a34Dut 10.17

Acts 10

Korniliusnöŋ Pitö ohola uruŋi meleŋnök.

Taon qetŋi Sisaria miaŋgöreŋ suahö galöm kianŋi kun qetŋi Kornilius malök. Yaŋön yarö kambu bahöŋi kun qetŋi “Italigö yarö kambu” qetkeri, miaŋgöreŋ yarö azi 100 yeŋgö galömŋina malök. Yaŋön saiwaurupŋi pakpak yembuk Anutu göda qeba waikŋi memba möpöseiba malget. Mewö malgetka Juda ambazip wanapŋi yeŋgöra kalem sehisehiŋi eŋgiba Anutu qösösök (qörörök) köuluköba malök. Mare kunöŋ 3 kilok miaŋgö dop aiga Kembunöŋ Kornilius kutum wasöriga imut kun ehök. Imut törörök eka miaŋgöreŋ Anutugöreŋ garata kunŋan miriŋe öŋgöi ehök. Garata miaŋön öŋgöba “Kornilius!” jiba qetŋi qerök.

Mewö qeriga garata ehiba sömbuŋi möta jiyök, “Ketaŋamni, wanigöra ki kazan?” Mewö jiiga meleŋnök, “Gi köuluköba malnöŋga keugi Anutugöreŋ öŋgöiga möri ölöwakza. Gi ambazip wanapŋi kalemŋi kalemŋi mendeŋ eŋgimakzani, mi Anutunöŋ möta aŋgön köla göhöra mötmöriba melaim niŋgiiga kazal. Miaŋgöra mönö dölki kolek alnöŋga Jopa taonöŋ aniga azi qetŋi Saimon, qetŋi kun Pitö qetzei, ia waŋgita kame. Yaŋön sömbup sileŋaŋgö nup meme azi qetŋi Saimon yaŋgö mire köwet jitŋe miaŋgöreŋ malja.”

Suep garatanöŋ Korniliusgöra keu mewö jibagun mosöta anök. Mosöta aniga welenqeqeŋi yahöt etkoholi kayohot. Kayohotka yarö azi kun kösutŋeyök kapaŋ köla Anutu göda qeba malohori, i mewöyök oholi kayök. Kagetka garatagöreŋ keu mi körek jii mötketka melaim eŋgii Jopa taonöŋ anget. Mewö.

Kembunöŋ Pitö kutum wasöriga imut ehök.

Azi yeŋön könanöŋ angetka miri giaŋii taon dopdowigetka silim bibiŋe miaŋgöreŋ Pitönöŋ miri uruŋi kun eu miaŋgöreŋ öŋgöba kinda köuluköyök. 10 Kinda köuluköba nenegö kömumba yuai nemamgö möta jii ohoget. Ohogetka nalö miaŋgöreŋ Kembugö alburupŋan qeiga tata imut kun kewö ehök: 11 Suepnöŋ aŋaŋiiga könde ketaŋi kun erök. Könde mi opo tuatŋi ketaŋaŋgö tandök ewö ahök. Garata yeŋön yuai miaŋgö waŋgömŋi 4 miaŋgöreŋ memba naŋgöbeak, miaŋgö tandök ewö gölmenöŋ erök. 12 Yuai miaŋgö uruŋe sömbup könaŋi könaŋi tatket. Sömbup tosatŋan köna 4:ŋan tiba anakze. Tosatŋan wösönöŋ ölölöŋgöba anakze. Mewöyök neiŋi neiŋi könakemba bölbölgöba anakzei, yuai mewöŋi mewöŋi mi könde miaŋgö uruŋe mohotŋe etket. 13 Etketka miaŋgöreŋ qet kun asuhuba keu kewö jii mörök, “Pitö, gi mönö wahöta yuai ki qeba ohoba nenöŋ.”

14 Mewö jii mörökmö, Pitönöŋ jiyök, “O Kembu, mewö qahö kötökŋi! Mi dönqizinŋambuk. Ni nalö kunöŋ yuai aŋgöjörakŋambuk mi kude neal. Ni miaŋgöra imbiloŋloŋ mötzal.”

15 Mewö jiiga qet miaŋön kunbuk asuhuba yaŋgöra jiyök, “Anutunöŋ yuai jim könjörari ahözawi, göŋön miaŋgö qetŋi aŋgöjörakŋambuk mewö qetnöŋga qahö dop kölja.” 16 Yuai mewöŋi mi kunbuk asuhui indimŋi karöbut ahök. Indimŋi karöbut aiga miaŋgöreŋök könde mi kunbuk örögetka Suepnöŋ öŋgöyök.

17 Pitönöŋ imut mi eka miaŋgö könaŋaŋgöra köŋkuŋ aka mötmamgö möt bibihiba tarök. Mewö tariga nalö miaŋgöreŋök Korniliusnöŋ azi melaim eŋgii kaba Saimongö miri jaruba miaŋgöra qeqesi aka miwikŋaiba kaŋgota miri naŋguŋe kinget. 18 Miri naŋguŋe kinda kewö qeta qesiget, “Saimon qetŋi alaŋi Pitö qetzei, yaŋön miri kiaŋgöreŋ malja me qahö?”

19 Pitönöŋ toroqeba imut miaŋgö könaŋaŋgöra möt bibihiba tariga Uŋa Töröŋan kewö jii mörök, “Mötnöŋ, azi karöbutŋan kaba gi jarum gihize. 20 Nöŋön azi mi melaim eŋgibiga ki kaze. Miaŋgöra mönö dölki wahöta geba uruyahöt mosöta yembuk anman.” 21 Mewö jiiga Pitönöŋ azi mieŋgöreŋ geba jiyök, “Mötket, iŋini azi jaruzei, nöŋön mia akzal. Mönö denöwögöra kaze?”

22 Jiiga meleŋget, “Suahö galöm Kornilius mi azi diŋdiŋi akza. Yaŋön Anutu waikŋi memba möpöseiba mali Juda ambazip kambu körek yeŋön göda öŋgöŋgöŋi qem waŋgimakze. Anutugö garata töröŋi kunŋan asuhum waŋgiba kewö jim kutui mörök, ‘Gi mönö kolek ala Pitö köl öröm waŋginöŋga mirige öŋgöba keu uruŋeyök jimawi, mi kezap ala mötman.’” 23 Mewö meleŋgetka öröm eŋgii miri uruŋe öŋgögetka köyan köl eŋgii köisirik tata ahöget. Ahögetka miri giaŋiiga Pitönöŋ wahöta yembuk anök. Jopa taon miaŋgöreŋök ala tosatŋi eŋgömeiga yambuk mohotŋe anget. Mewö.

Pitönöŋ kian ambazip yembuk tokoget.

24 Mohotŋe anda sömaŋi mohot ahöba anda mala Sisaria taonöŋ aŋgotket. Aŋgotketka Korniliusnöŋ yeŋgö mamböt aka malök. Mewö mala tinitosolom aka alaurupŋi ölöpŋi mi köl öröm eŋgii miriŋe tokoba tatket. 25 Aŋgota Pitönöŋ mire öŋgömamgö aiga Korniliusnöŋ wahöta eta jölöŋi jiba könaŋe geba sipköm waŋgiyök. 26 Sipköm waŋgiyökmö, Pitönöŋ böröŋe memba kököbihiiga wahöri kewö jiyök, “Mönö wahötnöŋ, nia kun gölme aziyök akzal.”

27 Mewö jii yambuk eraum möta miri uruŋe öŋgöyohotka ambazip gwötpukŋan tokoba tatkeri, mi eŋgehök. 28 Eŋgeka kewö jii mötket, “Iŋini Juda ambazip neŋgö könaŋamnini mötze. Juda nini ambazip kianŋi eŋgö mire öŋgöba embuk köisirik tatatkö soŋgo ahöi osizin. Mi osizinmö, Anutunöŋ keuŋi kun kondel niŋgiba kewö jiyök, ‘Göŋön ambazip iŋi waiŋi yeŋgö qetŋini mi aŋgöjörak imbiloŋloŋambuk mewö kude qetman.’ 29 Miaŋgöra iŋini kolek ala köl öröm niŋgigetka nöŋön qahö qetala kaba kaŋgotzal. Kaŋgota kewö qesizal: Iŋini mönö wuanöŋgöra kolek ala köl öröm niŋgiget? Mi ölöp jiget mötpi.”

30 Mewö jiiga Korniliusnöŋ meleŋnök, “Ni mare kunöŋ nalö kewöŋe 3 kilok miaŋgöreŋ mirine tata köuluk nup memba mala kotpi merak sömaŋi 4 akza. Köuluk nup memba malbiga miaŋgöreŋök azi kun sileötaŋi asakmararaŋambuk miaŋön asuhuba wösöne kinök. 31 “Wösöne kinda kewö jiyök, ‘Kornilius, gi köuluköba malnöŋga keugi Anutugöreŋ öŋgöiga möri ölöwakza. Gi kalemŋi kalemŋi ambazip wanapŋi mendeŋ eŋgimakzani, mi Anutunöŋ möta aŋgön köla göhöra mötmöriba melaim niŋgiiga kazal. 32 Miaŋgöra mönö dölki kolek alnöŋga Jopa taonöŋ aniga azi qetŋi Saimon, qetŋi kun Pitö qetzei, ia waŋgita kame. Yaŋön sömbup sileŋaŋgö nup meme azi Saimon yaŋgö mire köwet jitŋe malja.’

33 “Mewö jiyöhaŋgöra aka nöŋön miaŋgöreŋök kolek albiga göhöreŋ kaget. Göŋön keuni möta kazanaŋgöra uruni ölöwakza. Kembunöŋ keu pakpak jimangö jim kutum gihiyöhi, göŋön mi ölöp jinöŋ mötpin. Nini pakpak dölki miaŋgöra tokoba Anutugö jemesoholŋe ki tatzin.” Mewö.

Pitönöŋ Korniliusgö mire Buŋa keu jiyök.

34 Korniliusnöŋ mewö jiiga Pitönöŋ könahiba kewö jiyök, “Aha! Anutunöŋ ambazip tosatŋi qahö eŋgek soriba tosatŋi qahö qepureim eŋgimakzapmö, dop mohotnöŋ kewöt neŋgimakza. Yaŋgö jeŋe kunŋan aŋgöjörakŋambuk qahö akza. Nöŋön mi dölki ölŋa möt kutuzal.

35 “Mewö qahöpmö, ambazip kambuŋi kambuŋi körek yeŋgö sutŋine denike yeŋgöreŋök kunŋan Anutu waikŋi memba möpöseiba aiakaŋan köna diŋdiŋi wuataŋgözawi, yaŋön mönö Anutugö jeŋe dop kölja. 36 Jisös Kraistnöŋ ambazip körek neŋgö Kembuya aka luai qem neŋgimakzawi, Anutunöŋ Buŋa keuŋi mi Israel könagesö neŋgöreŋ ali kayök. Buŋa miaŋön kaiga nini miaŋgö Ölöwak Buŋaŋi jim asariba maljin. 37 Jonöŋ ambazip uruŋini kuŋguba kewö jiyök, ‘Iŋini mönö uruŋini meleŋgetka nöŋön o melun mem eŋgimam.’ Mewö jiiga miaŋgö andöŋe keu mi Galili prowinsnöŋ könahiba jiget sehiba anda Judia prowinsnöŋ aŋgota körek dop kölök. Iŋini mi lök mötze.

38 “Anutunöŋ Uŋa Töröŋi Nazaret azi Jisösgö uruŋe mokoiga kukösum buŋa qem aŋguba gölme dop liliköba malöhi, mi yambuk kiniga anda ambazip ak kömum eŋgiyök. Bölöŋaŋgö Toŋan ambazip ösumŋan jöhöba öröm eŋgii gegeri, yaŋön mi pakpak mem ölöwak eŋgim teköyök. 39 Yuai mi Juda neŋgö gölmenöŋ aka Jerusalem sitinöŋ aka memba maliga ip kembaŋe ala qeget kömuyök. Nini mi pakpak eka naŋgöba jiba dangunuŋi aka kinjin. 40 Kömumba ahöi sömaŋi karöbut aiga Anutunöŋ mem gulii wahörök. Wahöta indimŋi gwötpuk ambazip asuhum eŋgiyök.

41 “Yaŋön ambazip kambu pakpak yeŋgöra qahö asuhuyökmö, Anutunöŋ mutuhök nini möwölöhöm neŋgiiga Jisösnöŋ kömupnöhök wahöta malöhi, nalö miaŋgöreŋ yambuk keu eraum möta nene aŋgum nem malini, mönö neŋgöra asuhuiga nini miaŋgö keuŋi naŋgöba jiba kinjin. 42 Mewö kininga Jisösnöŋ kewö jim kutum neŋgiyök, ‘Anutunöŋ kuŋgum niŋgiiga nöŋön ambazip maljei aka kömugeri, yeŋgöreŋ jimtekötekö Toŋina akzal. Miaŋgöra eŋön mönö nöŋgö könaŋamni mi ambazip kambu dop yeŋgöra naŋgöba jim asariba malme.’ 43 Ambazip denike yeŋön Jisös möt narim waŋgiba qetŋi qerakzei, Anutunöŋ mönö qet mi möta yeŋgö siŋgisöndokŋini mosöta saŋgoŋmakza. Yaŋgö könaŋamŋi mewö ahözawi, mi kezapqetok ambazip körek yeŋön naŋgöba jim asariba ohoget ahöza.” Mewö a 

Uŋa Töröŋan kian ambazip yeŋgöreŋ erök.

44 Pitönöŋ keu mewö jibayök kiniga Uŋa Töröŋan ambazip kezap ala mötkeri, yeŋgö uruŋine geyök. 45 Anutunöŋ Uŋa Töröŋ kalemŋi mi kian ambazip yeŋgö uruŋine mewöyök mokoi geyöhi, mi Pitögö alaurupŋan eka auruget. Juda ambazip sileŋine Anutugö aiwesökŋi yandigetka uruŋini meleŋda Jisös möt nariba Pitö wuataŋgöba kaba tatkeri, mieŋön mönö auruba kewögöra welipköget: 46 Yeŋön kantri tosatŋi yeŋgö keuŋini murutŋi murutŋi könahiba jiba Anutu möpöseiget. Miaŋgöra welipkögetka Pitönöŋ kewö qesiba jiyök, 47 “Yeŋön Uŋa Töröŋi mi neŋön ahin ewö aŋgön köla buŋa qem aŋguzei, mi mötzin. Miaŋgöra i ölöp o melun mem eŋgiinga dop kölma. Mi ahinga daŋön qetal neŋgibawak?”

48 Mewö jiba jim kutum eŋgiiga Pitögö alaurupŋan kinda Jisös Kraistkö qetŋe Kornilius saiwaurupŋi o melun mem eŋgiget. O melun mem eŋgigetka Pitö aŋgön köl waŋgigetka toroqeba silim tosatŋi yembuk malök. Mewö.

Copyright information for `BMU