a18Dut 25.4, Mat 10.10, Luk 10.7;
b19Dut 17.6, 19.15

1 Timothy 5

Malö aka ambazip namŋi mi kewö galöm köl eŋgime:

Azi namŋi mi köhöikŋanök kude mindiŋgöba jim waŋgimanmö, iwigi ewö qambaŋ keu ösöŋ jinöŋga mötma. Azi sepgwölö mi darumungi ewö ak eŋgiba malman. Ambi namŋi mi namurupki ewö qambaŋ eŋgiman. Ambi seram mi nenurupki ewö ahakmeme sarakŋi wuataŋgöba göda qem eŋgiba malman.

Malö tinitosolomŋini qahö mi mönö gödaqeqe qakŋe ak eŋgiba malman. Malö kungö isimoröurupŋi malje ewö, yeŋön mönö mutukŋi aka bohon köla i galöm köl waŋgime. Anutunöŋ jim kutum neŋgiyöhi, yeŋön mönö miaŋgö dop nanŋini saiwaurupŋini köyan köl eŋgibingö könaŋi mötme. Iwinamurupŋinan mutuk nalö köröpŋi köyan köl eŋgiba malgetka yeŋön miaŋgö kitipŋi meleŋda tosaŋini meköm eŋgigetka Anutugö jeŋe dop kölma.

Malö ambi ölŋi, tinitosolomŋi qahö nanŋök maljawi, yaŋön mönö jörömqörömŋi Anutu al waŋgiba i sundan dop suŋgem asak qesiba köuluköm waŋgimakza. Yaŋön mewö maljapmö, ambi malö tosatŋan uruŋinan könöwiiga sihim kömbönaŋinaŋgö dop yuai laŋlaŋgöra böröjaŋ suhumakzei, yeŋön gölmenöŋ silebuk maljemö, töndup köhömuŋi akze. Miaŋgöra malö yeŋön sileŋine köpösihitkö keuŋi qahö ahöi malmegöra mönö mewöyök jim tuarim eŋgiba malman.

Kunŋan nanŋi tinitosolomurupŋi qahö köyan köla eŋgömosöri garömisiŋ maljei, yaŋgö ahakmemeŋan mönö bölim teköza. Yaŋön Kembu möt narizawaŋgö keuŋi mi silikŋan qaŋ köla urumeleŋgö kopa tandök oŋgita böliqöliba malja.

Urumeleŋ könagesö eŋön malö tosatŋi kutukutulaŋ aka köyan köl eŋgimakzei, malö kunŋan yeŋgö areŋnöŋ kaŋgotmapköra qeqesi alma ewö, ambi mi mönö kewötme. Kewötketka kewö asuhuiga iyök mönö qet areŋ miaŋgöreŋ toroqeba ohoba alme: Kunöŋ yambuŋi (yaraŋi) 60 oŋgita azi mohotkö anömŋa malök. 10 Mewö maliga tosatŋan könaŋaŋgöra kewö naŋgöba jimakze: Yaŋön nup ölöpŋi ölöpŋi memba mala morö galöm köla goro eŋgiiga qariget. Ambazip kianŋi miriŋe köl öröba köyan köl eŋgiiga Kraistkö alaurupŋi sarakŋan kagetka uziŋini saŋgoŋda esuhuba yaka taweŋ eŋgiba malök. Wahöjaliŋ uruŋe malgeri, mi mem ölöwaka nup ölöpŋi pakpak memamgöra uruŋi pöndaŋ jöhöba jegep kinda malök. Malö mewöŋi mönö areŋ papianöŋ ohoba köyan köla malme.

11 Malö ambi namŋi qahö, yeŋgö qetŋini mönö qet areŋ papia miaŋgöreŋ kude alman. Mi albanak ewö, yeŋgö sihim kömbönaŋinan könöp jeiga azi kunbuk membingö mötmötŋini ahum köhöiiga Kraist silekmalek ak waŋgiba zioz nup mosötpepuk. 12 Mi mosöta mutuk Kraist tem kölbingöra jöjöpaŋ keuŋini aukŋe jim jöhögeri, mi qegetka pömsöm qeiga Kraistnöŋ keuŋini jim teköba gamu qem eŋgiiga önewat laŋ malbepuk.

13 Önewat laŋ mala toroqeba kewö bölibepuk: Miriŋi miriŋi laŋ liliköba nalö ayuhumegö könaŋi möt aŋgön kölbepuk. Toroqeba böliba luasö keu laŋ jiba keu bapŋe qahö anda nanŋini imbi-imbi wuataŋgöba nup meme tandöktandök lilikqilik akepuk. Inöŋ wainöŋ laŋ möndöba nup ölŋi qahö memba tosatŋi yeŋgöreŋ yuai mem sohobepuk. Keu tosatŋi yeŋgöreŋ yuaia qahöpmö, töndup mi öne laŋ jim sehibepuk.

14 Mewö akepuköra sihimni kewö möta jizal: Malö ambi namŋi qahö yeŋön mönö azi memba morö memba nup miriŋini galöm köla malgetka dop kölma. Mewö aketka tuarenjoŋninan jim bölim neŋgimamgö könaŋi jaruba mi qahö miwikŋaima.

15 Malö tosatŋan galöm qahö mem aŋguba lök Kraist andö qeba eta Satangö könaŋe wuataŋgöba malje. 16 Urumeleŋ könagesö neŋön mönö malö ambi ölŋi, tinitosolomŋini qahö maljei, mi köyan köl eŋgibingöra ahakzin. Miaŋgöra mötnarip ambi kungö tinitosolomurupŋan malöya akzei, yaŋön mönö mi köyan köl eŋgiba malma. Miaŋgö lömbötŋan mönö zioz kambu eŋgö qakŋine kude öŋgöma. Mewö.

Ziozgö jitŋememe mi kewö köyan köl eŋgibin:

17 Jitŋememeurup urumeleŋ könagesö ölöp galöm köl eŋgimakzei, eŋön mönö miaŋgö likepŋi meleŋda gödaqeqe öŋgöŋgöŋi kondel eŋgiba malme. Yeŋgöreŋök tosatŋan Buŋa keu jim asariba kusum eŋgimakzei, miaŋgöra mönö kötönŋini toroqeget öŋgöi eŋgiba malme. 18 Buŋa Kimbigö keu kunŋan miaŋgö könaŋi kewö jiza,

“Wit padigö kötŋi aka kamböŋi mendeŋbingöra bulmakau aziŋi waŋgitketka padi kambu qakŋe tiba tözözamgömakzawi, yaŋgö numbuŋi mönö kude muzupköme. Mewö gumohom waŋgigetka ölöp nene kitipŋi neiga dop kölma.”
(Miaŋgö dop kiamnöŋ böröjaŋ memba sömbup meköi qegetka kitipŋi waŋgiget neiga dop kölma.) Keu kun kewö ahöza,

“Kunöŋ nup meiga tosatŋan töwaŋi waŋgigetka dop kölma.”
19 Jitŋememe kungö sileŋe keu laŋ ala jim waŋgigetka yahöt me karöbutŋan mi qahö naŋgöbeak ewö, i mönö keu jakeŋe kude alman. 20 Denike yeŋön siŋgisöndok ahakzei, göŋön mönö i aukŋe tembula jim eŋginöŋga körek pakpak keugi mi möta siŋgisöndok akinbukö keŋgötŋini möta galömŋini mem aŋgumakŋe.

21 O Timoti, keu ohoba jim kutum gihizali, mi mönö tem köla wuataŋgöba malman. Azi me ambi kun kude ek soriba tosatŋi kude qepureim eŋgiman. Miaŋgöra kungö keuŋi mi qeljiŋe laŋ kude jöhöman. Ambazip körek pakpak mönö öröröŋ kewöta ak eŋgiman. Mewö akŋangö keuŋi mi mönö Anutu, Kraist Jisös aka Suep garataurup sarakŋi yeŋgö jemesoholŋine jiba mi jöjöpaŋ keunöŋ jöhönöŋga mötpi dop kölma.

22 Tosatŋi yeŋgö siŋgisöndokŋinan göhö qake öŋgögetka gamu miwikŋaibanbuk. Miaŋgöra kunŋan “Kembugö nup memam,” me “Urumeleŋ kambu toroqemam,” jizawi, yaŋgö könaŋamŋi mutuk qahö kewöta börögi zilaŋzilaŋ yaŋgö qakŋe kude ala kötuetköm waŋgiman. Nangak sarakŋi malmangöra mönö galöm köl aŋguba malman.

23 O Timoti, gi nalö tosatŋi kawöl ahum gihiiga “Yaiŋmaiŋ!” qeta ahakzan. Miaŋgöra mönö oyök kude nemanmö, wain o tosatŋi mewöyök nenöŋga kömöŋgoki bauköiga amqema.

24 Keu kun kewö: Ambazip tosatŋan siŋgisöndok aketka zilaŋ aukŋe asuhugetka ambazipnöŋ eka qeljiŋe jim tekögetka nalö kewöŋe gamuŋinambuk kinje. Mewö kinjemö, tosatŋan siŋgisöndok aka tölapköba mala könaŋgep Anutugö jeŋe aŋgotketka aukŋe asuhui jim teköm eŋgima. 25 Ambazip nup ölöpŋi aködamunŋambuk memakzei, nup miaŋön mewöyök nalö kewöŋe aukŋeyök ahöza. Nup ölöpŋi tosatŋi aukŋe qahö ahöbeak ewö, mi mönö mewöyök tölapŋe ahöbingö osiba könaŋgep asuhugetka ekin. Mewö. a, b 

Copyright information for `BMU