriba jöhöm eŋgiba kitipŋi omaŋi mi qetbuŋa ketaŋi waŋgiiga öröröŋ akze. 25 Sile kitip yeŋön sutŋine jula aŋgururuk akepukmö, tandök mohot köyan köl aŋgumegöra mönö areŋgöiga öröröŋ akze. 26 Sile kitip kunŋan sihimbölö mötzawi, tosatŋi pakpak mönö yambuk sihimbölö mörakze. Sile kitip kunöŋ qetbuŋa miwikŋaizawi, tosatŋi pakpak mönö yambuk söŋgaimakze.

27 Eŋön Kraistkö ölŋi akze aka mohot mohot eŋön mönö yaŋgö ölŋaŋgö sile kitipŋi akze. 28 Miaŋgö dop Anutunöŋ al eŋgiiga urumeleŋ könagesögö nup kewö memakze: Mutuk tosatŋi kuŋgum eŋgiiga melaimelai azi aposol akze. Miaŋgö andöŋe kambu yahötŋi kuŋgum eŋgiiga kezapqetok ambazip akze. Kambu karöbutŋi yeŋön böhi qaqazu akze. Miaŋgö andöŋe tosatŋan aŋgöletot meme ambazip akze. Tosatŋi yeŋgöra mötmöt kalem eŋgiiga kawölŋi kawölŋi mem ölöwahakze. Tosatŋan amqeba köhöiba tosatŋi alabauk ak eŋgimakze. Tosatŋi yeŋgöra kalem eŋgiiga galömkölköl nup memakze. Tosatŋan keu qainŋi kun jimakze.

29 Körek eŋön mönö melaimelai azi aposol qahö akze. Saumbaŋ! Körek eŋön mönö kezapqetok ambazip qahö akze. Körek eŋön böhi qaqazu akze me qahö? Körek eŋön aŋgöletot meme ambazip akze me qahö?

30 Kawöl mem ölöwakingö mötmöt kalemŋi kalemŋi mi körek eŋgöreŋ ahöza me qahö? Körek eŋön mönö keu qainŋi kun qahö jimakze. Qahö. Keuŋi keuŋi qainŋi kun jigetka eŋön mönö körek mi meleŋbingö amqeze me qahö? 31 Eŋön mönö nup memegö mötmöt kalemŋi kalemŋi ölöp sorokŋi mi buŋa qem aŋgubingöra awöweŋgömakŋe. Mewö awöweŋgögetka nöŋön köna qetpuk sorokŋi kondela miaŋgö mötmöt kalemŋi mi kewö jim asarimam: b, c 

Copyright information for `BMU