a1Ef 6.9
b5Ef 5.16
c7Apo 20.4, 2 Tim 4.12; 7-8 Ef 6.21-22;
d9Flm 10-12
e10Apo 19.29, 27.2, Flm 24, Apo 12.12,25, 13.13, 15.37-39;
f12Kol 1.7, Flm 23;
g142 Tim 4.10,11, Flm 24; 17 Flm 2

Colossians 4

Galömurup eŋgöreŋ Kembu ketaŋi mi Suep mire malja, mi möt kutuzeaŋgöra mönö welenqeqeurupŋini titit diŋdiŋi aka dop mohot ak eŋgiba malme. Mewö. a 

Goro qambaŋ keu tosatŋi

Köuluk nup mönö kapaŋ köla memba malme. Miaŋgöreŋ mönö uruguliguli mala jim möpöseip aka malme. Möpöseip akŋei, miaŋgöreŋ mönö neŋgö mohotŋe kewö köuluköba malme, “Anutu, gi mönö Pol neŋakurupŋi köna mem eŋginöŋga ölöp Kraistkö Buŋa keu tölapŋi mi jim asarigetka sehima.” Nöŋön mönö Buŋa nup miaŋgöra aka kösö gwarönöŋ tatzal. Nöŋön Buŋa keu Anutugö sihimŋaŋgö dop jibi asarimegöra mönö köulukŋinan töngum niŋgiba malme.

Ambazip urumeleŋ qahö aka yaigep maljei, i mönö mötkutukutu qakŋe ak eŋgiba malme. Urugö nup membingö köna kun ahumawi, nalö mi mönö kude mösöhöba ayuhumemö, ambazip qöhöröŋine anda ösöŋ qambaŋ köl eŋgime. Keu eraum mötmei, mi mönö nalö dop howeŋambuk mindiriba jigetka nahömŋambuk ahakŋa. Jigetka mohot mohot nahömŋini ahuiga körek yeŋgöra keu denöwö meleŋ eŋgimei, mi mönö ölöp möt yaköba miaŋgö dop jimakŋe. Mewö. b 

Polnöŋ Tikikus Onesimus melaim etkiiga kamahot.

Wölböt alani Tikikus yaŋön Kembubuk qekötahöba kinda nömbuk nupŋi törörök memba neŋakni akza. Yaŋön eŋgöreŋ kaba denöwö aka malakzali, miaŋgö kösohotŋi körek jii mötme. Denöwö aka memba tata maljini, iŋini mönö kösohot mi mötmegöra melaim waŋgibiga eŋgöreŋ kama. Yaŋön kaba ölöp urukölalep ak eŋgima. Mewöyök wölböt alanini Onesimus Kolosi eŋgöreŋök kaba Kembugö keuŋi pöndaŋ wuataŋgöba mem yakömakzawi, nöŋön i melaibiga liliŋgöba kama. Azi yahöt mietkön kaba kiaŋgöreŋ yuai pakpak denöwö asuhui maljini, miaŋgö kösohotŋi ölöp jim teköyohotka mötme. Mewö. c, d 

Yaizökzök keu teteköŋi

10 Aristarkus nömbuk kösö mire tatzawi aka Barnabasgö numbutŋi Mak yetkön yaizökzökŋiri jiba alohotka eŋgöreŋ kaza. Maköra lök keuni kewö jim kutubiga mötket: Eŋgöreŋ kaba kaŋgotma ewö, mönö ölöp köl öröba ala ak waŋgime. 11 Josua qetŋi kun Jastus qetzei, yaŋön mewöyök yaizökzökŋi jiba ali eŋgöreŋ kaza. Neŋakurupnan nömbuk Anutugö bemtohoŋaŋgö nup memba maljei, yeŋgö sutŋine azi karöbut mieŋönök Juda azia malje. Yeŋön mönö urukölalep ak niŋgimalget.

12 Nanŋine azi Epafras Kraist Jisös welenŋi qemakzawi, yaŋön mönö yaizökzökŋi jiba aliga eŋgöreŋ kaza. Yaŋön nalö dop eŋgöra aka köulukömakza. Keu pakpak Anutugö jitŋaŋgö dop akzawi, iŋini miaŋgöreŋ töndangöba kin köhöiba aködamunŋinambuk aka malmegöra aum-mörimakza. 13 Nöŋön yaŋgö könaŋi möta kewö naŋgöba jizal: Yaŋön iŋini bauköm eŋgimamgöra nup gwötpuk memakza. Mewöyök Laodisia aka Hierapolis taon yahöt miaŋgöreŋ möt nariba maljei, yeŋgöra aka wani awamŋi nup memba aum-mörimakza. 14 Wölböt doktanini Luk aka Demas yetkön mewöyök yaizökzökŋini jiba alohotka eŋgöreŋ kaza.

15 Nöŋön yaizökzökŋini jiba ohozali, mi mönö urumeleŋ alaurup Laodisia taonöŋ maljei, yeŋgöra jiget mötme. Mewöyök Nimfa aka yaŋgö mire könagesö tokomakzei, mönö yeŋgöra jiget mötme. 16 Kimbi ki oyoŋ eŋgigetka mötket teköiga miaŋgö andöŋe mi mönö algetka Laodisia urumeleŋ könagesö yeŋgöreŋ aniga oyoŋme. Laodisia yeŋgöra kimbi kun ohobiga anöhi, mi alget eŋgöreŋ kaiga iŋini mi mewöyök oyoŋme. 17 Arkipus azi mi mönö kewö jigetka mötma, “Kembunöŋ Buŋa nup memangö jim kutuba köiputki tariga maljani, göŋön mönö mi mötmöriba körek mem teköman.”

18 Pol nöŋön yaizökzökni jiba nane börönan qetni kewö ohozal: Pol. Iŋini mönö kösö gwarö azi ni mötmörim niŋgiba malme. Kalem möriamnöŋ mönö embuk ahöma. Mewö. e, f, g 

Copyright information for `BMU