a1Dut 23.25;
b3-41 Sml 21.1-6;
c4Lew 24.9;
d5Jaŋ 28.9-10;
e7Mat 9.13, Hos 6.6
h18-21Ais 42.1-4
j24Mat 9.34, 10.25;
m33Mat 7.20, Luk 6.44;
n34Mat 3.7, 23.33, 15.18, Luk 3.7, 6.45
o38Mat 16.1, Mak 8.11, Luk 11.16;
p39Mat 16.4, Mak 8.12;
s421 Kiŋ 10.1-10, 2 Hist 9.1-12

Matthew 12

Jisösnöŋ Sabat kendongö Kembuŋi akza.

Mak 2.23-28, Luk 6.1-5

Miaŋgö andöŋe Sabat kendon kunöŋ Jisösnöŋ wit padi nup köröŋi ketaŋi kutuba anök. Aniga gwarekrupŋan wösöŋini eŋguiga wit ölŋi mohot mohot könahiba böröŋinan misiba neget. Negetmö, Farisi (Köna keugö kapaŋkölköl) tosatŋan mi eka Jisös kewö jiget mörök, “Mötnöŋ, göhö gwarekurupkan mönö Sabat kendongö nup meme soŋgoŋi oŋgitze?”

Mewö jigetka kewö meleŋnök, “Kiŋ Deiwidnöŋ yarö aziurupŋi yembuk liliköba wösöŋini eŋguiga yuai akeri, mi lök oyoŋget me qahö? Yaŋön mönö Anutugö opo seri jikenöŋ öŋgöba beret kömbukŋi Anutugö jemesoholŋe altanöŋ alget tariga ösumŋan walöŋniga qekögeri, mi mönö meiga neget. Beret kömbukŋi mosötmosötŋi mi jike nup galöm yeŋönök nezema. Yaŋön aka yaŋgö suŋgurumurupŋan mi nembepuköra soŋgo ahöyökmö, mi töndup neget. Mewöŋanök jike nup galöm yeŋön Sabat kendonöŋ jöwöwöl jikenöŋ kinda nup memba nup memegö soŋgoŋi oŋgita töndup keuŋinambuk qahö ahakze. Keu mi Köna keunöŋ oyoŋget me qahö?

“Mi oyoŋget, mewö mötzalmö, nöŋön kewö jibi mötme: Ki kinjawi, yaŋön mönö jöwöwöl jike oŋgita öŋgöŋgöŋi akza. Buŋa Kimbigö keu kun kewö ahöza, ‘Nöŋön jöwöwöl ohomegöra qahöpmö, sutŋine ak kömum aŋgumegöra mötzal.’ Iŋini keu miaŋgö könaŋi mötpeak ewö, ambazip pinjitkö keunini qahö neŋgö keunini mönö laŋ qahö jim teköbeak.

“Mi kewögöra jizal: Suep gölmegö azi ölŋan mönö Sabat kendongö Kembuŋi akza.” Mewö. a, b, c, d, e 

Jisösnöŋ azi böröŋi sösöröngöŋi mem ölöwahök.

Mak 3.1-6, Luk 6.6-11

Jisösnöŋ miri mi mosöta köuluk miriŋine öŋgöyök. 10 Miaŋgöreŋ azi böröŋi sosoholiŋi kun tarök. Ambazipnöŋ Jisös keu jakeŋe al waŋgibingöra kewö qesim waŋgiget, “Azi Sabat kendonöŋ möhamgöba Köna keu oŋgitpin me qahö?”

11 Qesim waŋgigetka kewö meleŋnök, “Eŋgöreŋök daŋön kewö akza: Azi kungö lamaŋi mohok-kunŋan Sabat kendonöŋ lömnöŋ gema ewö, yaŋön mi qahö memba öröiga kotma? 12 Azigö bohonŋan mönö lamagö bohonŋi gwötpuk oŋgitzawi, mönö mi mötmörime. Miaŋgöra Sabat kendonöŋ nup ölöpŋi memba mewö Köna keu qahö oŋgitpin.”

13 Mewö meleŋda azi miaŋgö jiyök, “Gi mönö börögi qötöteinöŋ.” Mewö jiiga qötöteiiga mutuk ahöhi, miaŋgö dop ölöwaka böröŋi alaŋaŋgö dop ahök. 14 Mewö asuhuiga Farisi (Köna keugö kapaŋkölköl) yeŋön yaigep anda totoko ala Jisös denöwö aka qein kömumapkö keu jim jaruget. Mewö. f 

Anutugö nup meme azi tök-kutukutuŋi kewö:

15 Jisösnöŋ keuŋini mi ek kutuba miaŋgöreŋök miri mi mosöta kungen anök. Aniga gwötpukŋan yaŋgö andöŋe wuataŋgöba angetka yeŋgö sutŋine kawöl ambazip pakpak mem ölöwak eŋgiyök. 16 Mi mem ölöwak eŋgiba könaŋi aukŋe jibepuköra köhöikŋanök qetal eŋgiyök. 17 Mewö aiga Anutunöŋ kezapqetok azi Aisaia sölölöhöiga keu kun jiyöhi, miaŋön mönö mewö ölŋambuk ahök. Keu mi kewö jii ahöza,

18 “Eket, ki mönö nöŋgö nup azini aiga i möwölöhöm waŋgial. Nöŋön wölböt alani yaŋgöra mötpi ölöwahiga urunan yaŋgöra söŋgaimakzal. Nöŋön Uŋani Töröŋi yaŋgö uruŋi dop kölmapköra melaibi geiga yaŋön keu diŋdiŋanök jim tekömakzalaŋgö Buŋaŋi indela jim sehiiga kantriŋi kantriŋi yeŋgöreŋ anma.
19 Yaŋön aŋgururuk qahö aka keu töhöreŋ qahö qerakŋa. Ambazip kunŋan yaŋgö qet kourukŋi mi rowoŋqeqe könanöŋ qahö mötma.
20 Jehot qölökögeri, yaŋön mi qahö qesiŋma.
Jehot aka lambegö wikŋi mi ambazipköra jiza. Ambazipnöŋ kun qeba jaŋgauraŋga ak waŋgigetka mötnaripŋan pömsöm qemapkö akzawi, Jisösnöŋ i mem ölöwakŋa.
Lambegö wikŋan jem kutuba sanjöp aiga bölamŋan jem bökbök ahakzawi, yaŋön mönö mi qahö qömbököma. Mewö nupŋi memba ambazipnöŋ keu diŋdiŋi wuataŋgömegöra bim qeba maliga keu miaŋön luhut aliga köiraŋ alme.
21 Kantriŋi kantriŋi yeŋön mönö yaŋön bauköm eŋgimapköra mamböta jörömqörömŋini yaŋgö qetŋe ala malme.” Mewö. h 

Jisösnöŋ öme yeŋgö ösumŋini oŋgita qei etza.

Mak 3.20-30, Luk 11.14-23

22 Ömenöŋ azi kun töŋöt aka numbuŋi jöhöiga jeŋan gömölii mötök malöhi, mi waŋgita Jisösgöreŋ kaget. Jisösnöŋ i mem ölöwahiga ömeŋan kota mosöri nesilamŋan lolohoiga kunbuk keu jiba uba ehök. 23 Uba ehiga ambazip kambu pakpak yeŋön mi eka auruba Jisösgöra jiget, “Azi kiaŋön mönö Deiwidkö gwölönarökŋi akza me?”

24 Mewö jigetmö, Farisi (Köna keugö kapaŋkölköl) yeŋön mi möta kewö jiget, “Azi kiaŋön kungö ösumnöŋ qahöpmö, öme yeŋgö Kembuŋini Katakömulat yaŋgö ösumnöŋ ömewöröme eŋguataŋgömakza.”

25 Mewö jigetmö, Jisösnöŋ urumötmötŋini möt teköba kewö jii mötket, “Kantri denike yeŋgö galömurupŋinan sutŋine aŋgururuk aka julmei, yeŋön mönö ayuhum aŋgugetka kantriŋinan böliba sahopŋanök aka qeqelaŋlaŋ ahöma. Mewöyök siti me miri kungö könagesö yeŋön sutŋine aŋgururuk aka julmei, yeŋön mönö galömkölköl nupŋini memba kinbingö osime.

26 “Mötket, Satanöŋ mönö alaŋi Satan kun wuataŋgöbawak ewö, yeŋön mönö sutŋine aŋgururuk aka julbeak. Mewö aiga gawman nupŋini membingö osigetka ömetohoŋinan mönö denöwö kinbawak?

27 “Mötket, nöŋön Katakömulatkö ösumnöŋ ömewöröme közöl eŋgibileŋak ewö, eŋgö alaurupŋinan mönö dagö ösumnöŋ mi közöl eŋgibeak? Miaŋgöra yeŋön mönö keuŋini ölŋi me qahö, mi kewöta jim teköme.
Nanŋini silegalömurupŋinan Anutugö qetŋi öme mi Katakömulatkö kukösumnöŋ közöl eŋgigetka nöŋön mi Anutugö ösumnöŋ közöl eŋgimakzal. Öröröŋ qahö kinjinaŋgöra daŋön keu muneŋi wuataŋgömakza? Yeŋön me nöŋön?’
28 Mi jim tekömemö, Anutugö ösumŋan nöŋgö börö kesötni sölölöhöi öme eŋguataŋgömakzal ewö, Anutugö bem-tohoŋan mönö eŋgöreŋ kam kuŋguza. 29 Kunŋan azi köhöikŋaŋgö köna böröŋi mutuk qahö jöhöma ewö, yaŋön mönö denöwö miriŋe öŋgöba qezaŋda sukinapŋi membawak? Mutuk i jöhöi tarigun mönö ölöp miriŋeyök öröyuaiŋi pakpak waŋgita memba anma. (Miaŋgö dop nöŋön mewöyök Satan jöhöba andöŋe ömeŋi eŋguataŋgömakzal.)

30 “Kunŋan nömbuk qahö maljawi, yaŋön mönö qetal niŋgimakza. Kunŋan ambazip nöŋgö qetne tokomegöra qahö öröm eŋgimakzawi, yaŋön mönö mendeŋ eŋgimakza. 31 Miaŋgöra nöŋön keu kun kewö jibi mötme: Ambazip siŋgisöndok aka mepaqepaik pakpak ahakzei, mi Anutunöŋ ölöp mosörakzapmö, kunŋan Uŋa Töröŋi ilita mepaikömawi, miaŋgö siŋgisöndokŋi Anutunöŋ mönö nalö kunöŋ qahö mosötma. Saumbaŋ!

32 “Kunŋan Suep gölmegö azi ölŋi qetala keu jima ewö, Anutunöŋ mi ölöp mosötmapmö, kunŋan Uŋa Töröŋi qetala keu yuai jimawi, yaŋgö siŋgisöndokŋi mi Anutunöŋ gölmenöŋ malmawaŋgö dop me kömup andöŋe miaŋgöreŋ qahö mosötma.” j, k, l 

Ipkö könaŋi mi ölŋi eka kewöta möt kutume.

Luk 6.43-45

33 “Ipkö könaŋi mi ölŋi eka kewöta mötzin. Miaŋgöra mönö ip galöm kölgetka ölöwaka ölŋi ölöpŋi kuŋgumakŋa me ip mem böligetka ölŋi bölöŋi kuŋgumakŋa. 34 Azi uruŋan yuai kokolak qei ahözawi, mia mönö numbuŋan aukŋe jimakza. Miaŋgöra qatögö moröŋi iŋini, nanŋinak bölöŋi aka mönö denöwö keu ölöpŋi jibeak? 35 Azi ölöpŋaŋgö uru köweŋe ölöpŋaŋgö möriamŋi ahözawi, yaŋön mönö ölöpŋi mi aukŋeyök jimakza. Azi bölöŋaŋgö uru köweŋe bölöŋaŋgö möriamŋi ahözawi, yaŋön mönö bölöŋi mi aukŋe jimakza.

36 “Mewö jimakzapmö, nöŋön keu ölŋi kun kewö jibi mötme: Ambazipnöŋ soŋgo walöŋda keu jit omaŋi omaŋi jimei, yeŋön mönö keu pakpak miaŋgö könaŋi mi jimtekötekögö nalö ketaŋe Anutugöra jim asarigetka kewötma. 37 Miaŋgö könaŋi kewö: Anutunöŋ mönö keu jitki kewöta miaŋgö dopkeugi jim teköi solaniman me keugabuk aka lömböt miwikŋaiman.” Mewö. m, n 

Böhi tosatŋan aŋgöletotköra kapaŋ köla uletket.

Mak 8.11-12, Luk 11.29-32

38 Nalö miaŋgöreŋ Farisi (Köna keugö kapaŋkölköl) aka Köna keugö böhi tosatŋan Jisösgöra kewö jiget, “Böhi, gi ölöp aŋgöletot kun menöŋga mi ekingö mötzin.”

39 Mewö jigetka kewö meleŋ eŋgiyök, “Ambazip merak gölmenöŋ maljei, mi kambu bölöŋi aka serowilin ahakze. Yeŋön Anutugö aiwesökŋaŋgöra kapaŋ kölakzemö, aiwesök kun kezapqetok azi Jonagöra lök asuhuyök. Anutunöŋ aiwesök murutŋi kun qahö al eŋgima. 40 Jonanöŋ suŋgem silimŋi karöbut köwet sömbupkö (gajugaju) gölömŋe malöhi, miaŋgö dop Suep gölmegö azi ölŋan mewöyök suŋgem asak karöbutkö dop gölme uruŋe ahöma.

41 “Jonanöŋ Niniwe ambazip sutŋine anda Anutugö keunöŋ uruŋini kuŋgui möta miaŋgöreŋök uruŋini meleŋgetmö, mötket, nöŋön sutŋine asuhuba kinda Jonagö ahakmemeŋi oŋgita ahakzal. Mewö ahakzalmö, iŋini töndup nesampurek ak niŋgimakze. Miaŋgöra Niniwe ambazipnöŋ jimtekötekögö nalö ketaŋe ambazip kambu ki kinjei, embuk öröröŋ kömupnöhök wahöta eŋgö qöhöröŋine mohotŋe kinme. Mohotŋe kinda Niniwe yeŋön keu kewö eŋgö sileŋine alme, ‘Iŋini Suep gölmegö azi ölŋi nesampurek ak waŋgigetka Anutunöŋ likepŋi meleŋ eŋgii sihimbölö öŋgöŋgöŋi mötme.’ Niniwe yeŋön mewö jigetka ahakmemeŋinan nanŋini könaŋamŋini indelgetka gamuŋini mötme.

42 “Könaŋamŋinaŋgö kaisöpsöpŋi kun kewö: Anutunöŋ mönöwök mötkutukutu öŋgöŋgöŋi ketaŋi mi kiŋ Solomon waŋgiiga Saut görökenök kantri kungö qin ambinöŋ Solomongö mötkutukutuŋi mötmamgö sihimŋi mörök. Sihimŋi möta gölme göraŋeyök wahöta köna köröp tiŋtiŋi kaba mala Solomongö mötmötŋi mörök.

“Mi mörökmö, mötket, nalö kewöŋe nöŋön sutŋine asuhuba kinda Anutugöreŋ mötkutukutu öŋgöŋgöŋi memba kazali, mi Solomongö mötkutukutuŋi oŋgitza. Oŋgitzapmö, iŋini töndup nesampurek ak niŋgiba tönpin kingetka qahö dop kölja. Miaŋgöra Anutunöŋ könaŋgep ambazip körek pakpak öröm eŋgii keuŋini jim tekömapköra jeŋe aŋgotmei, nalö miaŋgöreŋ Saut kantrigö qin ambi miaŋön mönö mewöyök aŋgotma. Yaŋön ambazip kambu ki kinjei, embuk öröröŋ kömupnöhök wahöta eŋgö qöhöröŋine mohotŋe kinma. Mohotŋe kinda keu kewö eŋgö sileŋine alme, ‘Iŋini Jisös nesampurek ak waŋgigetka Anutunöŋ likepŋi meleŋ eŋgii sihimbölö öŋgöŋgöŋi mötme.’ Yaŋön mewö jiiga silikŋi kewöta nanŋinaŋgöra gamuŋini mötme.” Mewö. o, p, q, r, s 

Öme yeŋön azi uruŋe liliŋgöbingö kapaŋ kölje.

Luk 11.24-26

43 “Ömenöŋ azi uruŋeyök kota gölme qararaŋkölkölŋe anda laŋ liliköba mala luhut memamgö miri jaruba kun qahö miwikŋaima. 44 Mi qahö miwikŋaiba osiba kewö jima, ‘Mirini mosöta kazali, miaŋgöreŋ mönö kunbuk liliŋgömam.’ Mewö jiba liliŋgöba miriŋi usuŋda meŋölöi ahöyöhi, mi gwamönŋi ahöi miwikŋaima.

45 “Mewö miwikŋaiba anda öme tosatŋi 7 eŋguaŋgitma. Öme 7 mi nanŋi oŋgita bölöŋi kötökŋi akze. Yaŋön mi eŋguaŋgiriga kaba miri mi öŋgöba miaŋgö uruŋe malme. Mewö aiga azi miaŋgö könaŋi mutuk kileŋkileŋ ahökmö, könaŋgep böliqölim teköma. Ambazip kambu bölöŋi ki merak gölmenöŋ maljei, eŋgöreŋ mewöyök mewö asuhuma.” Mewö.

Jisösgö nam-munurupŋi

Mak 3.31-35, Luk 8.19-21

46 Jisösnöŋ toroqeba ambazip kambu yeŋgöra keu jiba maliga nam-munŋan kaba yaigep kinda yambuk keu jibingö mötket. 47 Mötketka kunŋan kewö jii mörök, “Mötnöŋ, göhö nam-mungan mönö yaigep kinda göbuk keu jibingö mötze.”

48 Keu mi jii mörökmö, yaŋgöra meleŋda kewö jiyök, “Nöŋgö namni daŋön? Nöŋgö munurupni mi daŋön?” 49 Mewö jiba böröŋi gwarekurupŋi yeŋgöreŋ göröken böraŋda jiyök, “Eket, nöŋgö namni aka munurupni ölŋi mönö ki.” 50 Denike yeŋön nöŋgö Suep Iwinaŋgö jitsihitŋi tem kölakzei, körek mieŋön mönö nöŋgö namni aka nenmunurupni akze.” Mewö.

Copyright information for `BMU