a9Sum 112.9;
b10Ais 55.10

2 Corinthians 9

Mönö urumeleŋ alaurupŋini bauköm eŋgime.

Anutugö ambazip sarakŋi alabauk moneŋ eŋgimegöra ohomamgö mötzalmö, iŋini keu mi lök möta miaŋgöra qahö osize. Iŋini alabauk akingö sihimŋinan ahui mötze. Nöŋön mi möta eŋgö sileŋini mi miaŋgöra Masedonia urumeleŋ ambazip yeŋgö jeŋine möpöseiba kewö jial, “Korint aka Akaia urumeleŋ alaurup tosatŋan mönö yambu emuneyök könahiba Judia alabauk ak eŋgibingö jöjöröba malje.” Mewö jibiga eŋgö urukönöpŋinaŋgöra mötketka keu miaŋön mönö kuŋgum eŋgiyök. Miaŋgöra könagesö ölŋi yeŋgö uruŋinan mönö amqeba alabauk akingö urukönöp aket.

Eŋgö sihimŋinan ahui mötzemö, töndup neŋakurupni karöbut ki melaim eŋgizal. “Korint yeŋön mönö moneŋ tokobingöra jöjöröba malje,” mewö jial aka keu miaŋgöra eŋgö sileŋini möpöseial. Keu miaŋön omaŋi aiga gwötpukŋan ekepukmö, keuŋinaŋgö dop moneŋ ölŋa algetka kahaimök tari körekŋan mewö eŋgekŋegöra mötzal.

Keu miaŋön omaŋi aiga moneŋinan qahö kahaimök tari öne malgetka Masedonia neŋakurup tosatŋan nömbuk kaba mewö miwikŋaim eŋgibeak ewö, nöŋön mönö eŋgöra aka gamu miwikŋaibileŋbuk. Tem kölmegö möt narim eŋgiba malbiga ölŋi qahö asuhubawak ewö, iŋini mönö mewöŋanök keuŋini omaŋaŋgöra aka gamu miwikŋaibepuk.

Miaŋgöra urumeleŋ alaurupnini karöbut mi uru kuŋgum eŋgimamgö mötpi dop köli kewö jial, “Iŋini mönö qeljiŋe Korint yeŋgöreŋ anda naŋgönaŋgö naluk ketaŋi almegö keu jöhögeri, areŋ mi wuataŋgöba al tekömegöra mönö kuŋgum eŋgime. Mewö aketka alabauk nalukŋini mi kik-kukŋambuk ekbonep qakŋe qahöpmö, mönö sakalakŋi aka amqeba gwötpuk alme. Mi mindirigetka zioz köwenöŋ kahaimök tari kabiga ölöp membin.” Mewö jial.

Kötŋi mönö amqeba gwötpuk qesiŋda gilme.

Keu ki mönö mötmöriba malme: Nene kötŋi awamŋanök qesiŋda giljawaŋön mönö ölŋi mewöyök awamŋanök mema. Nene kötŋi gwötpuk qesiŋda giljawaŋön mönö ölŋi mewöyök gwötpuk mema. Miaŋgöra gwötpuk algetka Anutunöŋ salupŋe gwötpuk eŋgima. Iŋini nanŋök nanŋök nalukŋini mönö uruŋinan jöhögeraŋgö dop alakŋe. Sösöŋgainöŋ amqeba mözöközöröŋ ambazip kalem eŋgizei, Anutunöŋ mönö i jöpaköm eŋgimakza. Miaŋgöra nalukŋini kunŋan kuŋgum eŋgizawaŋgöra aka uruyahöt qakŋe kude alme. Mi kik-kukŋinambuk kude alme.

Uruawam qakŋe kötönŋini gwötpuk algetka Anutunöŋ mönö köhöiba kalem möriamŋi pakpak mem sehim eŋgimakŋa. Mewö eŋgiiga malmal pakpak miaŋgöreŋ yuaigöra osimei, mi pakpak mönö nalö dop buŋa qem aŋgugetka dop köl eŋgimakŋa. Mewö aiga nup ölöpŋi könaŋi könaŋi mi ölöp megetka ölŋi keleŋmaleleŋ asuhuma. Ekbonep mosöta naluk ketaŋi ketaŋi alakzei, mi Buŋa Kimbi keu ki ohoget ahözawaŋgö dop akze,

“Yaŋön amqeba kalemŋi kalemŋi mendeŋda ambazip wanapŋi eŋgimakza.
Ahakmemeŋi diŋdiŋi kik-kukŋi qahö miaŋön mönö nalö teteköŋi qahö Anutugö jeŋe ahöm öŋgöma.”
10 Anutunöŋ qesiŋ gilgil azigöra nene kötŋi waŋgiiga nene asuhui nemakzini, yaŋön mönö nenegö mözöközöröŋ ahakŋei, mi mewöyök eŋgimakŋa. Mi eŋgii uruŋinan lolohoiga ölöp amqeba keu kötŋi qesiŋ sehiba gilgetka ahakmeme solanŋaŋgö ölŋi asuhui Anutunöŋ mi mem qarii sehimakŋa. 11 Mewö aketka Anutunöŋ mönö malmal pakpak miaŋgöreŋ sehiba kötuetköm eŋgiiga ölöwahakŋe. Mewö ölöp amqeba ambazip nalö dop geŋmoŋi qahö kalem gwötpuk eŋgimakŋe. Mewö aketka mi memba (Jerusalem anda) eŋgiinga ambazip gwötpukŋan kötönŋinaŋgöra aka Anutu möpöseigetka ölŋi eŋgöreŋ asuhumakŋa.

12 Naŋgönaŋgö nup ki memakŋei, miaŋön mönö Anutugö ambazip sarakŋan yuaigöra mözöközöröŋ aketka bauköm eŋgimakŋa. Miyök qahöpmö, miaŋgöra “Anutu saiwap!” keu mi gwötpuk jimegöra aka ölŋi eŋgöreŋ asuhumakŋa.

13 Miaŋgö könaŋi kewö: Naŋgönaŋgö nup ki memba mewö miaŋön mötnaripŋinaŋgö könaŋi kondelgetka ambazip gwötpukŋan mi eka Anutu tem kölmeaŋgöra möpöseim waŋgiba kewö jime, “Korint yeŋön mönö Kraistkö Ölöwak Buŋaŋi keunöhök qahö jim miwikŋaizemö, Polgö keuŋi geŋmoŋi qahö tem köla amqeba sakalakŋi aka neŋgöra aka tosatŋi pakpak yeŋgöra kalem jesöŋgö eŋgimakze.”

14 Mewö jiba eŋgöra köuluköba miaŋgöreŋ waikŋini gwötpuk mem eŋgiba kewö jime, “Ia! Anutunöŋ mönö kalem möriamŋi keleŋmaleleŋ Korint eŋgiiga urukalemŋinaŋgö ölŋi gwötpuk neŋgiget.” Mewö jigetka Anutugö kalemŋan aukŋe asuhuma. 15 O nini Anutu kalemŋaŋgöra aka möpöseimakin. Yaŋgö kalemŋi Jisös Kraistnöŋ mönö qetpuk sorok akza. Naŋgönaŋgö almeaŋgö keuŋi mi mewö kaba teköza. a, b 

Copyright information for `BMU