a7Mat 24.38-39, Luk 17.27

Genesis 7

Ambazip aka sömbup pakpak mi waŋgenöŋ öŋgöget.

Noanöŋ waŋge mem teköiga Kembunöŋ keu kewö jii mörök: “Gi ambazip kambu kieŋgö sutŋine solanŋi aka maljan. Nöŋön göhö könaŋamgi mewö miwikŋaizal. Miaŋgöra gi aka saiwaurupki pakpak iŋini mönö waŋgenöŋ öŋgöme. Sömbup neneŋi, dönqizizinŋini qahö mi pakpak yeŋgöreŋök sewen sewen, aziŋi 7 aka ambiŋi 7 dopdop eŋgömenöŋga göhöreŋ kaŋgotme. Mewöyök sömbup dönqizizinŋinambuk pakpak yeŋgöreŋök yahöt yahöt aziŋi aka ambiŋi mewö eŋgömenöŋga göhöreŋ kaŋgotme. Toroqeba nei könaŋi könaŋi pakpak yeŋgöreŋök mewöyök sewen sewen, aziŋi 7 aka ambiŋi 7 mi eŋguaŋgitnöŋga göbuk waŋgenöŋ öŋgöme. Mewö aknöŋga sömbup aka nei tandökŋini könaŋi könaŋi pakpak mi kude qahöwakŋemö, toroqeba gölmenöŋ ahumsehip aka malme. Öŋgögetka wehön 7 teköiga jim kutubiga kie römbum ketaŋan mönö gölmenöŋ eta yöhöiga suŋgem silim 40:gö dop toroqeba yöhöm teköma. Mewö yöhöiga yuai isikusukŋinambuk pakpak miwikŋaim eŋgiali, mi mönö mohotŋe jim teköbiga gölmenöhök qahöwakŋe.” Kembunöŋ Noa mewö akŋapkö jim kutum waŋgiiga miaŋgö dowök mönö tem köla mi pakpak ak teköyök.

Mewö mia aka meiga yambuŋi 600 aiga göulu ketaŋan gölme qakŋe kaŋgorök. Kaŋgotmapkö aiga Noa anömŋet aka nahöniranurupŋiri yeŋön mohotŋe göulunöŋ kömumbepuköra ölöŋ köla waŋgenöŋ öŋgöget. Mewöyök sömbup neneŋi, dönqizizinŋini qahö aka sömbup dönqizizinŋinambuk aka nei aka yuai pakpak bapŋinan köla ölölöŋgömakzei, mi yahöt yahöt pakpak aziŋi aka ambiŋi mi dopdopŋine waŋgenöŋ öŋgöba Noagöreŋ kaget. Anutunöŋ Noa jim kutum waŋgiyöhi, mi mönö miaŋgö dop asuhuyök. Mewö. a 

Göulunöŋ ambazip turum eŋgii kömuget.

10 Mewö asuhuiga wehön 7:göra jiyöhi, mi teköiga göulu ketaŋan gölme qakŋe kaŋgorök. 11 Noanöŋ yambuŋi 600 aiga yambu miaŋgö köiŋi 2 miaŋgö wehönŋi jaŋgö 17 silim miaŋgöreŋ o jeŋi pakpak, o diginŋinambuk mieŋgö namŋini pakpak mi emuyök qariba qariba kotket. Mewöyök euyaŋgöreŋ könakembagö oŋi oŋi mieŋgö numbuŋini mi aŋaŋiget. 12 Kie römbum ketaŋi mi gölmenöŋ eta yöhöba yöhöba suŋgem silim 40:gö dop ahöyök. 13 Kienöŋ könahimapköra aiga wehön miaŋgöreŋ Noa aka nahönurupŋi Sem, Ham aka Jafet, Noagö anömŋet aka iranurupŋiri karöbut yeŋön mohotŋe waŋgenöŋ öŋgöm teköget. 14 Toroqeba arökŋaŋgö sömbupŋi aka mirigö sömbupŋi pakpak, yuai pakpak bapŋinan köla ölölöŋgömakzei, nei pakpak aka yuai ginginŋinambuk pakpak mi ambazip yembuk mohotŋe waŋgenöŋ öŋgöm teköget. 15 Anutunöŋ yuai pakpak malmalgö ösumŋinambuk miwikŋaim eŋgiyöhi, mieŋgöreŋök yahöt yahöt (2-2) mi Noagöreŋ kaŋgota waŋgenöŋ öŋgöm teköget. 16 Anutunöŋ Noa jim kutum waŋgiyöhaŋgö dop yuai isikusukŋinambuk pakpak waŋgenöŋ öŋgöm tekögeri, mi aziŋi aka ambiŋi ahot. Körekŋan öŋgöm tekögetka Kembunöŋ nanŋak Noagö andöŋe waŋgegö naŋguŋi kölök.

17 Naŋguŋi köliga miaŋgöreŋök göulu ketaŋan könahiba suŋgem asak 40:gö dop toroqeba gölmenöŋ kaŋgoriga o yeŋön qariba qariba gölme köl turuba öŋgöba waŋge gölmenöhök koaŋgetka wahöta öŋgöyök. 18 Öŋgöiga o yeŋön gölme qakŋe qariba qariba öŋgögetka waŋgenöŋ o qakŋe nanŋök öne laŋ anda kaba ahöyök. 19 Mewö aiga onöŋ gölme qakŋe kunbuk qariba öŋgöyök. Mewö kunduŋi köröpŋi köröpŋi suepkö bapŋe kin anjei, mi pakpak mönö musulumgöm eŋgiyök. 20 Musulumgöm eŋgiba öŋgöba öŋgöba kunduŋi bohonŋi bohonŋi mi köl turuba 8 mita (25 fit) miaŋgö dop eŋgoŋgita ahöyök.

21 Mewö ahöiga yuai isikusukŋinambuk pakpak gölme qakŋe anda kaba malgeri, mieŋön o nemba nemulahöba kömum teköget. Yuai pakpak mi nei me mirigö sömbupŋi me arökŋaŋgö sömbupŋi me mokoleŋ, gisip aka yuai pakpak kambuŋini köla gölmenöŋ qeqelaŋlaŋ anda kamakzei aka ambazip pakpak mi mohotŋe qahöwak teköget. 22 Yuai pakpak gölme örönŋe mala malmalgö ösumŋi söŋgöröŋine öröba malgeri, mi körekŋanök kömum teköget. 23 Yuai malmalŋinambuk pakpak gölmenöŋ malgeri, mi Anutunöŋ eŋgum teköyök. Yuai pakpak mi ambazip, sömbup me yuai bapŋinan köla ölölöŋgömakzei me könakembagö neiŋi neiŋi mi mönö Anutunöŋ eŋgum teköyök. Noa aka saiwaurupŋi waŋge uruŋe malgeri, miyök mönö eŋgehoriba aŋgön köla gou köl eŋgiyök. 24 O göulu miaŋön gölme köl turuba qahö öröba geyökmö, wehön 150:gö dop ahöyök. b 

Copyright information for `BMU