a3Sum 34.8;
b6Ais 28.16;
c7Sum 118.22;
d8Ais 8.14-15;
e9Eks 19.5-6, Ais 43.20-21, Dut 4.20, 7.6, 14.2, Tai 2.1, Ais 9.2;
f10Hos 2.23
g22Ais 53.9;
h23Ais 53.7;
i24Ais 53.5;
j25Ais 53.6

1 Peter 2

Köt malmalŋambuk yambuk kinda sarakŋi akŋe.

Buŋa keu mötzeaŋgöra mönö bölöŋamŋini pakpak köteköba gilme. Geŋmoŋ köŋbiŋ pakpak mosötme. Ahakmeme silesile mi sisitŋi memba tököme. Körögisigisi aka andöqeqe keu yöhösaŋ ahakzei, mi pakpak mönö qekögetka et teköma. Morösepsep geŋmoŋini qahö yeŋön juzu nembingörök möta awöweŋgömakze. Eŋön mönö miaŋgö dop Buŋa keu qahö möwöramgögeri, mi urukönömŋine albingö awöweŋgöba malme. Mewö mala möt-naripŋini köl guligetka qarim köhöiiga letota mala oyaeŋkoyaeŋ akŋe. Buŋa Kimbigö keu kun kewö ahöza, “Nene kun nepöleköba nahömŋi mötkeri, miaŋgö dop Kembu ölöpŋi yambuk qekötahöba nahömŋi mötket.” Keu miaŋgö dop Kembugö nahömŋi mötze ewö, mönö Buŋa keunöŋ qarim köhöiba malme.

Kraistkö söpsöp keuya jimam: Kraistnöŋ wahöta Anutugö tandö kömbönaŋi aka malmal köhöikŋaŋgö wötŋi akza. Iŋini mönö yaŋgöreŋ kaba kunbuk letotme. Ambazipnöŋ tandö kungöra “Köt omaŋi,” jiba andö qeba mosötketmö, Anutunöŋ i Amötqeqe Toŋi akŋapköra möwölöhöba yaŋgöra möri bohonŋi öŋgöŋgöŋi ketaŋi akza. Kraistköreŋ kaba guliba nanŋinak mewöyök köt jamönjiŋ malmalŋinambuk ewö akŋe. Mewö aka mal köhöigetka Suepkö mitimqeqe yaŋön eŋgömemba uruŋini möhamgöiga köhököhöi miwikŋaiba urugö malmalgö jöwöwöl jike ölŋi akŋe. Uŋa Töröŋan uruŋine mala sölölöhöba mem letot eŋgiiga jöwöwöl jike miaŋgö jike nup galöm sarakŋi aka kinme. Uŋa Töröŋan nam köla inahöm eŋgiiga tem köla Anutugö waikŋi memba möpöseim waŋgiba malme. Mewö malgetka Anutunöŋ eŋgeka Jisös Kraistköra aka ahakmemeŋini mewöŋaŋgö sihimŋi möta malma. Buŋa Kimbinöŋ keu kun kewö ahöza: “Eket, Anutunöŋ mönö köt tandö kun möwölöhöba Zaion kunduŋe Israel kambu uruŋine kömötpiga tandö kömbönaŋi guli damandaŋ (milyön Kina) ewö akŋa. Denike yeŋön tandö pöwöwöm köhöikŋi mi möt narim waŋgimakŋei, yeŋön mönö yaŋgöra aka gamu qahö möta malme.”

Möt narim waŋgiba maljei, eŋgö jemesoholŋine mi tandö kömbönaŋi aködamunŋambuk akzapmö, tosatŋan uruŋini qahö meleŋda maljei, yeŋgö jeŋine mi Buŋa keu kiaŋgö dop ahöza: “Miri meme yeŋön ‘Köt omaŋi,’ jiba tandö kun andö qeba mosötkeri, tandö miaŋön mönö tandö kömbönaŋi ahök. Könaŋgep tandökŋi ain ewö miwikŋaiget. Tandö pöwöwöm köhöikŋi mewöŋan tiŋgitpawak ewö, mirinöŋ mönö gororoŋgöba eta kölbawak.”

aka Buŋa keu kun kewö ahöza, “Ambazipnöŋ köt jamönjiŋ miaŋgöreŋ tötaŋgöba eŋguiga miaŋön mönö eŋgum mizit ak eŋgima.”

Yeŋön Buŋa keu qahö tem köla nanŋini imbi wuataŋgö-makzeaŋgöra aka tötaŋgöba erakze. Anutunöŋ mewö areŋgöm eŋgiyöhaŋgö dop erakze.

Yeŋön mewö erakzemö, eŋön ambazip kambu qainŋi kun kewö akze: Anutunöŋ iŋini nanŋaŋgöra möwölöhöm eŋgiiga qainŋi kun akze. Anutunöŋ söŋaupnöhök eŋgoholiga asakŋi wewelip-ŋambuk miaŋgöreŋ aŋgota jike nup galöm kambu sarakŋi akze. Aŋgöletot aködamunŋambuk memba malöhi, miaŋgö Buŋa keuŋi mi jim asaribingöra eŋgoholök. Eŋgoholiga Anutugö buŋa könagesöŋi mala Kiŋ Kembugö jembonurupŋi aka nupŋi liliköba memakze. 10 Mutuk Buŋa Kimbigö keu kungö dop “simbisembel laŋ malgetmö,” nalö kewöŋe uru jöhöm aŋguba kutulaŋgöba “Anutugö urumeleŋ könagesö kambu” aka malje. Mutuk Anutugö ak kömukömugöra “gukmaulem malgetmö,” nalö kewöŋe “eŋgehoriiga kalem möriamŋi ölöp möt kutuba malje.” Mewö. a, b, c, d, e, f 

Anutugö welenqeqe ambazip kewö aka malbin:

11 O wölböt alaurupni, Suepkö buŋaya aka gölmenöŋ ki kusuk kiana maljei, nöŋön eŋgö uruŋini kewö kuŋgumam: Silegö sihim kömbönaŋini bölöŋan galöm köl eŋgibapuköra mönö nanŋini aŋgön köl aŋgume. Sihim murutŋi murutŋi mieŋön mönö uruŋini mem bölimegöra bim qemakze. 12 Uruŋini qahö meleŋgeri, yeŋgö sutŋine ahakmemeŋini ölöpŋanök aka memba malme. Tosatŋan iŋini bölöŋi meme ambazip ewö keunöŋ jim bölim eŋgimakzei, yeŋön ahakmemeŋini ölöpŋi eka könaŋamŋini törörök möt asarigetka mötmötŋinan uteköma. Mötmötŋinan uteköiga nanŋini siŋgisöndokŋini aka möt sohosohoŋini ek kutuba uruŋini meleŋda Kraist asuhumawaŋgö nalöŋe eŋgöra aka Anutu möpöseim waŋgime.

13 Anutunöŋ malmal areŋgöiga ambazip tosatŋan galöm köl neŋgimakze. Kembugö qetŋi bisize ewö, eŋön mönö körek yeŋgö keu bapŋe anda malme. Kiŋ aka ministö yeŋön bohonŋini akzei, iŋini mönö yeŋgö jitŋini tem köla malme. 14 Kiap aka gawönö yeŋgö jitŋini mewöyök tem köla malme. Yeŋön ambazip bölöŋi akzei, yeŋgö keuŋini kewöta likepŋi meleŋ eŋgimakzemö, ölöpŋi ahakzei, yeŋgö qetŋini möpöseimakze. Anutunöŋ miaŋgöra aka gawman ambazip al eŋgiiga malje. 15 Anutugö jit sihitŋan mönö kewö ahöza: Kezapjupjup ambazip gukmaulem kinda eŋgöra uruqahö keu omaŋi omaŋi jimakzei, iŋini mönö ahakmeme ölöpŋi aka memba miaŋön yeŋgö numbuŋini muhungögetka ölöŋ malme.

16 Anutunöŋ bölöŋaŋgö kösö gwaröŋeyök pösat eŋgiiga lolohogeri, iŋini mönö miaŋgö dop ahakmeme solanŋi aka memba malme. Mewö malmemö, bölöŋamŋini turumegöra “Kösö gwarönini qahö solanŋi (fri) maljin,” jiba miaŋgöreŋ möndöba nanŋini imbiŋini kude wuataŋgöme. Mewö qahöpmö, Anutugö jitŋi tem köla welenŋi qemakzei, mönö miaŋgö dop gwarö qahö malme. 17 Ambazip körek mönö göda qem eŋgiba malme. Urumeleŋ alaurupŋini mi urukönömŋinan jöpaköm eŋgiba malme. Anutugö keuŋi oŋgitpinbuköra mönö sömbuŋini möta malme. Kiŋ aka ministöurupŋini yeŋgöra mönö mötket öŋgöiga göda qem eŋgiba malme. Mewö.

Kraistnöŋ sihimbölögö silik ölöpŋi kondel neŋgiyök.

18 Welenqeqeurup iŋini mönö ketaŋamŋinaŋgö keu bapŋe anda göda pakpak kondel eŋgiba malme. Urubönjöŋnöŋ galöm ölöpŋi ak eŋgimakzei, yeŋgörök qahöpmö, öröm ureim ak eŋgimakzei, mi mewöyök törörök göda qem eŋgiba malme. 19 Denike yeŋön Anutugö jitŋaŋgö dop ambazip göda qem eŋgiba malgetka töndup könaŋi qahöpmö, öne kahasililiŋ ak eŋgigetka sihimbölö möta kapaŋ köla mökösöŋmakzei, Anutunöŋ mi eka likepŋi meleŋda kötuetköm eŋgiiga simbawoŋ akze. 20 Bölöŋi aketka kömbinöŋ eŋgugetka mi möta mökösöŋda kinme ewö, nanŋinaŋgöra mönö denöwö aka mötket öŋgöbawak? Dopŋine eŋgugetka qetbuŋaŋi-nambuk qahö akŋe. Mewö qahöpmö, ahakmeme ölöpŋi akeraŋgöra aka sihimbölö miwikŋaiba mökösöŋda malme ewö, Anutunöŋ mönö miaŋgö likepŋi meleŋda kötuetköm eŋgiiga simbawoŋ akze.

21 Kraistnöŋ mewöŋanök eŋgöra aka sihimbölö möta silik ölöpŋi kondel eŋgiyök. Miaŋgöra iŋini mönö yaŋgö köna tamböŋi mötöteiba sihimbölö möta mökösöŋda malmegöra eŋgoholök. Mewö mala simbawoŋ akŋe. 22 Buŋa Kimbigö keu kun kewö ahöza, “Yaŋön siŋgisöndok kun qahö ahök aka yaŋgö numbu jitŋeyök muneŋ keu kun qahö erök.” Iŋini keu miaŋgö dop aketka dop kölma. 23 Ambazipnöŋ uruqeqe keu töhöreŋ Kraist gwötpuk jim waŋgigetka kitipŋi kun qahö meleŋnök. Sihimbölö ak waŋgigetka möta kitipŋi mekömamgö qahö töröpköm eŋgiyök. Mewö qahöpmö, Anutunöŋ keu diŋdiŋanök jim tekömakzawi, mönö i möt nariba keuŋi yaŋgö böröŋe ala jim tekömapkö mambörök.

24 Kraistnöŋ neŋgöra kapaŋ köla siŋgisöndok andö qeba ahakmeme solanŋi wuataŋgöba malbingöra aka sihimbölö mörök. Mi möri Buŋa Kimbigö dop “sileŋi qegetka uzi asuhuyöhaŋgöra aka Anutunöŋ iŋini mem ölöwak eŋgiyök.” Ölöwakŋegöra mönö “nanŋak siŋgisöndoknini memba sileŋe aŋguba” maripomnöŋ öŋgöba kömuyök. Miaŋgöra iŋini mönö Kraistkö dop sihimbölö möta mökösöŋgögetka ölöwakŋa. Siŋgisöndokö esapesapnöŋ öröm neŋgiiga miaŋgöreŋ mönö qamöt tandök aka köhömuŋi malbin. 25 Mutuk iŋini “lama ewö jaŋjuŋ anda kaba laŋlaŋ malget.” Mewö malgetmö, nalö kewöŋe uruŋinaŋgö galömŋaŋgöreŋ liliŋgöba kaba malje. Yaŋön iŋini lama ewö sel jöhöba köyan köl eŋgimakza. Mewö. g, h, i, j 

Copyright information for `BMU