b5Apo 19.21;
c8Lew 23.15-21, Dut 16.9-11;
d8-9Apo 19.8-10;
e101 Kor 4.17
f151 Kor 1.16;
g19Apo 18.2

1 Corinthians 16

Jerusalem alabauk eŋgimegö jimkutukutuŋi

1Judia könagesö sarakŋi yeŋgöra alabauk moneŋ tokomegöra qesim niŋgigeri, miaŋgöra kewö jim kutum eŋgizal: Nöŋön Galesia prowinsgö urumeleŋ könagesöŋi könagesöŋi jim kutum eŋgiali, eŋön tok mönö miaŋgö dop kewö ahakŋe:

2Sonda dop wehön mutukŋi miaŋgöreŋ iŋini körek nanŋök nanŋök mönö naluk alakŋe. Töhötmöriam memakzeaŋgö dop moneŋini bahöŋi mi köweŋini göraŋe ala galöm köla malme. Mewö aketka nalö eŋgöreŋ kabiga miaŋgöreŋ naluk saŋgabaŋga almeaŋgö dop qahö akŋemö, mi ölöp köweŋineyök memba altanöŋ alme.

3Mewö aketka eŋgöreŋ kamami, nöŋön nalö miaŋgöreŋ ölöp jim-asa-asari kimbi ohoba azi nup miaŋgö mötket dop köljawi, mönö yeŋgö böröŋine ala melaim eŋgibiga mindimindiri kalemŋini mi memba Jerusalem anme. 4Nöŋön yembuk mohotŋe anmamgö anmam ewö, yeŋön mönö ölöp nömbuk toroqeba mohotŋe köwet kutuba anbin. Mewö. a 

Polgö nupŋaŋgö aka köna anangö areŋi

5Nöŋön Masedonia prowins oŋgita anmam. Miaŋgöra Masedonia mosötagun mönö eŋgöreŋ kamamgö mötzal. 6Eŋgöreŋ kaba nalö tosatŋi embuk tatpileŋak me kömunjaŋ kie nalöŋi (winter) mi mewöyök eŋgö sutŋine toroqeba mal teköbileŋak. Mewö malbi ölöp bauköm niŋgigetka denike denike anbileŋak, miaŋgöreŋ mönö amqeba köna toroqeba anmam. 7Nalö kewöŋe eŋgöreŋ kaba kusukŋanök eŋgeka eŋgoŋgita anmamgö qahö mötzalmö, Kembunöŋ oŋ jima ewö, mönö nalö tosatŋi embuk tatmamgö jöjörözal.

8Mewö jöjörözalmö, mutuk Efesus siti kiaŋgöreŋ toroqeba malbi yambu jeŋiqeqe dölökŋi (pentekost) miaŋön kam kuŋguma. 9Anutunöŋ nöŋgöra nupkö naŋguŋi ketaŋi öröi ölöp nup ketaŋi membi ölŋi asuhum sehimakzapmö, gwötpukŋan tuarenjoŋ ak niŋgimakze. Miaŋgöra kiaŋgöreŋ toroqeba malmamgö mötzal.

10Timotinöŋ ni ewö Kembugö azi ipŋi aka nupŋi memba malja. Miaŋgöra yaŋön eŋgöreŋ kama ewö, iŋini mönö köyan köl waŋgigetka keŋgöt mötmötŋi qahö eŋgö sutŋine malma. 11Kunŋan kun kude ek sirik kölmapmö, embuk mal teköba nöŋgöreŋ kamamgö jimawi, miaŋgöreŋ mönö bauköm waŋgigetka luainöŋ eŋgömosöta liliŋgöba kama. Nöŋön urumeleŋ alaurup yembuk i ekingö mambötzin.

12Urumeleŋ alanini Apolos yaŋgö keuŋi kewö jimam: Yaŋön urumeleŋ alaurup yembuk eŋgöreŋ kamegöra jiba köhöikŋanök uru kuŋgum waŋgial. Mi waŋgialmö, nalö kewöŋe eŋgöreŋ kamamgö tököm köhöiza. Könaŋgep nalöŋi ölöp ahöm waŋgimawi, mönö miaŋgöreŋ kama. Mewö. b , c , d , e 

Yaizökzök keu teteköŋi

13Iŋini mönö uruguliguli mala mötnaripŋini köl guliba kin köhöiba malme. Azi köhöikŋaŋgö dop mönö urugö naŋgönaŋgö ambazip aka Kembugö kukösumŋambuk kinme. 14Yuai pakpak aka memei, mi mönö urukalemnöŋ aketka asuhuma.

15Stefanas yaŋgö mire maljei, iŋini mi möt eŋgize. Akaia prowinsnöŋ nup meinga uruŋini meleŋgetka nupninaŋgö ölŋi mutukŋi mewö asuhuyöhi, mötze. Yeŋön ambazip sarakŋi mi pöndaŋ welen qem eŋgiba uruŋini miaŋgöreŋ jöhöba ala maljei, mi mötze. O urumeleŋ alaurupni, nöŋön uruŋini kewö kuŋgum eŋgizal: 16Iŋini tok ambazip mewöŋi aka yembuk toroqeba nup mohotŋe memba Anutu welenŋi qemakzei, mönö körek yeŋgö keuŋini bapŋe anda malme.

17Nöŋön Stefanas Fortunatus aka Akaikus ki kageraŋgöra söŋgaimakzal. Iŋini nömbuk Efesus ki qahö malgetka yeŋön mönö eŋgö salupŋini aka köisirik ak niŋgigetka dop kölja. 18Yeŋön eŋgö uŋaŋini körö-ölöwak qeba maljei, miaŋgö dop mönö nöŋgö uŋani mewöyök körö-ölöwak qem niŋgiba malget. Miaŋgöra iŋini mönö azi mewöŋi yeŋgöra mötket öŋgöiga mi aukŋeyök jiba keuŋinaŋgöra törörök kezap ala malme.

19Urumeleŋ könagesöŋi könagesöŋi Eisia prowins kiaŋgöreŋ maljei, yeŋön mönö yaizökzökŋini algetka eŋgöreŋ kaza. Aqila Prisila aka urumeleŋ könagesö yetkö mire tokomakzei, yeŋön mönö Kembugö qetŋe yaizökzökŋini gwötpuk algetka eŋgöreŋ kaza. 20Urumeleŋ alaurup pakpak Efesus ki maljei, yeŋön mönö yaizökzökŋini algetka eŋgöreŋ kaza. Iŋini mönö urumeleŋ alaurupŋini yembuk jölöŋini jiba aŋgum aŋguba numbuŋini yöhötim nemba malme.

21Nani yaizökzökni eŋgöreŋ ala qetni nani börönan kewö ohozal: Pol.

22Kunŋan Kembu qahö jöpaköba urukalem qahö aka malja ewö, Kembunöŋ mönö qesuakŋi yaŋgö qakŋe ali öŋgöma. Kembunini, gi mönö kanöŋ!

23Kembu Jisösgö kalem möriamŋan mönö embuk ahöma.

24Kraist Jisösbuk qekötahöba kinjei, nöŋgö urujöpaknan mönö körek embuk ahöba kötuetköm eŋgii malme. Keu mi ölŋa. Mewö. f , g 

Copyright information for `BMU