Acts 25

Polnöŋ premiö Festusgö jeŋe keu likepŋi jiyök.

Festusnöŋ premiö aka prowins uruŋe aŋgota tariga wehön karöbut teköiga Sisaria taon mosöta Jerusalem sitinöŋ öŋgöyök. Öŋgöiga jike nup galöm bohonŋi aka Juda jitŋememe yeŋön jemesoholŋe kaŋgota Pol keu jakeŋe albingö jiba aröŋda kinget. Aröŋda kinda kewö jiba uletket, “O premiö, göŋön ölöp neŋön möringa dop kölmapköra jim tekönöŋga keu algetka Pol waŋgita Jerusalem sitinöŋ ki kame.” Yeŋön mutuk keu kewö jöhöba jiget, “Polnöŋ könanöŋ kaiga miaŋgöreŋ mönö qein kömuma.” Mewö jiba jöjöröba mönögeraŋgöra kaba uletket. Mewö uletketmö, Festusnöŋ kewö meleŋ eŋgiyök, “Pol mi Sisaria taongö kösö mire tari galöm kölje. Ni nanak nalö kude köriiga miaŋgöreŋ liliŋgöba anmamgö mötzal.” Mewö jiba toroqeyök, “Miaŋgöra azi miaŋön bölöŋi kun akawak ewö, ölöp eŋgö jitŋememeurup tosatŋan nömbuk Sisaria geba miaŋgöreŋ keuŋini sileŋe ala jim waŋgigetka mötmam.”

Mewö jiba wehön 8 me 10 miaŋgö dop Jerusalem sitinöŋ yembuk mali teköiga liliŋgöba Sisaria taonöŋ geyök. Geba ahöba wahöta miaŋgöreŋök keu jimtekötekögö dum tatatŋe tata jim kutuiga Pol waŋgita kagetka jeŋe kaŋgota kinök. Polnöŋ kaŋgota kiniga Juda jitŋememe yeŋön Jerusalem sitinöhök kageri, yeŋön liliköm waŋgiba kinda kazik qakŋe keu bölöŋi gwötpuk sileŋe ala jiget. Mi jigetmö, keuŋinaŋgö ölŋi mi kondelbingö osiget. Kazik keu öne jiba kingetmö, Polnöŋ mi qeapköba kewö jiyök, “Nöŋön yuai bölöŋi kun qahö ahal. Juda neŋgöreŋ Köna keu qahö qetalal. Jöwöwöl jike qahö mem töwial aka Rom sisa kiŋgöreŋ keugöra tuarenjoŋ qahö ahal.”

Mewö jiiga Festusnöŋ Juda yeŋön nanŋaŋgö mötket öŋgömapkö möta Pol kewö qesim waŋgiyök, “Silenöŋ alal keu ki jizei, gi ölöp miaŋgö likepŋi mi Jerusalem öŋgöba miaŋgöreŋ nöŋgö jemesoholne kinda jiman me qahö?”

10 Qesim waŋgiyökmö, Polnöŋ jiyök, “Rom sisa kiŋnöŋ jim kutuiga keu jake ki kuŋgugera ki kinbiga kewöt niŋgiba keuni jim tekönöŋga dop kölma. Ni Juda ambazip yeŋgöra bölöŋi kun qahö ahal. Mia nangak ölöp möt yaközan. Mönö Wuanöŋgöra kunbuk yeŋgöreŋ anbileŋak? 11 Bölöŋi kun qahö ahalmö, Köna keu kun qösököba yuai kun ak böliba miaŋgöra kömupkö buŋaya akileŋak ewö, ‘Nöŋön kömumbileŋbuk,’ jiba qahö ölöŋ köla anmam. Mi qahöpmö, yeŋön kazik keu öne töhöntöhön jiba keuŋinaŋgö könaŋi kondelbingö osize ewö, keu omaŋaŋgöra aka kunŋan nömimba yeŋgö böröŋine almapkö osima. Rom sisa kiŋnöŋ mönö keuni mindiŋgöba jim teköi diŋgima. Miaŋgöra nöŋön mönö yaŋgö jeŋe anmamgö köhöiba qesizal.”

12 Mewö jiiga Festusnöŋ jembonurupŋi yembuk qambaŋ keu jaruba kewöta kewö meleŋ waŋgiyök, “Gi sisa kiŋgöreŋ anmamgö möta qesizani, miaŋgöra mönö ölöp Rom anda yaŋgö jeŋe kinman.” Mewö.

Polnöŋ kiŋ Agripagö jeŋe kinök.

13 Wehön tosatŋi teköiga kiŋ Agripa aka nenŋi Bernaisi yetkön Festus eka gödaŋiri kondelbitköra Sisaria taonöŋ kayohot. 14 Kaba miaŋgöreŋ wehön gwötpuk malohotka Festusnöŋ Polgöreŋ keu mi kiŋbuk eraum möta kewö jiyök, “Filiksnöŋ azi kun qahö pösari kösö mire kiaŋgöreŋ tata malja. 15 Nöŋön Jerusalem anbiga Juda yeŋgö jike nup galöm bohonŋini aka jitŋememeurupŋinan nöŋgöreŋ kaŋgota kewö qesim niŋgiget, ‘Nini azi miaŋgö keu memba kainga göŋön mönö ölöp yaŋgö könaŋi kewöta keuŋi jim teköman.’

16 “Mewö qesim niŋgigetmö, nöŋön yeŋgöra kewö jibiga mötket, ‘Rom gawman neŋgöreŋ köna mi kewö: Kungö sileŋe keu bölöŋi ala jizei, nini ambazip kun yaŋgö keuŋi mi laŋ kude jim tekömakzin. Mutuk öröba keu jakeŋe alin kazikurupŋan kagetka likeplikep öröröŋ aröŋda kingetka keu sileŋe ala jim waŋgigetka likepŋi ölöp jima. Keu likepŋi jiiga mi kewöta ölŋi ahuiga miaŋgö dop ölöp keuŋi jim tekömakzin.’ 17 Yeŋön ki kaba tokogetka nöŋön nalö qahö köriiga ahöba wahöta miaŋgöreŋök jimtekötekögö dum tatatŋe tata jim kutubiga azi mi waŋgita kagetka nöŋgö jene kaŋgorök.

18 “Kaŋgorökmö, keu memba kageri, yeŋön liliköm waŋgiba aröŋda kinda keu sileŋe ala jim waŋgiget. Mewö aketka yuai bölöŋi kötökŋi kun akawak, mewö jimegöra mamböralmö, keu mewöŋi kun qahö jiget möral. 19 Mi qahö jiget möralmö, salupŋe azi mi qetala nanŋini mötnaripŋinaŋgö keu kembaŋi tosatŋi aka azi kun qetŋi Jisös yaŋgöra aŋgururuk aket. ‘Jisösnöŋ kömuyök,’ jigetmö, Polnöŋ ‘Guliba malja,’ jiba kapaŋ köla köhöiyök. 20 Mewö jiba kazik algetka nöŋön ‘Keu mewöŋi mi denöwö kewötpileŋak?’ jiba köna jaruba uruyahöt möral. Mi möta kinda kewö qesim waŋgial, ‘Silenöŋ alal keu jizei, gi ölöp miaŋgö likepŋi mi Jerusalem öŋgöba miaŋgöreŋ jibanak me qahö?’ 21 Qesim waŋgialmö, Polnöŋ Öŋgöŋgöŋamninaŋgö jeŋe anmamgö kapaŋ köla kewö qesiyök, ‘Mönö jinöŋga galöm köl niŋgigetka sisa kiŋgöreŋ anbiga keuni mindiŋgöiga diŋgima.’ Mewö qesiiga wahip azi jim kutum eŋgibiga galöm kölgetka tatza. Biaŋ melaim waŋgibiga sisa kiŋgö jemesoholŋe anma.”

22 Festusnöŋ mewö jiiga Agripanöŋ jii mörök, “Nia kun azi miaŋön keuŋi jii mötmamgö sihimŋi mötzal.” Jiiga meleŋnök, “Urangun ölöp keuŋi mötman.”

23 Mewö jiiga ahöba wahötketka kantrigö jembon, suahö galöm ketaŋi aka jitŋememe öŋgöŋgöŋi yeŋön kaba Agripa aka Bernaisi yetköra jura sorom jölŋire uta sösöŋgai liŋet köla köl öröm etkigetka keugö jake miri öŋgöŋgöŋi miaŋgö uruŋe aŋgotket. Festusnöŋ jim kutuiga Pol waŋgitketka miaŋgöreŋ kaŋgorök. 24 Polnöŋ kaŋgoriga Festusnöŋ wahöta kinda kewö jiyök, “Kiŋ Agripa aka azi ketaŋi pakpak nembuk ki tatzei, iŋini mönö azi ki eket. Juda ambazip kambu pakpak yeŋön yaŋgöra aka uruni kuŋguget. Sisaria taon kiaŋgöreŋ aka Jerusalem siti miaŋgöreŋ ölŋa keunöŋ kuŋgum niŋgiba qet gigilahöba kewö jiba malget, ‘Azi kiaŋön gölmenöŋ malmawaŋgö dop qahö. Mönö yapmakek!’

25 “Mewö qeta malgetmö, nöŋön kewötpiga yuai kun kömupkö buŋa akŋawaŋgö dop mi qahö ahök. Nöŋön könaŋi mewö miwikŋaiba ehalmö, nanŋak Rom Öŋgöŋgöŋamninaŋgö jeŋe ani keuŋi mindiŋgöiga diŋgimapköra kapaŋ köla qesiyök. Miaŋgöra keu jöhöba melaibiga Rom anma. 26 Rom sitinöŋ anmapmö, yaŋgöreŋ keu mi denöwö ohoba Rom azi kembunaŋgöra albi anbawak? Yaŋgöra keu laŋ jizemö, keu könaŋambuk kun mi törörök qahö möt asarizal. Miaŋgöra jibi waŋgita kaba kiŋ Agripa göhö jege aka iŋini tosatŋi kiŋgö andöŋe ki tatzei, eŋgö jemesoholŋine algetka kinja. Iŋini ölöp böröjaŋ memba keuŋi kewötketka ölŋi asuhui mönö mi möta ölöp kimbinöŋ ohobileŋak. 27 Azi kun kösönöŋ jöhöba keu jakeŋe alalgö keuŋi denöwö jizei, mi aukŋe jibingö osiba töndup öne melaibinbuk. Silik mi nöŋgö mötmötnöŋ kezapjupjup tandök ewö akza.” Mewö.

Copyright information for `BMU