a2Eks 34.6;
b31 Kiŋ 1 9.4

Jonah 4

Jonanöŋ tembula irimŋi seholiyök.

Mewö asuhuyökmö, Jonanöŋ miaŋgörap urubölö ketauŋi möta irimŋi seholiyök. Irimŋi seholiiga Kembu ulet waŋgiba kewö jiyök: “Aek Kembu, gi ak-kömukömugöt bemŋi mala ölöp neŋgehorimakzan. Göhöreŋ kuki mi öŋsöŋ aiga kalem möriamgi mi önöŋi qahöp ahöza. Mewö urugi zölaŋ amöröiga wösögi möta könagesö kun mem bölöm eŋgimamgöt kude mörakzan. Mia nane gölmenöŋ mala lök möt yaköba jiali, mia ölum guhuza me qahöp? Könaŋi mewögörap aka nalö miaŋgöreŋ Tarsis anmam jiba ösumok mömölaköba anda malal. Merak malmalgöt tököba kömupköt möralga ölöwakzap. Miaŋgörap Kembu, göŋön möp malmalni dölki noaŋgötnöŋ. Keu mi ölŋap.”

Mewö ulerökmö, Kembunöŋ kewö meleŋ waŋgiyök: “Jona, gi ak-kömukömugörap irimsesewöl mötzani, mi dop köljap me qahöp?”

Mewö jiiga Jonanöŋ siti mosöta eta wehön kotkotŋe göröken anda köna töwokŋe endu koum qeba miaŋgöt aumŋe tarök. Tata sitigörap mewö me mewö asuhumawi, mi ekŋamgörap uba tarök.

Mewö tarökmö, Kembu Anutunöŋ Jona uruölöwak ak waŋgimamgörap jiiga ölunölun kun asuhuba köriba kota Jonagöt nöröpŋi aum köl waŋgiyök. Aum köl waŋgiiga ölunölungörap uruölöwak ketauŋi möta tarök. Tata suŋgem kun ahöiga miri giaŋiiga miaŋgöreŋ Anutunöŋ taröŋ kun melaiiga kaba ölunölun mi yöhöröŋgöiga sinŋi soholiyök. Wehönöŋ koriga Anutunöŋ jiiga luhut könöpŋambuk kötökŋi mi miri jeŋi kotkotŋeyök qeiga wehön jeŋan nöröpŋe qei qei uruŋi öngöba duhuiga kömumamgöt möt teköba köuluköba kewö jiyök: “Nöŋön malmalgöt tököba kömupköt möralga ölöwakzap. Keu mi ölŋa.”

Mewö jiyökmö, Anutunöŋ Jonagörap kewö jiyök: “Gi ölunölungörap irimgi seholizawi, mi dop köljap me qahöp?” Mewö jiiga kewö meleŋ waŋgiyök: “Irimni seholizawi, mi möp dop köljawa. Nöŋgöt irimsesewölni mi ketauŋi aiga urunan kude amörimap. Miaŋgörap ölöp kömumam. Keu mi ölŋap.”

10 Jonanöŋ mewö jiiga Kembunöŋ kewö jiyök: “Gi ölunölungöt böröŋi kun kude memba mi kunde galöm kölnöŋga köriyök. Mi suŋgem mohotkö uruŋe asuhuyök aka suŋgem mohotkö uruŋe soholiba kömuyök. Töndup göŋön nangak yuai omaŋi mewöŋi miaŋgörap sahöta waimanjat mötzan.

11 Mewö aiga nöŋön möp denöwögörap siti ketauŋi kiaŋgöt könagesöŋi yeŋgörap waimanjat kude mötpileŋak? Miaŋgöt uruŋe morö namande 1 20.000 (handöt twenti tausen) jaŋgö mi oŋgöta maljei, mi ölöpŋaŋgöt aka bölöŋaŋgöt könaŋiri kude möt kewöt etkimakzei aka bau kuruk yuai mi tok gwötpuk malje. Mi ambazip ketauŋi yembuk mohok mem bölim eŋgibileŋbukörap nöŋön möp sihimnan Niniwe eŋgehorizal.” Mewö. a, b 

New Testament

Copyright information for `BMU