Mark 5

Ömenöŋ bau uruŋine gegetka azinöŋ ölöwahot.

Mat 8.28-34, Luk 8.26-39

1Mewö asuhuiga aŋgö kutuba likepŋe Gerasin yeŋgö gölmenöŋ aŋgotket. 2Aŋgota körökŋe öŋgögetka Jisösnöŋ waŋge mosöriga miaŋgöreŋök azi ömeŋambuk kun mi qaksirinöhök kaba kinda Jisös miwikŋaiyök. 3Azi mi qaksirinöŋ mala qamöt köteŋi esiba urorohoget ahögeraŋgöreŋ ahöm malök. Azi körekŋön könaböröŋi tapep (muŋgamuŋga) kösönöŋ jöhöbingö osiba malget. 4Indimŋi gwötpuk könaŋi tapep kösönöŋ jöhöba börötakŋi qeba malgetmö, börö takŋi kusula köna kösöŋi titikutuba maliga körekŋan i galöm köl osiget. 5Osiba suŋgem asak dop sundan qaksirigö köt köteŋnöŋ me kunduŋe laŋlaŋ ahöba malök. Mewö mala silata qeta sileŋi kötnöŋ qem kutumutuba malök.

6Jisösnöŋ tikep kaiga eka ösumŋan kaba gölmenöŋ kösutŋe geba simin kölök. 7Simin köliga Jisösnöŋ ömeŋi mi kewö jim waŋgimamgöra ahök, “Öme bölöŋi! Gi mönö azi ki mosöta anöŋ!” Mewö jimamgöra aiga qet bölöbölö ketaŋi qeta jiyök, “Aek! Gi Jisös, Anutu öŋgöŋgöŋaŋgö Nahönŋi akzan. Gi denöwö ak niŋgimamgöra kazan? Nöŋön Anutugö jemesoholŋe ulet gihizal: Gi keu jöhöba jöjöpaŋ keunöŋ jim köhöiba mönö sihimbölö könöpŋambuk kude ak niŋginöŋ.”

9Mewö jiiga kewö qesiyök, “Gi qetki niŋi?” Qesiiga jiget, “Nini gwötpuk maljinaŋgöra qetnini Lijön jizin.” Mi nanine keunöŋ Kerök kambu ketaŋi. 10Mewö jiba kapaŋ köla kewö ulet waŋgiget, “Gi neŋguataŋgöbanak, mewö mönö gölme kiaŋgöreŋök kude melaim neŋgiman.”

11Kösutŋine kunduŋi marömŋe miaŋgöreŋ bau kambu ketaŋi kun gwözözak uruŋe kuluŋda malget. 12Miaŋgöra ömenöŋ kewö jiba Jisös ulet waŋgiget, “Göŋön melaim neŋginöŋga nini ölöp bau mieŋgö uruŋine gebin.” 13Jigetka “Mönö anda geget,” jiba jim kutum eŋgiiga azi uruŋeyök kota anda bau uruŋine geget. Gegetka miaŋgöreŋök bau kambu 2000 miaŋgö dop mi mönö luhuba nembönembönöŋ anda jororoŋgöba o aŋgönöŋ geba nemulahöba kömuget.

14Kömugetka bau galöm yeŋön ölöŋ unjurata taon aka miri morömorö miaŋgöreŋ anda keu buzupŋi jiget. Jiget mötketka ambazip sesegilgil yeŋön yuai asuhuyöhi, mi ekingöra kaget. 15Kaba Jisösgöreŋ kaŋgota eketka azi öme kambuŋambuknöŋ malöhaŋön mönö opo sileötaŋi törörök jöhöba tata uruŋi amöriiga imbi mötmötŋi pakpak asuhuiga eka awöwöliget. 16Kingetka bau mi denöwö geba kömugeri aka azi ömeŋambuk yaŋgöreŋ yuai asuhuyöhi, mi ekeraŋön kösohot yahöt mi jiget mötket.

17Möta kinda Jisösnöŋ mindimindiri sel gölmeŋini mosöta anmapkö ulet waŋgiget.

18Ulet waŋgigetka mosöta waŋgenöŋ öŋgömamgöra ahiga azi ömeŋambuk malöhaŋön kaba Jisösbuk mohotŋe anda malmamgöra qesiyök.”

19Qesiyökmö, Jisösnöŋ qetal waŋgiba kewö jii mörök, “Gi mönö mirige anda tinitosolomurupki eŋgeka Kembunöŋ aŋgöletot ketaŋi aka ak-kömum gihiyöhi, miaŋgö kösohotŋi jinöŋga mötme.”

20Mewö jiiga mosöta anda Jisösnöŋ aŋgöletot ketaŋi ketaŋi ak waŋgiyöhi, miaŋgö keuŋi könahiba Ten-taon distrik uruŋe jim sehiiga körekŋan welipköget. Mewö.

Jairusnöŋ böratŋaŋgöra Jisös köuluköyök.

Mat 9.18-26, Luk 8.40-56

21Jisösnöŋ waŋgenöŋ öŋgöba liliŋgöba aŋgö kutuba likepŋe kaiga ambazip kambu gwötpukŋan yaŋgöreŋ kaba tokogetka aŋgö jitŋe kinget. 22Kingetka köuluk mirigö keu galöm kun qetŋi Jairus yaŋön kaba Jisös eka wösöŋe geba simin köl waŋgiyök. 23Simin köl waŋgiba kapaŋ köla köuluköba kewö jiyök, “Böratni moröŋan mönö kömumamgö akza. Mönö kaba börögi qakŋe alnöŋga ölöwaka toroqeba malma.”

24Mewö jiba Jisös waŋgiriga mohotŋe anohotka ambazip kambulelembe yeŋön andöŋire anda ölöqölököba liliköm etkiba anget. Mewö.

Kawöl ambi kunöŋ Jisösgö malukuŋi misiriyök.

25Angetka miaŋgöreŋ sutŋine ambi kun malök. Yaŋön (yara) yambu 12:gö dop köiŋnöŋ ehiga nalö dop kawöl yöhöiga malök. 26Mewö mala sihimbölö gwötpuk möriga sile galöm gwötpukŋan yaŋgö nup megetka baukbauk kun kude miwikŋaiba malök. Yaŋön sile galöm ambazip yeŋgö töwaŋinaŋgöra moneŋ inapŋi körek gila malökmö, kawölŋi miaŋön mönö mem bölim waŋgiiga malök. 27Mewö mala Jisösgö buzupŋi möta kewö jiyök, “Nöŋön i oseimamgö möt lömböriba malukuŋeyök borom kun misiribileŋak ewö, mönö ölöp ölöwakŋam.” Mewö jiba ambazip kambu sutŋine Jisösgö andöŋe anda malukuŋe misiriyök.

29Misiriiga sepŋi miaŋgöreŋök jöpköiga qemjem-mamjeŋan qahöwahiga sileŋan ölöwahiga mörök. 30Ölöwahiga Jisösnöŋ miaŋgöreök ösumŋi kun kutuba anöhi mi möta ambazip kambu sutŋine liliŋgöba jiyök, “Daŋön malukuni misiriza?”

31Mewö jiiga gwarekurupŋan kewö jiget mörök, “Ambazip kambunöŋ ölököba liliköm gihiba goseize. Mi eka denöwö ‘Daŋön nömisiriza?’ jizan?”

32Mewö jigetmö, Jisösnöŋ kunbuk “Daŋön mi akza?” jiba mi miwikŋaimamgöra liliŋgöba uba eŋgehök. 33Eŋgehiga ambi sileŋe angöletot asuhuyöhi, yaŋön mi möta miaŋgöra keŋgötŋi möta jönömŋi unduiga kaba Jisösgö wösöŋe geba simin köla könaŋi pakpak jiiga mörök. 34Jisösnöŋ mi möta kewö jii mörök, “Böratni, mötnaripkan mönö mem ölöwak gihiza. Qemjem-mamjeŋgan mönö qahöwahiga ölöp urubönjöŋnöŋ anman.” Mewö.

Jisösnöŋ Jairusgö böratŋi mem guliyök.

35Keu mewö jiba kiniga köuluk mirigö keu galömŋaŋgö mireyök kunŋan welen kaba Jairusgöra jiyök, “Böratki kömuza! Miaŋgöra böhigö qakŋe lömböt toroqeba kude alman.”

36Jiiga Jisösnöŋ keu miaŋgö nönöŋgan aka köuluk mirigö keu galömŋi kewö jii mörök, “Keŋgötki kude mötnöŋ! Mönö ni möt narim niŋginöŋ.” 37Mewö jiba ambazip tosatŋi eŋgömosöta Pitö, Jeims aka Jeimsgö munŋi Jon miyök eŋguaŋgiri i wuataŋgöba anget. 38Anda köuluk mirigö keu galömŋaŋgö mire aŋgotketka ambazip kambu göju megetka eŋgehök. Gwötpukŋan jiŋgeŋ köla köhöikŋanök sahöta amburereŋ meget. 39Eŋgeka mire öŋgöba kewö jii mötket, “Iŋini mönö wuanöŋgöra göju memba sahötze? Morö miaŋön qahö kömuzapmö, gaunök ahöza.”

40Mewö jii mötket gönahit ewö aiga gön köl waŋgigetmö, yaŋön i körek eŋguataŋgöba morögö iwinamŋi aka tosatŋi yambuk malgeri, miyök eŋguaŋgiriga morönöŋ ahöyöhaŋgöreŋ öŋgöget. 41Öŋgögetka börat mi böröŋe memba yaŋgöra jiyök, “Talita kum.” Mi nanine keunöŋ Ambi moröŋi, ni göhöra jizal: Mönö wahötnöŋ!

42Mewö jiiga ambi (yara) yambuŋi 12 miaŋön mönö miaŋgöreŋök wahöta kinda anda kayök. Mewö aiga eka kesötŋini yöhözömgöba welipköget. 43Welipkögetka miaŋgö buzupŋi kun jiget mötpepukö jiba soŋgo köhöikŋi al eŋgiyök. Al eŋgiba ambi moröŋi numbu nene waŋgiget nemapkö jiyök. Mewö.

Copyright information for `BMU