b2Heb 5.12-13;
c41 Kor 1.12;
d6Apo 18.4-11.24-28;
e161 Kor 6.19, 2 Kor 6.16;
f19Job 5.13;
g20Sum 94.11

1 Corinthians 3

Anutugö nup meme ambazip

O urumeleŋ alaurupni, iŋini namande ewö Kraistpuk qekötahöba kinget. Miaŋgöra nöŋön iŋini gölmegö ahakmeme mötöteimakzeaŋgö tandök malgetka Buŋa keu mi jim asarim eŋgiba sutŋine malal. Uŋa Töröŋan sölölöhöm eŋgii maljeaŋgö tandök ewö eŋgöra jimamgö osiba malal. Nöŋön keu möt asarimeaŋgö dop juzu oŋi ewö gumohom eŋgiba malal. Nene ölŋi nembingö dop qahö akeraŋgöra keu gegeŋi mi qahö eŋgial. Nalö miaŋgöreŋ nene ölŋi nembingö osiget aka nalö kewöŋe mewöyök mi ölöp qahö nemakze.

Iŋini toroqeba gölmegö ahakmeme bölöŋi mötöteiba malje. Iŋini urunöŋ mututqutut möta aŋgururuk aka keu jijinöŋ noŋgitnöŋ goŋgitpi ahakze. Mewö aketka uru silegö sihim kömbönaŋini bölöŋan galöm köl eŋgiiga urumeleŋgö kopa ambazip omaŋi yeŋgö tandök ahakze. Tosatŋi iŋini kewö jimakze, “Nini Polgö keuŋi wuataŋgömakzin.” Tosatŋan kewö jimakze, “Nini Apolosgö keuŋi wuataŋgömakzin.” Mewö mewö jiba mönö gölme ambazip omaŋan ahakzeaŋgö tandök aka malje.

Apolosnöŋ niŋia akza aka Pol nöŋön niŋia akzal? Niri mönö Anutugö nuwa memba maljit. Kembunöŋ nanŋik nanŋik netköra nup netkiyöhi, miaŋgö dop bauköm eŋgiziga uruŋini meleŋda Kembu möt nariba malje.

Nöŋön kötŋi kömötpiga Apolosnöŋ o memba kaba miaŋgöreŋ mokoyökmö, Anutunöŋ mönö meiga töhötmöriam asuhuyök. Miaŋgöra kömöröhi, yaŋön qetŋambuk qahö akza. O mokoyöhi, yaŋön mewöyök qetŋambuk qahö akzapmö, Anutunöŋ kötuetköiga töhötmöriamŋi kota qarimakzei, yaŋönök mönö qetbuŋaŋambuk akza. Mewö akzapmö, kömörakzali aka o mokomakzawi, netkön mönö dop mohot akzit. Mohot akzitmö, mi töndup töwaniri mi mönö nupniri memakziraŋgö dop nanŋök nanŋök membit.

Netkön Anutugö nup neŋakyahötŋi aka yambuk nup memakzit. Eŋgö uruŋini mi Anutugö arö ewö aiga kölkömöt nupŋi miaŋgöreŋ memakza. Anutunöŋ miri ewö uruŋini inahöba mindirim eŋgiiga köhöiba wahörakze. 10 Anutunöŋ kalem möriam niŋgiyöhi, nöŋön miaŋgö dop miri memegö mötmöt azi ewö aka Anutugö tandö kömbönaŋi uruŋine kuŋguba kömötpiga kunöŋ miaŋgö qakŋe miri memakza. Ölöp memakzapmö, mohot mohot neŋön mirigö nupŋi ölöpŋanök membinaŋgö dop akzin. Ek kutuba membingöra mönö je galöm mem aŋgubin. 11 Urugö tandöŋi mi Jisös Kraist. Nöŋön mi lök uruŋine kömötpiga kunŋan mötnaripkö tandö kun miwikŋaimamgö osima.

12 Tandö mohot akzapmö, miaŋgö qakŋe tosatŋan miriŋini goul silwönöŋ me köt ölŋinambuk tosatŋi miaŋön memakze. Tosatŋan miriŋini ip kösönöŋ, tömbö bohom sinŋan me seŋgwenöŋ memakze. Siliknini mewö me mewö memakzin ewö, 13 urugö nupninaŋgö ölŋan mönö inanŋök inanŋök aukŋe asuhuma. Kembunöŋ nalöŋan kam kuŋguiga miaŋgöreŋ mönö mirigö esuŋi luluŋma. Miri esuninan mönö Anutugö könöp bölamŋan asuhuiga jeba eriga ölŋan aukŋe ekingö dop akŋa. Könöp miaŋön mönö mohot mohot neŋgö mirininaŋgö tandökŋi ölŋi mi esapesapnöŋ ala kewötma.

14 Könöpnöŋ jeba miri pakpak kewöt eŋgiiga megetka ölŋinan köhöiba kinme ewö, yeŋön mönö nupŋinaŋgö töwaŋi buŋa qem aŋgume. 15 Tosatŋan miriŋini megetka ölŋinan jeba etme ewö, yeŋön mönö töwa qahöpmö, geŋmororoŋ miwikŋaime. Mi miwikŋaimemö, nanŋinak töndup Suepkö buŋaya malme. Könöp bölamnöŋ jem eŋgohoiga miaŋgö tandök oŋgitpingö jaram tiba kök alal ewö aketka Anutunöŋ meköm eŋgiiga Suepnöŋ öŋgöme.

16 Nanŋinak Anutugö Buŋa jike (tempöl) aketka Anutugö Uŋaŋan uruŋine maljawi, mi mötze me qahö? 17 Anutugö Buŋa jikeŋi mi kömbukŋi akzawi, miaŋgö dop eŋön sarakŋi akze. Miaŋgöra kunŋan Anutugö jike mem böliza ewö, Anutunöŋ mönö i nanŋi mem bölim waŋgima.

18 Kunŋan nanŋi gölmegö mötmötŋi wuataŋgöba tilipköm aŋgubapuk. Eŋgö sutŋine kunŋan nanŋaŋgöra möri “Gölmegö mötkutukutu öŋgöŋgöŋi memba maljal,” jiza ewö, yaŋön mönö mutuk uruqahö aka mewö miaŋön mötkutukutu ölŋi miwikŋaibawak.

19 Anutunöŋ gölmegö mötkutukutu öŋgöŋgöŋi miaŋgöra möri uruqahö keuya akza. Miaŋgö keuŋi Buŋa Kimbinöŋ kewö ohoget ahöza, “Anutunöŋ mötkutukutu öŋgöŋgöŋi memba maljei, mi gwaröhöm eŋgiiga nanŋini mötmöt imbi-imbinöŋ supapköba qaköme.” 20 Miaŋgö keuŋi kun kewö ahöza, “Kembunöŋ mötkutukutu ambazip yeŋgö mötmöt areŋinaŋgöra möri omaŋi akza.” 21 Miaŋgöra eŋgöreŋök kunŋan mönö ambazip neŋgöra aka sileŋi memba wahötpapuk. Körek neŋön mönö eŋgö buŋaya akzin.

22 Pol, Apolos, Pitö
Pitö qetŋi alaŋi Sifas
neŋön mönö eŋgö buŋaya akzin. Ambazip gölme dop maljini, neŋön mönö körek eŋgö buŋaya akzin. Miaŋgöra ölöp keu mi me mi kewöta memba mewö miaŋön malmalŋini malme aka kömupŋini kömume. Nalö kewöŋe maljini, körek neŋön mönö eŋgö buŋaya akzin aka könaŋgep nup meme ambazip malmei, yeŋön mönö mewöyök eŋgö buŋaya akŋe.
23 Mewö ak eŋgizinmö, eŋön Kraistkö buŋaya aketka Kraistnöŋ Anutugö buŋaŋi akza. Mewö. b, c, d, e, f, g 

Copyright information for `BMU