1 Corinthians 8

Nene tandö lopioŋgö naluk alalŋi mi nembin me qahö?

Iŋini nene tandö lopioŋgö naluk alalŋi miaŋgöra ohogetka goro kewö jimam: Urukalemnöŋ mönö bauköm eŋgima. Goranora jigetka tosatŋan kewö jimakze, “Körek neŋön tandö lopioŋgö könaŋini möt yaköinga omaŋi akza.” Keu mi ölbölŋa akza, mi mötzin. Iŋini mötmöt mewöŋi jiba malgetka uruŋinan wahöriga koŋaeŋ ewö terereŋgöba aiwelikömakze. Mewö aka deŋda siksauk malje. Köna bohonŋi mi urukalem. Köna mewö miaŋön mönö nanini urunini möhamgöba mem köhöim aŋgubin. Kunöŋ “Keu kungö könaŋi möt yaközal,” mi jitnöŋ jizawi, yaŋgö mötkutukutuŋi ölŋan mönö qahö asuhuiga toroqeba tönpin malja. Mi keunöhök jizapmö, kunŋan Anutu uruŋan jöpakömakzawi, Anutunöŋ mönö yaŋgöra möri ölŋi akza.

Nene tandö lopioŋ yeŋgöra naluk algeri, mi nembin me qahöpto? Keu kewö jimakze, “Tandö lopioŋ mi bem ölŋi qahö maljeaŋgö kaisöpsöpŋini akze,” aka keu kun kewö, “Anutu mohotnöŋ malja. Alaŋi kun qahö.” Keu yahöt mi ölŋa akzahot, mi mötzin. Keu miaŋgö könaŋi kewö, “Öme bemŋi bemŋi,” qetŋini mewö qerakzei, mi gwötpuk malje. Suepnöŋ me gölmenöŋ maljei, mi ölöp qahö mötzin. Ölŋa ömewöröme, bem aka azi kembu mi gwötpuk malje.

Mi maljemö, mi töndup Anutu mohot yaŋönök nanini bemnini aka Iwinini akza. Yaŋön yuai pakpak miwikŋaii asuhuyök. Malmalnini yaŋgöra malbingöra aka al neŋgii maljin. Mewöyök Kembu mohot Jisös Kraist malja. Yaŋön Anutu bauköiga yuai pakpak miwikŋaiyohot. Nini mewöyök bauköm neŋgiiga mal köhöimakzin.

Mewö möt narizinmö, ambazip körekŋan mönö mötkutukutu mewöŋi mi qahö memba malje. Mi qahöpmö, tosatŋan mutuk tandö lopioŋ waikŋini memba möt köhöigeraŋgöra aka dölkewöŋe mewöyök toroqeba nene tandö lopioŋgö naluk alalŋi mi nemba mewö miaŋön amqeba bemurup mi mötmöriba malje. Uruŋinan lölöwöröŋi aiga uruyahöt aka negetka uruŋinan miaŋgöra tölöhomakza. Tölöhomakzapmö, nenenöŋ neŋguaŋgita Anutu kösutŋe qahö al neŋgimakza. Nene siŋgi malbini, mewö geŋmororoŋ qahö miwikŋaibin. Nene nemba malbini, qetbuŋaninan mewö qahö qarima.

Mi töndup nene pakpak nembingö amqezei, eŋön mönö jaubatbat laŋ malbepuköra galöm mem aŋguba malme. Mewö malgetka tosatŋan eŋgeka uruŋinan lölöwörö aka bölii et eŋgubapuk. 10 Miaŋgö könaŋi kewö: Göŋön mötkutukutu ölŋi memba mala amqeba tandö lopioŋ jikeŋe anda tata nene nenöŋga alagi kunŋan gehi kewö lömbörima: Uruŋan lölöwöröŋi aiga uruyahöt akzawi, yaŋön mewö geka uruŋan wahöri amqeba nene tandö lopioŋgö naluk alalŋi mi nemba et qebawak.

11 Göhö mötkutukutugi ölŋi miaŋön mönö nangi urumeleŋ alagi kuŋguiga uruyahöt qakŋe lölöwöröŋi akzawaŋgöra mönö amqeba nemba et qebawak. Kraistnöŋ yaŋgöra aka kömuyökmö, nene mi nemba mewö et qeba ayuhuiga qahö dop kölma.

12 Ayuhumapmö, urumeleŋ alaurupŋini mewö mem bölim eŋgiba uruŋini lölöwöröŋi mi qeba köndeŋda siŋgisöndok ahakzei, mewö miaŋön mönö Kraist nanŋi qetala siŋgisöndok ahakze. 13 Miaŋgöra nöŋön nene kun nembiga miaŋön urumeleŋ alani kölgorom waŋgiiga et qeba siŋgisöndok akza ewö, nöŋön mönö nalö kunöŋ nene mi qahö toroqeba nemam. Nöŋön alani jölöŋgöba kölgorom waŋgibileŋbuköra kapaŋ köla kinjal. Mewö.

Copyright information for `BMU