a5Apo 23.6, Fil 3.5;
b9-11Apo 8.3, 22.4-5
c20Apo 9.20,28-29;
d23Ais 42.6, 49.6, 1 Kor 15.20

Acts 26

Polnöŋ keuŋaŋgö likepŋi kiŋ Agripagö jeŋe jiyök.

Mewö tatketka kiŋ Agripanöŋ Polgöra jiyök, “Gi ölöp nangahö keu likepŋi jinöŋga mötpi.” Mewö jiiga Polnöŋ kinda börö kutum waŋgiba nanŋi keuŋi aŋgön köla kewö könahiba jiyök,

“O kiŋ Agripa! Juda jitŋememe yeŋön keu silene ala jim niŋgizei, nöŋön keu pakpak miaŋgö likepŋi mi merak ölöp göhö jege aukŋe jimamgö simbawoŋ mötzal. Göŋön Juda neŋgöreŋ ahakmeme aka aŋgururuk keunini pakpak mi törörök möt yaközan. Miaŋgöra nöŋön ölŋa simbawoŋ mötzal. Mewö aiga qesim gihizal: Keu jimami, mi ölöp möta mökösöŋda kezap alman.

“Nöŋön Juda ambazip kambu uruŋe ahuba könakönahiŋeyök könahiba nani kantri ki aka sitinini Jerusalem miaŋgöreŋ mala koral. Miaŋgöra Juda ambazip pakpak yeŋön malmalni gwaböneyök denöwö kota malali, mi ölöp möt kutuze. Yeŋön könaŋamni nalö köröpŋi möt kutuze. Sihimŋini ahöi mi ölöp kewö naŋgöba jibeak: Nanine jike nup uruŋe Farisi pati neŋön asa yeŋgöreŋ jike mötmöt mi törörök kötökŋi wuataŋgöba maljin. Nöŋön mutuk yeŋgö kambu patinöŋ aŋgota Köna keu kapaŋ köla wuataŋgöba malal. Anutunöŋ ambösakonurupnini yeŋgöra jöhöjöhö keu alöhi, nöŋön miaŋgö ölŋi ahumapköra al mamböta jörömqöröm aka maljal. Miaŋgöra aka merak keu jakeŋe al niŋgigetka kinjal.

“Nanine Israel ambazip kambu 12 neŋön körek pakpak jöhöjöhö keu miaŋgö ölŋi asuhumapköra mambörakzin. Mi mamböta jörömqöröm aka qösösök (qörörök) suŋgem asak Anutu waikŋi memba möpöseimakzin. O Öŋgöŋgöŋamni, nöŋön jörömqöröm mewö ahakzalaŋgöra Juda jitŋememe yeŋön keu bölöŋi bölöŋi silene ala jim niŋgimakze. Anutunöŋ ambazip kömukömuŋi mem gulim eŋgii wahötmei, iŋini mi mönö denöwögöra aka qahö möt narize?

“Nanak mewöyök kewö mötmöriba malal, ‘Ni Jisös Nazaret azigö qetbuŋaŋi saŋgolbi qahöwakŋapköra bim gwötpuk qemamaŋgö dop akzal.’ Mewö mötmöriba kazik aka malal. 10 Kazik aka Jerusalem miaŋgöreŋ ölŋa bim qeba malal. Jike nup galöm bohonŋi yeŋön nam köl niŋgiget jim kutubiga Anutugö ambazip sarakŋi mi gwötpuk eŋgömemba kösö mire al eŋgiget aka tosatŋi kömumegö keu jigetka nöŋön mewöyök keu mi kötöngöba imbi köla (wout ala) malal. 11 Nalöŋi nalöŋi liliköba köuluk miri dop böröjaŋ mem eŋgibiga uruŋini meleŋgeri, mieŋön asuhuget. Asuhugetka Jisös qaŋ köla ilit waŋgimegöra kuŋguba töhöreŋ öröm ureim eŋgial. Mewö ak eŋgibiga ihileknöŋ könöpuk tauköba eŋgugetka sihimbölö kahasililiŋ möta malget. Urunan könöp jem sölöŋgöiga sesewerowero ak eŋgimamgöra köröwen kötökŋi kian kantrigö sitiŋi sitiŋi miaŋgöreŋ anda malal.” Mewö. a, b 

Polnöŋ uruŋi meleŋnöhaŋgö kösohotŋi jiyök.

Apo 9.1-19, 22.6-16

12 “Kaisilik mewö aka malbiga nalö kunöŋ jike nup galöm bohonŋi yeŋön nömbuk urumohot aka nam köl niŋgigetka Damaskus sitinöŋ anmamgöra könanöŋ anal. 13 O Öŋgöŋgöŋamni, nöŋön könanöŋ anbiga silim bibiŋe miaŋgöreŋ Suepnöhök asakmararaŋ kun wölaŋ erök. Eta wölbilik ewö asuhuba wehön jeŋi oŋgita asariiga ehal. Asak miaŋön mönö ni aka azi nömbuk anini, nini turum neŋgiyök. 14 Turum neŋgiiga körek tala gölmenöŋ eta kölin. Eta köla ahöinga nöŋgöra keu kun kaiga Hibru keunöŋ kewö jii möral, ‘Sol, Sol, gi wuanöŋgöra sesewerowero ak niŋgizan? Gi mönö bulmakau aziŋi ewö akanbuk. Toŋan gölme mözözamgömapköra bulmakau aziŋi kinoŋnöŋ jöhöi ösöŋ öröiga dop köljapmö, laŋ öröba könöpuk yaköriba öröm ureiiga kerösuap jitŋan uiga sihimbölö mörakza. Gi mönö miaŋgö dop laŋ luhuba nangi könisemgi öne töhön kutubanbuk.’

15 “Mi möta qesial, ‘O Kembu, gi daŋön?’ Qesibiga jiyök, ‘Ni Jisös sesewerowero qakŋe al niŋgimakzani, mönö mia akzal. 16 Mi akzalmö, ölöp wahöta kinöŋ. Ni aka yuai ekzani aka könaŋgep toroqeba asuhuba kondel gihimami, mi mönö naŋgöba jiba dangunu ewö kinda nöŋgö jitŋememeni aka weleni qeba malman. Gi nup mi memba malman. Nöŋön miaŋgöra aka asuhum gihizal. 17 Nöŋön mönö nangi Israel ambazip kambu yeŋgö böröŋineyök meköm gihimam aka kian kantri ambazip yeŋgöreŋ melaim gihibiga anmani, yeŋön guhubepuköra mewöyök galöm mem gihimam. 18 Nöŋön melaim gihibiga anda ambazip jeŋini metohonöŋga uruŋini meleŋda söŋaupnöhök asakŋe kaŋgotme. Jeŋini tohoiga imbiŋini meleŋda Satangö kukösumnöhök lolohoba Anutugö sel uruŋe kame. Mewö kaba möt narim niŋgigetka siŋgisöndokŋini saŋgoŋda mosötmam. Mosötpiga Anutunöŋ alaurupŋi tök kutum eŋgiiga sarakŋi akzei, mönö yeŋgö sutŋine aŋgota dum tatatŋini memba oyaeŋkoyaeŋ aka malme.’ Jisösnöŋ mewö kutum nuasöta jiyök.”

Polnöŋ urugö nupŋaŋgö kösohotŋi jiyök.

19 “O kiŋ Agripa, Jisösnöŋ mewö jiiga nöŋön Suepnöhök jemeleŋ imut eka könaŋi möta mi köyatiba malmamgö mötpiga osiyök. Miaŋgöra nöŋön imut miaŋgö keuŋi mi tem köla nup memba malal. 20 Mi tem köla liliköba Buŋa keu kewö jim sehiba malal: Iŋini mönö uruŋini meleŋda Anutugöreŋ liliŋgöba kaba uru meleŋgeraŋgö ölŋi mi ahakmemeŋinan kondela malme. Buŋa keu mi mutuk Damaskus aka Jerusalem siti yahöt miaŋgöreŋ maljei, yeŋgöra jim asariba malal. Miaŋgö andöŋe Juda kantri pakpak yeŋgöra jial aka kian kantri yeŋgöra jiba uruŋini kuŋguba malal. 21 Könaŋi miaŋgöra aka Juda ambazip tosatŋan jöwöwöl jikenöŋ öŋgöba miaŋgöreŋ qeraköba nömimba kapaŋ köla köhömuŋi nuŋgubingö aket.

22 “Mewö aketmö, uruni meleŋnalaŋgöreŋök mala kotpiga Anutunöŋ bauköm niŋgiba maliga nalö kewöŋe toroqeba ölöp maljal. Baukbauk miaŋgöra aka ki kinda öŋgöŋgöŋi aka eretŋi eŋgö jeŋine keuni ki jizal. Moses aka kezapqetok ambazip yeŋön yuai asuhumapkö jigeri, nöŋön mönö yeŋgö keuŋini miyök törörök wuataŋgöba keu kewö naŋgöba jizal: 23 Anutunöŋ areŋ ali Amötqeqe Toŋi Kraist yaŋön sihimbölö möta kömumba azi mutukŋi kömupnöhök wahötma. Wahöta Anutu asakŋaŋgö könaŋi mi Juda kambu neŋgöra aka kian kantri yeŋgöra indela jim tuarim eŋgiba malmamgö jiyök.”

24 Polnöŋ keuŋaŋgö likepŋi mewö jiiga premiö Festusnöŋ tereŋgöba keu kembaŋe kutuba jiyök, “Pol, gi kahapmahap akzan. Papia miriŋi miriŋi miaŋgöreŋ öŋgönöŋga mötmötkan sehiba nöröpsohop mem gihii maljan.”

25 Mewö jiyökmö, Polnöŋ meleŋnök, “O kembu sorokni Festus, nöŋön nöröpsohop qahö akzal. Keu jizali, mi mötkutukutu keu ölŋa akza. 26 Kiŋ Agripanöŋ keu kiaŋgö könaŋi möt soroköza, mewö mötzal. Yuai pakpak mi tölapŋe waŋgöm kunöŋ qahö asuhuyök. Miaŋgöra keu buzupŋi pakpak mi mönö kiŋgö kezapŋe gei möt teközawi, mewö möt köhöizal. Miaŋgöra nöŋön keuni ki ölöp awösamkakak qakŋe kinda jibiga mötzan. 27 O kiŋ Agripa, Juda azi gi kezapqetok yeŋgöreŋ Buzup Kimbigö keuŋi möt narizan me qahö? Mi möt narizan, mewö mötzal.”

28 Polnöŋ mewö jiiga Agripanöŋ meleŋda jiyök, “O Pol, göŋön nalö töröptökŋi kiaŋgöreŋ uruni kuŋgunöŋga nöŋön uruni meleŋda Kraistkö alaŋi akileŋakgö mötzan me? Mewö mötmörizan me?”

29 Mewö jiiga Polnöŋ meleŋnök, “O kiŋ, keu köröpŋi me kötoŋi jibileŋak, mi muatmö, göŋönök qahöpmö, dölki keuni kezap ala mötzei, körek eŋön mewöyök Kraistkö alaurupŋi akŋegöra urusihimnan möta kewö köuluközal: O Anutu, uruŋini meleŋ eŋginöŋga nöŋön ki maljali, mönö miaŋgö dop akŋe. Tapep (muŋgamuŋga) miyök al eŋgimapköra qahö köuluközal.”

30 Mewö jiiga kiŋnöŋ wahöriga premiö aka Bernaisi yetkön mewöyök wahörohot aka yembuk tatkeri, yeŋön körek wahötket. 31 Wahöta mosöta angetka azi ipŋan nanŋinök eraum möta kewö jiget, “Azi kiaŋön bölöŋi kun qahö aiga wuanöŋgöra mönö gwaröhöm waŋgiget? Yaŋön kömupkö buŋa akŋawaŋgö dop qahö akza, mi mötzin.” 32 Mewö jiba eraum möta Agripanöŋ Festusgöra jiyök, “Sisa kiŋgöreŋ anbiga keuni mindiŋgöi diŋgimapköra qahö kapaŋ köla qesiba jibawak ewö, mönö ölöp pösaringa gebawak.” Mewö. c, d 

Copyright information for `BMU