c4Eks 12.1-27

Acts 12

Herodnöŋ Jeims qeba Pitö kösö mire alök.

Nalö miaŋgöreŋ kiŋ Herodnöŋ
Kiŋ Herod Agripa I (mutukŋi) yaŋön (yara) yambu 37-44 miaŋgöreŋ Palestain pakpak galöm köl eŋgiba malök.
urumeleŋ könagesö sesewerowero mem eŋgibingö möta jiiga urumeleŋ ambazip tosatŋi eŋgimemba jöhöm eŋgiget.
Kiŋnöŋ jiiga Jongö datŋi Jeims mi bimgö sou ketaŋan qegetka kömuyök.

Mewö jii kömuiga Juda ambazip tosatŋan mi mötket ölöwahiga ehök. Mi eka miaŋgöra toroqeba jiiga Pitö mewöyök memba jöhöget. Yuai mi beret yistŋi qahöpkö kendon nalöŋe jiiga asuhuyök. Miaŋgöra kiŋnöŋ kewö jiyök, “Nöŋön ak-kömukömu kendon
kendon mi Nei keunöŋ Pasowa. Nanine keunöŋ qetŋi alaŋi mi walöŋsörak aka goukölköl. Israel ambazip yeŋön Ijipt mala naŋguŋini sepnöŋ mirigetka Anutugö garatanöŋ neŋgehoriba neŋgoŋgita morö mutukŋini qahö eŋgui kömuget.
teköiga Juda yeŋgö keu jakeŋe almam.” Mewö jiba jii kösö mire alget. Algetka yarö azi 16 yeŋön sutŋine kambu 4 köla nalö utekutek aketka azi 4:ŋan sundan suŋgem asak kinda galöm mem waŋgiba malget.
Pitö mewö galöm mem waŋgiba malgetka kösö mire ahöyökmö, urumeleŋ könagesö yeŋön sundan dop yaŋgöra aka Anutu kapaŋ köla köuluköba malget. Mewö. c 

Suep garatanöŋ Pitö pösata waŋgita erök.

Köuluköba malgetka ak-kömukömu (Pasowa) kendon teköiga suŋgem miaŋgöreŋ yarö azi yahötŋan Pitö tapep (muŋgamuŋga) yahötnöŋ jöhöm köhöiyohotka sutŋire gaun ahöyök aka wahibuk tosatŋan naŋgu andöŋe kinda kösö miri galöm meget. Kiŋ Herodnöŋ miri giaŋiiga Pitö waŋgita keu jakeŋe almamgö mötmöriba areŋ ali gaun ahöget. Gaun ahögetmö, Kembugö garata kunŋan wölaŋ asuhuba Pitö qöhöröŋe kini kösö mirigö uruŋi asarim teköi Pitögö nambulŋe qeba jiyök, “Mönö zilaŋ wahötnöŋ.” Mewö jii tapep (muŋgamuŋga) yahötŋan miaŋgöreŋök Pitögö böröŋeyök öne sulohot. Sulohotka garatanöŋ jii mörök, “Mönö opogi jöhöba köna esugi utnöŋ.” Mi möta mewö ahök. Mi aiga toroqeba jii mörök, “Mönö malukugi kölnöŋ geiga ni nuataŋgöba kaman.”

Mewö jii möta miri uruŋi mosöta wuataŋgöyök. I wuataŋgöba anökmö, garatanöŋ yuai ahöhi, mi ölŋa asuhuyök me qahö, yaŋön miaŋgöra möri jaŋjuŋ ahök. Yaŋön gaun ahöba imut ehöhi, miaŋgö tandöktandök möri ahök. 10 Miri uruŋi mosöta naŋgu mutukŋe galöm memba kinohori, mi etkoŋgita naŋgu kunöŋ aŋgota etkoŋgita öne kutuba anda kösö miri sileŋaŋgö ain kiripoŋe aŋgorohot. Aŋgorohotka naŋgu köhöikŋi ketaŋi miaŋön mönö nanŋök öne taliga yaigepŋe siti köna numbuŋe geyohot. Geba köna namŋi strit kun toroqeba anohotka garatanöŋ wölaŋ Pitö mosöta sök alök.

11 Sök aliga Pitögö uruŋi tohoiga kewö jiyök, “O Kembunöŋ mönö garataŋi melaii kaba Herodgö böröŋeyök meköm niŋgiza, mi mötzal. Juda ambazipnöŋ nöŋgö silene yuai asuhumapköra mambötzei, yaŋön mönö yuai pakpak miaŋgöreŋök bohoni jöhöza. Nöŋön dölki mi ölŋa möt kutuzal.”

12 Mewö möt kutui asariiga Jongö namŋi Mariagö mirinöŋ göröken anök. Jon miaŋgö qetŋi kun Mak qetket. Miri miaŋgöreŋ ambazip gwötpukŋan tokoba Anutu köuluköba malget. 13 Mewö malgetka Pitönöŋ kaba söndaknöŋ kinda naŋgunöŋ qeyök. Naŋgunöŋ qeiga welenqeqe ambi qetŋi Roda yaŋön kaba “Gi daŋön?” jiba qesiyök. 14 Qesiba kinda Pitögö jölŋi möt kutuba “I-ia kazan!” jiba söŋgaiba luhuba naŋgu qahö öröba ösumŋan miri uruŋe öŋgöba jiyök, “Pitönöŋ kaba naŋgunöŋ kinja.” 15 Jii möta yaŋgöra “Urugi sohoi jizan,” jiget. Jigetmö, yaŋön bohon köla “Keu ölŋa jizal!” jiyök. Mewö jiiga jiget, “Mi mönö Pitögö garataŋan kinja.”

16 Mewö eraum mötketmö, Pitönöŋ naŋgu qebayök kiniga öröba eka auruget. 17 Aurugetka böröŋan söpsöp ala ölöŋ almegö jiyök. Jiba Kembunöŋ kösö mireyök waŋgiri yaigepŋe eröhi, kösohot mi jiyök, “Iŋini buzup ki mönö bisop Jeims aka urumeleŋ alaurup tosatŋi yeŋgöra jigetka mötme.” Mewö jiba eŋgömosöta miri kungen anök. Mewö.

Pitönöŋ kösö miri mosöriga Herodgö irimŋi seholiyök.

18 Miri giaŋiiga yarö azi yeŋön Pitö jaruba “Denike sömuniba sök ala anja?” jiba miaŋgöra kahasililiŋ aka waimanjat ketaŋi mötket.
azinöŋ ölöŋ kölbawak, azi wahibuk mi mönö eŋgugetka kömuzema. Rom gawman nupkö areŋi mewö. Miaŋgöra kahasililiŋ aka waimanjat ketaŋi mötket.
19 Herodnöŋ mewöyök Pitö miwikŋaimegö jii jarum bibihiba qahö miwikŋaigetka azi wahibuk Pitögö galöm megeri, mi keu jakeŋe ala gwötpuk qesim eŋgiba jim teköba eŋguaŋgita eŋguget kömumegö jim kutum eŋgiyök. Miaŋgö andöŋe Judia prowins mosöta Sisaria taonöŋ geba miaŋgöreŋ malök. Mewö.

Anutunöŋ kiŋ Herod kitipŋi waŋgii kömuyök.

20 Fonisia prowinsgö taon qetŋiri Taiö aka Saidon yeŋön nenegö nupŋini membingö osiba kiŋ Herodkö kantri yeŋgöreŋök nene yuaiŋini bohonŋi memba malget. Mewö malgetka Herodkö irimŋi seholiiga Taiö Saidon kerök ak eŋgiba nene eŋgimegö soŋgo alök. Miaŋgöra yeŋön mindiriba jitŋememeurupŋini melaim eŋgigetka kambu köla kiŋ Herod ekingöra anget. Angetka jembonŋi qetŋi Blastus jakömbuak miriŋaŋgö galömŋan i mutuk eŋgehök. Eŋgehiga jiget, “Nini keu jim solaniinga luai ahumapkö qesibingöra kazin.” Mewö jiba jim mölöwörim ak waŋgigetka jiyök, “Ölöp keuŋini kötöngöba andöŋine kinmam.”

21 Mewö jiiga kiŋnöŋ keu meleŋ eŋgimamgö nalö mem eŋgiiga miaŋgöreŋ tokogetka nanŋi sileŋi meŋölöba kiŋ azi kembugö malukuŋi köla eta jakömbuak dum tatatŋe tata yeŋgöra sösöŋgai keu jiyök. 22 Jiiga ambazip kambu yeŋön möta kewö jiba qetket, “Keu mi Anutugöreŋ keuya. Mi gölme azigö keuya qahö.” 23 Mewö qetketmö, kiŋnöŋ mewö aka Anutugö qetbuŋaŋi qaŋ köla qahö möpöseiba nanŋi möri öŋgöyök. Miaŋgöra Kembugöreŋ Suep garata kunŋan miaŋgöreŋök qei döhönöŋ yöhösii kömuyök. 24 Mewö asuhuyökmö, Anutugöreŋ Buŋa keu mi jiba malgetka töhötmöriamŋambuk aka sehiyök.

25 Antiokia siti yeŋön Barnabas aka Sol naŋgönaŋgö misin nup kun
yeŋgöreŋ naŋgönaŋgö moneŋ mi memba anda Jerusalem urumeleŋ könagesögö jitŋememeurup yeŋgö böröŋine alohot. Miaŋgöra qetŋi naŋgönaŋgö misin nup kun jizin. Apo 11.30
etkigeri, yetkön mi Jerusalem mala meköyohot teköyök. Mi teköiga Jon qetŋi kun Mak qetkeri, i waŋgita mohotŋe Jerusalem mosöta Antiokia sitinöŋ liliŋgöba kaget. Mewö.

Copyright information for `BMU