a2Jaŋ 12.7
b7-11Sum 95.7-11;
c15Sum 95.7-8;
d16-18Jaŋ 14.1-35

Hebrews 3

Jisösnöŋ Moses oŋgita öŋgöŋgöŋi akza.

Miaŋgöra urumeleŋ alaurupnini sarakŋi, Suep Toŋan eŋgoholi nembuk kambu mohot maljei, eŋön mönö urumötmötŋini pöndaŋ Jisösgöreŋ ala malme. Anutunöŋ i melaiiga aposol aka jike nup galömnini bohonŋi akzawi, yaŋgöra mewö jim miwikŋaimakzin. Mosesnöŋ Anutugö könagesöŋi pakpak mi memburikŋi qahöpmö, pöndaŋ galöm köl eŋgiba malök. Miaŋgö dop Jisösnöŋ mewöyök kun kuŋgum waŋgiyöhi, yaŋgö keuŋi (misila) törörök wuataŋgöba memburikŋi qahöpmö, pöndaŋ nömtik memba malök. Miri aka azi miri meyöhi, mi kewöt etkiinga mitimqeqe azigö qetbuŋaŋan mönö mirigö qetbuŋaŋi gwötpuk oŋgitza. Miaŋgö dop Moses aka Jisös kewöt etkiinga Jisösgö asakmararaŋi öŋgöŋgöŋan mönö Moses gwötpuk oŋgitza. Könaŋi mewö eka miwikŋaimakzin.

Miri pakpak mi kungö börösöwöya akzemö, yuai pakpak mi mönö Anutugö börösöwöŋi akza. Mosesnöŋ Anutugö könagesöŋi pakpak mi memburikŋi qahöpmö, pöndaŋ welen qem eŋgiba malök. Mewö mala Anutunöŋ könaŋgep azi kungöra jiyöhi, mönö keu miaŋgö söpsöpŋi mi qeljiŋe indela dangunuŋa kinök. Mewö kinökmö, Kraistnöŋ mönö Anutugö Nahönŋi aka Iwiŋaŋgö keuŋi (misila) nömtik memba könagesöŋi pöndaŋ galöm köl neŋgiba malja. Anutugö könagesöŋi mi neŋön akzin. Oyaeŋkoyaeŋ akingö jörömqöröm aka miaŋgöreŋ qekötahöba silenini memba öŋgöba awösamkakak kin köhöim teköbin ewö, mönö Anutugö urumeleŋ könagesöŋi aka malbin. Mewö. a 

Yaŋgiseŋ aka malbinbukö galöm meme keu

Miaŋgöra iŋini mönö Uŋa Töröŋan keu kewö jimakzawaŋgö dop akŋe, “Dölkewöŋe Anutunöŋ eŋgohola keuŋi saŋep ali mötze ewö,

uruŋini mönö mötmöt bölöŋan kude gwözöŋme. Eŋgö ambösakonurupŋinan gölme qararaŋkölkölŋe kaba nalö kunöŋ Anutu qetala esapköm waŋgiba karim akeri, iŋini mönö miaŋgö dop Anutu qetala akepuk.
Yeŋön gölme qararaŋkölkölŋe kaba Anutu ni esapköm niŋgiba malget. Aŋgöletot aka memba malali, iŋini mi yambu (yara) 40 miaŋgö dop eka mala mi töndup ni qahö möt narim niŋgigetka urunan böliiga malal.
10 Miaŋgöra ambazip kambu nalö miaŋgöreŋ gölmenöŋ malgeri, yeŋgöra aka irimni seholiiga kewö jial, ‘Yeŋön mönö sundan uruŋinan kahapmahap aka jaŋjuŋ anakze. Malmalgö köna kusum eŋgiba malalmö, mi qahö möt kutuget. Qahö!’
11 Mewö jiba irimsesewöl qakŋe keuni jim kutuba jöjöpaŋ keunan mi jöhöba kewö jial, ‘Luhut memba malmegö areŋ al eŋgialmö, yeŋön mönö oyaeŋkoyaeŋ miaŋgöreŋ qahö aŋgotme.’”
12 O urumeleŋ alaurupni, iŋini mönö kewögöra galöm mem aŋguba malme: Eŋgöreŋök kungö uruŋan goŋgiiga mötnaripŋan sörauba eri Anutu malmal Toŋi andö qeba malbapuk. 13 Mewö qahöpmö, siŋgisöndokö isimkakalekŋan tilipköm eŋgii miaŋön eŋgöreŋök kungö uruŋi gwözöŋbapuköra mönö silim dop sutŋine uru kuŋgum aŋguba malme. “Merak” keu mi jimakzini, miaŋgö dop mönö jölöŋgöm aŋguba malme. 14 Nini Kraist möt aŋgön köla yambuk kambu mohot aka maljin. Mutuk urunini meleŋda uruyahöt yaköriba awösamkakak miwikŋaiba malini, mewö gölmenöŋ malbinaŋgö dop kapaŋ köla köhöiba kinbin ewö, mönö oyaeŋkoyaeŋ akin.

15 Buŋa keu mi kunbuk jiba kewö ohozal, “Merak Anutunöŋ eŋgohola keuŋi saŋep ali mötze ewö, uruŋini mönö kude gwözöŋme. Eŋgö ambösakonurupŋinan Anutu qetala karim akeri, iŋini mönö Anutu miaŋgö dop qetala akepuk.”

16 Ambazip denike yeŋön Buŋa keu möta Anutu qetala karim aket? Mosesnöŋ könagesö eŋguaŋgiri Ijipt mosöta kageri, yeŋön mönö körek mewö aket. 17 Ambazip denike yeŋgöra aka yambu (yara) 40 miaŋgö dop irimŋi seholiiga kazik ak eŋgii malget? Ambazip siŋgisöndok aketka mem kömum eŋgii sileŋinan gölme qararaŋkölkölŋe eta kölgeri, yeŋgöreŋ mönö mewö asuhuyök. 18 Luainöŋ luhut memba malmegö areŋ ala nanŋini gölmeŋine kude aŋgotmegö keuŋi jim kutuba jöjöpaŋ keuŋan jöhöyöhi, keu mi mönö dagöra jiyök? Ambazip keuŋi qetala yaŋgiseŋ malgeri, mi mönö yeŋgöra aka jiyök. 19 Keu miaŋgö könaŋi mi kewö ek asarizin: Yeŋön Anutu qahö möt nariba yaŋgiseŋ akeraŋgöra aka nanŋini gölmeŋine aŋgotpingö osiget. Mewö. b, c, d 

Copyright information for `BMU