a12-13Apo 20.1

2 Corinthians 2

Mutuk eŋgöreŋ kaba siksauk akeraŋgöra jim eŋgibiga gamuŋini möta wösöbirik aket. Miaŋgöra eŋgöreŋ kabiga kunbuk mewö akepuköra möta urunan keu jöhöba köna anangö areŋni uteköyal. Miaŋgö könaŋi kewö: Gamu qem eŋgibi wösöbirik akeak ewö, daŋön ölöp uruni qesawölim niŋgiiga kunbuk sösöŋgai miwikŋaibileŋak? Jaŋjuŋinaŋgöra aka jim eŋgibi wösöbirik akeak ewö, tosatŋan sösöŋgai ak niŋgibingö osigetka nanak mewöyök wösöbirik aka malbileŋbuk. Miaŋgöra zilaŋ kaba gamu qem eŋgimamgö töközal.

Kimbi köhöikŋi mi könaŋi kewögöra ohoba alal: Nöŋön söŋgaibiga körek eŋön mönö nömbuk söŋgaime. Nöŋön iŋini körek mewö uruyahötŋi qahö möt narim eŋgizal. Nöŋön tosatŋi eŋgöra sösöŋgai miwikŋaimamgö mötzalmö, kabiga könaŋamŋini sohoi laŋ malgetka eŋgeka wösöbirik akileŋbuk. Wösöbirik akŋegöra kimbi mi qahö ohoyalmö, önöŋi qahö uru jöpaköm eŋgimakzali, iŋini miaŋgö könaŋi möt yakömegöra mönö keu köhöikŋi mi kimbinöŋ ohoyal. Urunan eŋgöra aka waimanjat ketaŋi möta köŋjiliŋ qakŋe tata imbilnan eriga ohoyal. Mewö.

Kunŋan köna oŋgiröhi, yaŋgö siŋgisöndokŋi mönö mosötme.

Kunöŋ siŋgisöndok aiga gamu aka wösöbirik asuhuyöhi, miaŋön mönö nöŋgö qakneyök qahöpmö, körek eŋgö qakŋine mewöyök öŋgöyök. Keu mi jim qaribi sohobapuköra mönö kewöyök jimam: Gamu miaŋön mönö körek dop köl eŋgii miaŋgöra gwötpuk me borom kun wösöbirik aket. Könagesö ölŋan keuŋaŋgö likepŋi meleŋ waŋgigeri, miaŋön mönö dop köl waŋgii uruŋi kunbuk meleŋnök.

Nalö kewöŋe gamu aka wösöbirik keta bölökŋi möriga miaŋön jem keleleŋgöbapuköra mönö lömböt kude toroqem waŋgime. Lömböt qahöpmö, mönö kapaŋ köla siŋgisöndokŋi mosöta urukölalep ak waŋgime. Miaŋgöra kewö uru kuŋgum eŋgizal: Iŋini mönö keu jöhöba urukalemŋini kunbuk toroqeba köhöiba kondel waŋgiba malme. Nöŋön kimbini mi kewögöra ohoyal: Iŋini nöŋgö keuni pakpak tem köla esapesapnöŋ kin köhöime me qahö tem köla töteköba etme, miaŋgö könaŋi kewöta mötmamgöra möta mi ohoyal.

10 Iŋini kungö siŋgisöndokŋi mosötze ewö, nöŋön mi mewöyök mosöt waŋgizal. Bölöŋi ak niŋgiyöhi, miaŋgöra qahö mötpi öŋgözapmö, eŋön kunbuk ölöwaka mindirim aŋgumegöra mötzal. Miaŋgöra bölöŋamŋi mi lök Kraistkö jeŋe ölŋa mosöt waŋgibiga teköyök. 11 Satanöŋ areŋi ala silenöŋ alal könaŋi könaŋi ahakzawi, miaŋgöra tönpin qahö maljal. Miaŋgöra Satanöŋ luhut al neŋgibapuköra aka azi miaŋgö siŋgisöndokŋi mönö mosöt teköme. Mewö.

Polnöŋ Troas mala Taitusgöra waimanjat mörök.

12 Nöŋön Kraistkö Ölöwak Buŋaŋi jim sehimamgöra aka Troas taonöŋ anbiga Kembunöŋ naŋgu öröm niŋgiiga nupŋi miaŋgöreŋ memamgö amqeyök. 13 Mewö amqeyökmö, urumeleŋ alani Taitus qahö miwikŋaibi keuŋini qahö jii möralaŋgöra aka waimanjat möta luainöŋ urune qahö ahöyök. Miaŋgöra yaizökzökŋini jiba eŋgömosöta Taitus jarumamgöra Masedonia prowinsnöŋ anal. Mewö. a 

Kraistnöŋ ösum neŋgiiga luhut alakzin.

14 Neŋön Anutu kewögöra möpöseimakin: Kraistkö buŋa aka welenŋi qeinga Anutunöŋ nalö dop suahö galöm ewö aka neŋguaŋgiriga anda köiraŋ kölakzin. Luhutnöŋ plaua juraŋaŋgö wörönŋi ölöpŋi memba kaiga mörakzin. Miaŋgö dop Anutunöŋ nam köl neŋgiiga denike denike liliköba Kraistkö könaŋi jim asariinga aukŋe asuhum sehiba aniga gölme dop mörakze. Miaŋgöra Anutu möpöseimakzin.

15 Miaŋgö könaŋi kewö: Neŋön ambazip Suep mire öŋgömei aka könöp sianöŋ gemei, yeŋgö sutŋine anda kainga wörönini sarakŋi mörakze. Kraistkö könaŋi jim sehiinga Anutunöŋ nupninaŋgö wörönŋi möt ölöwahakza.

16 Könöp sianöŋ gemei, yeŋön Buŋa keunini mötketka miaŋön keuŋini jim teköiga kömum köhöimegö möta mönö qamötkö mumu wörönŋi ewö akza. Suep mire öŋgömei, yeŋön Buŋa keunini mötketka oyaeŋkoyaeŋ eŋgimapkö möta mönö malmal kömbönaŋaŋgö wörönŋi umköhöwakŋambuk ewö akza. Daŋön nup mewöŋi memawaŋgö dop akza? 17 Ambazip tosatŋi gwötpukŋan mönö ni ewö qahö akze. Yeŋön malmalŋini naŋgöbingöra möta Anutugöreŋ keu mi kölköl-örörö ewö laŋ memba ala jimakze. Nöŋön yeŋgö dop qahö ahakzalmö, Kraist qekötahöba köŋbiŋ mosöta uruni sarakŋi aiga kinjal. Anutunöŋ melaim niŋgiyöhi, mi möta yaŋgö jemesoholŋe kinda Buŋa keuŋi törörök jim sehimakzal. Mewö.

Copyright information for `BMU