b5-7Sum 40.6-8;
c11Eks 29.38;
d12-13Sum 110.1;
e16Jer 31.33;
f17Jer 31.34
g22Lew 8.30, Eze 36.25;
h27Ais 26.11;
i28Dut 17.6, 19.15;
j29Eks 24.8;
k30Dut 32.35,36;
l37-38Hab 2.3-4

Hebrews 10

Indim mohot kömupnöŋ al aŋgui dop köl teköza.

Köna keu walŋi miaŋön oyaeŋkoyaeŋ akingö könaŋi ölŋi qahö akzapmö, oyaeŋkoyaeŋ asuhumawaŋgö imutimutŋi miyök ahöza. Köna keugö könaŋi mewö ahözawaŋgöra aka ambazip Anutu möpöseibingöra jike kömbukŋe nalö dop öŋgömakzei, yeŋön mönö letota aködamunŋinambuk akingö osimakze. Yeŋön nalö teteköŋi qahö naluk kalem waŋgita ala jöwöwöl ohoho miyök yambu (yara) dop toroqeba aka malgetmö, miaŋön qahö dop kölök. Miaŋön dop kölbawak ewö, jöwöwöl ohoho mi ölöp mosötpeak. Jike kömbukŋe Anutu waikŋi memba möpöseigeri, yeŋön indim mohot amöt eŋgugetka sarakŋi ak teköbeak, mewö mönö siŋgisön-dokŋinaŋgö gamuŋi mi qahö toroqeba mötpeakmö, mi toroqeba mötket. Miaŋgöra sömbup kalem mi toroqeba nalukŋina almalget.

Yambu (yara) dop jöwöwöl ohoba malgeri, miaŋön mönö toroqeba siŋgisöndokŋinaŋgö gamuŋi mi jim gulim eŋgii malget. Bulmakau aziŋi aka meme (noniŋ) yeŋgö sepŋinan mönö siŋgisöndok köl könjöratmapkö osiza. Mi esapkögetmö, qaköba mala kotket.

Miaŋgöra Kraistnöŋ gölmenöŋ eta asuhuyöhi, nalö miaŋgöreŋ kewö jiyök, “Anutu, göŋön naluk kalemgöra aka jöwöwöl ohome-göra qahö köpösöŋgöba malnöŋmö, gölmenöŋ malmalgö sileŋi mi mözözömgöba niŋginöŋ.

Jöwöwöl ohoba siŋgisöndokŋinaŋgöra aka naluk kalemŋi kalemŋi ala malgeri, mi eka miaŋgöra qahö söŋgaiba malnöŋ.
Nalö miaŋgöreŋ kewö jial, ‘Anutu, mötnöŋ, nöŋön ki kazal. Nöŋgö könani mi papia lipiŋlipiŋi miaŋgöreŋ ohogetka ahöza. Miaŋgö dop mönö göhö sihimgahö dop aka memba malmam.’”
Mutuk kewö jiyök, “Naluk kalem ala jöwöwöl ohoba siŋgisöndokŋinan solanimapköra yuai könaŋi könaŋi aka malgeri, miaŋgöra mönö sihimgan qahö asuhui möta malnöŋ. Mi eka miaŋgöra qahö söŋgaiba malnöŋ.” Yuai mi Köna keu walŋaŋgö dop toroqeba ahakzemö, mi töndup mewö jiyök. Miaŋgö andöŋe keu kewö jiyök, “Anutu mötnöŋ, nöŋön mönö ki kaba göhö jitsihitkahö dop aka memba malmam.” Mewö jiba Anutu waikŋi memba möpöseibingö könaŋi mutukŋi mi qeapköba köna dölökŋi kuŋguyök. 10 Anutugö jitsihitŋan nam köl waŋgiiga sileŋan jöwöwöl ohoho ewö aket teköi miaŋgöra mönö tök kutum neŋgii sarakŋi ak teközin. Indim mohotkö dop sileŋi köleŋniga miaŋön nalö dop mönö söp köla ahöm öŋgöma.

11 Nalöŋi nalöŋi jike nup galöm pakpak mieŋön kinda jike nupŋini memakze. Sundan dop jöwöwöl ohoho miyöhök dumŋe kunbuk ahakzemö, mieŋön siŋgisöndokŋini köl könjöratpingö osimakze. 12 Mieŋön osimakzemö, Suepkö jike nup galöm bohonŋan mönö indim mohotkö dop siŋgisöndoköra aka sileŋi köleŋniga nalö teteköŋi qahö dop köla ahöm öŋgöma. Jöwöwöl ohoho ewö ak waŋgigetka Suep jikenöŋ öŋgöba Anutugö böröŋi ölŋe tatza. 13 Miaŋgöreŋ tata nalö sutŋi kiaŋgöreŋ Anutunöŋ tuarenjoŋurupŋi tötali et eŋguiga Kraist könaŋaŋgö döpŋi
Kerökurupŋi memba et al eŋgiba luhut ala gamu qem eŋgibingöra könaŋinan tuapköba qakŋine döp ewö tölanjiba malget. Juda yeŋgöreŋ köna mewö.
aketka köiraŋ kölbingö mamböta malja.
14 Indim mohotkö dop kömupnöŋ al aŋgui jöwöwöl ohoho ewö ak waŋgigetka miaŋön dop köl teköi ölöp ambazip tök kutum neŋgii sarakŋi akingö dop akzin. Mewö ölöp mem letot neŋgiiga aködamunini pakpak miwikŋaiba nalö teteköŋi qahö mewö mal öŋgöbin.

15 Uŋa Töröŋan mewöyök keu mi naŋgöba jiiga mötzin. Mutuk keu kewö jii ahöza:

16 “Kembu nöŋön kewö jizal: Nalö tosatŋan tekögetka miaŋgöreŋ mönö jöhöjöhö areŋ yembuk akŋami, mi kewö: Nöŋön Köna keuni pakpak mi mönö uru könömŋine ala mötmötŋine kimbi ewö ohomam.”
17 Mewö jiba kewö toroqeyök, “Nöŋön mönö yeŋgö siŋgisöndok-ŋini aka ahakmemeŋini iwilelebuk akeri, miaŋgöra ölum nuŋgui mi qahö toroqeba mötmöriba malmam.” 18 Keu miaŋgö dop Anutunöŋ mi mosöri keuninan kömuyöhi, siŋgisöndok mieŋgöra jöwöwöl ohobinaŋgö dop qahö akzin. Mewö. b, c, d, e, f 

Anutubuk kapaŋ köla malbingöra neŋgoholök.

19 Miaŋgöra urumeleŋ alaurupnini, Jisösgö sepŋan saŋgoŋ neŋgiiga mönö ölöp Anutugö jike oleŋi töröŋi kötökŋi miaŋgöreŋ öŋgöbin. Mewö möt narim köhöiba uruyahöt qahö ahakzin. 20 Jisösnöŋ köna anangö köna dölökŋi mesariga nanŋak malmal köhöikŋaŋgö könaŋi ak neŋgiza. Köna mi nanŋi sileŋi köleŋda mewö miaŋön mesari ahöza. Köna mi tiba Anutugö jikeŋaŋgö opo selŋi kutuba jike oleŋi töröŋi kötökŋi miaŋgöreŋ öŋgöbin. Jisösgö sileŋan nam köl neŋgiiga opo selŋi mi ölöp kutubin. 21 Jisösnöŋ jike nup galöm öŋgöŋgöŋi ak neŋgimakza. Yaŋön Anutugö könagesöŋi pakpak galöm köl neŋgiba malja.

22 Mewö maljawaŋgöra neŋön mönö geŋmoŋ mosöta uruyahöt körek yaköriba pöndaŋök mötnarip qakŋe kinda Anutugö kösutŋe anda köuluköba malbin. Sepŋan qewösahöi neŋgömiriba uru tölöhopnini saŋgoŋniga sarakŋi aka malbin. Uruninan qahö toroqeba jim neŋgiiga mönö awösamkakak malbin. O sarakŋi ariinga mem tuarim neŋgiiga mewö mönö Anutubuk qekötahöba malbin. 23 Anutunöŋ oyaeŋkoyaeŋ akingö keu jöhöba neŋgiyöhi, yaŋön mönö keuŋi pöndaŋ wuataŋgöba nembuk kinja. Mewö kinjawaŋgöra aka mewö akingö mamböta jörömqörömŋi jim miwikŋaimakzin. Miaŋgöreŋ mönö koŋgwarak mosöta zeŋ kin köhöiba malbin. 24 Urukalem aka ahakmeme ölöpŋi akingöra mönö uru kuŋgum aka naŋgöm aŋguba malbin. Mewö malbingöra mönö pöndaŋ galöm mem aŋguba malbin. 25 Tosatŋan nanŋini urumeleŋ könagesögö totokoŋini mosörakzei, neŋön mönö silik miaŋgö dop kude aka malbin. Mewö qahöpmö, Kembu kamawaŋgö aiwesökŋi eka nalöŋan dopdowimapkö mötzini, miaŋgö dop mönö kapaŋ köla köhöiba uru kuŋgum aŋguba malbin.

26 Buŋa keu ölŋi mötagun nanini imbi-imbi qakŋe siŋgisöndok laŋ akin ewö, siŋgisöndoknini miaŋgöra mönö naluk jöwöwöl kun albingö osibin. Jöwöwöl ohoho kun mi qahö bauköm neŋgima. 27 Mi qahö bauköm neŋgimapmö, Anutunöŋ keunini mi jim teköba likepŋi meleŋni qaknine öŋgömapkö mamböringa jönömninan undui keŋgötnini möta malbin. Anutugö könöpŋan tuarenjoŋ-urupŋi eŋgohomawi, miaŋgö kukŋi miyök asuhumapköra mönö mamböta malbin. 28 Kunŋan Mosesgö Köna keu andö qezawi, i mönö keu jakeŋe algetka yahöt karöbutŋan keuŋi naŋgöba jigetka keuŋambuk akŋa ewö, i mönö kude ak kömum waŋgigetka kömupkö buŋaya akŋa.

29 Mewö akŋapmö, ambazip kun kewöŋaŋgö keuŋaŋgöra mönö denöwö mötmörize? Kunöŋ Anutu Nahönŋaŋgö keuŋi könaŋan tökötahöba gilakza. Jöhöjöhö areŋ dölökŋaŋgö sepŋan lök tök kutum waŋgii sarakŋi ahökmö, sep mi yuai omaŋi ewö memba et alakza aka kalem möriam Toŋi Uŋa Töröŋi mi ilita mepaqepaik ak waŋgimakza. Kunŋan mewö aiga Anutunöŋ keuŋi kewöta likepŋi dawikö dop waŋgii dop kölbawak? Köna keu qetala kömupkö buŋaya akingö dop akzinmö, Anutunöŋ ambazip mewöŋaŋgö likepŋi mi mönö könöpuk ak waŋgii qakŋe öŋgöi sihimbölö önöŋi qahö möta malma. Wani sihimbölönöŋ mönö dop köl waŋgibawak? Yaŋgö könaŋaŋgöra mönö denöwö mötmörize?

30 Keu kun kewö ahöza, “Jinöŋ jibi, nuŋgunöŋ guhubi, aknöŋ aki mi nöŋgö nuwa. Nöŋön mönö ambazip keuŋinaŋgö likepŋi meleŋmam.” Toroqeba keu kun kewö jii ahöza, “Kembunöŋ könagesöurupŋi eŋgö keuŋini kewöta jim teköma.” Kun daŋön mewö jiyöhi, neŋön i möt waŋgizin. 31 Anutu malmal Toŋaŋgö jeŋe kinda et neŋgui böröŋan neŋgumawi, miaŋön mönö kanjamŋambuk kötökŋi akŋa. Mewö.

32 Löwöribepuköra kewö jizal: Anutugö asakŋan kaiga buŋa qem aŋguba asarigeri, mönö nalö mutukŋi mi mötmöriba malme. Nalö miaŋgöreŋ mötnaripkö bim qeba sihimbölö gwötpuk miwikŋaiba mi töndup aum-möriba aoŋgit aka kin köhöiget. Mi mönö kude ölum eŋguma. 33 Nalö tosatŋe gamu qem eŋgiget köŋjiliŋ mötketka qenjaröknöŋ eŋgehiba malget. Nalö tosatŋe alaurupŋini tandök mewöyök ak eŋgigetka yeŋgö qöhöröŋine kinget. 34 Tosatŋi kösö mire alget tatkeri, mönö i eŋgeka sihimbölöŋini mohotŋe möta malget. Sukinapŋini kiom qeba megeri, mi mönö sösöŋgai qakŋe möt aŋgön köla malget. Suepkö ainemaluku qainŋi kun qahö ayapkömawi, mi ahöm eŋgizawaŋgö möta miaŋgöra urukölalep möta malget.

35 Miaŋgöra awösamkakakŋini mönö nalö kewöŋe kude gila mosötme. Mi kude mosötketka Anutunöŋ mönö miaŋgö töwaŋi ketaŋi eŋgima. 36 Anutunöŋ yuai eŋgimapkö keu jöhöi ahözawi, eŋön mi buŋa qem aŋgumegöra kinje. Miaŋgöra Anutugö jitsihitŋi wuataŋgöba lömböt möta mökösöŋda kapaŋ köla malme ewö, Suepkö buŋaŋi miaŋön mönö eŋgö buŋa akŋa. 37 Kewögöra mönö kin köhöiba malme: Nalö töröptökŋi miyök mönö toroqeba mamböringa “Kunbuk kamawaŋön mönö kam kuŋguma. Nalöŋi qahö qem körii öŋgömapmö, nalöŋaŋgö dop törörök kama.

38 Törörök kamapmö, nöŋgö alanan ahakmeme diŋdiŋi wuataŋgömakzawi, yaŋgö mötnaripŋan mönö nam köl waŋgii mal köhöim öŋgöma. Kunbuk eleŋda mötnaripŋi mosötma ewö, mi qahö dop köli urunan mönö yaŋgöra qahö söŋgaima.”
39 Keu mewö ahözapmö, neŋön ambazip uruŋini kunbuk eleŋda mötnaripŋini mosöta könöp siagö buŋaya akŋei, mönö yeŋgö kambunöŋ qahö kinjin. Mewö qahöpmö, mötnaripnini mi mönö galöm kölinga Anutunöŋ amöt qem neŋgii mala Suep mire öŋgöbinaŋgö dop akzin. Mewö. g, h, i, j, k, l 

Copyright information for `BMU