c8Apo 6.5, 8.5;
d10Apo 11.28
e23-24Jaŋ 6.13-21;
f25Apo 15.29
g29Apo 20.4

Acts 21

Polnöŋ Jerusalem anök.

Yaizökzök jiba neŋgömosötketka opo seri öröba möröreŋgögetka luhutnöŋ naŋgöi anda gölme jölanŋi qetŋi Kos miaŋgöreŋ göröken diŋdiŋanök anda aŋgorin. Aŋgota ahöba wahöta toroqeba gölme jölanŋi qetŋi Rodos miaŋgöreŋ anin. Miaŋgöreŋök toroqeba Lisia prowinsgö miriŋi qetŋi Patara miaŋgöreŋ aŋgorin. Aŋgota kinda waŋge kun Fonisia gölmenöŋ anmamgö ahiga mi miwikŋaiba miaŋgöreŋ öŋgöinga opo seri öröba möröreŋgögetka luhutnöŋ naŋgöi anin.

Anda mala gölme jölanŋi qetŋi Saiprus miaŋgö kösutŋe kaba eka mösököba Saut görökenök oŋgita toroqeba luhutnöŋ naŋgöiga Siria prowins göröken anin. Anda “Waŋgegö inapŋi mi Taiö taonöŋ anda waŋgenöhök memba albin,” jigeraŋgöra miaŋgöreŋ anin. Miaŋgöreŋ anda waŋge mosöta gein. Geba gwarekurup miwikŋaim eŋgiba yembuk toroqeba wehön 7 malin. Miaŋgöreŋ malinga Uŋa Töröŋan sölölöhöm eŋgii Pol Jerusalem sitinöŋ anbapuköra galöm meme keu jiget. Mi jigetmö, nini wehön 7 mi yembuk malin teköiga eŋgömosöta köna anin. Köna anbin jiinga yeŋön körek pakpak anöm-moröurupŋinambuk neŋgubula taon mosöta sileŋe kaget. Taon sileŋe kaba köwet sakŋe eta simin köla Anutu köuluköin. Köuluköba yaizökzöknini jim aŋguinga Jerusalem anbingöra waŋgenöŋ öŋgöinga yeŋön miriŋine liliŋgöget.

Pol aka nini yaŋgö suŋgurumurupŋan mewö Taiö mosöta toroqeba anda miri qetŋi Tolemes miaŋgöreŋ aŋgota waŋge mosörin. Waŋge mosöta urumeleŋ alaurup jölöŋini jiin aka yembuk wehön mohot malin. Mala ahöba wahöta eŋgömosöta gölme köna anda Sisaria taonöŋ kaŋgorin. Jerusalem urumeleŋ kambu uruŋe urukuŋgukuŋgu azi (ewanjelis) sewen meköm eŋgigeri,
Aposol nup meme boŋ 6 miaŋgöreŋ azi 7 mi meköm eŋgigetka naŋgönaŋgö nup aka ewanjelis nup mi mindiriba meget.
yeŋgöreŋök kun qetŋi Filip yaŋön Sisaria malök. Neŋön Sisaria kaŋgota yaŋgö mire anda tata ahöin.
Filipkö böraturupŋi 4 malget. Anutunöŋ ambi seram mieŋgö uruŋine kezapqetok keu jijigö mötmöt kalem aliga malget.

10 Neŋön Sisaria taon miaŋgöreŋ wehön gwötpuk toroqeba malin. Miaŋgöreŋ malinga Juda prowinsnöhök kezapqetok azi kun qetŋi Agabus erök. 11 Neŋgöreŋ eta Polgöreŋ örigit memba miaŋön nanŋi köna böröŋi jöhöba kewö jiyök, “Uŋa Töröŋan kewö jiza, ‘Juda jitŋememe yeŋön örigit kiaŋgö toŋi mi Jerusalem sitinöŋ kewö jöhöba kian kantrigö galöm
Kian kantri yeŋgö böröŋine alget, mi Rom gawman yeŋgöra jiza.
yeŋgö böröŋine alme.’”
12 Mewö jii möta nini aka urumeleŋ alaurup miaŋgöreŋ malgeri, yeŋön mohot Polnöŋ Jerusalem anbapuköra uleta qetal waŋgiin. 13 Qetal waŋgiinga kewö meleŋda jiyök, “Iŋini mönö denöwö akze? Sahöta keu jiba mewö miaŋön uruni munjuratze. Nöŋön Jerusalem anbi gwaröhöm niŋgimegöra jöjörözal aka miyök qahöpmö, Kembu Jisös qetŋaŋgöra aka nuŋgugetka kömumbileŋak, nöŋön mönö miaŋgöra mewöyök jöjöröba kinjal.”

14 Mewö jiiga mölöwörim waŋgibingö osiba urunini bönjöŋ köliga kewö jiin, “Mi mönö Kembugö jitsihitŋaŋgö dop asuhuma.”

15 Sisaria taonöŋ malin nalö mi teköiga amgöba mözözömgöba eŋgömosöta anda Jerusalem sitinöŋ öŋgöin. 16 Sisaria miaŋgöreŋök gwarek tosatŋan mewöyök neŋgö köinini kaget. Kaget yeŋön kewö jiget, “Iŋini Saiprus azi qetŋi Nason yaŋgö mire ahöba malme.” Mewö jiba neŋguaŋgita yaŋgö mire anin. Nasonöŋ mutuhök uruŋi meleŋda Jisösgö gwarekŋi aka mala korök. Mewö. c, d 

Polnöŋ Jerusalem sitinöŋ kaŋgorök.

17 Neŋön Jerusalem aŋgoringa urumeleŋ alaurup yeŋön neŋgömemba söŋgaiba jölöŋnini jiget. 18 Jölöŋnini jigetka ahöba wahöta Polnöŋ nembuk bisop Jeims ekingö möta anin. Aninga urumeleŋ könagesögö jitŋememe yeŋön körek pakpak miaŋgöreŋ kaŋgota tatket.

19 Tatketka Polnöŋ jölöŋini jiba kösohotŋi alök. Anutunöŋ köiput aka nam köl neŋgiiga kian kantri yeŋgö sutŋine anda liliköba misin nup meinga ölŋi ahuyöhi, miaŋgö kösohotŋi mesiŋda mohot mohot mi körekŋanök jii mötket. 20 Mi jii möta Anutu möpöseigetka azi ipŋi kunŋan kewö jiyök, “Pol alanini, Juda ambazip tausenŋi tausenŋi yeŋön Jisös möt nariba uruŋini meleŋda töndup körek pakpak toroqeba Mosesgö Köna keu mi törörök wuataŋgöbingö kapaŋ kölje. 21 Mewö kapaŋ köljemö, göhö buzupki mi kewö laŋ jiget mötket, ‘Juda ambazip deŋda kian kantri yeŋgö sutŋine anda maljei, göŋön liliköba i kewö kusum eŋgiba maljan, jimakze, “Iŋini mönö Mosesgö köna keu andö qeba Anutugöreŋ aiwesök mi azi morosepsep sileŋine kude yandime aka Juda ahakmeme tosatŋi mi kude wuataŋgöme.” ’

22 “Mi jimakzeaŋgöra aka göŋön kazani, yeŋön mi möta miaŋgöreŋök öröba kambu ketaŋi köla tokobeak. Miaŋgöra nini waimanjat möta mönö denöwö ahinga dop kölbawak? 23 Miaŋgöra neŋön dölki keu göhöra jibini, göŋön mönö miaŋgö dop akŋan. Azi 4:ŋan yuai akingö keuŋini Anutugöreŋ jiba jöjöpaŋ keunöŋ jöhöget. 24 Mi keunöŋ jöhögetmö, moneŋgöra osiba mamböta sutnine ki malje. Miaŋgöra göŋön mönö i eŋgömemba yembuk köl könjörat ak aŋguba yeŋgöra aka naluk alnöŋga dop köli ölöp nöröp jupŋini mitigetka keuŋini köhöima. Göŋön mewö aka Mosesgö Köna keu tem köla wuataŋgöba maljani, körek pakpak göhö könaŋamgi mi törörök eka möt asarime. Mi möt asariba göhöra keu jiget mötkeri, mi ölŋi kun qahö miwikŋaigetka omaŋi aiga kömuma. 25 Göhöreŋ keu kömumapmö, kian kantri yeŋön Jisös möt nariba uruŋini meleŋgeri, neŋön yeŋgöra keu kewö jöhöba kimbi ohoba alin anök, ‘Sömbup busuŋi bem lopioŋ yeŋgö naluk buŋa qeba könaŋine algetka ösumŋinan walöŋnöhi, mi mönö kude neme. Mewöyök sep me sömbup jölŋini qeqeŋi miaŋgö busuŋi mi kude neme. Serowilin kude akŋe. Yuai kanjamŋambuk 4 mi mönö mosöta andö qegetka dop kölma.’”

26 Jitŋememe yeŋön mewö jigetka Polnöŋ azi 4 mi eŋgömemba ahöba wahöta yembuk köl könjörat ak aŋguget. Ak aŋgugetka jöwöwöl jikenöŋ öŋgöba azi mohot mohot eŋgöra naluk ala jöwöwöl ohogetka köl könjörat nalöŋini tekömawi, miaŋgö nalö buzupŋi jii mötket. Mewö. e, f 

Jöwöwöl jikegö tohoŋ uruŋe Pol memba jöhöget.

27 Polnöŋ mi jii mötketmö, silim 7 mi tekömamgö aiga Juda tosatŋi Eisia prowinsnöhök kageri, yeŋön Pol jöwöwöl jikenöŋ öŋgöi eket. Eka ambazip kambu körek uruŋini kuŋgum eŋgiget wahöri Pol qeraköba meget. 28 Qeraköba memba kewö qetket, “Israel ambazip, mönö bauköm neŋgiget! Azi kiaŋön mönö gölmeŋi gölmeŋi liliköba miri dop kusum eŋgiba uruŋini kewö kuŋgum eŋgimakza: Iŋini pakpak mönö Israel ambazip kambu qetala mem bölim neŋgime. Nanine Köna keu mosöta jöwöwöl jikenine laŋ öŋgöba iwilele aka malme. Mewö kusum eŋgiba malök aka merak Grik azi mi tok waŋgita jöwöwöl jikenöŋ öŋgöiga miri kömbukŋi kiaŋön mönö töwiba kölköljiŋjiŋambuk akapuk.” 29 Mi kewögöra qetket: Efesus azi Trofimus yaŋön mutuk siti könanöŋ Polbuk ani etkeka kewö mötmöriget: Polnöŋ i waŋgiri mohotŋe jöwöwöl jikenöŋ öŋgöbahotpuk.

30 Mewö qetketka ambazipnöŋ eŋololoŋ aka ösumŋinan luluŋda kaba tokoba göjupmajup aketka qeburuŋ ketaŋi yöhöi siti körek dop kölök. Mewö aiga Pol qeraköba jöhöba jöwöwöl jikenöhök öröba yaigep eta miaŋgöreŋök jikegö kiripo naŋguŋi pakpak mi miaŋgöreŋök köla jöhöget. 31 Pol jöhöba qebingö kapaŋ kölgetka buzupŋi sehiba Rom yarö kambugö suahö galöm bohonŋi yaŋgö kezapŋe keu kewö geiga mörök, “Jerusalem pakpak yeŋön karim aka bim qeze.” 32 Mewö möta miaŋgöreŋök yarö azi kambu tosatŋi suahö galömŋinambuk eŋguaŋgita luhuba yeŋgöreŋ geget. Gegetka i eŋgeka Pol qegeri, mi mosötket.

33 Mosötketka suahö galöm bohonŋan sutŋine anda jim kutuiga Pol memba tapep (muŋgamuŋga) yahötnöŋ jöhöget. Jöhögetka kewö jiba qesim eŋgiyök, “Azi ki niŋia?” aiga “Wania aiga qeze?” 34 Qesim eŋgiyökmö, ambazip kambunöhök keu murutŋi murutŋi meleŋda laŋlaŋ qetket. Mewö laŋlaŋ qeta göju megeraŋgöra aka könaŋi törörök mötmamgö osiyök. Mi osiba miaŋgöra jim kutuiga Pol waŋgita yarö azi yeŋgö ain kiripo uruŋe anget. 35 Waŋgita angetka ambazip kambu ketaŋi yeŋön könaŋine eŋguataŋgöba kaba kewö qetket, “Mönö qeget kömuma. Yapmakek!” Mewö qetketka yarö azi yeŋgö ain kiripo naŋguŋe aŋgoriga könöpuk anda kaba göjupmajup ketaŋi akeraŋgöra aka gwötpuk lömböriyök. Miaŋgöra yarö azi yeŋön Pol memba aŋguba anget. Mewö. g 

Polnöŋ keuŋaŋgö likepŋi könahiba meleŋda jiyök.

37 Aŋguba kaba yarö azi yeŋgö sel uruŋe öŋgöbingö aketka Polnöŋ suahö galöm bohonŋi kewö qesim waŋgiyök, “Ni göhöra keu kun ölöp jimam me qahö?” Qesim waŋgiiga möta köŋkuŋ aka jiyök, “O, gi Grik keu mötzan me? 38 Miaŋgöra gi Ijipt azia akzan me qahö? Ijipt azi kunŋan uruwale tuarenjoŋ azi timbiŋinambuk 4000 mi eŋololoŋ ak eŋgiiga Rom gawman tuarenjoŋ aka bim karim könahiba aka eŋguaŋgiri gölme qararaŋkölkölŋe anget. Gi galöm azi mia akzan me qahö?”

39 Mewö jiiga Polnöŋ jiyök, “Ni Juda azia. Ni Silisia prowinsgö taon qetŋi Tarsus mötzani, mönö miaŋgöreŋ ahuba mala koral. Miaŋgöra qesim gihibi: Gi ölöp jinöŋga nöŋön ambazip kambu kieŋgöra keu jibi mötme.”

40 Mewö jiiga “Ölöp jiman,” jiiga Polnöŋ döpnöŋ kinda ambazip eŋgöra börö misiyök. Börö misiiga göju mosöta keu bök kingetka Hibru keunöŋ keu kewö jii mötket,

Copyright information for `BMU