a15-171 Kor 15.51-52

1 Thessalonians 4

Ahakmeme solanŋi urukalemŋambuk mi dop kölma.

Urumeleŋ alaurupnini, keu kun kewö: Ahakmemeŋini Anutugö jeŋe aket dop kölmawaŋgö könaŋi kusum eŋgiinga mi lök köl guliba wuataŋgömakzemö, mi toroqeba gwötpuk ahakŋegöra uruŋini kuŋguzin. Neŋön qambaŋ keu mi Kembu Jisösgö qetŋe eŋgizin. Neŋön Kembu Jisösgö kukösum qakŋe kinda jöjöpaŋ keuŋi jim kutum eŋgiini, iŋini keu mohot mohot mi lök möt teköze.

Anutunöŋ eŋgöra jitsihitŋi kewö mötza: Iŋini mönö sero yoŋgorö andö qeba sarakŋi aka tök-kutukutuŋi aka malme. Anutugöreŋ köna diŋdiŋi mi mönö kewö möt kutume: Uru sileŋinaŋgö sihim kömbönaŋini galöm köla sarakŋi (mala nanŋini anömŋini nanŋik nanŋik memba) malgetka aködamunŋambuk akŋa. Urumeleŋgö kopa yeŋön Anutugö könaŋi qahö möt kutuba uruŋini könöp jeiga ambi laŋ memakze. Miaŋgö dop kude aka malme.

Mewö qahöpmö, ambi apŋan kungen aniga kunöŋ ölöŋ kaba ambi kude saitköma. Kunöŋ bölöŋi mewöŋi ahiga uruŋiran kömbuhibapuk. Mutuk qambaŋ keu mi jiba galöm mem eŋgiini, miaŋgö dop kunöŋ ambi mem böliiga Kembunöŋ siŋgisöndokŋi pakpakö likepŋi meleŋ waŋgima. Anutunöŋ nini qewöloŋ malbingöra qahöpmö, malmal sarakŋi malbingöra neŋgoholök. Miaŋgöra jöjöpaŋ keu mi mosötmawaŋön mönö gölme ambaziwa qahöpmö, Anutu nanŋa andö qema. Anutu Uŋaŋi Töröŋi eŋgimakzawi, ia mönö andö qebepuk.

Sutŋine jöpaköm aŋgumakzei, miaŋgö könaŋi Anutunöŋ kusum eŋgii nanŋinak lök möta malje. Miaŋgöra neŋön urukalem ak aŋgubingö keuŋi kunbuk ohom eŋgibingö qahö osizin. 10 Masedonia prowins uruŋe urumeleŋ alaurup pakpak uruŋinan jöpaköm eŋgiba maljemö, urumeleŋ alaurupni, mi mönö toroqeba gwötpuk ahakŋegöra uruŋini kuŋguzin. 11 Mönö ösöŋ mala nanŋini malmal naŋgönaŋgöŋini galöm köla böröŋinan nup memba malme. Mewö aka aködamunŋinambuk akingö kapaŋ köla kinme. Mutuk mewö jim kutum eŋgiinga miaŋgö dop mönö aka memba malme.

12 Mewö aketka uruŋini qahö meleŋda yaigep kinjei, yeŋön ahakmemeŋini solanŋi ek yaköba göda qem eŋgiba malme. Injarere laŋ mala nene yuaigö uleta kungö qakŋe kude malme. Mewö.

Kembugö kaka nalöŋe kewö asuhuma:

13 Urumeleŋ alaurupnini! “Tosatŋan uruŋini meleŋda kömumba ahözei, yeŋgöra denöwö asuhubawak?” Iŋini keu mewö jiba miaŋgöra gukmaulem malbepuk. Ambazip uruŋini qahö meleŋda jörömqöröm qahö maljei, yeŋön kömukömuŋi yeŋgöra aka wösöbirik maljemö, eŋön i ewö wösöbirik malbepuköra keu kewö jibin: 14 Jisösnöŋ kömumba wahöröhi, nini keu mi möt nariba kewö jizin: Anutunöŋ Jisös mem guliyök. Miaŋgöra ambazip yambuk kömumba nöŋ qegeri, Anutunöŋ mönö i mewöyök mem guliba Jisösbuk mohotŋe eŋguaŋgiri aukŋe asuhume. Keu likepŋi möt narizin ewö, likepŋi kun mi mewöyök möt nariinga dop kölma.

15 Kembunöŋ keu kusum neŋgiiga neŋön yaŋgö jitŋi mi eŋgöra kewö jibin: Tosatŋi neŋön qahö kömumba toroqeba silebuk malinga Kembunöŋ liliŋgöba kamawi, nini nalö miaŋgöreŋ mutuk qahö öŋgöbin. Nini ambazip kömukömuŋi qahö eŋgoŋgitpin. Qahö. 16 Miaŋgö areŋi kewö: Anutunöŋ tömunŋi qainŋi kun uiga ötöŋi asuhuiga Suep garata bohonŋan jimkutukutuŋi qeriga ambazipnöŋ kourukŋiri mötketka Kembunöŋ nanŋak Suepnöhök etma. Kraistnöŋ eriga i möt narim waŋgiba kömugeri, yeŋön mönö mutuk kömupnöhök wahötme.

17 Yeŋön mutuk wahötketkun nini qahö kömumba jebuk malbini, Anutunöŋ mönö neŋguaŋgiri könakemba öŋgöbin. Wahötkeri yembuk öröröŋ kousunöŋ öŋgöba Kembubuk aitoŋgöba yambuk Suep mire sundan dop malbin. 18 Miaŋgöra keu mewöŋi jiba miaŋön mönö uruŋini naŋgöm aŋguba malme. Mewö. a 

Copyright information for `BMU