a72 Tim 1.11
c13Jen 2.7,21-22;
d14Jen 3.1-6

1 Timothy 2

Buŋa nupkö köuluk areŋ

Yuai bohonŋi mi köuluk nup. Nöŋön miaŋgö uruwahöt keuŋi jiba uruŋini kewö kuŋguzal: Iŋini mönö ambazip körek pakpak eŋgöra köuluköba kapaŋ köla uleta Anutu qesim waŋgiba saiwap jiba malme.

Kiŋ azi kembu aka gawmangö galöm ambazip könaŋi könaŋi yeŋgöra aka köuluköba malme. Mewö kötöngöm eŋgigetka diŋdiŋanök galöm köl neŋgigetka luai qakŋe guŋbönjönjöŋ malbin. Mewö mala Anutugö jitŋi wuataŋgöba ahakmeme diŋdiŋi aka memba malinga aködamunŋambuk ahakŋa. Köuluk nup mewöŋi miaŋön ölöp sorokŋi akza. Mi Anutu, Amötqeqe Toninaŋgö jemesoholŋe ölöp dop kölja. Yaŋön ambazip körekŋan Buŋa keu ölŋi möt kutuba uruŋini meleŋgetka amöt qem eŋgii letotmegöra jitsihitŋi mörakza.

Anutu mohok-kun ahöza aka ambazip Anutubuk mindirim neŋgimapköra azi mohok-kun mewöyök ahöza. Azi mohot Jisös Kraist yaŋön mönö mi köhöiiga tosatŋan mi osimakze. Yaŋön siŋgisöndok ambazip pakpak neŋgö sohopnini memapköra malmalŋi köleŋda mosörök. Buŋa keu mi Anutunöŋ nalö ali tosatŋan nalö törörök miaŋgöreŋ könahiba naŋgöba jim asarigetka neŋgöreŋ kayök. Miaŋgöra aka Anutunöŋ aposol akŋamgö kuŋguba melaim niŋgiiga kantri dop lilikömakzal. Ambazip Jisös möt narimegöra Buŋa keu ölbölŋi jim asariba kusum eŋgiba uruŋini kuŋgum eŋgimakzal. Könani mewö jiba muneŋ kun qahöpmö, keu ölŋa mewö jizal. Mewö. a 

Azi aka ambi yeŋgö malmal areŋini

Miaŋgöra jitsihitnan kewö jizal: Azi eŋön mönö pöndaŋ miri dop tokoba köuluk nup töp memba malme. Yom kazik aka aŋgururuk mosötketka uruŋinan sarahiiga ölöp böröŋini mem wahöta Anutu köulukömakŋe. Ambi eŋgö qambaŋ keuŋini kewö jizal: Eŋön mönö kinisöröŋini löŋgöta sileŋini törörök turuba malme. Opo sörö sorokŋi aködamunŋambuk mi mosötme. Nöröp jupŋini qeba gawasu könaŋi könaŋi kude ala minjiŋda öŋböŋ meme. Kösasorom me goul miaŋön kude meŋölöm aŋgume aka löŋgölöŋgöt söŋgöröŋi ketaŋi miaŋön memba aiwelikqaiwelik kude akŋe.

10 Aködamunŋini ölŋi mi ahakmeme ölöpŋi. Ambi Anutugö jitŋi oŋgitpinbukö keŋgötŋini möta qetŋi jim aumakzei, eŋön mönö nup ölöpŋi ölöpŋi jegep kinda memakŋe. 11 Azinöŋ kusum eŋgigetka ambi eŋön mönö uruŋini memba et al aŋguba Buŋa keu ösöŋ möta nesilam qakŋe takpararak aka jitnöŋ söhöp kude meleŋmemö, mi urukönömŋine ala malme.

12 Ambi eŋön azi galöm köla kusum eŋgimegöra nöŋön ‘Oŋ!’ qahö jizalmö, tokogetka ösöŋ keu bök tatme. 13 Anutunöŋ mutuk Adam miwikŋaiba yaŋgö andöŋe Iw (Ewa) miwikŋaiyök. 14 Mokoleŋnöŋ Adam qahö tilipköyökmö, ambi mi tilipköm waŋgiiga keu oŋgita siŋgisöndok ahök. 15 Töndup ambi yeŋön nup areŋini wuataŋgöba morö memba Kraist möt nariba ahakmeme sarakŋi wuataŋgöba urumeleŋ alaurupŋini urunöŋ jöpaköm eŋgiba ösöŋ malme ewö, Anutunöŋ mönö ölöp amöt qem eŋgiiga letota Suepnöŋ öŋgöme. Mewö. b, c, d 

Copyright information for `BMU