a1Mat 12.38, Luk 11.16;
b4Mat 12.39, Luk 11.29
d9Mat 14.17-21;
e10Mat 15.34-38
f14Mat 14.1-2, Mak 6.14-15, Luk 9.7-8;
h19Mat 18.18, Jon 20.23
i24Mat 10.38, Luk 14.27;
j25Mat 10.39, Luk 17.33, Jon 12.25;
k27Mat 25.31, Sum 62.12, Rom 2.6

Matthew 16

Böhi tosatŋan aŋgöletot ekingöra kapaŋ kölget.

Mak 8.11-13, Luk 12.54-56

Farisi (Köna keugö kapaŋkölköl) aka Sadyusi (Jike nupkö kapaŋkölköl) tosatŋan Jisösgöreŋ kaba keugö bötaknöŋ örömap-köra esapköm waŋgiba kewö qesiget, “Mönö jinöŋga Suepnöhök aŋgöletot kun asuhuiga ekin.” Mewö jigetka kewö meleŋnök, “Wehön gemamgö ahiga miaŋgöreŋ kewö jimakze, ‘Suepnöŋ pisihizawaŋgöra uran wehön ölöpŋi akŋa.’

“Mewöyök söŋanök kewö jimakze, ‘Suepnöŋ pisihiiga kousunöŋ töwizawaŋgöra mönö kie luhut gilma.’ Mewö mewö jiba suepkö tandökŋi eka kie wehöngö könaŋi ölöp kewörakzemö, nalö maljini, miaŋgö aiwesökŋi kewötpingö qahö mötze. Mi qahö dop kölja. Ambazip kambu bölöŋi gölmenöŋ mala qesabulum ahakzei, yeŋön Anutugö aiwesökŋi asuhumapköra kapaŋ kölakzemö, Anutunöŋ kezapqetok azi Jonagö aiwesökŋi lök eŋgiiga aiwesök tosatŋi qahö toroqeba kondel eŋgima.” Mewö jiba eŋgömosöta kungen anök. Mewö. a, b 

Farisi aka Sadyusi yeŋön wösökömbuk ewö akze.

Mak 8.14-21

Jisösnöŋ gwarekurupŋi yembuk o aŋgö kutuba likepŋe aŋgota semön membingö ölum eŋguyöhi, mi eket. Mi eketka Jisösnöŋ kewö jii mötket, “Iŋini Farisi aka Sadyusi pati yahöt yeŋgö wösökömbukŋini aka gipŋi kakŋi mietköra mönö galömŋini meme. Mi ölöpŋanök qahö kewöta andö qegetka mietkön mönö yist ewö qariba mem bölim eŋgimahot.”

Jiiga keu pasetŋi mi qahö möt asariba sutŋine kewö eraum mötket, “Nini beret qahö memba kazin. Miaŋgöra jiza me denöwö?” Mi eraum mötket kezapŋe geiga kewö jii mötket, “O iŋini mötnaripŋini morörökŋi, wuanöŋgöra ‘Beret qahö mezin,’ jiba nanŋini eraum mötze? Nöŋgö könaŋamni mi wuanöŋgöra qahö möt kutuze? Nöŋön beret 5 mi 5000 yeŋgöra mindipköbiga miaŋgö kitipŋi qezakögetka könde dawiknöŋ geba numbuŋe qeyök? Mi ölum eŋguza me qahö?

10 “Mewöyök beret 7 mi 4000 yeŋgöra mindipköbiga miaŋgö kitipŋi qezakögetka sakap dawiknöŋ geba kokolak qeyök? Mi ölum eŋguza me qahö? 11 Ni beretköra keu qahö jizali, mi denöwö aka qahö möt kutuze? Nöŋön beretköra qahöpmö, Farisi aka Sadyusi pati yeŋgö wösökömbukŋini aka gipŋi kakŋi kewöta andö qemegöra jizal.” 12 Mewö jiiga miaŋgöreŋök keuŋaŋgö könaŋi kewö möt asariget, “Aha! Plaua mem qariqari yistkö galöm mem aŋgubingöra qahö jiyökmö, Farisi pati aka Sadyusi pati yeŋgöreŋ keu loloŋqaloŋi andö qebingöra jiyök.” Mewö. c, d, e 

Pitönöŋ Jisösgö könaŋi jim miwikŋaiyök.

Mak 8.27-30, Luk 9.18-21

13 Jisösnöŋ Sisaria Filipai taongö kösutŋe anda miaŋgöreŋ gwarekurupŋi kewö qesim eŋgiyök, “Ambazipnöŋ Suep gölmegö azi ölŋi nöŋgöra denöwö jimakze? Ni niŋia akzal?” 14 Jiiga meleŋda kewö jiget, “Tosatŋan ‘Gi Jon O-melun azia akzan,’ jimakzemö, tosatŋan ‘Gi Elaija akzan,’ jimakze aka tosatŋan toroqeba kewö jimakze, ‘Gi Jeremaia me kezapqetok azi walŋi yeŋgöreŋök kun akzan.’”

15 Mewö jigetka kewö qesim eŋgiyök, “Aka nanŋinak nöŋgöra denöwö jize? Ni niŋia akzal?” 16 Qesim eŋgiiga Saimon Pitönöŋ meleŋda jii mörök, “Gi Amötqeqe Toŋi Kraist aka malmal Toŋi Anutugö Nahönŋi akzan.”

17 Mewö jiiga Jisösnöŋ meleŋda kewö jii mörök, “O Saimon Jonagö nahönŋi, gölme azi sep busuŋambuk kunŋan qahöpmö, nöŋgö Iwini Suep mire maljawi, yaŋön mönö keu mi göhöreŋ indelök. Miaŋgöra göŋön mönö simbawoŋ akzan. 18 Nöŋön kewö jibi mötman: Gi Pitö (nanine keunöŋ jamönjiŋ) aknöŋga nöŋön jamönjiŋ miaŋgö qakŋe urumeleŋ könagesönaŋgö tandöŋi albi naŋgöm eŋginöŋga uruŋini möhamgöba köhöiba kinme. Göŋön i galöm köl eŋginöŋga kömup Toŋan i senjom mirigö kiripo naŋguŋe öröm eŋgimamgö osima. Ömewöröme tosatŋi yeŋgö kukösumŋinan mewöyök i köndeŋda luhut al eŋgibingö osime.

19 “Nöŋön Suep bemtohoŋaŋgö ki moröŋi yahöt gihimam. Gi gölmenöŋ siŋgisöndok jöhönöŋga miaŋön mönö Suep mire mewöyök jöhöjöhöŋi ahöma. Gi gölmenöŋ siŋgisöndok mosöta pösatnöŋga miaŋön mönö Suep mire mewöyök pösatpösatŋi ahöma.” 20 Mewö jiba Amötqeqe Toŋi Kraist ahöhi, mi aukŋe jiget kunŋan mötpepuköra gwarekurupŋi yeŋgöra soŋgo köhöikŋi al eŋgiyök. Mewö. f, g, h 

Jisösnöŋ kömumamgö keuŋi jiyök.

Mak 8.31-9.1, Luk 9.22-27

21 Nalö miaŋgöreŋök Jisösnöŋ könahiba gwarekurupŋi yeŋgöra keu kewö indelök, “Nöŋön Jerusalem anda sihimbölö gwötpuk mötmam. Kantrigö jitŋememe, jike nup galöm aka Köna keugö böhi yeŋön nuŋgugetka kömumam. Kömumbiga wehön karöbut aiga kömupnöhök wahötmam.”

22 Jisösnöŋ mewö jiiga Pitönöŋ öröm waŋgiba göraŋe anda könahiba qetala kewö jim waŋgiyök, “O Kembu, mi nalö kunöŋ asuhum gihibapuköra Anutunöŋ mönö sel jöhöm gihima.” 23 Qetal waŋgiiga liliŋgöba Pitö kewö jim waŋgiyök, “Gi keu mötmörizani, mi Anutugöreŋ keuya qahöpmö, gölme ambazip aka Satangö sihima. Gi nöŋgö köna utumamgö mötnöŋga urunan böliza. Miaŋgöra Satan, gi mönö dölki nöŋgö jemesoholneyök kesalnöŋ!” Mewö.

Kraist wuataŋgöbingö söŋgöröŋi

24 Nalö miaŋgöreŋ Jisösnöŋ gwarekurupŋi keu kewö jii mötket, “Kunŋan nöŋgö andöne kamamgö mötzawi, yaŋön mönö nanŋi urusileŋaŋgö sihim kömbönaŋi bölöŋi andö qeiga sisitŋi megetka sihimbölö mi bisimakŋa. Mi maripomnöŋ kömumawaŋgö dop mökösöŋda ni nuataŋgöba kama. 25 Kunŋan malmalŋi nanŋaŋgöra aŋgön köla nanŋi imbi-imbi maljawi, yaŋön mönö malmalŋi ölŋi jöhöi sohoma. Sohomapmö, kunŋan gölmegö malmalŋi nöŋgöra aka köleŋda tököm niŋgimawi, yaŋön mönö malmal ölŋaŋgö könaŋi miwikŋaiba köhöiba malma.

26 “Kunŋan gölmeŋi gölmeŋi mieŋgö öröyuaiŋi pakpak köl öröiga buŋaŋi an teköiga uruŋaŋgö malmalŋi mem sohoba silebile mala kömuiga Anutunöŋ keuŋi jim teköiga uŋaŋan ayuhuiga qahö dop kölma. Sukinapŋi miaŋön mönö urusösöŋgai qahö ak waŋgima. Qahöpmahöp. Körek neŋön mönö bohonini jöhöm aŋgubingö osibin.

27 “Suep gölmegö azi ölŋan könaŋgep Suep garata töröŋi yembuk ki etketka Iwiŋaŋgö asakmararaŋi eka aurume. Nalö miaŋgöreŋ mohot mohot neŋgö ahakmemenini kewöta likepŋi miaŋgö dop neŋgima. 28 Nöŋön keu ölŋi kun kewö jibi mötme: Kiaŋgöreŋ kinjei, eŋgö sutŋineyök tosatŋan Suep gölmegö azi ölŋan kiŋ aka asuhumawi, mi ek kutume. Jebuk mala kömupkö sihimbölöŋi qahö mötketka asuhum tiŋgiriga mi ekŋe.” Mewö. i, j, k 

Copyright information for `BMU