a5Sum 2.7, 2 Sml 7.14, 1 Hist 17.13;
b6Dut 32.43;
c7Sum 104.4;
d8-9Sum 45.6-7;
e10-12Sum 102.25-27;
f13Sum 110.1

Hebrews 1

Anutunöŋ Nahönŋi melaiiga keuŋi indelök.

Anutunöŋ mönö möpŋaŋgö möpŋeyök könahiba köna murutŋi murutŋi wuataŋgöba keuŋi indelmamgö mörök. Mewö möta keuŋi nalö gwötpuk kezapqetok ambazip yeŋgö uruŋine aliga aukŋe jigetka ambösakonurupninan möta mala kotket. Mewö mala kotketmö, nalö teteköŋe malinga kewöŋe mönö Nahönŋi melaiiga keuŋi indela aukŋe jiiga mörin. Nahönŋi yaŋön Iwiŋi bauköiga Suep gölme aka mietkö öröyuaiŋiri pakpak miwikŋaiyo-hotka Nahönŋan nalö teteköŋe yuai pakpakö Toŋi akŋapkö jim teköi malja. Anutugö kaisoŋgolomŋan Nahönŋi ahöm waŋgiiga eta kondelök. Anutugö asakmararaŋan mönö i kuŋguiga biliksik aliga imutimut ewö ehin. Siŋgisöndoknini köl könjörat teköbagun mönö Suep mire öŋgöba dumŋi memba Öŋgöŋgöŋamninaŋgö böröŋi ölŋe tatza. Miaŋgöreŋ tata Suep gölmegö öröyuai pakpak mi keuŋi kukösumŋambuknöŋ bisiba galöm köla malja.

Anutugö Nahönŋan Suep garata eŋgoŋgitza.

Anutunöŋ Nahönŋi qet waŋgiiga miaŋön mönö Suep garata yeŋgö qetŋini oŋgita aködamunŋambuk akzawi, miaŋgö dop Nahönŋan Suep garata eŋgoŋgita ketaŋamŋini aiga nembö bapŋe malje. Anutunöŋ nalö kunöŋ Suep garataurupŋi yeŋgöreŋök kungöra keu kewö qahö jiyök,

“Göŋön nöŋgö Nahöni aknöŋga nöŋön merak göhö Iwigi akzal.”
Mewöyök keu kun kewö jii ahöza, “Nöŋön yaŋgö Iwiŋi akiga yaŋön nöŋgö Nahöni akŋa.”

Keu mi dumŋe kunbuk Nahönŋi mutukŋi jim teköiga gölmenöŋ etmamgö ahöhi, nalö miaŋgöreŋ mönö qeljiŋe kewö jiyök, “O Suep garataurupni, iŋini mönö körek pakpak yaŋgö waikŋi memba möpöseiba malme.”

Suep garata yeŋgöra keu kewö jii ahöza, “Anutunöŋ mönö garataurupŋi mem letot eŋgiiga luhut ewö aka anda kame. Welenqeqeurupŋan mönö letota könöp bölam ewö aka anda kame.”

Yeŋgöra mewö jiyökmö, Nahönŋaŋgöra keu kun kewö jii ahöza, “O Kembu, göŋön mönö jakömbuak dum tatatke nalö teteköŋi qahö tat öŋgöman. Öröpki kukösum-ŋambuk miaŋön qindiŋaim neŋginöŋga ahakmeme diŋdiŋan mönö bemtohoŋgahö muŋgemŋi aka ahöm öŋgöma.

Göŋön ahakmeme solanŋaŋgöra ak gihiiga ahakmeme goŋgoŋaŋgöra irimgi seholiiga kazik aka mala kotnöŋ. Miaŋgöra göhö bemgi Anutu yaŋön mönö al gihiiga alaurupki eŋgoŋgita sösöŋgai kelöknöŋ gömirii maljan.”
10 Nahönŋaŋgö keuŋi kun mi kewö, “O Kembu, göŋön könakönahiŋe gölmegö tandöŋi kuŋgunöŋga Suepkö jakeŋi jakeŋi mieŋön mönö göhö börösöwögi akze.

11 Suep gölme pakpak mieŋön opo maluku ewö walŋi aka ayapkömemö, göŋön mönö köhöiba kin öŋgöman.
12 Möki köpeimakzini, göŋön mönö miaŋgö dop suep ehekŋi mi opo sörö jöhözin ewö köpeim eŋginöŋga letotme. Yuai pakpak utekömapmö, göŋön mönö tandök mohot miyök aka yambugi (yaragi) teteköŋi qahö mal öŋgöman.”
13 Anutunöŋ nalö kunöŋ Suep garataurupŋi yeŋgöreŋök kungöra keu kewö qahö jiyök, “Göŋön mönö kaba böröni ölŋe tatnöŋga nöŋön mönö tuarenjoŋurupki nalö sutŋi kiaŋgöreŋ tim tötal eŋgibiga et eŋguiga göhö könagahö döpŋi aketka köiraŋ albin.”

14 Nahönŋaŋgöra keuŋi keuŋi mewö jiyökmö, Suep garata i mönö niŋia akze? Körek yeŋön Anutugö welenqeqe uŋaurupŋi akze. Mewö aka ambazip oyaeŋkoyaeŋ buŋa qem aŋgumei, i bauköm eŋgimegöra melaim eŋgii malje. Mewö. a, b, c, d, e, f 

Copyright information for `BMU