b5Qam 3.34;
c6Mat 23.12, Luk 14.11, 18.14
f12Apo 15.22,40;
g13Apo 12.12,25, 13.13, 15.37-39, Kol 4.10, Flm 24

1 Peter 5

Jitŋememe eŋgöreŋ qambaŋ keu

Nöŋön urumeleŋ könagesögö jitŋememe kun aka Kraistnöŋ sihimbölö möröhi, miaŋgö keuŋi naŋgöba jimakzal. Könaŋgep liliŋgöba kaiga asakmararaŋan asuhuiga qetbuŋa niŋgii miwik-ŋaimamgö mötzal. Eŋgö sutŋine nöŋgö jitŋememe alaurupni akzei, nöŋön eŋgö uruŋini kewö kuŋgum eŋgizal: Anutunöŋ möt narim eŋgiba lama kambuŋi böröŋine alöhi, eŋön mönö i köyan köl eŋgiba malme. Nup mi ölan qakŋe qahöpmö, Anutugö jitŋaŋgö dop urusihimŋini nupnöŋ ala mi amqeba urukönöp qakŋe zeŋ memba kinme. Möndömöndö qakŋe injarere mala moneŋ yuaigöra kude kapaŋ kölma malme.

Lama kambu bapŋine kaba kinjei, i mönö azi kembu tandök kude galöm köl eŋgime. “Zioz galöm akzin,” jiba töptöpŋine kude qeba miwidimgöm aŋgumemö, ahakmemegö silik ölöpŋi mi lama kambu kondel eŋgiba malme. Ahakmeme ölöpŋi aka malgetka lama galöm bohonŋan kunbuk asuhumawi, nalö miaŋgöreŋ mönö sorom jölŋine uta ila jalö aködamunŋambuk nöröpŋine köl eŋgigetka buŋa qem aŋgume. Aködamun miaŋön mönö nalö kunöŋ qahö tahöliba piahima. Mewö. a 

Sepguli eŋgöreŋ qambaŋ keu

Sepguli iŋini mewöyök galömurup yeŋgö keuŋini bapŋe anda malme. “Anutunöŋ söŋgöröqök ambazip tuarenjoŋ ak eŋgimak-zapmö, nanŋini memba et al aŋgumakzei, yeŋgöra mönö kalem möriamŋi eŋgimakza.” Miaŋgöra iŋini mönö körekmakörek sutŋine nanŋini memba et al aŋguba malme. Tandök miaŋön mönö maluku ewö kölget gem eŋgiiga malme. Miaŋgöra mönö nanŋini memba et al aŋguba Anutu böröŋi kukösumŋambuk miaŋgö bapŋe angetka nalöŋan kam kuŋguiga ölöp memba öŋgöba al eŋgima. Buŋa keu kun kewö ahöza, “Yaŋön iŋini köyan köl eŋgimakzawaŋgöra waimanjatŋini pakpak mönö yaŋgö böröŋe ala mosötme.”

Ahakmemeŋini galöm köl aŋguba zeŋ kinda pöndaŋ uru guliguli malme. Bölöŋaŋgö Toŋan laŋ liliköba ambazip tuarenjoŋ aka jarum neŋgimakza. Kunŋan sipkömturuk aiga yaŋön mönö laion sömbup ewö gwahöt neŋgimamgö jöjöröza. (Laionöŋ görörök qeriga silatŋi mötketka bönŋini wahörakza.) Iŋini sihimbölö mörakzei, eŋgö urumeleŋ alaurupŋinan mönö mewöŋanök gölme dop kahasililiŋ miyöhök möta mökösöŋda malje. Mi mötmöriba keŋgötŋini yaköriba mötnaripnöŋ töndangöba kinda laion mi köhöikŋanök tuarenjoŋ ak waŋgiba malme.

10 Iŋini nalö töröpŋi sihimbölö möta malgetka mösöhöba naŋgöm eŋgiba töngum eŋgiiga ölöp kin köhöiba malme. Mewö Kraistpuk kingetkun aködamunŋi tököm eŋgiiga asakmararaŋe öŋgöba teteköŋi qahö asariba malme. Anutu, kalem möriam pakpakö Toŋi akzawaŋön mönö iŋini mewö aka malmegöra eŋgoholök. 11 Yaŋön kukösum Toŋi mala kota malja aka nalö teteköŋi qahö mal öŋgöba malma. Keu mi ölŋa. b, c 

Pitönöŋ yaizökzök keu teteköŋi jiyök.

12 Anutugö kalem möriamŋan mönö ak kömukömu öl töhönŋi akza. Nöŋön keu mi köhöiba naŋgöba jiba eŋön kalem möriam miaŋgöreŋ tönguba kin köhöiba malmegöra jim kutum eŋgizal. Miaŋgöra kimbi töröpŋi ki jibiga neŋakni Sailasnöŋ ohom eŋgiyök. Yaŋön nömbuk pöndaŋ kinda urumeleŋ neŋakni akza. Yaŋgöra mewö mötmörizal.

13 Anutunöŋ urumeleŋ könagesö iŋini ewö nanŋaŋgöra möwölöhöm eŋgiiga Babilon siti bölöŋi miaŋgöreŋ
Babilon mi Rom sitigö qet tölapŋa. Indelindel buknöŋ mewöŋanök qet mi miaŋgö dop ohoget ahöza.
maljei, mieŋön mönö yaizökzökŋini algetka eŋgöreŋ kaza. Mötnaripkö nahöni Mak yaŋön mewöyök yaizökzökŋi alja.
14 Iŋini sutŋine urukalem-ŋinaŋgö waikŋini memba aŋgum aŋguba nemböŋini susuhuba malme.
Nalö miaŋgöreŋ jölöŋini jiba waikŋini memba numbuŋini yöhötim nemba malgeri, mönö miaŋgöra jiza.


Alaurup Kraistpuk qekötahöba kinjei, luainöŋ mönö körek embuk ahöma. Mewö. f, g 

Copyright information for `BMU