b2Jen 18.1-8, 19.1-3;
c5Dut 31.6,8, Jos 1.5;
d6Sum 118.6;
e11Lew 16.27

Hebrews 13

Qambaŋ keu teteköŋi

Urumeleŋ alaurup nanŋini mönö jöpaköm aŋguba malme. Kian ambazip sutŋine kamei, mi mönö köyan köl eŋgigetka köisirik miwikŋaimakŋe. Mewö akingö mönö kude ölum eŋgumakŋa. Tosatŋan mewö akeri, miaŋön Suep garata tosatŋi qahö möt asariba mohot köl öröm eŋgigetka miriŋine malget. Tosatŋan kösö mire maljei, mi mötmörim eŋgimakŋe. Nanŋinak yembuk gwaröhöm eŋgigetka malbeak tandök möta mönö i mötmörim eŋgimakŋe. Tosatŋi ak bölim eŋgigetka miaŋgö sihimbölöŋi mötzei, mi mönö nanŋinak mewö malbeak ewö möta mötmörim eŋgimakŋe.

Ambazip qesabulum aka serowilin akzei, Anutunöŋ i jim teköm eŋgima. Miaŋgöra körek eŋön mönö awanöm malmal göda qegetka sarakŋi aiga awanöm sutŋire tötekqötek töwötŋi kun qahö ahöma.

Anutunöŋ nanŋak keu kun kewö jii ahöza, “Nöŋön mönö nalö kunöŋ qahö gömosöta andö guhumam.” Keu miaŋgöra aka ahakmemeŋinan membagun membingö nepaqepalok kude köpösöŋgömakŋemö, yuai ahöm eŋgizawi, miaŋgöra mönö mötket dop köl eŋgiiga sösöŋgaibuk malme. Mewö möta ölöp ewebibininambuk saitiŋgit kinda kewö jiba malbin, “Kembunöŋ baukbaukni aiga gölme ambazipnöŋ ayuhum niŋgimeaŋgö dop qahö akze. Miaŋgöra keŋgötni kun qahö möta maljal.”

Galömurupŋinan Anutugö keu jiget mötkeri, i mönö mötmörim eŋgiba malme. Ahakmemeŋini denöwö aka megetka malmalŋinan teköyöhi, mönö mi mötmöriba mötnaripŋinaŋgö silikŋini wuataŋgöba malme. Jisös Kraist utekutekŋi qahö. Mutuk malöhi, miyök merak malja aka nalö teteköŋi qahö mal öŋgöma. Kalem möriam toroqeba buŋa qem aŋguinga urunini mem köhöiiga ölöwahakŋapmö, nene nembingö silikŋi mi me mi miaŋön mönö urunini mem köhöimapkö osimakza. Tosatŋan nenegö dönqizizin könaŋi könaŋi wuataŋgögetka ahakmeme miaŋön mönö qahöpmahöp bauköm eŋgiiga pöröpköyök. Miaŋgöra tosatŋan dönqizizin murutŋi murutŋi ambazip kusum eŋgimakzei, eŋön mönö keu mi mosötme. (Silikö keunöŋ mönö jaŋjuŋ kude ak eŋgima.)

10 Jöwöwöl ohoho alta qainŋi kun mi neŋgöreŋ ahöza. Gölmenöŋ opo seri jikegö nup memakzei, yeŋön jöwöwöl qainŋi kun miaŋgö bahöŋi memba nembingö osimakze. Anutunöŋ yeŋgöra keu mewö qahö jim teköi ahöza. 11 Gölmegö jike nup galöm bohonŋan kinda ambazip siŋgisöndokŋini köl könjöratmapköra aka sömbup qeba sepŋi memba jike oleŋi töröŋi kötökŋi miaŋgöreŋ öŋgömakzapmö, sömbup ölŋini mi memba miri qandak maljei, miaŋgö sel yaigepŋe anda miaŋgöreŋ ohogetka jeba ayapkömakze. 12 Miaŋgö dop Jisös mewöyök könagesöurupŋi nanŋi sepŋan mem sarahim eŋgimapköra aka siti selgö naŋgu yaigepŋe qegetka sihimbölö möta kömuyök.

13 Miaŋgöra miri qandak
Gölmenöŋ kusuk maljini, miaŋgö qetŋi qandak.
maljini, neŋön mönö miaŋgö sel yaigepŋe anda Jisösgöreŋ toroqebin. Yaŋgöra aka mepaqepaik ak neŋgimakzei, mönö mi bisiba malbin.
14 Mi kewögöra: Siti teteköŋi qahö ahöm öŋgömawi, mi gölmenöŋ qahö ahöm neŋgizapmö, siti könaŋgep asuhum neŋgimawi, mi ekingö mönö jaram tiba maljin. 15 Miaŋgöra mönö qösösök Jisösnöŋ nam köl neŋgiiga Anutugöra möpömöpösei naluk ala malbin. Jisös qetŋi möpöseimakzei, yeŋgö numbu jitŋinaŋgö ölŋan mönö Anutugö nalukŋi akza. 16 Yuai ahöm eŋgizawi, mi mendeŋ aŋguba mem ölöwak aŋgumakzei, miaŋön mönö Anutugö nalukŋi kun akza. Anutunöŋ naluk mi ehi uruŋan ölöwahiga dop kölakza. Miaŋgöra mewö akŋegöra mönö kude ölum eŋgumakŋa.

17 Galömurupŋini mönö tem köl eŋgiba kukösumŋini bapŋe anda malme. Nup megeraŋgö kösohotŋini Anutugö jeŋe almei, yeŋön mönö miaŋgö tandök eŋgeka uruŋini galöm kölakze. Yeŋön nupŋini mi urulömböt qakŋe membepuk. Miaŋön iŋini qahö bauköm eŋgibawak. Miaŋgöra mönö keuŋinaŋgö bapŋe anda malgetka sösöŋgai qakŋe nupŋini megetka dop kölma.

18 Mönö neŋgöra aka Anutu köulukömakŋe. Yuai pakpak miaŋgöreŋ ahakmeme qetbuŋaŋambuk akingö sihimŋi ahöm neŋgiiga Anutunöŋ neŋgeka “Dop kölja,” jiiga urukezapninan möringa ölöwahakza. Keu mi möt yaközin. 19 Nöŋgöra köulukömakŋegöra mönö kapaŋ köla kewögöra kuŋgum eŋgizal: Iŋini köulukögetka Anutunöŋ nalö qahö mem köriiga ölöwaka ölöp kunbuk eŋgöreŋ kamam. b, c, d, e 

Kewö köulukömakzin:

20 Jisösnöŋ kömuyöhaŋgöra aka lama galöm qetbuŋaŋambuk aka malja. Sepŋi mokoba miaŋgö muŋgem silimbanŋan Anutugö jöhöjöhö areŋi qekötahöba mem köhöiiga nalö teteköŋi qahö ahöm öŋgöma. Anutunöŋ Kembunini mi mem guliiga kömupnöhök wahöta köhöiba malja.

21 Anutu luai Toŋan mönö inahöm eŋgiba jitsihitŋaŋgö dop aka memba malmegö aködamunŋi pakpak eŋgimakŋa. Mewö ölöp köhöiba nup ölöpŋi könaŋi könaŋi memba malme. Yaŋön mönö möwölöhöba kuŋgum eŋgiiga Jisös Kraistköreŋ naŋgöba malmal Anutugöreŋ dop köljawi, mewö malme. Kraistkö qetbuŋaŋi mönö nalö dop möpöseininga nalö teteköŋi qahö aködamunŋambuk ahöm öŋgöma. Keu mi ölŋa.

Keu teteköŋi

22 O urumeleŋ alaurupni, nöŋön kewö qesim eŋgizal: Buŋa Kimbi töröpŋi kiyök ohom eŋgizal. Miaŋgöra andö qambaŋ keuni ki mönö kapaŋ köla buŋa qem aŋgume. 23 Buzup ki mötme: Urumeleŋ alanini Timoti i kösö mireyök pösatketka erök. Ösumok ki kaŋgotma ewö, mönö yambuk kaba eŋgekit.

24 Yaizökzök keuni albiga galömurupŋini pakpak aka Anutugö ambazip sarakŋi körek yeŋgöra jigetka mötme. Itali alaurupninan yaizökzökŋini algetka eŋgöreŋ kaza.

25 Anutugö kalem möriamŋan mönö körek embuk ahöm öŋgöba ahöma.

Copyright information for `BMU