a13Mat 6.24
b16Mat 11.12-13;
c17Mat 5.18;
d18Mat 5.32, 1 Kor 7.10-11

Luke 16

Sukinap galöm tilipqilipŋambukö dopkeu

Jisösnöŋ gwarekurupŋi keu kun kewö jii mötket, “Azi pomŋi kungö sukinap galömŋi kun malök. Tosatŋan kaba azi pomŋi mi luasö keu jiget mörök, ‘Yaŋön göhöreŋ moneŋ inapki köndeŋda laŋ gila malja.’ Mi möta galöm mi jii kaiga jim waŋgiyök, ‘Ni göhöra buŋa bölöŋi jiget mötzal. Gi nöŋgö miri aka sukinapni kunbuk galöm kölmanaŋgö dop qahö akzan. Miaŋgöra mi denöwö galöm köla malnöŋ, miaŋgö löpötŋi jim asarim niŋgiman.’ Mewö jiiga uruŋan kewö mötmöriyök, ‘Miri toŋan galömkölköl nupni noaŋgiri denöwö akŋamto? Ösumni qahö dop köljawaŋgöra gölme esimamgö osizal aka ulet azi malmamgö gamuni mötzal. Yaŋön galömkölköl nupni noaŋgitmawi, nöŋön nalö miaŋgöreŋ denöwö akiga tosatŋan miriŋine köl öröba köyan köl niŋgibeak? Aha! Köna kun mötmörizal.’

“Mewö jiba ambazip toŋan tosa al eŋgiyöhi, mi pakpak nanŋik nanŋik öröm eŋgiiga kaget. Mutukŋan kaiga yaŋgöra kewö jiyök, ‘Tonaŋgöreŋ tosa göhöreŋ dawik ahöza?’ Mewö qesiiga jiyök, ‘Oil dram 100 meal.’ Mewö jiiga kewö meleŋnök, ‘Gi tosa papiagi memba ki tata ösumok uteköba 50 ohonöŋga ahöma.’ Mewö jiba azi kun qesim waŋgiyök, ‘Aka gi? Göhöreŋ tosa dawik ahöza?’ Qesiiga kewö jiyök, ‘Wit flaua mi 21.000 kilogram meal.’ Mewö jiiga jiyök, ‘Gi tosa papiagi memba miaŋgöreŋ 16.800 kilogram mewö ohonöŋga ahöma’.

“Mewö aiga miri toŋan möta jim-ölöwak keu kewö jiyök, ‘Galömnan tilipqilip qakŋe yuai ahöhi, mi mötkutukutu ölöpŋi kondelja.’” Kembu Jisösnöŋ kösohot mewö jiba toroqeba jiyök, “Söŋaupkö ahakmeme wuataŋgömakzei, yeŋgö mötkutukutuŋini mi ambazip tosatŋi merak maljei, mi tilipqilip ak eŋgimeaŋgö dop ahözapmö, Anutugö asakŋe maljei, yeŋgö mötkutukutuŋini mi miaŋgö bapŋe akza.

“Miaŋgöra kewö jibi mötket: Tosatŋan gölmegö moneŋ inapnöŋ ambazip tilipköm eŋgimakzemö, eŋön mönö miaŋön memba alaurup miwikŋaim eŋgime. Mi miwikŋaim eŋgigetka gölmegö yuainöŋ qahöwakŋawi, Anutunöŋ mönö nalö miaŋgöreŋ köl öröm eŋgiiga malmal köhöikŋi mire aŋgota teteköŋi qahö malme.

10 “Kunŋan yuai morörökŋi memba kapaŋ köla törörök galöm köljawi, yaŋön mönö yuai ketaŋi mewöyök törörök galöm kölma. Kunŋan yuai morörökŋi galöm köla kitik-katuk akzawi, yaŋön mönö yuai ketaŋi mi mewöyök galöm kölmapkö jiinga kitik-katuk akŋa. 11 Gölmegö moneŋ inapŋi böröŋine algetka mi pöndaŋ qahö galöm kölgetka ölŋi qahö asuhuyök ewö, kunŋan mönö yuai buŋaŋi öŋgöŋgöŋi ölŋi mi böröŋine qahö alma. 12 Iŋini tosatŋi yeŋgöreŋ yuai mi pöndaŋ qahö galöm kölgetka ölŋi qahö asuhuyök ewö, nanŋini uruŋinaŋgö buŋa ölŋi mi daŋön kun eŋgibawak?

13 “Welenqeqe kunŋan kembu yahöt welen qem etkimamgö osimakza. Kunŋan mewö akŋamgö mötzawi, yaŋön mönö kun kazik ak waŋgiba kun uruŋan jöpaköma. Kungöreŋ qekötahöba kun jijiwilit ak waŋgima. Miaŋgöra eŋön Anutu aka moneŋ inap mi mindiriba welen qem etkibingö osime.” Mewö. a 

Moneŋgö urukönöp akepukö goro keu

Mat 11.12-13, 5.31-32, Mak 10.11-12

14 Farisi (Köna keugö kapaŋkölköl) yeŋön moneŋgö nahöm gwötpuk ahöm eŋgii malgeraŋgöra Jisösnöŋ keu pakpak mi jiyöhi, mi möta je misiba ilit waŋgiget. 15 Ilit waŋgigetka kewö jii mötket, “Farisi eŋön mönö ambazip jeŋine solanŋi tandök kondel eŋgibingö könöpuk ahakzemö, Anutunöŋ uruŋinaŋgö könaŋi möt kutum teköza. Ambazip jeŋine yuai kungöra mötketka öŋgöŋgöŋi akzawi, mi Anutunöŋ ehi imbiloŋloŋambuk ahakza.

16 “Bemtohoŋgö könaŋi mi Mosesgöreŋ Köna keunöŋ aka kezapqetok ambazip yeŋgö Buzup Kimbiŋine ohogetka oyoŋda mala koringa Jonöŋ asuhuba ölŋi aukŋe indelök. Nalö miaŋgöreŋök könahiba keu mi jim sehiba Anutugö bemtohoŋe aŋgotmegöra ambazip uruŋini kuŋgumakzin. Ambazip körekŋan mönö jaram tiba kapaŋ köla bemtohoŋ miaŋgö uruŋe aŋgotpingö ahakze. 17 Suep gölmenöŋ göröŋ qemahotkö dop akzahotmö, Köna keugö kulem jönbölanŋi mohok-kun mi nalö kungen qahö kötökŋi ayapköma. Mewö.

18 “Azi kunŋan anömŋi mosöta ambi kun memawi, yaŋön mönö qesabulum akŋa. Azi kunŋan ambi apŋan mosöröhi, mi memawaŋön mönö mewöyök qesabulum akŋa.” Mewö. b, c, d 

Azi pomŋi aka Lazarus

19 “Azi pomŋi kun malök. Yaŋön opo maluku gugakgugak pisikŋi aködamunŋambuk löŋgöta mala nalö dop nene söŋgaip aka siyoŋsayoŋi qahö malök. 20 Mewö malökmö, yaŋgö miri naŋguŋi kösutŋe azi wanapŋi kun qetŋi Lazarus ahöba malök. Uzi nömböŋnöŋ sileŋi dop köla tarök. 21 Wösöŋi aliga gwarönöŋ ahöba azi pomŋaŋgö tebolnöhök nene irip boromŋi eri mia nemamgö mörök. Möta ahöiga kiam yeŋön kaŋgota uzi nömböŋi bözöba malget.

22 “Mewö mala wanapŋi yaŋön kömuyök. Kömui Suep garata yeŋön waŋgita öŋgöba Abrahamgö qöhöröŋe alget tarök. Azi pomŋi yaŋön mewöŋanök kömuiga löm kölget. 23 Löm kölgetka kömupkö senjom mire geiga jem sölöŋgöi sihimbölö ketaŋi möta ui öŋgöiga Lazarus Abrahamgö qöhöröŋe köröwen endu tari etkehök. 24 Etkeka silata qeta jiyök, ‘O iwini Abraham, mönö wösögi möt niŋgiman. Ni könöp bölamnöŋ nohoi kiaŋgöreŋ wahöjaliŋ öŋgöŋgöŋi möta kinjal. Miaŋgöra mönö Lazarus melainöŋ anda kesöt suŋan onöŋ kusahöla kaba nesilamne mirii amörima.’

25 “Mewö jiyökmö, Abrahamnöŋ meleŋnök, ‘Nahöni, mönö ki mötmörinöŋ anök. Göŋön gölmenöŋ malmal sösöŋgaiŋambuk lök malnöŋ teköyökmö, Lazarusnöŋ gölmenöŋ malmalŋi qemjem-mamjeŋ aka malök. Mewö malökmö, nalö kewöŋe urukölalep ak waŋgiinga tatzapmö, göŋön sihimbölö möta wahöjaliŋ qakŋe kinjan. 26 Mewö maljin aiga toroqeba kewö jizal: Anutunöŋ nini aka iŋini sutnine mendeŋda jabö al köhöii ahöza. Miaŋgöra tosatŋan jabö qösököba neŋgöreŋök eŋgöreŋ kaŋgotpingö mötpeak, mi mönö osime. Mewöyök likep endu maljei, eŋön mewöyök neŋgöreŋ yuhu kaŋgotpingö qaköme.’ 27 Mewö jiiga kewö jiyök, ‘Iwini, mewö aiga kewö ulet gihizal: Göŋön mönö Lazarus melainöŋga iwinaŋgö mire anma. 28 Miri miaŋgöreŋ darumunurupni 5 maljei, yeŋön mewöŋanök senjom miri kiaŋgöreŋ eta sihimbölö ketaŋi mötpepuk. Miaŋgöra mönö jinöŋga anda kezapqetok keu jii mötme.’

29 “Mewö ulerökmö, Abrahamnöŋ jiyök, ‘Qahö! Mosesgö Köna keu aka kezapqetok ambazip yeŋgöreŋ Buzup Kimbi mi yeŋgö buŋaya ahöza. Keu mia mönö kezap ala mötme!’ 30 Mewö jiiga kewö jiyök, ‘O iwi Abraham, mewö qahöpmö, kömukömuŋi neŋgöreŋök kunŋan yeŋgöreŋ anbawak, mewö mönö uruŋini meleŋbeak.’ 31 Jiiga Abrahamnöŋ kewö jii mörök, ‘Yeŋön Moses aka kezapqetok ambazip yeŋgö keugöra kezap qahö alje ewö, mewöŋanök kömukömuŋi neŋgöreŋök kunŋan wahöta keu jibawak, yeŋön mönö töndup Anutu qahö möt narim waŋgibeak.’” Mewö.

Copyright information for `BMU