a10-11Mat 5.32, 19.9, Mak 10.11-12, Luk 16.18

1 Corinthians 7

Awanöm aka gwabö seram malmal tatat

Iŋini keu tosatŋi ohoba qesigeri, mi jim asarimam. Azinöŋ ambi qahö memba gwaböya maljawi, mi ölöp. Mi ölöpŋi akzapmö, silegö sihimŋan sero yoŋgorö akepuköra iŋini mohot mohot mönö nanŋik nanŋik awanöm amemba malme. Azinöŋ mönö anömŋaŋgö sihimŋaŋgö dop awanöm malmalgö areŋi wuataŋgöma. Anömŋan mewöyök mönö apŋaŋgö sihimŋi wuataŋgöba malma.

Anömŋaŋgö sileŋan mönö nanŋi buŋaŋi qahö aiga nanŋök mi qahö galöm kölakzapmö, apŋan mi galöm kölakza. Apŋaŋgö sileŋan mewöyök nanŋi buŋaya qahö aiga nanŋanök qahö galöm kölakzapmö, anömŋan mi galöm kölakza. Miaŋgöra nanŋiri mönö kude aŋgön köl aŋguba malmahot. Nanŋirök urumohot aka pöndaŋ köuluk nup membitköra ölöp nanŋök nanŋök malmahotmö, nalö tosatŋi mewö malagun mönö kunbuk mindiriba mohotŋe malmahot. Uruŋiri ölöp qahö galöm kölohotka Satanöŋ esapköm etkiiga siŋgisöndoknöŋ etpahotpuköra mönö mewö aka malmahot.

Mewö akŋahotköra ölöp jizalmö, jöjöpaŋ keu mewöŋi mi qahö al eŋgizal. Nöŋön ambazip körek pakpak ni ewö gwabulum malmegöra mötzalmö, iŋini tosatŋi Anutugö nup memegöra mötmöt kalem mewöŋi mi qahö memba malje. Anutunöŋ mötmöt kalemŋi mendeŋniga mohot mohot neŋön mi me mi nanŋök nanŋök buŋa qem aŋguba maljin.

Awanöm qahö aka malö maljei, eŋgöra kewö jizal: Eŋön ni ewö toroqeba awanöm qahöpmö, solanŋi malmei, mi mönö ölöpŋi akza. Ölöpŋi akzapmö, awanöm akingö uruŋini könöp jeiga malbepuköra mönö ölöp awanöm aketka amqema. Miaŋgöra yeŋön uruŋini galöm kölbingö osize ewö, mönö ölöp awanöm akŋe.

10 Awanöm maljei, eŋgöra kewö jim kutuzal, nöŋönök qahöpmö, Kembunöŋ nanŋak mönö keu ki jiza: Anömŋan apŋi kude mosötma. 11 Mewö jizapmö, töndup apŋi mosötma ewö, mönö azi kun kude memba öne malma me apŋambuk kunbuk eraum möta urumohot aka malmahot. Mewöyök apŋan anömŋi kude mosötma.

12 Mi Kembugö keuyapmö, awanöm tosatŋi eŋgö goroŋini mi Kembunöŋ qahö jizapmö, nanak mi kewö jizal: Urumeleŋ azi kungö anömŋan uruŋi qahö meleŋda töndup yambuk malmamgö mötzawi, yaŋön mönö anömŋi mi kude mosötma. 13 Mewöŋanök urumeleŋ ambi kungö apŋan uruŋi qahö meleŋda töndup yambuk malmamgö mötzawi, yaŋön mönö apŋi mi kude mosötma. 14 Miaŋgö könaŋi kewö: Kungö apŋan urumeleŋgö kopa azia aiga Anutunöŋ i töndup urumeleŋ anömŋi qekötahözawaŋgöra aka tök kutum waŋgiiga sarakŋi akza. Mewöŋanök kungö anömŋan mötnaripŋi qahöpmö, urumeleŋ apŋi qekötahözawaŋgöra aka Anutunöŋ i tök kutum waŋgiiga sarakŋi akza. Kunöŋ sarakŋi qahö akawak ewö, nahönböratŋiran mönö Anutugö sel yaigepŋe malbeak. Mewö malbeakmö, Anutunöŋ mohotŋe tök kutum eŋgiyöhaŋgöra mönö sarakŋi akze.

15 Sarakŋi akzemö, kunŋan qahö möt nariba apŋi me anömŋi mosötmamgö mötza ewö, mönö ölöp mosötma. Mewö asuhuiga nöŋgö keunan urumeleŋ alanini mi qahö jöhöma. Anutunöŋ iŋini luainöŋ malmegöra eŋgoholök. 16 Ambi, gi apki uru kuŋgum waŋginöŋga uruŋi meleŋma me qahöwi, mi mönö denöwö mötpanak? Me azi, gi anömgi uru kuŋgum waŋginöŋga uruŋi meleŋma me qahöwi, mi mönö denöwö mötpanak? Miaŋgöra mönö luainöŋ malme. Mewö. a 

Anutunöŋ eŋgoholöhaŋgö dop mönö toroqeba malme.

17 Kembunöŋ mohot mohot eŋgö malmalŋini areŋ aliga awanöm me solanŋi malgetka Anutunöŋ eŋgoholöhi, miaŋgö dop mönö toroqeba mala malmalŋinaŋgö könaŋi kude uteköme. Urumeleŋ könagesöŋi könagesöŋi liliköba miri dop mewö jim kutum eŋgimakzal.

18 Anutugö aiwesökŋi azi kungö sileŋe yaŋdiget maliga mewö oholök ewö, mi mönö kutumamgö kude kapaŋ kölma. Anutugö aiwesökŋi kungö sileŋe qahö yaŋdiget maliga mewö oholök ewö, mönö mi yandimegö kude kapaŋ kölma. 19 Anutugö aiwesökŋi silenine yandiget ahöza me qahöwi, miaŋön Anutugö jeŋe yuai omaŋi akzapmö, jöjöpaŋ keuŋi tem köla wuataŋgöinga ölŋi akza.

20 Anutunöŋ eŋgoholiga nalö miaŋgöreŋ awanöm me solanŋi malgeri, iŋini mohot mohot mönö miaŋgö dop toroqeba malme. 21 Kungö welenqeqe omaŋi aknöŋga Anutunöŋ goholök ewö, miaŋgöra mönö waimanjat kude aka malman. Urugi meleŋda ölöp solanŋi aka nup kun miwikŋaibanak ewö, mi mönö ölöp miwikŋaiman me urugi amqeiga ölöp toroqeba welenqeqe omaŋi malman.
Keu miaŋgö könaŋi kun kewö: Urugi meleŋda ölöp solanŋi aka nup kun miwikŋaizan ewö, gi ölöp toroqeba welenqeqe omaŋi malman.


22 Mi kewögöra: Kunöŋ welenqeqe omaŋi aiga Kembunöŋ mewö oholi uruŋi meleŋniga siŋgisöndokŋaŋgö kösöŋi pösariga solanŋi aka malja. Mewöŋanök kunŋan solanŋi aiga Kembunöŋ mewö oholi uruŋi meleŋniga nanŋi imbi-imbi qahöpmö, Kraistkö jitŋi tem kölmapkö kösönöŋ kinda welenŋi qeba malja. 23 Kraistnöŋ bohonŋi ketaŋan söŋgöröŋini meiga maljeaŋgöra mönö gölme ambazip yeŋgö keu keŋgöt bapŋe anda welenqeqeŋini omaŋi aka malbepuk. 24 Miaŋgöra urumeleŋ alaurupni, Anutunöŋ eŋgoholiga nalö miaŋgöreŋ solanŋi kösöŋini qahö me welenqeqe toŋinaŋgö kösö gwarönöŋ malgeri, iŋini mohot mohot mönö miaŋgö dop Anutugö jeŋe toroqeba malme. Mewö.

Gwabö seram aka malö yeŋgö goro keuŋini

25 Ambi seram jömukŋi
qesabulum qahö qeqeŋi
eŋgö goroya mi Kembunöŋ qahö jim kutui mötzal. Miaŋgöra Kembunöŋ ak kömum niŋgiiga keuni laŋ qahöpmö, möt nariget dop köljawaŋgö dop jimakzali, mönö miaŋgö dop kewöta nani mötmötnan kewö jimam:

26 Kahasililiŋ nalöŋi dopdowizawaŋgöra gwabö seram maljei, körek eŋön mönö miaŋgö dop toroqeba malgetka ölöwakza. Mewö mötmörizal. 27 Ambi memba maljan ewö, anömgi mosötmangö kude akŋan. Anömgi qahö solanŋi maljan ewö, mönö ambigöra kude jaruman. 28 Töndup ambi memani, miaŋön mönö siŋgisöndokŋi qahö akŋa. Mewöŋanök ambi seramnöŋ azi memawi, yaŋön siŋgisöndok qahö akŋa. Siŋgisöndok qahöpmö, mewö akŋei, yeŋön mönö sileŋinan kahasililiŋ gwötpuk miwikŋaiba mötme. Eŋön mi mötpepuköra mönö aŋgön köl eŋgimamgö mötzal.

29 Mewö möta goro eŋgizalmö, urumeleŋ alaurupni, keu kun kewö jimam: Kembu kamawaŋgö nalöŋan törizawaŋgöra aka ambi memba maljei, eŋön mönö mewöyök nalö kiaŋgöreŋök könahiba anömŋini qahö tandök ewö aka malme. 30 Wösöbirik aka sahötzei, eŋön mönö qahö sahötmeaŋgö tandök ewö aka malme. Uruŋini ölöwahiga söŋgaizei, eŋön mönö qahö söŋgaimeaŋgö tandök ewö aka malme. Yuai bohonŋi mezei, eŋön mönö mi qahö buŋa qem aŋgumeaŋgö tandök ewö aka malme.

31 Gölmenöŋ nalö kewöŋe areŋ wuataŋgömakzei, miaŋön mönö ayapkömawaŋgö dop akza. Miaŋgöra gölmegö öröyuaiŋi kölköl-örörö aka nupköra alakzei, eŋön mönö miaŋön uruŋini jöhömakzawaŋgö tandök ewö kude aka malme.

32 Iŋini gölmegö lömbötköra waimanjat qahö malmegö sihimni mötzal. Awanöm qahö solanŋi maljawaŋön mönö Kembugö öröyuaigöra waimanjat mörakza. Mi möta “Denöwö akiga Kembugö uruŋan ölöwahi dop kölbawak,” nanŋaŋgöra mewö jimakza. 33 Mewö jimakzapmö, ambi memba maljawaŋön mönö gölmegö öröyuaigöra waimanjat mörakza. Mi möta “Denöwö akiga anömnaŋgö uruŋan ölöwahi dop kölbawak,” nanŋaŋgöra mewö jimakza.

34 Kembunöŋ likep anömŋan likep mötmötŋi öröyohotka urudeŋdeŋ aka malja. Mewöŋanök ambi apŋi qahö aka ambi seram solanŋi maljahoraŋön mönö Kembugö öröyuaigöra waimanjat mörakzahot. Mi möta “Denöwö akiga uŋani aka sileni sarakŋi aiga Kembugöra dop kölbawak,” nanŋiraŋgöra mewö jimakzahot. Mewö jimakzahotmö, azi memba maljawaŋön mönö gölmegö öröyuaigöra waimanjat mörakza. Mi möta “Denöwö akiga apnaŋgö uruŋan ölöwahi dop kölbawak,” nanŋaŋgöra mewö jimakza.

35 Nanŋini bauköm eŋgimamgö möta goro mi eŋgizal. Mi tosatŋi kösö ewö jöhöm eŋgibi lömböt miwikŋaimegöra qahöpmö, könaŋi kewögöra mi eŋgizal: Nöŋön iŋini ahakmeme diŋdiŋi wuataŋgöba urudeŋdeŋ qahöpmö, pöndaŋ Kembubuk qekötahöba kin köhöimegöra mötzal. Miaŋgöra goroŋini mi jizal. Mewö.

36 Azi kunŋan ambi serambuk buŋa qeba malagun aŋgömosötpitkö mötmörizahori, yetkö goroŋiri kewö jimam: Azi miaŋön kewö mötmöriba jiza, “Ambi mi memba mewö törörök qahö ak waŋgibileŋak.” Mewö jiiga ambi memawaŋgö sihimŋi möt köhöiiga ambigö yambuŋi azi memegö dop akza ewö, yaŋön mönö ölöp sihimŋaŋgö dop aiga ameyohotka dop kölma. Mewö miaŋön siŋgisöndokŋiri qahö akŋa. 37 Qahö akŋapmö, azinöŋ ambi mi qahö memapkö keuŋi nanŋi uruŋan jöhöba möt köhöizawi, miaŋgöra kewö jimam: Kunŋan azi mi kuŋgui qahö qaközapmö, ölöp nanŋi sihimŋaŋgö dop wuataŋgöba keunöŋ qahö jöhöi ahakza ewö, yaŋön mönö ölöp sihimŋaŋgö dop aka ambi mi qahö mema.

38 Mewö aiga ambi seram mezawaŋön mönö dopŋe akzapmö, i qahö mezawaŋön mönö köna ölöp sorokŋi wuataŋgöba törörök akza. Mewö.
36b Azi kunöŋ böratŋi azi waŋgimamgö uruyahöt mötzawi, yaŋgö goroŋi kewö jimam: Iwiŋan kewö mötmöriba jiza, “Böratni waŋgiba mewö törörök qahö ak waŋgibileŋak.” Mewö jiiga böratŋaŋgö yambuŋi azi memegö dop aiga azi waŋgimamgö sihimŋi möt köhöiza ewö, yaŋön mönö ölöp sihimŋaŋgö dop aka mosöriga azi meiga dop kölma. Iwiŋan mewö miaŋön siŋgisöndok qahö akŋa.
Qahö akŋapmö, iwiŋan böratŋi azi qahö waŋgimapkö keuŋi nanŋi uruŋan jöhöba möt köhöizawi, miaŋgöra kewö jimam: Kunŋan iwi mi qahö kuŋgui qaközapmö, ölöp nanŋi sihimŋaŋgö dop wuataŋgöba keunöŋ qahö jöhöi ahakza ewö, yaŋön mönö ölöp sihimŋaŋgö dop aka böratŋi aŋgön kölma. Mewö aiga börat seramŋi azi waŋgizawaŋön mönö dopŋe akzapmö, i qahö waŋgizawaŋön mönö köna ölöp sorokŋi wuataŋgöiga törörök akza. Mewö.

39 Ambinöŋ apŋan jebuk malmawaŋgö dop amöamögö keuŋan jöhöi maljapmö, apŋan kömuma ewö, keu miaŋön mewöŋanök kömuiga ölöp azi sihimŋan jimawaŋgö dop mema. Urumeleŋgö kopa azia qahöpmö, azi Kembubuk qekötahözawi, miyök mema. 40 Ölöp azi memba sösöŋgai qorembeŋi miwikŋaimapmö, toroqeba solanŋi malma ewö, mönö urusösöŋgai ölŋi miwikŋaiba söŋgaimakŋa. Nöŋön keu mi kewöta mewö jizal. Anutugö Uŋaŋan nöŋgö urune mewöyök maljawi, miaŋgöra mönö mewö mötmöriba jizal. Mewö.

Copyright information for `BMU