c15Mat 9.34, 10.25;
d16Mat 12.38, 16.1, Mak 8.11;
f29Mat 16.4, Mak 8.12;
h311 Kiŋ 10.1-10, 2 Hist 9.1-12;
j33Mat 5.15, Mak 4.21, Luk 8.16
k42Lew 27.30;
l51Jen 4.8, 2 Hist 24.20-21

Luke 11

Jisösnöŋ köulukö könaŋi kusum eŋgiyök.

Mat 6.9-13, 7.7-11

Jisösnöŋ miri kunöŋ köuluköba mali teköiga gwarekurupŋi yeŋgöreŋök kunŋan kewö jiyök, “Kembu, Jon O-melun azinöŋ gwarekurupŋi köulukö könaŋi kusum eŋgiyöhi, gi mönö mewöŋanök nini kusum neŋgiman.”

Jiiga Jisösnöŋ kewö jii mötket, “Iŋini köuluköbin jiba kewö jime:

Iwi, göhö qetkan mönö töröŋi ahöma. Mönö galöm köl neŋginöŋga bemtohoŋgahö ölŋi asuhuma. (Göhö jitsihitki Suepnöŋ tem kölakzei, gölmenöŋ mönö mewöŋanök asuhuma.)
Gi wehön dop nene dopnine neŋgiman.
Tosatŋan bölöŋi ak neŋgigeri, nini körek yeŋgö siŋgisöndokŋini mosötzin ewö, gi mönö neŋgöreŋ siŋgisöndok saŋgoŋ neŋgiman.
Gi esapesapnöŋ eta neŋgubapuköra aŋgön köl neŋgiba Bölöŋi Toŋaŋgö böröŋeyök meköm neŋgiman.”
Tosatŋan keu mi kewö meleŋda jimakze: bölöŋeyök meköm neŋgiman.

Jisösnöŋ toroqeba kewö jii mötket, “Eŋgöreŋök kunŋan suŋgem bibiŋe alaŋaŋgö mire anda möndöba kewö jima, ‘Alani, beret karöbut niŋginöŋga likepŋi biaŋ meleŋ gihibi. Alani kunŋan könanöŋ mala nöŋgöreŋ kaŋgoriga neneŋamni qahöpköra gumohom waŋgimamgö jaruzal.’ Mewö jii alaŋan miri uruŋeyök kewö meleŋda jima, ‘Gi gaun gwölö ak neŋgizan. Ni naŋguŋi lök köl köhöibiga nahönböraturupnan nömbuk tumbulahöpnini tumbula gaun ahözin. Miaŋgöra wahöta mi gihimamgö osizal.’ Mewö jimapmö, nöŋön jibi mötket: Miri toŋan alaŋi akzawaŋgöra aka qahö wahöta waŋgimapmö, mi töndup kapaŋ köla jiba kinjawaŋgöra mi ölöp wahöta qesizawaŋgö dop körek waŋgima.

“Nöŋön miaŋgö likepŋi kewö jibi mötket: Mönö Anutu köuluköme. Köulukögetka eŋgima. Anutugöreŋ mönö yuaigö böröjaŋ memba jarume. Mi jarugetka kondeliga miwikŋaime. Kinda naŋgunöŋ qeme. Qegetka naŋgu tal eŋgima. 10 Kunŋan Anutu köulukömakzawi, yaŋön mönö likepŋi buŋa qem aŋguma, yuaigö jarumakzawaŋön mönö mi miwikŋaima. Naŋgunöŋ qemakzawaŋgöra mönö naŋgu öröm waŋgima.

11 “Iwiurup eŋgöreŋök daŋön kewö akza: Nahönŋan söragöra qesiiga salupŋe qatö waŋgima. 12 me kuruk kötŋaŋgö qesiiga skorpion (nendaŋ kömbukŋi pomemba) waŋgima? 13 Mewögöra iŋini ambazip bölöŋi akze aka töndup kalem ölöpŋi ölöpŋi mi nahönböraturupŋini eŋgibingö mötze ewö, Suep Iwinöŋ mönö kalemŋi denöwö aŋgön kölbawak? Yaŋgö uruŋaŋgö ahakmemeŋi mi neŋgoŋgita tandökŋi kun akza. Miaŋgöra Uŋa Töröŋaŋgöra köuluköba qesim waŋgime ewö, yaŋön mönö sihimŋan i melaiiga uruŋine gema.” Mewö.

Jisösnöŋ öme yeŋgö ösumŋini oŋgita qei etza.

Mat 12.22-32, Mak 3.20-27

14 Ömenöŋ azi kun töŋöt aka numbuŋi jöhöiga mötök maliga Jisösnöŋ ömeŋi mi wuataŋgöiga kota mosöri nesilamŋan lolohoiga kunbuk keu jiyök. Keu jiiga ambazip kambu yeŋön mi eka welipköget. 15 Welipkögetmö, yeŋgöreŋök tosatŋan kewö jiget, “Yaŋön mönö öme yeŋgö kembuŋini Katakömulat yaŋgö ösumnöŋ ömewöröme eŋguataŋgömakza.”

16 Mewö jigetka tosatŋan Jisös keugö bötaknöŋ örömapköra esapköm waŋgiba kewö qesiget, “Gi mönö jim kutunöŋga Suepnöhök aŋgöletot kun asuhuiga ekin.” 17 Qesigetmö, yaŋön uru mötmötŋini möt teköba kewö jii mötket, “Kantri denike yeŋgö galömurupŋinan sutŋine aŋgururuk aka julmei, yeŋön mönö ayuhum aŋgugetka kantriŋinan böliba sahopŋanök ahöma. Mewöyök miri kungö könagesö yeŋön julmei, miriŋinan mönö qeqelaŋlaŋ ahöma.

18 “Mötket! Satangö könagesö yeŋön mewöyök sutŋine aŋgururuk aka julbeak ewö, yeŋön mönö gawman nupŋini membingö osigetka ömetohoŋinan mönö denöwö kinbawak? Iŋini nöŋgöra kewö jize: Yaŋön Katakömulatkö ösumnöŋ ömewöröme eŋguataŋgömakza. 19 Mewö jizemö, mötket, nöŋön Katakömulatkö ösumnöŋ ömewöröme közöl eŋgibileŋak ewö, eŋgö alaurupŋinan mönö dagö ösumnöŋ mi közöl eŋgibeak? Miaŋgöra yeŋön mönö keuŋini ölŋi me qahö, mi kewöta jim teköme.
Nanŋini sile galömurupŋinan Anutugö qetŋi qeta töndup öme mi Katakömulatkö kukösumnöŋ közöl eŋgigetka nöŋön mi Anutugö ösumnöŋ közöl eŋgimakzal. Öröröŋ qahö kinjinaŋgöra daŋön ölŋi aka daŋön keu muneŋi wuataŋgömakzawi, mi ambazipnöŋ kewöta jim teköme.
20 Mi jim tekömemö, Anutugö ösumŋan nöŋgö börö kesötni sölölöhöi öme eŋguataŋgömakzal ewö, Anutugö bemtohoŋan mönö eŋgöreŋ kam kuŋguza.

21 “Azi köhöikŋan timbi liŋgipŋambuk miri gölmeŋi galöm meiga sukinapŋan mönö kahaimök ahöma. 22 Mewö ahömapmö, azi köhöikŋi kötökŋan luhuba kaba qeba luhut al waŋgiba timbi liŋgipŋi nariyöhi, mi körek waŋgita qezaŋda sukinapŋi memba anda alaurupŋi mendeŋ eŋgima.

23 “Kunŋan nömbuk qahö maljawi, yaŋön mönö qetal niŋgimakza. Kunŋan ambazip nöŋgö qetne tokomegöra qahö öröm eŋgimakzawi, yaŋön mönö mendeŋ eŋgimakza.” Mewö. c, d, e 

Öme yeŋön azi uruŋe liliŋgöbingö kapaŋ kölje.

Mat 12.43-45

24 “Ömenöŋ azi uruŋeyök kota gölme qararaŋkölkölŋe anda laŋ liliköba mala luhut memamgö miri jaruba kun qahö miwikŋaiba ölan yöhöiga kewö jima, ‘Mirini mosöta kazali, miaŋgöreŋ mönö kunbuk liliŋgömam.’ 25 Mewö jiba liliŋgöba miriŋi usuŋda meŋölöi ahöyöhi, mi mewöŋanök ahöi miwikŋaima. 26 Mewö miwikŋaiba anda öme tosatŋi 7 eŋguaŋgitma. Öme 7 mi nanŋi oŋgita bölöŋi kötökŋi akze. Yaŋön mi eŋguaŋgiriga kaba miri mi öŋgöba miaŋgö uruŋe malme. Mewö aiga azi miaŋgö könaŋi mutuk kileŋkileŋ ahökmö, könaŋgep bölim qölim teköma.” Mewö.

Denike yeŋön simbawoŋ akze?

27 Jisösnöŋ keu mewö jiba mali ambazip kambu sutŋineyök ambi kunŋan qeta Jisös kewö jii mörök, “Gömokni, ambinöŋ gölöm ala gömimba juzu gumohom gihiyöhi, nöŋön yaŋgö mötpi simbawoŋ akza.” 28 Mewö jiyökmö, Jisösnöŋ kewö meleŋnök, “Mi jizanmö, nöŋön kewö jimam: Ambazip Anutugö keugöra kezap ala möta tem köla köl gulimakzei, yeŋön mönö simbawoŋ akze.” Mewö.

Böhi tosatŋan aŋgöletotköra kapaŋ köla uletket.

Mak 8.11-12, Mat 12.38-42

29 Ambazip kambunöŋ tokogetka qariiga Jisösnöŋ toroqeba keu kewö jiyök, “Ambazip merak gölmenöŋ maljei, mi kambu bölöŋa. Yeŋön Anutugö aiwesökŋaŋgöra kapaŋ kölakzemö, aiwesök kun kezapqetok azi Jonagöra lök asuhuyök. Anutunöŋ aiwesök murutŋi kun qahö al eŋgima. 30 Keu miaŋgö könaŋi kewö: Anutunöŋ mönöwök Jona melaiiga Niniwe yeŋgö sutŋine anda Anutugö aiwesökŋi ahök. Miaŋgö dop Suep gölmegö azi ölŋan mewöyök ambazip kambu kiaŋgö sutŋine asuhuba uruŋini meleŋmegöra kuŋgum eŋgiba aiwesökŋina akŋa.

31 “Könaŋamŋinaŋgö kaisösöpŋi kun kewö: Anutunöŋ mönöwök mötkutukutu öŋgöŋgöŋi ketaŋi mi kiŋ Solomon waŋgiiga Saut görökenök kantri kungö qin ambinöŋ Solomongö mötkutukutuŋi mötmamgö sihimŋi mörök. Sihimŋi möta gölme göraŋeyök wahöta köna köröp tiŋtiŋi kaba mala Solomongö mötmötŋi mörök. Mi mörökmö, mötket, nalö kewöŋe nöŋön sutŋine asuhuba kinda Anutugöreŋ mötkutukutu öŋgöŋgöŋi memba kazali, mi Solomongö mötkutukutuŋi oŋgitza. Oŋgitzapmö, iŋini töndup nesampurek ak niŋgiba tönpin kingetka qahö dop kölja.

“Miaŋgöra Anutunöŋ könaŋgep ambazip körek pakpak öröm eŋgii keuŋini jim tekömapköra jeŋe aŋgotmei, nalö miaŋgöreŋ Saut kantrigö qin ambi miaŋön mönö mewöyök aŋgotma. Yaŋön ambazip kambu ki kinjei, embuk öröröŋ kömupnöhök wahöta eŋgö qöhöröŋine mohotŋe kinma. Mohotŋe kinda keu kewö eŋgö sileŋine alma, ‘Iŋini Jisös nesampurek ak waŋgigetka Anutunöŋ likepŋi meleŋ eŋgii sihimbölö öŋgöŋgöŋi mötme.’ Yaŋön mewö jiiga silikŋi kewöta nanŋinaŋgöra gamuŋini mötme.

32 “Jonanöŋ Niniwe ambazip sutŋine anda Anutugö keunöŋ uruŋini kuŋgui möta miaŋgöreŋök uruŋini meleŋgetmö, mötket, nöŋön sutŋine asuhuba kinda Jonagö ahakmemeŋi oŋgita ahakzal. Mewö ahakzalmö, iŋini töndup nesampurek ak niŋgimakze.

Miaŋgöra Niniwe ambazipnöŋ jimtekötekögö nalö ketaŋe ambazip kambu ki kinjei, embuk öröröŋ kömupnöhök wahöta eŋgö qöhöröŋine mohotŋe kinme. Mohotŋe kinda Niniwe yeŋön keu kewö eŋgö sileŋine alme, ‘Iŋini Suep gölmegö azi ölŋi nesampurek ak waŋgigetka Anutunöŋ likepŋi meleŋ eŋgii sihimbölö öŋgöŋgöŋi mötme.’ Niniwe yeŋön mewö jigetka ahakmemeŋinan nanŋini könaŋamŋini indelgetka gamuŋini mötme.” Mewö. f, g, h, i 

Kiwa mi asakŋi neŋgimapköra ahöza.

Mat 5.15, 6.22-23, Mak 4.21-23

33 “Kunŋan lambe me kiwa ohotiriba köwe waŋgömŋe me kimbutnöŋ qahö almapmö, mi mönö miaŋgö dum tatatnöŋ alma. Mewö ali tosatŋan miri uruŋe öŋgöbingö mötzei, yeŋön miaŋgö asakŋi eka ölöp öŋgöme. 34 Göhö jegi mi uru silegahö kiwaŋi akza. Miaŋgöra kawöl kunöŋ jegi qahö mem böliza ewö, miaŋön mönö tohoba asarim teköi Anutugö asakŋan ölöp uruge mem asariiga malmalgi pakpak asakŋe malman. Asakŋe malmanmö, sihim kömbönaŋi bölöŋan me yuai kunŋan jegi mem böliba asakŋi közambötza ewö, miaŋön silegö malmalgi mewöyök mem söŋauiga pandaman uruŋe jipjap malman.

35 “Mewö aiga mötnöŋ, söŋaupnöŋ urugahö asakŋi közamböri söŋaubapuköra mönö tihitki möta galöm mem aŋguman. 36 Mewö aknöŋga Anutugö asakŋan urugi körek dop köli waŋgömŋi kun qahö söŋauza ewö, göhö silegan mönö mewöyök asoŋ-kilik-kilikŋambuk aka jemesoholgan asariza. Kiwa ketaŋan silege kuŋguba kölköl-bilikbilikŋambuk mem asarim gihizawi, malmalgi mönö miaŋgö dop Anutugö asakŋe al teköba malman.” Mewö. j 

Urumeleŋgö silesile tandököra ‘Yei!’ jiiga 6 ahök.

Mat 23.1-36, Mak 12.38-40, Luk 20.45-47

37 Jisösnöŋ keu mi jim teköi Farisi (Köna keugö kapaŋkölköl) azi kunöŋ kewö jiba köl öröm waŋgiyök, “Gi ölöp nöŋgö mire öŋgöba tata nene nembin.” Mewö jiiga anda öŋgöba nene nemamgö tarök. 38 Mutuk böröŋi qahö saŋgoŋda eta tarökmö, Farisi azinöŋ silik mi eka welipköyök. 39 Welipköiga Kembunöŋ kewö jii mörök, “O Farisi iŋini mönö ölŋa amöt qem aŋgubingöra qambi aka al nenegö sileŋi saŋgoŋ yakömakzemö, nanŋini uruŋinan mönö tölohoza. Mi dogo jimamoŋ aka qewöloŋ miaŋön kokolak qei malje.

40 “O iŋini, uruŋini qahö. Kunöŋ sileŋi pakpak miwikŋaiyöhi, yaŋön mönö uruŋi mewöyök miwikŋaiyök me qahö? Iŋini mönö wuanöŋgöra uru likepŋaŋgöra taŋqaŋ akze? Mi qahö dop kölja. 41 Miaŋgöra yuai kiwi al nenenöŋ tatzawi, mi mönö kalema ambazip wanapŋi eŋgime. Mewö aketka Anutunöŋ amöt qem eŋgii eŋgöreŋ yuai pakpak mönö sarakŋi ahöma.” Mewö.

42 “O Farisi ambazip, lömböt qakŋine öŋgözawaŋgöra mönö wölziköba ‘Yei!’ jizal. Iŋini nene pakpak mendeŋda bahöŋi 10 miaŋgöreŋök mohot Anutugö buŋaya qemakze. Gipŋi, supe aka yöha könaŋi könaŋi mi mewöyök meŋdeŋda tenöhök mohot mi Anutugö buŋa qemakze. Naluk mi törörök alakzemö, Köna keugö kötŋi bohonŋi ki mönö oŋgita mosörakze: Gi Anutu uru könömgan jöpaköm waŋgiman aka ambazip sutŋine ahakmeme diŋdiŋi wuataŋgöba malman. Keu bohonŋi mi mönö kapaŋ köla wuataŋgöba malme aka keu morömorö mi mewöyök kude oŋgita mosötme.

43 “O Farisi, lömböt qakŋine öŋgözawaŋgöra mönö wölziköba ‘Yei!’ jizal. Iŋini köuluk mire dum tatat mutukŋe jegep tatpingö sihimŋi mörakze. Maketnöŋ me könanöŋ ambazip eŋgeketka jölöŋini jimegö mörakze. 44 O iŋini, lömböt qakŋine öŋgözawaŋgöra wölziköba ‘Yei!’ jizal. Iŋini qaksiri qetŋini qahö miaŋgö dop akze. Ambazipnöŋ qamöt wörönŋambuk denike ahözawi, mi qahö möta qakŋine laŋlaŋ tiba yuai dönqizinŋambuk oseiba tölohomakze.” Mewö.

45 Jisösnöŋ keu mewö jiiga Köna keugö böhi yeŋgöreŋök kunŋan möta meleŋda kewö jiyök, “Böhi, gi keu mewö jiba nini mewöyök gamu qem neŋgizan.”

46 Mewö jiyökmö, Jisösnöŋ keu kewö jiyök, “O Köna keugö böhi, eŋgö qakŋine mewöyök lömböt öŋgözawaŋgöra wölziköba ‘Yei!’ jizal. Iŋini keuŋi keuŋi jim kutuba miaŋgö könjöŋ lömbötŋi ambazip qakŋine alagun algetka mi tem kölbingö lömböriiga jaraŋbaraŋ ahakzemö, nanŋinak i kesötŋinan borom kun bauköm eŋgibingö wösömötmötŋini kun qahö ahöza.

47 “O iŋini, lömböt qakŋine öŋgözawaŋgöra mönö wölziköba ‘Yei!’ jizal. Iŋini kezapqetok ambazip yeŋgö qaksirinöŋ simen koum memba meŋölömakzemö, nanŋini ambösakonŋinan mönö i eŋguget kömuget. 48 Nanŋini ambösakonŋinan kezapqetok ambazip eŋguget kömugetka iŋini yeŋgö qaksiriŋine koum memba simen alakze. Mewö aka miaŋön ambösakonŋini yeŋgö ahakmemegöra imbi köla keuŋini naŋgöba jiba dangunu ewö kinje.

49 “Miaŋgöra Anutu, mötkutukutu Toŋi yaŋön kewö jiza, ‘Nöŋön kezapqetok ambazip aka aposol melaim eŋgibi eŋgöreŋ kame. Kagetka yeŋgöreŋök tosatŋi i eŋguget kömume aka tosatŋi sesewerowero ak eŋgime.’

50 “Anutunöŋ Suep gölme miwikŋaim etkiyöhi, nalö miaŋgöreŋök könahiba kezapqetok ambazip eŋgugetka sepŋini mokoget eri, miaŋgö sep kitipŋi pakpak mi ambazip merak maljei, mönö eŋgö qakŋine öŋgöi sihimbölö mötme. 51 Abelgö sepŋan eri miaŋgöreŋök könahiba eŋguba kota mala Zekaraia jöwöwöl alta aka jöwöwöl jike kömbukŋi mietkö sutŋire qeget sepŋi eri miaŋgöreŋ teköyök. Nöŋön keu kewö jibi mötme: Sepŋinaŋgö kitipŋan mönö ambazip merak maljei, eŋgö qakŋine öŋgöiga sihimbölö mötme.

52 “O Köna keugö böhi iŋini, lömböt qakŋine öŋgözawaŋgöra mönö wölziköba ‘Yei!’ jizal. Iŋini Anutugö mötmöt membingö naŋgu ki moröŋi mi ambazip eŋguaŋgita aŋgön köl eŋgimakze. Nanŋinak miaŋgö uruŋe qahö aŋgotket aka tosatŋan miaŋgö uruŋe aŋgotpingö akzei, iŋini i jöhöba aŋgön köl eŋgiba malget.”

53 Jisösnöŋ keu mewö jiba mosöta ani Köna keugö böhi aka Farisi yeŋön könahiba keu könöpŋambuk jim waŋgiba keu könaŋi könaŋi jimapkö qeqesi gwötpuk al waŋgiget. 54 Al waŋgigetka numbuŋeyök keu kun qiwitipköiga miaŋön köpeiba keugö bötaknöŋ örömapköra mönöget. Mewö. k, l 

Copyright information for `BMU