a1-3Mat 13.1-2, Mak 3.9-10, 4.1;
d14Lew 14.1-32

Luke 5

Jisösnöŋ gwarekurupŋi mutukŋi eŋgoholök.

Mat 4.18-22, Mak 1.16-20

Nalö kunöŋ Jisösnöŋ Genesaret o aŋgö jitŋe kiniga ambazipnöŋ kambu köla Anutugö Buŋa keu mötpingö ölöqölököba liliköm waŋgiget. Liliköm waŋgigetka kinda waŋge yahöt köwet göraŋe tarohotka etkehök. Söra örörö yeŋön waŋge mi mosöta geba mösakŋini kusahöla saŋgoŋget. Waŋge kun mi Saimongöreŋa. Jisösnöŋ miaŋgöreŋ öŋgöba toŋi kewö qesim waŋgiyök, “Göŋön mönö naŋgönöŋga borom kun noaŋgita onöŋ göröken anma.” Qesim waŋgiiga naŋgöiga anda waŋgenöŋ tata ambazip kambu kusum eŋgiyök.

Kusum eŋgim teköba Saimongöra jiyök, “Göŋön mönö waŋge ki naŋgönöŋga o aŋgö bibiŋe aniga alaurupki yembuk mösakŋini söragöra gilgetka gema.”

Jiiga Saimonöŋ meleŋnök, “Ketaŋamni, nini suŋgem köröp mösak gil bibihiba ölŋi kun qahö mezin. Qahöpmö, göŋön jim kutuzanaŋgöra mönö töndup anda gilin gema.” Mewö meleŋni jiyöhaŋgö dop aketka söranöŋ awamŋi qahö mösakŋine gegetka buratibingö aket. Mewö aketka alaurupŋini waŋge kunöŋ malgeri, yeŋgöra kaba bauköm eŋgimegö börökaek kölgetka kaget. Kagetka waŋge yahöt mi söranöŋ kokolak qegetka nemulahöm taköyohot.

Söra öŋgöŋgöŋi mewö memba eka miaŋgöra körekŋan welipköget. Welipköba Saimon Pitönöŋ mi eka Jisösgö wösöŋe geba simin köla jiyök, “O Kembu, ni siŋgisöndok azia akzalaŋgöra mönö nömosöta anöŋ.” 10 Saimongö alayahötŋi Jeims aka Jon Zebedigö nahönyahötŋi yetkön mewöyök nemböŋiri teköiga welipköyohot. Saimonöŋ keuŋi jiyökmö, Jisösnöŋ kewö meleŋnök, “Mönö keŋgötki kude mötman. Gi kiaŋgö andöŋe ambazip mi söra ewö öröba eŋgömemba malman.”

11 Mewö jiiga waŋgeŋini öröba kota saknöŋ ala öröyuaiŋini pakpak mosöta Jisösgö andöŋe wuataŋgöba anget. Mewö. a, b, c 

Jisösnöŋ uzikuku azi kun mem solaniyök.

Mat 8.1-4, Mak 1.40-45

12 Jisösnöŋ taon kunöŋ maliga miaŋgöreŋ azi kun sileŋi uzikukunöŋ mem bölim teköiga tarök. Tata Jisös eka kösutŋe simin köla geba kewö köuluköm waŋgiyök, “O Kembu, göŋön sihimgan mem ölöwak niŋgimamgö mötzan ewö, mönö ni ölöp mem solanim niŋgiman.”

13 Mewö jiiga böröŋi böraŋda sileŋi misiriba jiyök, “Nöŋön mi akŋamgö mötzal. Gi mönö solaniman.” Mewö jiiga uzikukuŋi mi miaŋgöreŋök solaniyök. 14 Solaniiga kewö jim kutum waŋgiyök, “Mötnöŋ kiaŋgö buzup keuŋi mi kun kude jinöŋ mötme. Qahöpmö, gi mönö jike nup galömgöreŋ anda silegi kondel waŋgiba Mosesgöreŋ jimkutukutuŋi wuataŋgöba solanizanaŋgö saiwap nalukŋi ala jöwöwöl ohoman. Mi ohonöŋ ehiga ambazipnöŋ könaŋamgi möt kutume.”

15 Mewö jiyökmö, mi töndup Jisösgö qetbuŋaŋi sehiba miri dop asariba anök. Anöhaŋgö dop ambazip kambuŋi kambuŋi yeŋön keuŋi mötpingö aka kawölŋini mem ölöwakŋapkö yaŋgöreŋ kaba tokoget. 16 Kagetmö, Jisösnöŋ eŋgömosöta gölme qararaŋkölkölŋe anda mala köuluköyök. Mewö. d 

Jisösnöŋ azi sile likepŋi kömukömuŋi möhamgöyök.

Mat 9.1-8, Mak 2.1-12

17 Jisösnöŋ wehön kunöŋ Buŋa keu kusum eŋgiiga Farisi (Köna keugö kapaŋkölköl) aka Köna keugö böhi tosatŋan Galili aka Judia prowinsgö miriŋi miriŋi aka Jerusalemök kaba ambazip kambu sutŋine tatket. Kembugö kukösumŋan Jisös nam köl waŋgiiga ambazip kawölŋini mei ölöwaket.

18 Nalö miaŋgöreŋ azi tosatŋan alaŋini sile likepŋi kömukömuŋi mi kululunöŋ ala aŋguba kaget. Kaba kutuba Jisösgö kösutŋe miri uruŋe öŋgöba albingö esapköget. 19 Esapkögetmö, ambazip kambunöŋ ölököba kingeraŋgöra paŋpaŋgöba miri uruŋe öŋgöbingö köna kun qahö miwikŋaiba memba miri qakŋe öŋgöget. Öŋgöba bo kötnöŋ memeŋi mi esim luluŋgetka kinimŋi ahui kawöl azi kululuŋambuk kösönöŋ jöhöba miaŋgöreŋ algetka ambazip sutŋine Jisösgö wösöŋe geyök. 20 Mewö geiga Anutu möt narim waŋgigeri, Jisösnöŋ yeŋgö tandökŋini mi ehi dop köliga kawöl azigöra kewö jiyök, “Alani, nöŋön siŋgisöndoki mosötzal.”

21 Mewö jiiga Köna keugö böhi aka Farisi yeŋön mi möta könahiba kewö jiba mötmöriget, “Azi ki niŋia? Yaŋön mönö Anutu ilita mepaqepaik akza. Anutu mohotŋan siŋgisöndoknini mosörakzapmö, azi kunŋan mi qahö.”

22 Mewö mötmörigetmö, Jisösnöŋ uruŋini ek kutuba kewö jii mötket, “Tosatŋi iŋini uruŋinan wuanöŋgöra keu jizali, miaŋgöra gwötpuk mötmörize? Mi qahö dop kölja. 23 ‘Nöŋön siŋgisöndoki mosötzal, jizali, keu miaŋön mönö awamŋanök jijiŋa. Kunŋan mewö jiiga tosatŋan keu miaŋgö ölŋi qahö ekŋe. Miaŋgöra mi keu awamŋaŋgö dop. Nöŋön keu kun kewö jimamamgö mötzal, ‘Mönö wahöta anöŋ.’ Keu mi mönö lömbötŋambuk jijiŋa akza. Mewö jibiga ölŋi asuhuma me qahöwi, miaŋön mönö aukŋe asuhui ekŋe.

24 Mötket, gölmenöŋ siŋgisöndok mosötmosötkö kukösumŋi mi Suep gölmegö azi ölŋaŋgöreŋ ahözawi, iŋini miaŋgö könaŋaŋgöra jaŋjuŋ malbepuk. Miaŋgöra keu lömbötŋi mi azi kiaŋgöra jibi ölŋi eket.” Mewö jiba azi sile likepŋi kömukömuŋi yaŋgöra jiyök, “Nöŋön göhöra jizal: Gi mönö wahöta tumbulahöpki memba mirige anöŋ. Keu lömbötŋi mi ölŋambuk akŋa ewö, keu awamŋi mi mönö mewöyök denöwögöra omaŋi akawak?”

25 Mewö jiiga miaŋgöreŋök jeŋine wahöta tumbulahöpŋi ahöyöhi, mi memba Anutu möpöseiba mosöta miriŋe anök. 26 Mewö asuhuiga ambazip körekŋan welipköba sömbuŋini möta Anutu möpöseiba jiget, “Yei! Merak yuai qetpuk soroha ekzin.” Mewö.

Jisösnöŋ Matyu (Liwai) oholök.

Mat 9.9-13, Mak 2.13-17

27 Miaŋgö andöŋe Jisösnöŋ Kaperneam mosöta anda takis ofis oŋgitmamgö aiga miaŋgöreŋ takis meme azi qetŋi Liwai tariga eka jii mörök, “Gi mönö nöŋgö andöne kanöŋ.” 28 Mewö jii möta nupŋi pakpak mosöta wahöta Jisösgö andöŋe anök.

29 Anda Jisös miriŋe köl öröba yaŋgöra közölömbuaŋ ketaŋi mözözömgöyök. Mözözömgöba takis meme tilipqilipŋinambuk aka alaurupŋi tosatŋi öröm eŋgiiga kambu ketaŋi köla yembuk tata nene neget. 30 Mewö negetka Farisi (Köna keugö kapaŋkölköl) aka yeŋgöreŋ böhi yeŋön mi eka jimoŋgot aka Jisösgö gwarekurupŋi kewö jim eŋgiget, “Aek! Iŋini mönö wuanöŋgöra takis meme tilipqilipŋinambuk aka siŋgisöndok ambazip yembuk tata nene aka o neze? Mi qahö dop kölja.”

31 Mewö jim eŋgigetka Jisösnöŋ likepŋi kewö jii mötket, “Sile unditundit ambazipnöŋ doktagöra qahö ak eŋgimakzapmö, kawöl ambazipnöŋ mönö doktagöreŋ anakze. 32 Nöŋön siŋgisöndok ambazip uruŋini meleŋmegö eŋgoholmamgöra kaba maljalmö, ambazip nanŋinaŋgö mötketka solanŋi akzei, i qahö.” e 

Nene siŋgi malmalgö keuŋi

Mat 9.14-17, Mak 2.18-22

33 Ambazip tosatŋan Jisösgöreŋ kaba qesiget, “Jon O-melun azigö gwarekurupŋi neŋön nalö gwötpuk Anutugöra nene siŋgi mala köuluk totoko köröpŋi alakzin. Farisi (Köna keugö kapaŋkölköl) yeŋgö gwarekurupŋinan mewöŋanök aka maljemö, nangi gwarekurupkan mönö pöndaŋ nene aka o nemakze.”

34 Mewö qesigetka kewö meleŋnök, “Ölŋa! Nini wani nalönöŋ nene siŋgi malakzin? Ambi meme nalöŋe azigö andöurupŋan könöpŋi algetka ambigö sep kitipurupŋan yuai mi tökömakze me qahö? Nöŋön nani gwarekurupni yeŋgö azi buŋaya aka yeŋgö sutŋine köisirik tatzal. Tatpiga siŋgi malbingö jigetka yeŋön aijölöŋ söŋgaiba tata siŋgi malbingö osimakze. 35 Osimakzemö, Anutunöŋ noaŋgiri kömumbiga yeŋön mönö nalö miaŋgöreŋ ölöp siŋgi malakŋe.

36 “Iŋini malmal walŋi aka sösöŋgai Buŋa dölökŋi mi mindirim etkibingö osime. Miaŋgö dopkeu pasetŋi kun mi kewö jibi mötket: Löŋgölöŋgöt walŋi jurariga kunöŋ löŋgölöŋgöt dölökŋi mitiba opo su jöhanŋi miaŋön qahö ala uhum göreŋgömakza. Mewö akawak ewö, opo su jöhanŋi dölökŋan mönö walŋambuk öröröŋ qahö aka mi öröba munjurariga böliqölibapuk.

37 “Mewöŋanök kunöŋ wain o dölökŋi mi jobö me toru walŋi lama sileŋan memeŋi miaŋgöreŋ qahö kusuiga gemakza. Mewö akawak ewö, wain o dölökŋan mönö qariba toru qesiŋniga jula mokoiga gölmenöŋ eta sohoiga toruŋan böliqölibepuk.

38 “Miaŋgöra wain o dölökŋi mi toru dölökŋeyök mokoin geiga dop kölma. (Mewöŋanök kunöŋ o ölöpŋi mi gina gisagisahöŋe qahö umakzin. Mewö ubinak ewö, miaŋön mönö jula kisipisirik eriga nemba kawöl neŋgöhöbapuk. Mewö akapuköra o ölöpŋi mi gina ölöpŋe umakzin. Iŋini mewöyök malmal walŋi aka Ölöwak Buŋa dölökŋi mi mindirim etkibingö osime.) 39 Kunŋan wain o walŋi möpöseiba nemba malakzawi, yaŋön wain o dölökŋi nemamgö sihimŋi qahö möta ölan alakza.” Mewö.

Copyright information for `BMU