a3-4Jen 28.13-14; 7 Jen 35.16-19; 20 Hib 11.21

Genesis 48

Jeikobnöŋ Manase aka Efraim kötuetköm etkiyök.

Nalö tosatŋi teköiga Jeikobnöŋ kawöl miwikŋaiiga keu mi Josefköra jigetka mörök. Mi möta nahönyahötŋi yahöt Manase aka Efraim mi etkuaŋgita iwiŋaŋgöreŋ anök. Aniga tosatŋan Jeikobköra kewö jigetka mörök, “Nahöngi Josefnöŋ mönö gi gekŋamgöra kaza. “Israelnöŋ keu mi möta ösumŋi ahöyöhi, mi qezaköba ahöahö dumŋeyök wahöta tarök. Wahöta tata Josefköra kewö jiyök: “Anutu kukösum pakpakö Toŋi yaŋön Keinan gölmegö Luz miri miaŋgöreŋ nöŋgöreŋ asuhuba kötuetköm niŋgiba

kewö jiyök: ‘Nöŋön ahumsehip gihibiga gwölönarökurupki yeŋgö qötöŋinan mönö qariba qariba öŋgöiga göŋön könagesö kambuŋi kambuŋi gwötpuk yeŋgö bömön jalöŋina akŋan. Gwölönarökurupki könage asuhum öŋgömei, nöŋön gölme ki mi i buŋa qem eŋgibiga yeŋgö buŋaŋina teteköŋi qahö ahöm öŋgöma.’

Anutunöŋ mewö jiyök. Mutuk nöŋön Ijipt gölmenöŋ göhöreŋ qahö kayalaŋgöreŋ anömgan nahönyahötki yahöt Ijipt kiaŋgöreŋ etkömeyöhi, yetkön mönö nöŋgö buŋaya akŋahot. Manase aka Efraim yetkön mönö Ruben aka Simeon ewö nöŋgö buŋaya akŋahot. Mewö ahotka könaŋgep gölme mesiŋda yetköra distrik yahöt etkime. Efraim aka Manase yetkö bapŋire nahönböraturupki tosatŋi asuhugeri, mieŋön mönö nange buŋaya akŋe. Yeŋön gölme bahöŋini buŋa qem aŋgumei, mi mönö Efraim aka Manase yetkö distrik yahötŋiri mietkö uruŋe ahögetka bohon toŋiri ahotka datyahötŋiri yetkö nembö bapŋire malme. Nöŋön Mesopotemia (Padan Aram) mosöta liliŋgöba Keinan gölmenöŋ kaba Efrata taon dopdowibiga anömni Reizölnöŋ kömuiga wösöbirik ketaŋi ahum niŋgiyök. Kömuiga qamötŋi mi Efrat anangö köna töwokŋe löm kölal. Efrat mirigö qetŋi alaŋi mi Betlehem.”

Israelnöŋ mewö jiba Josefkö nahönyahötŋi etkeka kewö qesim waŋgiyök: “Azi moröŋi yahöt ki daŋön daŋön?”

Qesim waŋgiiga Josefnöŋ iwiŋaŋgöra kewö jiyök: “Nöŋgö nahönyahötni Anutunöŋ Ijipt kiaŋgöreŋ niŋgiyöhi, i mönö mia. “Mewö jiiga Israelnöŋ jiyök: “Nöŋön kötuetköm etkimamaŋgöra i ölöp etkuaŋgitnöŋga nöŋgö kösutne kamahot.” 10 Mewö jiiga Josefnöŋ nahönyahötŋi etkuaŋgita kösutŋe kagetka böröŋi giliga imbiŋire geiga numbuŋiri yöhötim neyök. Israelnöŋ azi namŋi aiga jeŋi ömuŋ köliga yuai kun ek kutumamgö tönpin aka osiyök. 11 Numbuŋiri yöhötim nemba Josefköra kewö jiyök: “Nöŋön mutuk göhö jemesoholgi kunbuk gekŋamgöra qahö al mamböta malalmö, Anutunöŋ köna mesariga dölki nangi aka nahönyahötki mewöyök eŋgekzal.”

12 Mewö jiiga Josefnöŋ nahönyahötŋi iwiŋaŋgö tambuŋeyök etkömemba simin köla bamgöba geyök.

13 Bamgöba geba wahöta nahönyahötŋi böröŋire memba etkuaŋgiriga nanŋi iwiŋaŋgö wösöŋe kayohot. Efraim mi böröŋi ölŋan memba Israelgö böröŋi qaniŋe ala Manase mi böröŋi qaniŋan memba Israelgö böröŋi ölŋe alök. 14 Mewö al etkiyökmö, Efraim munŋi aiga asaŋan töndup böröŋi ölŋan böraŋda yaŋgö nöröpŋe alök. Manasenöŋ Josefkö nahönŋi mutukŋi ahökmö, asaŋan töndup böröŋi qaniŋan yaŋgö nöröpŋe alök. Mewö aka böröŋi maripom ewö al kutuba nöröpŋire alök. 15 Mewö ala tata Josef kötuetköm waŋgiba kewö jiyök:

“Asani Abraham aka iwini Aisak yetkön Anutugö jeŋe anda kaba aka memba malohot. Nöŋön asuhuba mala korali,
Anutunöŋ mönö nalö miaŋgöreŋ pöndaŋ köyan köl niŋgiba mala korök.
16 Suep garatanöŋ ni bölöŋi pakpak miaŋgöreŋök meköba aŋgön köl niŋgiba malöhi, yaŋön mönö azi gwabö yahöt ki kötuetköm etkiba malma.
Ambazipnöŋ yetkö qetŋiri qetketka miaŋön mönö ni aka iwi asani Aisak aka Abraham neŋgö qetbuŋanini bisiba malmahot.
Yetkö könagesöŋiran mönö gölme qakŋe önöŋi qahö sehiba malme.”
17 Mewö jiyökmö, Josefnöŋ iwiŋan böröŋi ölŋan Efraimgö nöröpŋe ali mi ehi dop qahö köliga miaŋgöra möt böliba iwiŋaŋgö böröŋi ölŋe memba Efraimgö nöröpŋeyök meköba Manasegö nöröpŋe almamgö ahök. 18 Mewö aka iwiŋaŋgöra kewö jiyök: “Iwini, mewö kude aknöŋ. Morö kiaŋön nahöni mutukŋi akza. Miaŋgöra börögi ölŋan mönö yaŋgö nöröpŋe alnöŋ.”

19 Mewö jiyökmö, iwiŋan mi akŋamgö qetala Josef kewö jii mörök: “Nahöni, mi ölöp mötzal. Nöŋön mi mötzal. Manasenöŋ mewöyök qetbuŋaŋambuk aiga yaŋgö gwölönarökurupŋan mewöyök ahumsehip aka könagesö ketaŋi akŋemö, Efraimgö qetbuŋaŋan mönö Manasegöreŋ qetbuŋa oŋgita ahöma. Yaŋgö gwölönarökurupŋan mönö ahumsehip ketaŋi aka könagesö kambuŋi kambuŋi gwötpuk aka malme.”

20 Mewö jii möriga silim miaŋgöreŋök kötuetköm etkiba kewö jiyök: “Israel yeŋön mönö etkö qetŋiri qeta könagesöŋini kötuetköm eŋgiba kewö jime: Anutunöŋ mönö oyaeŋkoyaeŋ ak eŋgiiga eŋön Efraim aka Manase ewö akŋe. “Mewö jiba Manase mi Efraimgö nembö bapŋe alök.

21 Israelnöŋ kötuetköm eŋgii teköiga Josefköra keu kewö jiyök: “Mötnöŋ, nöŋön kömumamgö akzalmö, Anutunöŋ embuk mal öŋgöma. Yaŋön mönö eŋguaŋgiriga iwi asaurupŋini yeŋgö gölmenöŋ liliŋgöba anme. 22 Miaŋgöreŋ anda sutŋine gölme mesiŋgetka nöŋön göhö gölmegi toroqeba Sekem gölme kelökŋambuk mi gihizal. Nöŋön kukundu gölme mi Amor könagesö yembuk bim qeba nani timbi aka bimgö sou ketaŋi miaŋön yeŋgöreŋök meal. Josef gi darumunurupki yeŋgö bohonŋini akzanaŋgöra mi darumunurupki yeŋgöra qahöpmö, göhö buŋaya jim teköbi ahöma. “Mewö. a 

Copyright information for `BMU