a11Mat 12.38, Luk 11.16;
b12Mat 12.39, Luk 11.29
d18Jer 5.21, Eze 12.2, Mak 4.12
g34Mat 10.38, Luk 14.27;
h35Mat 10.39, Luk 17.33, Jon 12.25

Mark 8

Jisösnöŋ ambazip 4000 nene gumohom eŋgiyök.

Mat 15.32-39

1Nalö miaŋgöreŋ ambazip kambu ketaŋan dumŋe kunbuk tokoget. Neneŋini qahö malgeraŋgöra Jisösnöŋ gwarekurupŋi eŋgoholi yaŋgöreŋ kagetka kewö jii mötket, 2“Nöŋön ambazip kambu kieŋgöra wösöni mötzal. Yeŋön nöŋgöreŋ kaba wehön karöbut lök mala kotketka neneŋini qahöwahiga ekzal. 3Yeŋgöreŋök tosatŋan köröwenök kaba malgetka nöŋön ‘Ölöp miriŋine anme,’ jibi nene qahö negetka öne melaim eŋgibiga könanöŋ anda mala kembaŋe jeŋini gili tirinbirin akepuk.”

4Mewö jiiga gwarekurupŋan meleŋda kewö jiget mörök. “Gölme qararaŋkölkölŋe kiaŋgöreŋ kunŋan mönö denikeyöhök numbu nene mewöŋi mi mönö miwikŋaiba kambu ki gumohom eŋgibawak?”

5Mewö möta kewö qesim eŋgiyök, “Eŋgöreŋ beret dawik ahöza?” Qesim eŋgiiga “Beret 7 ahöza,” jiget.

6Jigetka Jisösnöŋ ambazip kambu mi gölmenöŋ geba tatmegöra jim kutum eŋgiiga geba tatket. Geba tatketka beret 7 mi memba Anutugö saiwap jiba mindipköba gwarekurupŋi eŋgiba ambazip kambu dop sutŋine almegöra jiyök. Mewö jiiga miaŋgö dop alget. 7Yeŋgöreŋ söra morömorö tosatŋi mewöyök ahöyök. Mi tok memba kötuetköba ambazip kambu dop sutŋine toto qem eŋgimegöra jim kutuyök. 8Jim kutuiga eŋgiget nemba nem timbireŋgöget. Nem timbireŋgöba nene kitipŋi mosötket geyöhi, mi sakap 7 miaŋgöreŋ qezakögetka numbuŋe qeyök. 9Azi nene negeri, yeŋgö jaŋgöŋi mi 4000. Negetka melaim eŋgiiga miriŋine anget. Mewö.

Böhi tosatŋan aŋgöletot ekingöra kapaŋ kölget.

Mat 16.1-4

10Angetka miaŋgöreŋök gwarekurupŋi yembuk waŋgenöŋ öŋgöba distrik qetŋi Dalmanuta miaŋgöreŋ anget. 11Farisi (Köna keugö kapaŋkölköl) tosatŋan miaŋgöreŋ kaba Jisösbuk könahiba jitnakölik aket. Keu bötaknöŋ örömapköra esapköm waŋgiba kewö kapaŋ köla qesiget, “Mönö jinöŋga Suepnöhök aŋgöletot kun asuhuiga ekin.” 12Mewö jigetka uruŋan lömböriiga osoŋgombuk qeiga jiyök, “O ambazip nalö kewöŋe gölmenöŋ maljei, iŋini mönö wuanöŋgöra Anutugö aiwesök asuhumapköra kapaŋ kölakze? Nöŋön keu ölŋi kun kewö jibi mötme: Anutunöŋ aiwesök mewöŋi mi qahö memba kondel eŋgima. Ombaŋ saumbaŋ!”

13Mewö jiba eŋgömosöta kunbuk gwarekurupŋi yembuk waŋgenöŋ öŋgöba aŋgö kutuba likepŋe aŋgotket. Mewö. a , b 

Farisi aka Herod yeŋön wösökömbuk ewö akze.

Mat 16.5-12

14Miaŋgöreŋ aŋgota semön membingö ölum eŋguiga beret mohot-töp mia waŋgenöŋ memba tatket. 15Tatketka Jisösnöŋ kewö jim kutum eŋgiyök, “Iŋini Köna keugö kapaŋkölköl (Farisi) yeŋgö wösökömbukŋini aka Herodkö gipmi kakŋi mietköra mönö galömŋini meme. Mi ölöpŋaŋök qahö kewöta andö qegetka mietkön mönö yist ewö qariba mem bölim eŋgimahot.”

16Jiiga keu pasetŋi mi qahö möt asariba sutŋine kewö eraum mötket. “Beretnini qahöpköra jiza me denöwö?”

17Mi eraum mötket kezapŋe geiga kewö jii mötket, “Wuanöŋgöra beretnini qahö jiba eraum mötze? Nöŋgö könaŋamni mi wuanöŋgöra qahö möt kutuze? Mi tok qahö möt asarize me? Urukezapŋinan gwözöŋda tatza me? 18Jeŋini ahözapmö, töndup qahö ek kutuze me? Kezapŋini ahözapmö, töndup qahö möt asarize me? Yuai asuhuyöhi, mi ölum eŋguza me qahö? 19Nöŋön beret 5 mi 5000 yeŋgöra mindipköbiga miaŋgö kitipŋi qezakögetka könde dawiknöŋ geba numbuŋine qeyök?” Qesim eŋgiiga “Könde 12,” jiget.

20Jigetka toroqeyök, “Nöŋön beret 7 mi 4000 yeŋgöra mindipköbiga miaŋgö kitipŋi qezakögetka sakap dawiknöŋ geba kokolak qeyök?” Qesim eŋgiiga sakap 7 jiget.”

21Jigetka jii mötket, “Miaŋgöra könaŋamni mi mönö tok qahö möt asarize me?” Mewö c , d 

Jegömöl azi kun jeŋi metohoyök.

22Jisösnöŋ gwarekurupŋi yembuk Betsaida taonöŋ kaget. Miaŋgöreŋ kaba jegömöl azi kun waŋgita Jisösgöreŋ kaŋgota böröŋan misirimapkö köuluköm waŋgiget. 23Köuluköm waŋgigetka jegömöl azi mi böröŋe memba waŋgita miri yaigepŋe anohot. Anda söutnezit jeŋe ala böröŋi nöröpŋe ala qesim waŋgiyök, “Yuai kun ekzan me qahö?”

24Qesim waŋgiiga jeŋi ui öŋgöiga jiyök, “Ambazip eŋgekzalmö, mi ip tandöktandök aketka imutimutŋanök eŋgekiga anda kaba kinje.”

25Mewö jiiga kunbuk böröŋan jeyahötŋi misiriiga tohoyohotka törörök uiga asarim sölölöŋgöiga yuai pakpak ölöpŋanök ek teköyök. 26Ek teköiga melaim waŋgiba kewö jii mörök, “Gi miri kungen kude anmanmö, diŋdiŋanök nangi mirige anman.” Mewö.

Pitönöŋ Jisösgö könaŋi jim miwikŋaiyök.

Mat 16.13-20, Luk 9.18-21

27Jisösnöŋ Betsaida mosöta gwarekurupŋi yembuk Sisarea Filipai taongö kösutŋe anget. Könanöŋ anda gwarekurupŋi kewö qesim eŋgiyök, “Ambazipnöŋ nöŋgöra denöwö jimakze? Ni niŋia akzal?”

28Jiiga meleŋda kewö jiget, “Tosatŋan ‘Gi Jon O-melun azia akzan,’ jimakzemö, tosatŋan ‘Gi Elaija akzan,’ jimakze aka tosatŋan toroqeba kewö jimakze, ‘Gi kezapqetok azi walŋi yeŋgöreŋök kun akzan.’

29Mewö jigetka kewö qesim eŋgiyök, “Aka nanŋinak nöŋgöra denöwö jize? Ni niŋia akzal?” Qesim eŋgiiga Pitönöŋ kewö meleŋnök,

“Gi Anutugöreŋ Amötqeqe Toŋi Kraist akzan.”

30Mewö jiiga könaŋi aukŋe jiget kunŋan mötpapuköra soŋgo köhöikŋi al eŋgiyök. e , f 

Jisösnöŋ kömumamgö keuŋi jiyök.

Mat 16.21-28, Luk 9.22-27

31Jisösnöŋ gwarekurupŋi könahiba kewö kusum eŋgiyök, “Suep gölmegö azi ölŋan mönö sihimbölö gwötpuk mötma. Kantrigö jitŋememe, jike nup galöm aka Köna keugö böhi yeŋön mönö andö qeba qegetka kömuma. Kömui wehön karöbut teköiga kömupnöhök wahötma.” 32Jisösnöŋ keu mi qahö köyatiba aukŋe jiiga Pitönöŋ miaŋgöreŋök öröm waŋgiba göraŋe anda könahiba qetal waŋgiyök. 33Qetal waŋgiiga liliŋgöba gwarekurupŋi uba eŋgeka Pitö qetala kewö jim waŋgiyök, “Gi keu mötmörizani, mi Anutugöreŋ keuya qahöpmö, gölme ambazip aka Satangö sihima. Miaŋgöra Satan, gi mönö dölki nöŋgö jemesoholneyök kesalnöŋ.” Mewö.

Kraist wuataŋgöbingö söŋgöröŋi.

34Jisösnöŋ ambazip kambu aka gwarekurupŋi eŋgoholi kagetka keu kewö jii mötket, “Kunŋan nöŋgö andöne kamamgö mötzawi, yaŋön mönö nanŋi urusileŋaŋgö sihim kömbönaŋi bölöŋi andö qeiga sisitŋi megetka sihimbölö mi bisimakŋa. Mi maripomnöŋ kömumawaŋgö dop mökösöŋda ni nuataŋgöba kama. 35Kunŋan malmalŋi nanŋaŋgöra aŋgön köla nanŋi imbi-imbi maljawi, yaŋön mönö malmalŋi ölŋi jöhöi sohoma. Sohomapmö, kunöŋ gölmegö malmalŋi mi ni aka nöŋgö Ölöwak Buŋanaŋgöra aka köleŋda tököm niŋgimawi, yaŋön mönö malmal ölŋaŋgö könaŋi miwikŋaiba köhöiba malma. 36Kunŋan gölmeŋi gölmeŋi mieŋgö öröyuaiŋi pakpak köl öröi buŋaŋi an teköiga uruŋaŋgö malmalŋi mem sohoba silebile mala kömuiga Anutunöŋ keuŋi jim teköiga uŋaŋan ayuhuiga qahö dop kölma. Sukinapŋi miaŋön mönö urusösöŋgai qahö ak waŋgima. Qahöpmahöp! 37Körek neŋön mönö bohonini jöhöbingö osibin. 38Ambazip kambuŋi kambuŋi nalö kewöŋe gölmenöŋ qesabulum aka siŋgisöndok tosatŋi aka malakze. Kunŋan yeŋgö sutŋine nöŋgö qetni aka Buŋa keuni memba et aljawi, mi Suep gölmegö azi ölŋan mewöyök ehöröŋ kölma. Yaŋön könaŋgep Suep garata töröŋi yembuk ki etketka Iwiŋaŋgö asakmararaŋi eka aurugetka yaŋön azi me ambi mewöŋi mönö ehöröŋ köl waŋgima.” Mewö. g , h 

Copyright information for `BMU