a4-6Kol 1.26-27

Ephesians 3

Polnöŋ kian kantri yeŋgöreŋ anda Buŋa nup meyök.

Könaŋi miaŋgöra aka Pol nöŋön kian kantri ambazip iŋini bauköm eŋgimamgöra nup memba maljal. Mewö malbiga Kraist Jisösgö nupŋi mealaŋgöra kösö mire al niŋgigetka tata simin köla köulukömakzal. Anutunöŋ kalem möriamŋi kantri tosatŋi eŋgöra mendeŋ eŋgiiga ölöwakŋegö nup niŋgiyöhi, iŋini mi ölŋa möt teköze. Anutunöŋ keu areŋi tölapŋi indela jiiga möt yaközali, keu miaŋgö könaŋi lök töröpŋanök ohom eŋgial. Ohom eŋgiali, iŋini kulem mi oyoŋda ölöp nöŋgö könani kewö möt asarime: Nöŋön Kraistkö könaŋi tölapŋi mi ölöpŋanök möt kutuzal.

Möpŋaŋgö möpŋeyök ambazipnöŋ könahiba mala kota malgeri, yeŋön nalö miaŋgöreŋ Buŋa tölapŋi miaŋgöra tönpin malget. Mewö mala kotketmö, nalö kewöŋe Uŋa Töröŋan mi Anutugö aposol aka kezapqetok ambazip tök-kutukutuŋi neŋgöra jim indeli mötzin. Buŋa tölapŋi mi kewö: Kraist Jisösnöŋ Buŋa neŋgimapkö jiba keu jöhöyöhi, iŋini mi Juda nembuk öröröŋ aŋgön köla memba malje. Ölöwak Buŋanöŋ miaŋgö könaŋi mi kian kantri ambazip eŋgöra mewöyök kondel eŋgimakza. Iŋini uruŋini meleŋda ölöp nembuk mohotŋe kötumötuetŋaŋgö Buŋaŋi dop mohot memba malje. Uruŋini Anutubuk jöhöba mohotŋe Kraistkö ölŋi aka nembuk kambu mohot kinjin.

Yaŋgö kukösumŋan mönö nöŋgö uruni sölölöhöiga uruni meleŋbiga Anutunöŋ kalem möriamŋi söŋgöröŋi qahö niŋgiyök. Mi niŋgiiga köna asuhuiga Ölöwak Buŋagö nup meme azia ahal. Nöŋön Anutugö könagesö sarakŋi pakpak eŋgö nembö bapŋine eretŋi kötökŋi maljal. Mewö maljalmö, Anutunöŋ töndup kalemŋi öŋgöŋgöŋi kewöŋi niŋgiyök: Nöŋön Kraistkö oyaeŋkoyaeŋ Buŋaŋi mi kian kantri ambazip eŋgöra jim asarimamgö simbawoŋ mötzal. Oyaeŋkoyaeŋ miaŋgö könaŋi mi körek esiba möt kutum teköbinaŋgö dop qahö.

Anutunöŋ möpŋaŋgö möpŋe yuai pakpak miwikŋaiba Buŋaŋi tölapŋi közamböriga ambazipnöŋ mala kota malgetka nalö miaŋgöreŋ tönpin malget. Miaŋgöra nöŋön Anutugö Buŋa areŋ tölapŋi mi galöm köla malbiga ölŋambuk ahakza. Nöŋön miaŋgö könaŋi aukŋe jibiga ambazip körekŋan möt sölöŋgömegöra simbawoŋ mötzal.

10 Anutunöŋ mötkutukutuŋi qainŋi kun könaŋi könaŋi indel neŋgiiga nalö kewöŋe urumeleŋ zioz kambu sutnine eraum möringa aukŋe ahum sehimakza. Anutunöŋ urusihimŋan kewö mörakza: Bem suahö galöm aka pom garata öŋgöŋgöŋi eretŋi Suep gölme sutŋire öröyuai pakpak galöm kölakzei, yeŋön mewöyök Anutugö mötkutukutuŋi mi kezap ala mötmegöra mörakza. 11 Yeŋön mi mötmegöra Anutunöŋ Buŋa areŋi mi möpŋaŋgö möpŋeyök nalö qahöpŋe uruŋan jim köhöiba ali ahöyök. Miaŋgö dop Kembunini Kraist Jisös melaiiga ölŋi miwikŋaiiga könagesöurupŋi aka mindiriba kinjin.

12 Kraistpuk qekötahöba kinda möt narim waŋgiinga Anutugö naŋguŋan mewö taliga ölöp yaŋgö jemesoholŋe aŋgotpingöra awösamkakak kinjin. 13 Miaŋgöra kewö ulet eŋgizal: Nöŋön kösö mire tata eŋön ölöwakŋegöra aka köŋjiliŋ möta malakzali, miaŋgöra uruŋinan mönö kude etma. Iŋini nöŋgö sihimbölöni miaŋgöra aka ölöp aködamunŋinambuk akŋe. Mewö. a 

Polnöŋ Efesus yeŋgöra kewö köuluköyök:

14 Könaŋi miaŋgöra nöŋön Iwinini simin köl waŋgiba köulukömakzal. 15 Yaŋönök mönö iwinini mutukŋi akza. Yaŋgö dop Suep aka gölmegö könagesö pakpak neŋön iwi qet memba qerakzin. 16 Kewö köulukömakzal, “Anutu, gi mönö Uŋagi Töröŋi al eŋginöŋga uruŋinan köhöimakŋa. Göhö Buŋagi kukösumŋi buŋabuŋaŋambuk mi teteköŋi qahö köwege ahözawi, gi mönö kukösumgi miaŋgö dop mem köhöim eŋgimakŋan. 17 Mem köhöim eŋginöŋga ölöp Kraist möt narim waŋgigetka uruŋine dumŋi memba malma. Mewö maliga kesötŋini Kraistkö urukalemnöŋ möndömgöba mendawölget geiga töndangöba kinme.

18 Urukalemŋan nam köl eŋgiiga könagesö sarakŋi pakpak yembuk ölöp Kraistkö urukalemŋaŋgö könaŋi möt kutume. Jöpaköm neŋgimakzawi, urukalem miaŋgö dopŋi kewö: Göraŋi likeplikep teteköŋi qahö an bibihiza. Köröpŋi enduyaŋgö enduŋe angaiza. Köröpŋi euyaŋgö euŋe öŋgöza. Mewöyök dutŋe emuyaŋgö emuŋe geba ahöza. 19 Kraistkö urukalemŋan mönö gölmegö mötmötninaŋgö dopŋi oŋgitza. Mi möt kömumegöra kewö köulukömakzal: Anutu, gi mönö aködamungi pakpakö dop mötmöt Buŋagan uruŋini kokolak qeba musulumgöm eŋgiman.”

20 Anutu mewö köuluköba kewögöra möpöseimakzal: Nini mötmötnini oŋgita yuaigöra köuluköba qesibinak me jemeleŋ imut ala mötmöribinak ewö, yaŋön mönö yuai mi ölöp köhöiba neŋgima. Anutu kukösumŋan urunine nup memakzawi, yaŋön mönö miaŋgö dop köuluk aka mötmöt dopnini oŋgit teköba amqeba yuai pakpak ölöp ak neŋgimakŋa. Miaŋgöra möpöseim waŋgimakin. 21 Urumeleŋ könagesö neŋön tokoba Kraist Jisösgöra aka Anutugö qetbuŋaŋi möpöseininga aködamunŋambuk aka ahöma. Mi gwöt isik ahöm köhöiba teteköŋi qahö ahöba öŋgömei, nalö miaŋgöreŋ mönö mewöŋanök aködamunŋambuk aka ahöma. Keu mi ölŋa.

Copyright information for `BMU