Genesis 38

Juda aka Tamar

Nalö miaŋgöreŋ Judanöŋ darumunurupŋi eŋgömosöta yagömanŋe Adulam mire geba azi kun qetŋi Hira yambuk tata malök. Miaŋgöreŋ mala Judanöŋ Keinan azi kun qetŋi Sua yaŋgö böratŋi eka anömŋa meiga mohotŋe ahöyohot. Mohotŋe ahöyohotka anömŋan gölöm ala morö nahön memba qetŋi Er qerök. Mewö qeta kunbuk gölöm ala morö nahön kun memba qetŋi Onan qerök. Miaŋgö bapŋe dumŋe kunbuk morö nahön kun memba yaŋgö qetŋi Sela qerök. Morö nahön mi Kezib mire mala miaŋgöreŋ meyök.

Mewö malgetka Judanöŋ nahönŋi mutukŋi Er yaŋgöra ambi kun qetŋi Tamar waŋgiiga anömŋa ahök. Anömŋa ahökmö, Judagö nahönŋi mutukŋi Er yaŋön Kembugö jeŋe bölöŋi aka memba malöhi, miaŋgöra Kembunöŋ jim teköm waŋgiiga kömuyök. Kömuiga Judanöŋ nahönŋi Onangöra kewö jiyök: “Gi ölöp datkahö malöŋi memba qambötŋi akzanaŋgö köna keuŋi wuataŋgöba yambuk ahöba datkahöra gwölönarök qiwikŋaiman.”

Mewö jiyökmö, Onanöŋ gwölönarök mi yaŋgö buŋaya qahö akŋawi, mewö möta silik kewö aka malök: Datŋaŋgöra gwölönarök qiwikŋaibapuköra yaŋgö anöm malöŋambuk ahöba malöhi, nalö miaŋgöreŋ nalö dop morö qiwiqiwikŋaigö sile oŋi mi öne gölmenöŋ qokoba malök. 10 Silik mewö aka malöhi, mi Kembugö jeŋe bölöŋi ahök. Miaŋgöra Kembunöŋ i mewöyök jim teköm waŋgiiga kömuyök. 11 Kömuiga Judanöŋ iranŋi Tamargöra kewö jiyök: “Gi mönö iwigahö mire liliŋgöba anda malöya mala malnöŋga nahöni Selanöŋ qariba ketaŋi akagun gi gömima. “Keŋgötŋi kewö mötmöriba mewö jiyök: Selagö datyahötŋan kömuyohotka yaŋön miaŋgö dop mala mewöyök kömumbapuk. Mewö mötmöriba Tamargöra jiiga iwiŋaŋgö mire liliŋgöba anda miaŋgöreŋ tata malök.

12 Miaŋgöreŋ tata maliga nalö köröpŋi teköiga Suagö böratŋi, Judagö anömŋi yaŋön kömuyök. Kömuiga jiŋgeŋ köla sahöta mali teköiga Judanöŋ miri gölme qetŋi Timna miaŋgöreŋ azi tosatŋan nanŋi lamaurupŋi yeŋgö jupŋini mitigeri, i eŋgekŋamgöra öŋgöyök. Adulam mirigö azi alaŋi Hira yambuk mohotŋe miaŋgöreŋ öŋgöyohot. 13 Öŋgöyohotka Tamargöra buzup kewö jigetka mörök: “Mötnöŋ, göhö azi irangan mönö lamaurupŋi yeŋgö jupŋini mitimamgöra aka Timna miri gölmenöŋ anja.”

14 Mewö jigetka mörök. Judagö nahönŋi Selanöŋ lök qariba ketaŋi aiga töndup i anömŋi akŋapköra qahö waŋgiyök. Miaŋgöra Tamarnöŋ malö malmamgö malukuŋi qeköba nöröp kawöseŋnöŋ nöröp jeŋi esuhuba turum aŋguyök. Mewö aka Timna anangö könanöŋ anda taon qetŋi Enaim miaŋgöreŋ aŋgota kiripo naŋgu kösutŋe tarök.

15 Tariga Judanöŋ kaba eka jemesoholŋi esuhuyöhaŋgöra i qahö ek kutuba mi köna ketaŋi ambia mewö mötmöriyök. 16 Iranŋa taröhi, mi qahö möt kutuyöhaŋgöra aka köna jitŋe yaŋgöreŋ anda kewö jiyök: “Ölöp kanöŋga nöŋön göbuk ahöbit. “Mewö jiiga möta kewö qesiyök: “Nömbuk ahömanaŋgö töwaŋi mönö wani yuaia niŋgiman?”

17 Mewö qesiiga kewö jiyök: “Ni nani kambunöhök meme moröŋi gwaböŋi kun albi göhöreŋ kama. “Mewö jiiga kewö qesiyök: “Mi mutuk qahö kaba kaŋgoriga keugahö ölŋi akŋawaŋgö yuai kun mi niŋgiman me qahö?”

18 Mewö qesiiga kewö jiyök: “Nöŋgö keunaŋgö ölŋi akŋawaŋgö yuai kun mi mönö wani yuaia gihibileŋak?” Mewö jiiga kewö meleŋnök: “Köpep supapkan qetki mekötahömakzani, mi, miaŋgö kösö wötŋi aka öröpki börögan memba kinjani, mönö mia niŋgiman. “Mewö meleŋniga yuai mi waŋgiba yambuk ahöiga gölöm alök. 19 Yambuk ahöba wahöta miriŋe anda nöröp kawöseŋi luluŋda qeköba malö malmamgö malukuŋi mi kunbuk löŋgöta malök.

20 Mewö maliga Judanöŋ nalö kunöŋ Adulam mirigö azi alaŋi Hira melaiba kewö jiyök: “Gi mönö meme (noniŋ) moröŋi gwaböŋi memba anda ambi mi waŋginöŋga nöŋgö keunaŋgö ölŋi akŋawaŋgö yuaiŋi mi meleŋ gihiiga memba kaman. “Nup mewö memapköra Hira melaiiga anökmö, Hiranöŋ ambi mi qahö miwikŋaiyök. 21 Qahö miwikŋaiba Enaim azi tosatŋi kewö qesim eŋgiba jiyök: “Jöwöwöl jikegö köna ketaŋi ambinöŋ Enaim kiaŋgöreŋ köna göraŋe taröhi, mi denike?” Mewö jiiga kewö meleŋda jiget: “Ambi mewöŋi kun mi kiaŋgöreŋ qahö malök.”

22 Mewö jigetka Hiranöŋ öne liliŋgöba Judagöreŋ kaba jiyök: “Nöŋön anda ambi mi qahö ehal. Miri miaŋgö toŋi yeŋön mewöyök keu kewö jigetka möral: ‘Jöwöwöl jikegö köna ketaŋi ambiŋi kun mi kiaŋgöreŋ qahö malök.’ “

23 Mewö jiiga Judanöŋ kewö jiyök: “O alani, muat! Yaŋön yuai mi ölöp memba malma. Yuai kun akirak, mönö gön köl netkigetka gamunöŋ turum netkibapuk. Nöŋön meme moröŋi gwaböŋi ki mi ölöp albiga anökmö, göŋön ambi mi qahö miwikŋainöŋ.”

24 Mewö jiiga köiŋ karöbutkö dop teköiga tosatŋan Judagöra buzup keu kewö jigetka mörök: “Göhö irangi Tamarnöŋ mönö serowilin aka gölöm ala malja. “Mewö jigetka Judanöŋ mi möta Mosesgö köna keugö dop jimkutukutu kewö alök: “I mönö waŋgita örörahöba könöpnöŋ gilgetka geba jema.”

25 I waŋgita örörahöba angetka iranŋan Judagöra keu kewö aliga anök: “O irani, yuai kieŋgö toŋan mönö nömeiga gölöm ala maljal. Miaŋgöra köpep supap ki, miaŋgö kösö wötŋi aka öröp ki mönö ek kewöta toŋi miwikŋaiman.”

26 Keu mewö ali aniga möta nanŋi yuaiŋi mi ek kewöta kewö jiyök: “Yaŋön keu mi ölŋa jiza. Nöŋön i nahöni Selagö anömŋi akŋapköra qahö waŋgial. Miaŋgöra yaŋön mönö ni noŋgita ambi diŋdiŋi aka keu mi jiza. “Mewö jiba ambi miambuk kunbuk qahö ahöyök.

27 Könaŋgep morö memamgö nalöŋan kam kuŋguiga morö gösöŋaŋgö uruŋe siwisiwi azi moröŋi yahöt tarohot. 28 Tarohotka morö memamgö aiga kunöŋ böröŋi suluiga erök. Eriga anjö meme ambinöŋ mi eka möt kösö pisikŋi pötpöt memba böröŋe jöhöba kewö jiyök: “Yaŋön mutuk asuhuza.”

29 Mewö jiyökmö, morö miaŋön böröŋi kunbuk öröi öŋgöiga alaŋan mutuk asuhuyök. Yaŋön asuhuiga anjö meme ambinöŋ kewö jiyök: “O mönö mewö aka könagi munjurata asuhuzan. “Mewö jiiga qetŋi Perez qetket. (Perez Könaŋi munjuratza.) 30 Miaŋgö andöŋe alaŋaŋgö böröŋe möt kösö pisikŋi pötpöt ahöyöhi, yaŋön asuhuiga qetŋi Zera qetket. (Zera pisikŋi pötpöt) Mewö.

Copyright information for `BMU