Genesis 40

Josefnöŋ azi yahöt yetkö gaunŋiraŋgö könaŋi jiyök.

1Nalö tosatŋi teköiga Ijiptkö kiŋ kembuŋaŋgö wain o qambigö galömŋi aka bered ohohogö galömŋi yetkön ketaŋamŋiri Ijiptkö kiŋi qetala köna siŋgiyohot. 2Mewö ahotka Farao kiŋnöŋ jembonŋi yahöt, wain o qambigö galömŋi bohonŋi aka bered ohohogö galömŋi bohonŋi yetköra aka irimŋi seholiyök. 3Irimŋi seholiiga jiiga etkuaŋgita kiŋgö malmalŋaŋgö sikiriti yeŋgö suahö galömŋinaŋgö kösö mire yaŋgö böröŋe al etkigetka geyohot. Josefnöŋ kösö miri miaŋgöreŋök malök. 4Sikiriti yeŋgö suahö galömŋinan Josef jim kutum waŋgiiga i welen qem etkiba malök. Mewö maliga nalö tosatŋi toroqeba kösö mire malget.

5Mewö mala malgetka Ijipt kiŋgö wain o qambigö galömŋi aka bered ohohogö galömŋi yetkön suŋgem mohot miaŋgöreŋök gaunŋiri inanŋök inanŋök ehot. Gaunŋiraŋgö könaŋi mi inanŋök inanŋök. 6Mi ehotka Josefnöŋ söŋanöhök yetköreŋ öŋgöba etkehi urueret aka bosoliba tarohot.

7Mewö tarohotka Farao kiŋgö jembon yahötŋi yetkön Josefkö ketaŋamŋaŋgö kösö mire yambuk mohotŋe tarohori, i kewö qesim etkiyök: “Iŋiri merak denöwögöra jemesoholŋiri wösöbirikjeje uba tatzahot?”

8Qesim etkiiga kewö meleŋda jiyohot: “Niri nanŋök nanŋök gauniri ekzitmö, mietkö könaŋiri mi daŋön jii mötpirak?” Mewö jiyohotka Josefnöŋ kewö jiyök: “Anutunöŋ mönö gaungö könaŋini jiji Toŋi akzapmö, ölöp töndup gaunŋiri jiyohotka mötmam.”

9Mewö jiiga wain o qambigö galöm bohonŋan gaunŋi ehöhi, miaŋgö kösohotŋi mi Josef kewö jii mörök: “Nöŋön gauni uruŋe wain ip kun mi nöŋgö wösöne kiniga ekzal. 10Wain ipkö böröŋi karöbut kingetka könahiba sötŋi jula kota kuŋguzawi, nalö miaŋgöreŋök juraŋi kota tuliga kaŋgeŋi kaŋgeŋi asuhuba öligetka ölŋaŋgö kötŋi pisihize. 11Pisihigetka ni Farao kiŋgö qambiŋi mi börönan memba kinda ölŋaŋgö kötŋi memba mözöhölbiga oŋi Farao kiŋgö qambinöŋ geiga kiŋgö böröŋe aljal.”

12Mewö jii möta Josefnöŋ kewö jii mörök: “Gaungahö könaŋi mi kewö: Ip böröŋi karöbut mi wehön karöbutkö söpsöpŋi akza. 13Wehön karöbut teköiga Farao kiŋnöŋ göhö nöröpki mem wahöta pösat gihiba kunbuk nupke al gihima. Gi mutuk yaŋgö wain o qambigö galömŋa mala qambi Farao kiŋgö böröŋe ala malnöŋi, miaŋgö dop mönö kunbuk aka malman.

14Mewö malmanmö, sösöŋgai qakŋe malmani, nalö miaŋgöreŋ mönö ni mötmöriba ak kömum niŋgiba nöŋgö kösohotni Farao kiŋgöra jinöŋga mötma. Mewö aka bauköm niŋginöŋga kösö miri ki mosöta etpileŋak. 15Mötnöŋ, ni Hibru könagesögö gölmenöhök ösum-mumu qakŋe yoŋgorö noaŋgitketka kaba kiaŋgöreŋ mewöyök yuai bölöŋi kun kösö miri kiaŋgö dutŋe al niŋgigeraŋgö dop mi qahö ahal.”

16Josefnöŋ mewö jii möriga bered ohohogö galöm bohonŋan alaŋaŋgö gaunŋaŋgö könaŋi ölöpŋi jim asariyöhi, mi eka kewö jii mörök: “Nöŋön mewöyök gauni ekiga miaŋgöreŋ bered könde karöbut nöŋgö nöröpne kunduta kazal. 17Kaba könde qakŋe eu tatzawi, miaŋgöreŋ bered yuai nahömŋinambuk könaŋi könaŋi Farao kiŋgöra ahözapmö, neiŋi neiŋi yeŋön kaŋgota könde kunduta kazali, miaŋgöreŋök mi nem teköze.”

18Mewö jii möta Josefnöŋ kewö meleŋda jiyök: “Gaungahö könaŋi mi kewö: Könde karöbut mi wehön karöbutkö söpsöpŋi akza. 19Wehön karöbut teköiga Farao kiŋnöŋ jiiga liŋgipnöŋ geriba qetohom gihiba nöröpki aka qamötki mem wahöta ipnöŋ möndögetka neiŋi neiŋi yeŋön kaŋgota busugi nem teköme.”

20Mewö meleŋda jiiga wehön karöbut teköiga Farao kiŋgö ahuahu nalöŋan kam kuŋguiga jembonurupŋi pakpak i nene lömbuaŋ ohoba eŋgiyök. Mi ohoba eŋgiba wain o qambigö galöm bohonŋi aka bered ohohogö galöm bohonŋi yetkö nöröpŋiri mi jembonurupŋi yeŋgö jeŋine memba wahörök. 21Wain o qambigö galömŋan mutuk nupŋi memba malöhi, mi toroqeba memapköra kuŋgum waŋgiiga dumŋe kunbuk qambi mi Farao kiŋgö böröŋe ala malök.

22Mewö malökmö, kiŋnöŋ bered ohohogö galöm bohonŋaŋgö keuŋi jim teköiga Josefnöŋ gaunŋiraŋgö könaŋi jii mörohoraŋgö dop i liŋgipnöŋ eriba qetohoba nöröpŋi aka qamötki mi mem wahöta möndöget. 23Miaŋgö andöŋe wain o qambigö galöm bohonŋan Josef qahö mötmörim waŋgiyökmö, i ölum qeiga laŋ malök. Mewö.

Copyright information for `BMU