2 Corinthians 5

Polnöŋ Suepkö oyaeŋkoyaeŋ koumnöŋ anmamgö mörök.

1Neŋön keu ki mötzin: Gölme silegö opo seri koumŋe malinga kömupnöŋ mi köndeŋniga etmawi, Anutunöŋ nalö miaŋgöreŋ silegö miri dölökŋi nanŋak meiga Suepnöŋ ahömawi, mi buŋa qem neŋgiiga miaŋgöreŋ malbin. Silegö miri qainŋi kun mi teteköŋi qahö köhöikŋi ahöm öŋgöma.

2Keu mi möta nalö sutŋe kiaŋgöreŋ letotpingö osoŋgom köla Suep malmal mirinine öŋgöbingö möta awöweŋgömakzin. 3Suepnöŋ öŋgöinga sile qainŋi kunöŋ löŋgöt neŋgii tatpini, nalö miaŋgöreŋ mönö uŋa sile meinga kunŋan aukŋe qahö miwikŋaim neŋgima.

4Gölme sile ki qekömegöra qahö mötzinmö, Suep malmal mirinine öŋgöba silenini dölökŋi membingö awöweŋgömakzin. Sile ki kömumawi, mi malmal köhöikŋan gwahöri qahöwahiga Anutunöŋ salupŋe oyaeŋkoyaeŋ sileya neŋgimapkö mötzin. Miaŋgöra nalö kewöŋe seri koum kiaŋgö uruŋe mala urulömbötnini bisiba letotpingö osoŋgom ahakzin. 5Anutu nanŋak Suep sile membingöra möta miwikŋaim neŋgiba Uŋa Töröŋi urunine aliga oyaeŋkoyaeŋ akingö dangunuŋi akza.

6Miaŋgöra neŋön mönö nalö dop ewebibininambuk saitiŋgit mal köhöiba kewö mörakzin: Sileninaŋgö malmal koumnine ki malbini, nalö miaŋgö dop eu Suep malmal mirinine Kembu Jisösbuk qahö malbin. 7Nalö kewöŋe Suep mirigö öröyuaiŋi qahö uba eŋgehakzinmö, töndup mi möt nariba miaŋgö dop aka memba malinga nam köl neŋgimakze. 8Miaŋgöra ewebibininambuk köhöiba sileninaŋgö malmal koumŋi ki mosötpingö kapaŋ köla mirinini ölŋi eu öŋgöba Kembubuk malbingö mötzin.

9Miaŋgöra mirinine ki me eu malbini, neŋön mönö urunini Kembu Jisös uruölöwak ak waŋgibingöra jöhöba miaŋgöra köhöiba kapaŋ kölakzin. 10Miaŋgö könaŋi kewö: Körek neŋön mönö Kraistkö keu jakeŋe asuhubin. Gölmenöŋ silebuk mala Kembugö jitsihitŋi dopŋe tem kölini me qötömötötaŋ ahini me önewat laŋ malini, nanŋak mönö keunini mi kewöta miaŋgö dop töwanini nanŋök nanŋök neŋgii buŋa qem aŋgubin. Mewö. a 

Ambazip Anutubuk urumohot akŋegö nupŋi memakzin.

11Kraistkö keu jakeŋe kinbini, neŋön mi möta Kembugö mötmötŋi oŋgitpinbuköra keŋgötnini mörakzin. Mi mötzinaŋgöra ambazip könanini sarakŋi mötmegöra kapaŋ köla uru kuŋgum eŋgimakzin. Könaninan mönö Anutugö jeŋe aukŋe ahöza. Nöŋön tilipqilip azia qahö, eŋön mewöyök mi uruŋinan möt yakömegöra möta jörömqöröm akzal.

12Mewö jiba nanini jim ölöwak keunini mötmegöra kunbuk qahö kapaŋ kölakzalmö, könanini miyök jim asarim eŋgimamgö mötzal. Iŋini mi möta ölöp neŋgö silenini mi böhi takapulakaŋi yeŋgö jeŋine möpöseigetka dop kölma. Yeŋön yuai eŋgö uruŋine ahözawi, miaŋgöra qahöpmö, sileŋinaŋgö yuaiŋi jenöŋ ekingö dop akzawi, mönö miaŋgöra aiweliköba nanŋini sileŋini memba öŋgöba keu laŋ jimakze. Miaŋgöra keuni ki jizal. Eŋön yeŋgö keuŋini gilipitŋi (ambetakŋi) mötzeaŋgöra mönö neŋgö könanini jim asariba törörök meleŋ eŋgime.

13Eŋön nöŋgöra “Urusohop tandök ewö akza,” jiget ewö, nöŋön mönö Anutu nupŋaŋgöra aka urukönöp aka malal. Tosatŋan nöŋgöra kewö jize, “Urukönöpŋi qahöpmö, keuŋi ösöŋök jimakza,” Mewö jize ewö, mi mönö iŋini bauköm eŋgibingöra aka ahal. Miaŋgöra ölum eŋgubapuk.

14Miaŋgö könaŋi kewö: Kraistnöŋ jöpaköm neŋgimakzawi, miaŋön mönö kondota kuŋgum neŋgiiga nupŋi memakzin. Azi mohotnöŋ körek neŋgö salupnine neŋgö kömupnina kömuyök. Miaŋgöra siŋgisöndokninaŋgö likepŋi qahö meleŋ neŋgiyökmö, körek neŋgö siŋgisöndoknini mosöri toroqeba köhömuŋi qahö akzin. Keu mi möt asariba möt yaközini, Kraistkö urukalemŋan mönö körek nini jölöŋgöba nupŋi membingöra kuŋgum neŋgimakza.

15Yaŋön mönö kewögöra körek neŋgö salupnine kömuyök: Gölmenöŋ jebuk maljini, neŋön mönö malmalnini toroqeba naninaŋgörök malbinbuk. Mewö qahöpmö, kun neŋgöra aka kömumba wahöröhi, malmalnini mönö yaŋgöra tököba ala malbingöra kömuyök.

16Miaŋgöra urunini meleŋnini, nalö miaŋgöreŋök könahiba ambazip silesile qahö kewöt eŋgizin. Ambazip kun gölmenöŋ silikŋaŋgö dowök qahö möt kutum waŋgizin. Mutuk Kraist kewöta möringa gölme azi töhön ahökmö, nalö kewöŋe möt kutum waŋgiinga Suepkö Amötqeqe Tonina akza. 17Miaŋgöra kunŋan Kraistpuk qekötahöza ewö, yaŋön mönö ahuahu dölökŋi ahuba dömŋi dölökŋi akza. Malmal walŋan ayapköiga malmal dölökŋan mönö salupŋe asuhum waŋgiza.

18Mewö maljapmö, yuai pakpak miaŋgö kondotkondot Toŋi mi Anutu. Yaŋön Kraist melaiiga töwanini qeba neŋgömeiga Anutu nanŋambuk urumohot akingö könaŋi möwölöhöyök. Köna mewö asuhuiga Anutunöŋ nup neŋgiiga neŋön ambazip Anutugö alaurupŋi akŋegöra jölöŋgöba kuŋgum eŋgimakzin.

19Anutubuk urumohot akingö könaŋi kewö: Kraistnöŋ eta gölmeŋi gölmeŋi neŋgö töwanini qeiga dop köli Anutunöŋ neŋgömeiga alaurupŋi ahin. Köna oŋgita mala korini, siŋgisöndok mieŋgö keuŋini qahö oyoŋda mötmöriba likepŋi qahö meleŋ neŋgiyök. Anutugö alaurupŋi ahinga möt narim neŋgiba Kraistkö töwagöra aka Anutubuk urumohot akingö Buŋa keuŋi mi börönine alök.

20Mi aliga Kraistkö jitŋememeurupŋi akzin. Anutunöŋ keu saŋep al neŋgii miaŋgö dop ambazip uruŋini kuŋgum eŋgimakzin. Kraistkö jitŋi memba kapaŋ köla kewö qesim eŋgimakzin: Mönö Kraistkö töwaŋi buŋa qem aŋguba Anutugö alaurupŋi akŋe. 21Anutunöŋ körek neŋgö siŋgisöndokninaŋgö keuŋi jim teköba likepŋi meleŋda Kraist siŋgisöndok kun qahö ahöhaŋgö qakŋe ali öŋgöiga salupnine sihimbölö mörök. Kraistkö sihimbölöŋi miaŋgöra aka yaŋgöreŋ qekötahöinga Anutunöŋ ölöp keunini jim teköi solanibin. Mewö.

Copyright information for `BMU