a9Sum 118.25-26
c17Ais 56.7, Jer 7.11
d23Mat 17.20, 1 Kor 13.2;
e25-26Mat 6.14-15

Mark 11

Jisösgöra köiraŋ kölgetka Jerusalem öŋgöyök.

Mat 21.1-11, Luk 19.28-40, Jon 12.12-19

Jisösnöŋ gwarekurupŋi yembuk Jerusalem siti dopdowiba Betfage aka Betani miri yahöt kösutŋire kaba Oil ip kunduŋe öŋgöba gwarekyahötŋi yahöt melaim etkimamgöra aka kewö jii mörohot, “Miri wösöŋire tatzawi, mönö miaŋgöreŋ anohot. Anda miaŋgöreŋ aŋgota doŋki moröŋi kösönöŋ jöhöget kinjawi, mi miaŋgreŋök miwikŋaimahot. Doŋki mi dölökŋa, azi kunŋan qakŋe qahö tatatŋa. Mi mönö pösata memba ki kamahot. Pösarohotka kunŋan ‘Wuanöŋgöra mewö akzahot?’ jiba qesim etkiiga kewö jimahot, ‘Kembuniran mönö miaŋgöra osiba jiiga kazira zilaŋ meleŋniga kunbuk ki kama.’

Mewö jiba melaim etkiiga anda doŋki moröŋi miri towokŋe miri kungö naŋguŋe kösönöŋ jöhöget kiniga miwikŋaiba pösarohot. Pösarohotka azi tosatŋi miaŋgöreŋ kingeri yeŋön kewö qesim etkiget, “Hei, wania akitköra doŋki moröŋi pösatzahot?”

Mewö qesim etkigetka Jisösnöŋ jiyöhaŋgö dop jiyohot möta “Ölöp memba anmahot,” jiget. Jigetka memba Jisösgöreŋ kayohotka malukuŋini qeköba doŋki moröŋaŋgö qakŋe algetka öŋgöba tarök. Mewö tata aniga ambazip jesöŋgöŋan göda qeba malukuŋini qeköba köna namŋe tumbulgetka tosatŋan gölme köröŋe anda ip sinŋi mitiba tumbulget. Tumbulgetka ambazip jeŋe köl öröba angeri aka andöŋe wuataŋgöba kageri, yeŋön kewö jiba qetket, “Hosana, owe owe! Anutu möpöseizin. Kembugö qetŋe kamawi, Anutunöŋ mönö i kötuetköm waŋgima. 10 Kiŋ Deiwidnöŋ kantri tohoŋ kuŋguba galöm köl eŋgiyöhi, nalö mewöŋan mönö kunbuk kam neŋgiza. O Anutu mönö kantri tohoŋnini kötuetköman. Hosana! Qetbuŋagi möpöseininga euyaŋgöreŋ öŋgöza. Owe Owe!”

11 Mewö qetketka Jerusalem sitinöŋ öŋgöba jöwöwöl jikegö tohoŋ uruŋe anök. Miaŋgöreŋ liliköba yuai pakpak ehi mare ahiga eta gwarekurupŋi 12 yembuk jike mosöta Betani mire anda ahöget. Mewö. a 

Jisösnöŋ fig ip kun qesuahöiga ululuŋgöyök.

Mat 21.18-19

12 Ahöba söŋanök wahöta gwarekurupŋi yembuk Betani miri mosöta angetka Jisösnöŋ nenegö kömuyök. 13 Nenegö kömumba ui aniga fig ip kun
Fig mi sambi ipkö alaŋi kun. Mi nupŋine kömötketka kötŋi nahömŋinambuk asuhugetka gwötpuk nemakzema.
sinŋambuk kini ehök. Eka “Sinŋaŋgö uruŋe ölŋi tari miwikŋaiba nembileŋak,” jiba fig ipkö könaŋe anök. Anökmö, ölŋaŋgö nalöŋan qahö töriyöhaŋgöra sinŋanök kini ehök.
14 Mewö eka ip mi kewö jim waŋgiyök, “Kunŋan ölgi kunbuk kude nema.”

Mewö jim waŋgiiga keu mi gwarekurupŋan mötket. Mewö.

Jisösnöŋ jöwöwöl jike jim kömbuhiyök.

Mat 21.12-17, Luk 19.45-48, Jon 2.13-22

15 Anda mala Jerusalem sitinöŋ öŋgögetka Jisösnöŋ jöwöwöl jikegö tohoŋ uruŋe anök. Miaŋgöreŋ ambazip eŋgehiga inap bohonŋi memegöra algetka söŋgöröŋi megeri, mi könahiba közöl eŋgiiga etket. Moneŋ utekutek ambazip yeŋgö jakeŋini metali anget. Mewöyök kembö bohonŋini memegöra algeri, mieŋgö dum tatatŋini mi tok tötaliga anget. 16 Sombem kömbukŋi kutuba yuai siriba aŋgotkaŋgotkö könaŋi jöhöyök. 17 Mewö aka kusum eŋgiba kewö jii mötket, “Aisaianöŋ keu kun kewö ohoi ahöza, ‘Nöŋgö jikenan mönö gölmeŋi gölmeŋi pakpak yeŋgö köulukö miriŋina akŋapkö qetme.’ Keu mi ahözapmö, iŋini mi utekögetka kegwek-kahasililiŋ yeŋgö baŋet ewö akza.”

18 Mewö jii möta ambazip kambu pakpak yeŋön miaŋgöra nemböŋini teköiga welipköget. Miaŋgöra jike nup galöm aka Köna keugö böhi yeŋön mi möta Jisösgöra keŋgötŋini möta eraum möta kewö jiget, “Mönö denöwö jiinga qegetka kömumbawak?”

19 Mare ahiga Jisösnöŋ gwarekurupŋi yembuk siti mosöta yaigep anda ahöget. Mewö. c 

Fig ipnöŋ ululuŋgöiga eket.

Mat 21.20-22

20 Ahöba söŋanök wahöta könanöŋ anda fig ip mi oŋgitpingö aketka jalöŋambuk uluŋgöba kini eket. 21 Kiniga Pitönöŋ Jisösgöreŋ keu mötmöriba kewö jii mörök, “Ketaŋamni eknöŋ, fig ip qesuahönöŋi, mi mönö ululuŋgöba kinja.”

22 Jii möta Jisösnöŋ kewö meleŋnök, “Anutugö mötnarip mönö töp memba malme.” 23 Nöŋön keu ölŋi kun kewö jibi mötme, “Kunŋan keuŋaŋgö ölŋi ahumapkö uruyahöt qahö aka kunduŋi kiaŋgö toŋaŋgöra kewö jim kutubawak, ‘Mönö kunduŋi ki qeköba wahöta anda köwetnöŋ alman.’ Mewö jim kutuba Anutu möt nariiga ölŋi mönö miaŋgö dop ahuma. 24 Miaŋgöra nöŋön kewö jibi mötme: Wani yuaigöra qesiba köulukömei, mi pakpak lök buŋa qem aŋguzin, mewö möt narigetka mönö buŋaŋini akŋa. 25 Iŋini kinda Anutu köulukögetka kunŋan alaŋaŋgö pinjitköra urubölö akŋa ewö, pinjit mi mönö mosötme. Mewö akŋe ewö, eŋgö Iwiŋini Suep mire maljawaŋön mönö mewöŋanök eŋgöreŋ siŋgisöndok mosötma. 26 (Iŋini tosatŋi yeŋgöreŋ siŋgisöndok qahö mosötme ewö, eŋgö Iwiŋini Suep mire maljawaŋön mönö mewöŋanök eŋgöreŋ siŋgisöndok qahö mosötma.)” Mewö. d, e 

Jitŋememe yeŋön Jisösgö kukösumŋaŋgö qesiget.

Mat 21.23-27, Luk 20.1-8

27 Jisösnöŋ gwarekurupŋi yembuk kunbuk Jerusalem sitinöŋ öŋgöget. Öŋgöba jöwöwöl jikegö tohoŋ uruŋe anda kaiga jike nup galöm, Köna keugö böhi aka kantrigö jitŋememe tosatŋi yeŋön yaŋgöreŋ kaŋgotket. 28 Kaŋgota kewö qesim waŋgiget, “Gi kiaŋgöreŋ yuai akzani, mi mönö daŋön jim kutum gihiiga ahakzan? Mi memamgö kukösumŋi mi daŋön gihiyök?”

29 Qesim waŋgigetka kewö meleŋ eŋgiyök, “Nöŋön mewöyök keu kun qesim eŋgimam. Mi meleŋ niŋgigetka nöŋön mewöyök daŋön kukösum niŋgiiga yuai ki ahakzali, mi jibi mötme. 30 Jonöŋ ambazip o-melun mem eŋgiba malöhi, yaŋön miaŋgö kukösumŋi mi denikeyök meyök? Suep Toŋan waŋgiyök me gölme toŋan waŋgiget? Mi jiget mötmam.”

31 Mewö meleŋ eŋgiiga sutŋine eraum möta kewö jiget, “‘Kukösumŋan Suepnöhök asuhuyök,’ mewö jibin ewö, yaŋön mönö kewö jima: Iŋini mönö wuanöŋgöra Jon qahö möt narim waŋgiget? Mi qahö dop kölja. 32 Me ‘Gölme ambazipnöhök asuhuyök,’ jibinak? Mi qahö dop kölja.” Ambazip körekŋan Jongöra ‘Ölŋa kezapqetok azia akza,’ jigeraŋgöra aka ambazip kambu yeŋgöra keŋgötŋini möta mi jibingö osiget. 33 Miaŋgöra “Mi qahö mötzin,” meleŋget. Mewö meleŋgetka Jisösnöŋ kewö jii mötket, “Mewö aiga nöŋön mewöyök yuai ki ahakzalaŋgö kukösumŋi daŋön niŋgiyök, mi qahö jibi mötme.” Mewö.

Copyright information for `BMU