a4-5Mat 1 2.41, Luk 11.32

Jonah 3

Jonanöŋ Anutugöt nup mi Niniwe uruŋe meyök.

Gölme oronŋe eriga Kembugöreŋ keu ki mi kunbuk Jonagöreŋ asuhuyök: “Göŋön möp wahöta siti ketauŋi Niniwe miaŋgöreŋ anda buŋa keu gihimami, mi jiba uruŋini kuŋguman.” Keu mewö asuhuiga Jonanöŋ wahöta Kembugöt keu jit tem köla Niniwe anök. Niniwegöt dopŋi mi kewö: Gi göraŋeyök könahiba anda malnöŋga wehön karöbut teköiga likepŋe endu aŋgotman. Jonanöŋ könahiba siti uruŋe anda maliga wehön mohot teköiga buŋa keu qeta kewö jiyök:

“Wehön 40 kun ahözap. Mi teköiga Niniwe siti kiaŋön möp meleŋni gemap.”

Keu mewö qeta jiiga Niniwe könagesö yeŋön Anutugöreŋ keu möt nariba uruŋini meleŋda nene siŋgi malbingöt nalö ala jim köhöiget. Mi jim köhöiba ambazip ketauŋi moröŋi yeŋön lökŋanök imbi meleŋgöt samot meget sileŋine öŋgöiga kau ariget.

Mewö aketka miaŋgöt buzup keuŋi mi Niniwegöt kiŋ (praim minista) yaŋgöreŋ aŋgorök. Aŋgoriga möta jakömbuak dum tatatŋeyök eta malukuŋi köteköba samot memba at-turuba kau utuba ariba tarök. Tata jim kutukutu kewö aliga Niniwe siti dop köl teköba anök: “Iŋini möp kiŋ aka jembonurupŋi yeŋgöreŋ jim kutukutu ki mötme: Kunŋan kun möp nene kuluŋ kude nemap. Ambazip me bau kuruk-lama bulmakau-iŋini nene kuluŋ kun nemegöt kude möt eŋgime. Nene siŋgi mewö mala samot mem teköba Anutu köhöikŋanök sahöt köuluköm waŋgiba nanŋök nanŋök könaŋamŋini bölöŋi aka ambazip ayuayuhu böröŋini töwötpuk meget ahözawi, mi möp andö qem teköba mosötme.

Mewö ahinga Anutugöt uruŋan kunbuk eriga wösöŋi möt neŋgiba kukŋaŋgöt könöpŋi qeraköba siŋgisöndoknini mosötpawak. Mi mosöriga kude ayuhubinak. Mewö jizin.”

10 Mi möt asahiba könaŋamŋini bölöŋi andö qeba uruŋini meleŋgetka Anutunöŋ ahakmemeŋini mi eka wösöŋi möt eŋgiba mötmötŋi liliŋgöiga siŋgisöndokŋinaŋgöt likepŋi meleŋ eŋgimapkö ahöhi, mi mosörök. Uruŋan mewö eriga kude mem bölim eŋgiyök. Mewö. a 

Copyright information for `BMU