a8Jen 3.17-18
b14Jen 22.16-17;
c19Lew 16.2;
d20Sum 110.4

Hebrews 6

Miaŋgöra Kraist könaŋaŋgö keu kötŋi mutukŋi lök möta miaŋgöreŋ mönö kude qaköbin. Mewö qahöpmö, mönö toroqeba qariba aködamuninambuk akingö kapaŋ köla malbin. Mötnaripkö tandöŋi lök kuŋguba mi mönö dumŋe kunbuk könahiba kuŋgubinbuk. Tandö mi uruŋine kewö kuŋguin: Ahakmemenini köhömuŋi mosöta urunini meleŋda Anutu möt narim waŋgiin.

Urunini meleŋninga mötnaripkö keu kembaŋi kembaŋi kewö kusum neŋgigetka mörin: Siŋgisöndoknini köl könjöratmegöra o melun aka amötqeqe könaŋi könaŋi mieŋgö könaŋini kusum neŋgiget. Böröŋini qaknine alalgö könaŋi kusum neŋgiget. Guliba kömupnöhök wahötpingö könaŋi kusum neŋgiget. Anutunöŋ keunini jim teköi teteköŋi qahö köhöikŋi ahömapkö könaŋi kusum neŋgiget. Mötnaripkö tandöŋi mewö kuŋgubagun mönö toroqeba möt qaribingö mötzin. Anutunöŋ ösum-mumu neŋgimakzawaŋgö dop mönö aködamunini pakpak miwikŋaibingö kapaŋ köla kinbin.

Mewö kinbingö möta miaŋgöreŋ qaköba etpinbuköra aka kinjin. Ambazip kewöŋi mi uruŋini meleŋmegöra eŋguaŋgitpingö osimakzin: Tosatŋan uruŋini nalö kunöŋ asariiga Anutunöŋ Suep kalemŋi eŋgii möta söŋgaigetka Uŋa Töröŋan ösupköm eŋgii malget. Anutu Buŋa keuŋaŋgö nahömŋi mötketka oyaeŋkoyaeŋ nalö könaŋgepŋaŋgö kukösumŋan mönö uruŋine gei mötket. Mi pakpak mötagun mönö mötnaripŋini mosöta Anutu andö qeget. Ambazip mi uruŋini kunbuk meleŋmegöra eŋguaŋgitpingö osimakzin. Yeŋön Anutugö Nahönŋi ilita dumŋe kunbuk maripomnöŋ qeqe ewö memba et ala aukŋe gamu qem waŋgimakze. Mewö miaŋön mönö nanŋini geŋmororoŋ ak aŋgumakze.

Mi söpsöp keu kiaŋgö dop: Kienöŋ nalö gwötpuk yöhöba gölme qakŋe eta uruŋe geba gölme mem kelöriga nup toŋaŋgö welenqeqeurupŋan nene kömötketka Anutunöŋ gölme kötuetköiga ölŋi asuhui kölkömöt toŋi yeŋön mi memba köweŋine alakze. Mewö alakzemö, koururuk aka siriuret wahiŋambuk miaŋön gölmenöŋ asuhuba wahörakzawi, gölme miaŋön mönö nesakŋi akza. Toŋi yeŋön mi saitköbingö mötze aka kapaŋ köla mambötketka ölŋi qahö asuhui eka teteköŋe mönö kuŋgugetka jema.

O wölböt alaurupni, neŋön söpsöp keu mewö jizinmö, mi töndup iŋini uruŋini meleŋda malmeaŋgöra mönö uruyahöt qahö akzin. Eŋgö uruŋine Buŋa keugö ölŋan mönö asuhum qarimapköra möta awösamkakak kinjin. Anutunöŋ ölŋi mi eka mönö meköm eŋgii letota Suepnöŋ öŋgöme. 10 Anutunöŋ mönö ekbonep qakŋe goŋgoŋi qahö akza. Iŋini Anutugö ambazip sarakŋi bauköm eŋgiba mala kota toroqeba bauköm eŋgiba nup memba malakze. Mewö urukalemŋini Anutu kondel waŋgigetka qetbuŋaŋan qarimakzawi, yaŋön nupŋini aka urukalemŋini miaŋgöra mönö qahö ölum qeiga kitipŋi meleŋ eŋgima.

11 Nini oyaeŋkoyaeŋ akingö jörömqöröm aka miaŋgöreŋ awösamkakak uruyahöt qahö kinmegö sihimnini möta kewö awöweŋgömakzin: Iŋini nanŋök nanŋök Anutugö urukönöp ahakzei, miyöhök mönö toroqeba kondela malme. Aködamun-ŋinambuk akingö kapaŋ köla gölmenöŋ mal tekömeaŋgö dop miaŋgöreŋ mönö kude löwörime. 12 Qölzöm akepuköra mönö awöweŋgömakzin. Anutunöŋ oyaeŋkoyaeŋ yuai neŋgimamgö keu jöhöyöhi, tosatŋan Anutu möt nariba sihimbölöŋini möta mökösöŋda mewö miaŋön mi buŋa qem aŋgumakze. Iŋini yeŋgö silikŋini wuataŋgömegöra mötzin. Mewö. a 

Anutugö jöhöjöhö keu mi uruyahötŋi qahö.

13 Anutunöŋ Abraham jöhöjöhö keu waŋgiba mi nanŋi qetŋi qeta jöjöpaŋ keuŋan jim köhöiyök. Kunöŋ Anutu oŋgita öŋgöŋgöŋi malbawak, ölöp yaŋgö qetŋi qetpawakmö, mewöŋi kun qahö maliga miaŋgöra mönö nanŋi qetŋi qeta jöjöpaŋ keuŋi jiiga köhöiyök. 14 Jöhöjöhö keuŋi mi Abrahamgöra kewö jiba jiyök, “Nöŋön mönö ölŋa kötuetköm gihimam. Mönö ölŋa gwölönarök gihibiga sehime.”

15 Mewö jiiga Abraham yuai waŋgimapkö keu jöhöi ahöyöhi, yaŋön mi ölŋambuk akŋapkö kapaŋ köla mamböta mala ölŋi buŋa qem aŋguyök. 16 Ambazipnöŋ ketaŋamŋinaŋgö qetŋi qeta jöjöpaŋ keu jiget mörakze. Jöjöpaŋ keuŋinan keu jizei, mi mem köhöiiga qeapköbingö osigetka keu jijiŋinan teköza. 17 Miaŋgö dop Anutunöŋ keuŋi Abrahamgö gwölönarökurupŋi neŋön mötpingöra jöhöba jiyök. Keu areŋi mi kunöŋ qeapköba utekömamgö osizawi, gwölönarökurupŋi neŋön jöhöjöhö keu miaŋgö könaŋi mi törörök möt yaköbingö mörök. Miaŋgöra jöhöjöhö keuŋi jiiga mutukŋi aiga keu mi kunbuk jöjöpaŋ keuŋan jim köhöiiga indimŋi yahöt ahök.

18 Anutunöŋ keu mi jiba miaŋgö muneŋ jimamgö osiyök. Yaŋön keu utekutekŋi qahö mi jibagun jim köhöiyöhi, miaŋön mönö urunini naŋgömapköra mörök. Miaŋgöra mi jibagun jim köhöiyök. Neŋön gölmegö ahakmeme bölöŋeyök ölöŋ köla Anutugöreŋ aŋgota oyaeŋkoyaeŋ neŋgimapkö jörömqöröm neŋgiyöhi, mi mönö töp memba mamböta maljin. 19 Oyaeŋkoyaeŋ akingö al mamböta miaŋgö uruyahötŋi kun qahö ahakzin. Jörömqörömnini miaŋön uruninaŋgö kösö mendanŋi tandök ewö aka nini Jisösbuk jöhöm neŋgimakza. Jörömqörömninaŋgö kösö mendanŋi köröpŋi miaŋön mönö neŋgöreŋök könahiba Suep jikegö uruŋe öŋgöba jike oleŋi yahötkö sutŋire opo sel ahözawi, mi mewöyök kutuba toroqeba Jisös jakömbuak dum kömbukŋe tatzawaŋgöreŋ anja. 20 Jisösnöŋ mönö jitŋememenini aka mutuk euyaŋgöreŋ öŋgöba jakömbuak dumŋi memba nalö teteköŋi qahö tat öŋgöma. Mewö Melkizedek ewö jike nup galömnini bohonŋi aka malja. Mewö. b, c, d 

Copyright information for `BMU