a12Mat 10.33, Luk 12.9
b19Jaŋ 16.5

2 Timothy 2

Kraist Jisösgöra mönö bim qeba malman.

O mötnarip nahöni Timoti, gi mönö Kraist Jisösbuk qekötahöba kalem möriam uruŋe böŋ qeba köhöiba kinman. Nöŋön Buŋa keu kusum gihibiga gwötpukŋan neka naŋgöba jiget mötnöŋi, mi ambazip möt narim eŋgieŋgigö dop akzei, mönö yeŋgö buŋaya ahömapköra al eŋgiman. Mewö al eŋginöŋga ahöi ölöp ambazip tosatŋi toroqeba kusum eŋgimeaŋgö dop akŋe.

O Timoti, gi mönö Kraist Jisösbuk kinda yarö aziŋi aködamunŋambuk aka kapaŋ köla köhöikŋanök bim qeba malman. Aŋgösirip ak gihimei, miaŋgö sihimbölöŋi mönö möta mökösöŋda bisiba malman. Yarö azigö tandökŋi kewö: Suahö galöm bohonŋinan azi eŋgömeiga yarö kambugö areŋnöŋ aŋgota anda kaba nup töp memba maljei, yeŋön mönö körek galömŋinan jim kutumakzawaŋgö dop tem köla akingö jöjöröba kinje. Mewö kinda nanŋini malmalgö naŋgönaŋgögöra yuai kun qahö memba malje. Uru deŋqeŋ qahö malje.

Miaŋgö dopkeuŋi kun kewö: Mönahot aŋgolat azinöŋ aoŋgitnöŋ aŋgota jimkutukutu galömgö keuŋi oŋgita ösumŋan laŋ anjawi, yaŋön mönö aködamunŋambuk qahö akŋa. Yaŋgö nöröpŋe luhut alalgö ila kun qahö kölgetka gema. Miaŋgöra gi mönö diŋdiŋanök anman. Mewöŋanök kölkömöt azinöŋ nup lömbötŋi meiga ölŋi asuhuiga mutuk anda jeŋi qeba neiga dop kölma. Tosatŋan löwörigeri, yeŋön yaŋgö andöŋe kame. Gi mönö miaŋgö dop köhöiba nup memba malman. Keu ohozali, mi oyoŋnöŋ lömböriiga Kembunöŋ mönö mötkutukutu gihiiga mi pakpak ölöp möt asariman. Miaŋgöra mi mönö uru könömge ala mötmöriba malman.

Mönö Jisös Kraist mötmöriba malman. Nöŋön Ölöwak Buŋa jim asarimakzali, Jisösnöŋ keu miaŋgö dop kiŋ Deiwidkö gwölönarökŋa ahuba Amötqeqe Toŋi aiga Anutunöŋ mem gulii kömupnöhök wahörök.

Nöŋön Ölöwak Buŋa keu kapaŋ köla jim asariba aŋgösiripkö sihimbölöŋi mötpiga kegwek-kahasililiŋ azi ewö kösö gwarö mem niŋgigetka tatzal. Mewö tatzalmö, Anutugö Buŋa keuŋi mi mönö qahö jöhöba gwaröhöget. 10 Könaŋi miaŋgöra aka nöŋön sihimbölö pakpak möta mökösöŋda köhöiba kinjal. Anutunöŋ ambazip nanŋaŋgöra möwölöhöm eŋgiyöhi, nöŋön mönö yeŋgöra aka kapaŋ köla bim qeba maljal. Kraist Jisösnöŋ amöt qem eŋgii yeŋön mewöyök letota oyaeŋkoyaeŋ akŋegöra mötzal. Uruŋini meleŋda malme ewö, mönö Suepkö asakmararaŋnöŋ öŋgöba teteköŋi qahö köhöiba mala mal öŋgöme. 11 Keu ki mönö pöwöwöm köhöikŋi akza,

“Nini urunini walŋan yambuk mohotŋe kömui maljin ewö, mönö mewöŋanök yambuk köhöiba malbin.
12 Yambuk mohotŋe sihimbölö möta mökösöŋda maljin ewö, mönö mewöŋanök yaŋgö bemtohoŋ uruŋe yambuk galömkölköl akin.
Nini i qaŋ köljin ewö, yaŋön mönö mewöŋanök qaŋ köl neŋgiba neŋgehöröŋ kölma.
13 Nini andö qem waŋgiinga likepŋi meleŋ neŋgimapkö keu jöhöi ahözawi, yaŋön mi qeapkömamgö osima.
Mindiŋqindiŋ aka nanŋi könaŋi utekömamgö qötötaŋgömakza.
Miaŋgöra peksek aka keunini pöndaŋ qahö wuataŋgöbin ewö, yaŋön mönö töndup (misila) keuŋi pöndaŋ wuataŋgöba miaŋgö dop ak neŋgima.” Mewö. a 

Anutugö Buŋa nup azi kewö aka malman:

14 O Timoti, keu ki ölum eŋgubapuköra mi mönö jim gulim eŋgiba Anutugö jemesoholŋe kewö jim kutum eŋgiba malman: Mötnaripkö keu imbiŋi imbiŋi mi mönö meleŋqeleŋda möndömkösök kude akŋe. Jitnakölik mönö qahöpmahöp bauköm neŋgimakzapmö, tosatŋan goranora keu mewöŋi möta eŋololoŋ aketka mötnaripŋinan sohoi ayuhubepuk. 15 Göŋön mönö Buŋa nupkö esapesap könaŋi könaŋi mi luhut alnöŋga Anutunöŋ geka “Dop köljan,” jimapköra kapaŋ köla kinman. Gi Kraistkö nupköra gamu kude möta malmanmö, Buŋa keu ölŋi mönö törörök mendeŋda uruŋini kuŋgum eŋgiba malman.

16 Gölmegö keu oyoŋdewedewet omaŋi omaŋi mi mönö yaköriba andö qeman. Tosatŋan mi sehiba jiba mala mewö miaŋön gölmegö aŋgöjörakŋe qekötahöba Anutu toroqeba nönöŋgan aka kahapmahap ahakze. 17 Uzi köhöikŋi (qetŋi kensö) miaŋön busu siribuk qem qariba yöhöba anakzawi, yeŋön miaŋgö dop keu omaŋi jiba miaŋön ambazip mem bölim eŋgimakze. Yeŋgö kambunöŋ azi yahöt qetŋiri Himeneus aka Filetus maljahot. 18 Yetkön keu ölŋaŋgö könaŋi mosöta jaŋjuŋ aka keu sinŋi kewö jimakzahot, “Urumeleŋ ambazip neŋön lök guliba wahöta maljin. Miaŋgöra könaŋgep kömupnöhök kunbuk qahö guliba wahötpin.” Mewö jiba tosatŋi eŋololoŋ mem eŋgiyohotka mötnaripŋinan bölimakza.

19 Mewö bölimakzapmö, Anutunöŋ tandö pöwöwöm köhöikŋi kuŋguyöhi, miaŋön mönö töndup qahö uruba kinja. Miaŋgö muŋgemŋi mi kewö ohoget ahöza, “Kembunöŋ nanŋi buŋaŋi akzei, mi ölöp möt kutum eŋgiza.” Muŋgemŋi kun kewö, “Ambazip Kembugö qetŋi memba qetzei, yeŋön körek mönö ahakmeme bölöŋi qem yaköriba malme.”

20 Miri ketaŋi miaŋgöreŋ jout, kimbut, alnene, umnene könaŋi könaŋi ahöza. Tosatŋan ipnöŋ aka gwaköm gölmenöŋ memeŋi, mi nalö dop memba nupnöŋ alakzin. Tosatŋan goul aka silwönöŋ memeŋa. Aködamunŋinambuk mewöŋi mi sösöŋgai nalöŋeyök nupnöŋ alakzin. 21 Miaŋgö dop kunŋan keu omaŋi mosöta nanŋi köl könjörat mem aŋguzawi, yaŋön mönö kimbut goulnöŋ memeŋi kun ewö akŋa. Toŋan i memba nup aködamunŋambuknöŋ ali memakŋa. Mi meiga töhötmöriamŋambuk aiga Ketaŋamŋan yaŋgöra söŋgaimakŋa. Anutunöŋ mem sarahim waŋgiiga titiŋgitŋi kinda nup ölöpŋi pakpak memamgö jöjöröba kinma.

22 Sepguli malmalgö sihim kömbönaŋi bölöŋan galöm ak gihibapuköra mönö galöm mem aŋguba malman. (Nupkahö ölŋan etpapuköra mi jizal.) Esapesapnöŋ öröm gihimakzei, mi mönö qizingöba andö qeba malmal kewöŋi malmangöra kapaŋ köla malman: Ambazip uru sarakŋaŋgö qakŋe Kembu bauköm eŋgimapköra qerakzei, yembuk mönö ahakmeme diŋdiŋi wuataŋgöba Anutu törörök möt nariba ölŋa jöpaköm aŋguba luainöŋ malme.

23 Tosatŋan kezapjupjup keu jiba oyoŋdewedewet ala jitnakölik aketka goranora aŋgururuk asuhumakza, mi ölŋa mötzan. Miaŋgöra mi mönö yaköriba andö qeba malman.

24 Kembugö nup meme azi akzawaŋön mönö aŋgururuk akŋawaŋgö dop qahöpmö, ambazip körek guŋbönjönjöŋ qakŋe ak eŋgiba amqeba kusum eŋgiba malma. Aŋgösirip ak waŋgigetka mi köhöiba mökösöŋda malma. 25 Tosatŋan tuarenjoŋ ak waŋgigetka i ölöp uruluai qakŋe mutulaŋgöba mindiŋgöm eŋgimakŋa. Mewö ak eŋgiiga Anutunöŋ uru mölöwörim eŋgiiga ölöp Buŋa keu möt kutuba uruŋini meleŋbeak. 26 Tuarenjoŋ ambazip yeŋön Bölöŋi Toŋaŋgö mötöp simbanöŋ tötekögetka gwaröhöm eŋgii jitŋi tem köla ahakze. Mewö aka imbiŋini möta urumötmötŋini ahuiga yaŋgö kösönöhök lolohoba etpeak. Mewö. b 

Copyright information for `BMU