a5Zek 9.9;
b9Sum 118.25,26
c13Ais 56.7, Jer 7.11;
d16Sum 8.2
f21Mat 17.20, 1 Kor 13.2
h33Ais 5.1-2;
i42Sum 118.22-23

Matthew 21

Jisösgöra köiraŋ kölgetka Jerusalem öŋgöyök.

Mak 11.1-11, Luk 19.28-40, Jon 12.12-19

1Jisösnöŋ gwarekurupŋi yembuk Jerusalem siti dopdowiba Oil ip kunduŋe Betfage mirinöŋ kaget. Kaba gwarekyahötŋi yahöt melaim etkimamgöra aka 2kewö jii mörohot, “Miri wösöŋire tatzawi, mönö miaŋgöreŋ anmahot. Anda miaŋgöreŋ aŋgota doŋki ambiŋi kösönöŋ jöhöget kinjawi aka doŋki moröŋi mi miaŋgöreŋök miwikŋaim etkimahot. Mi mönö pösat etkiba memba nöŋgöreŋ kamahot.

3“Pösarohotka kunŋan keu kun jiiga kewö jimahot, ‘Kembu-niran mönö miaŋgöra osiza.’ Mewö jiyohotka doŋki mi zilaŋ al etkiiga ki kamahot. 4Anutunöŋ keu kun kezapqetok azi kungö uruŋe ali jiyöhi, miaŋön ölŋambuk akŋapköra mewö asuhuyök. Keu mi kewö,

5“O Jerusalem ambazip Zaion kunduŋi liliköba maljei, yeŋgöra mönö kewö jigetka mötme, ‘Mötket, eŋgö kiŋ kembuŋinan mönö eŋgöreŋ asuhuma. Yaŋön guŋbönjönjöŋ aka doŋki qakŋe tata kama. Doŋki lömböt bisimakzawaŋgö moröŋi miaŋgö qakŋe tata kama.’”
6Jisösnöŋ gwarekyahötŋi melaim etkiiga anda keu jiyöhaŋgö dop ahot. 7Yetkön doŋki ambiŋi moröŋambuk etkömemba kayohot. Kayohotka malukuŋini qeköba doŋki qakŋire algetka Jisösnöŋ moröŋaŋgö qakŋe öŋgöba tarök.

8Mewö tata aniga ambazip kambulelembeŋan göda qeba malukuŋini qeköba köna namŋe tumbulgetka tosatŋan ip uruŋe anda böröŋi qezuŋgata köna namŋe tumbulget. 9Tumbulgetka ambazip kambu jeŋe köl öröba angeri aka andöŋe wuataŋgöba kageri, yeŋön kewö jiba qetket, “Hosana! Anutu möpöseizin. Deiwidkö gwölönarökŋi owe owe! Kembugö qetŋe kamawi, Anutunöŋ mönö i kötuetköma. Hosana! Qetbuŋagi möpöseininga euyaŋgöreŋ öŋgöza! Owe owe!”

10Mewö qetketka Jerusalem sitinöŋ öŋgöba sitigö ambazip körekŋan auruba göjupmajup aka kewö qesiget, “Azi ki mönö niŋia?”

11Qesigetka ambazip kambulelembe yeŋön kewö meleŋget, “Yaŋön mönö kezapqetok azi Jisös, Galili prowinsgö Nazaret mirigöra.” Mewö. a , b 

Jisösnöŋ jöwöwöl jike jim kömbuhiyök.

Mak 11.15-19, Luk 19.45-48, Jon 2.13-22

12Jisösnöŋ jöwöwöl jikegö tohoŋ uruŋe anök. Miaŋgöreŋ ambazip eŋgehiga inap bohonŋi memegöra algetka söŋgöröŋi megeri, yaŋön mi pakpak közöl eŋgiiga etket. Moneŋ utekutek ambazip yeŋgö jakeŋini metali anget. Mewöyök kembö bohonŋini memegöra algeri, mieŋgö dum tatatŋini mi tok tötaliga anget. 13Mewö aka kewö jii mötket, “Aisaianöŋ keu kun kewö ohoi ahöza, ‘Nöŋgö jikenan mönö köulukö miriŋina akŋapkö qetme.’ Keu mi ahözapmö, iŋini mi utekögetka kegwek-kahasililiŋ yeŋgö baŋet ewö akza.”

14Mewö aiga jegömöl aka simalokon ambazip jöwöwöl jikenöŋ yaŋgöreŋ kagetka mem ölöwak eŋgiyök. 15Mewö asuhuyökmö, jike nup galöm aka Köna keugö böhi yeŋön aŋgöletot meyöhi, mi eket aka nahönbörat jöwöwöl jikenöŋ qeta “Hosana! Deiwidkö gwölönarökŋi owe owe!” jigeri, mi eŋgeka urubölö aket.

16Urubölö aka kewö jim waŋgiget, “Morö mi keu qetzei, mi mötzan me qahö?” Jim waŋgigetka kewö meleŋ eŋgiyök, “Ölöp mötzal. Iŋini nalö kungen Buŋa keu ki oyoŋget me qahö, ‘Göŋön mönö nahönbörat aka morösepsep juzu nemakzei, mi kusum eŋginöŋga nangi törörök möpöseim gihimakze.’”

17Mewö jiba eŋgömosöta siti mosöta mare aiga Betani anda ahöyök. Mewö. c , d 

Jisösnöŋ fig ip kun qesuahöiga ululuŋgöyök.

Mak 11.12-14, 20-24

18Ahöba söŋanök wahöta kunbuk sitinöŋ anda nenegö kömuyök. 19Nenegö kömumba köna jitŋe fig ip
Fig mi sambi ipkö alaŋi kun. Mi nupŋine kömötketka kötŋi nahömŋinambuk asuhugetka gwötpuk nemakze.
kun eka miaŋgö könaŋe anök. Anökmö, ölŋi qahö miwikŋaiiga sinŋanök kiniga ehök. Mewö eka ip mi kewö jim waŋgiyök, “Göŋön mönö nalö kunöŋ ölgi kunbuk kude kuŋguman.” Mewö jim waŋgiiga fig ip miaŋön mönö miaŋgöreŋök ululuŋgöyök.

20Ululuŋgöiga gwarekurupŋan mi eka auruba kewö jiget, “Fig ipnöŋ mönö denöwö ösumok ululuŋgöza?” 21Jigetka Jisösnöŋ kewö meleŋnök, “Nöŋön keu ölŋi kun kewö jibi mötme: Mötnarip töp memba uruyahöt qahö akeak ewö, fig ipköra yuai asuhuzawi, iŋini miyök qahö akeakmö, ki mewöyök ölöp akeak: Kunduŋi kiaŋgö toŋaŋgöra kewö jim kutubeak, ‘Mönö kunduŋi ki qeköba wahöta anda köwetnöŋ alman.’ Mewö jim kutuba Anutu möt nariiga mönö miaŋgö dop ahuma. 22Wani yuaigöra qesiba köulukömei, mi pakpak buŋa qem aŋgubingö möt narigetka mönö buŋaŋini akŋa.” Mewö. f 

Jitŋememe yeŋön Jisösgö kukösumŋaŋgö qesiget.

Mak 11.27-33, Luk 20.1-8

23Jisösnöŋ jöwöwöl jikegö tohoŋ uruŋe anda ambazip kusum eŋgiiga jike nup galöm aka kantrigö jitŋememe tosatŋi yeŋön yaŋgöreŋ kaŋgotket. Kaŋgota kewö qesim waŋgiget, “Gi kiaŋgöreŋ yuai akzani, mi mönö daŋön jim kutum gihiiga ahakzan? Miaŋgö kukösumŋi mi daŋön gihiyök?”

24Qesim waŋgigetka kewö meleŋ eŋgiyök, “Nöŋön mewöyök keu kun qesim eŋgimam. Mi meleŋ niŋgime ewö, nöŋön mewöyök daŋön kukösum niŋgiiga yuai ki ahakzali, mi jibi mötme. 25Jonöŋ ambazip o-melun mem eŋgiba malöhi, yaŋön miaŋgö kukösumŋi mi denikeyök meyök? Suep Toŋan waŋgiyök me gölme toŋan waŋgiget?” Mewö qesim eŋgiiga sutŋine eraum möta kewö jiget, “‘Kukösumŋan Suepnöhök asuhuyök,’ mewö jibin ewö, yaŋön mönö kewö jima, ‘Iŋini mönö wuanöŋgöra Jon qahö möt narim waŋgiget?’ Mi qahö dop kölja.

26“Me ‘Gölme ambazipnöhök asuhuyök,’ jibin ewö, neŋön mönö ambazip kambu yeŋgöra keŋgötnini möta osibin. Könagesö pakpak yeŋön mönö Jongöra ‘Kezapqetok azia akza,’ jiba malje.” 27Keu mewö kewöta Jisösgöra kewö meleŋget, “Mi qahö mötzin.” Mewö meleŋgetka Jisösnöŋ kewö jii mötket, “Mewö aiga nöŋön mewöyök yuai ki ahakzalaŋgö kukösumŋi daŋön niŋgiyök, mi qahö jibi mötme.” Mewö.

Kungö nahönyahöt yetkö söpsöpkeu

28Jisösnöŋ söpsöpkeu kun kewö jiyök, “Iŋini keu kiaŋgöra denöwö mötmörize? Azi kun nahönyahötŋi yahöt malget. Nalö kunöŋ iwiŋiran nahönŋi kungöreŋ anda kewö jiyök, ‘Nahöni, gi ölöp merak nöŋgö wain kösö nupne anda nup meman.’

29“Mewö jiiga kewö meleŋnök, ‘Ni töközal.’ Mewö jiyökmö, könaŋgep keuŋi miaŋgö möt böliba eleŋda anda nup meyök. 30Miaŋgö andöŋe iwiŋiran nahönŋi kungöreŋ anda nahönŋi mutukŋaŋgö jiyöhi, keu miyök jii mörök. Mi möta keu kewö jiba meleŋnök, ‘Oŋ! Ketaŋamni, ölöp anmam.’ Mewö jiyökmö, töndup qahö anök.”

31Jisösnöŋ mewö jiba qesim eŋgiyök, “Yahöt yetköreŋök daŋön mönö iwiŋiraŋgö jitŋi tem kölök?” Mewö qesim eŋgiiga kewö meleŋget, “Nahönŋi mutukŋi yaŋön.” Mewö meleŋgetka kewö jii mörök, “Nöŋön keu öl töhönŋi kun kewö jibi mötme: Takis meme ambazip tilipqilipŋinambuk aka köna ketaŋi ambi yeŋön mönö iŋini eŋgoŋgita mutuk Anutugö bemtohoŋ uruŋe öŋgöme.

32“Keu miaŋgö könaŋi kewö: Jon O-melun azinöŋ eŋgöreŋ kaba Anutugö jeŋe solanibingö könaŋi kondeliga iŋini yaŋgö keuŋi mi qahö möt narigetmö, takis meme ambazip tilipqilipŋinambuk aka köna ketaŋi ambi yeŋön mönö i möt narim waŋgiget. Yeŋön i möt narim waŋgigeri, iŋini mi eka töndup könaŋgep mewöyök nanŋini qahö möt bölim aŋguba eleŋda i qahö möt narim waŋgiget.” Mewö. g 

Wain kösö nup galöm bölöŋi mieŋgö dopkeu

Mak 12.1-12, Luk 20.9-19

33Jisösnöŋ jiyök, “Dopkeu kun kewö mötme: Gölme toŋi kunöŋ wain kösö nup kun köla kömörök. Köla kömöta selŋi memba liliköyök. Mem liliköba kötnöŋ wain jout ketaŋi kötnöŋ meyök. Miaŋgöreŋ waingö ölŋi ala könanöŋ tözöhölget oŋan lalanöŋ geyök. Wain jout ketaŋi mi kötnöŋ memba wain yoŋgorö membepuköra galöm meme jake köröpŋi köweŋambuk meyök. Yuai pakpak mem teköba wain nup galöm tosatŋi miwikŋaim eŋgiba kewö jiyök, ‘Mönö nup memba ölŋaŋgö bahöŋi nanŋini memba bahöŋi toŋi ni niŋgime.’ Mewö jiba nup mi böröŋine ala eŋgömosöta kantri kunöŋ anda malök.

34“Mala mali ölŋi öliyöhaŋgö nalöŋi (yambu 5) töriiga miaŋgöreŋ welenqeqeurupŋi kun melaim eŋgiiga galöm yeŋgöreŋ anda wain nup ölŋaŋgö bahöŋi waŋgimegöra jiget. 35Jigetmö, galöm yeŋön i eŋgömemba jöhöba tosatŋi kömbinöŋ sepgwörörök eŋguba tosatŋi eŋguget kömugetka tosatŋi kötnöŋ gila eŋguget kömuget. 36Miaŋgö andöŋe welenazi tosatŋi toroqeba melaim eŋgiiga gwötpuk aketmö, i mewöŋanök öröm ureim mem eŋgiget.

37“Mewö aketka wain nup toŋan keu jaruba jiyök, ‘Nani nahöni mönö göda qem waŋgime me denöwö?’ Mewö jiba qöndökŋi mi nahönŋa melaiiga yeŋgöreŋ anök. 38Anökmö, wain nup galöm yeŋön nahönŋi eka sutŋine kewö eraum möta jiget, ‘Yaŋön mönö börösamotŋaŋgö toŋi akŋa. Ayop, mönö memba qein kömuiga wain kösö nupŋan mönö nanine buŋanina akŋa.’

39“Mewö jiba memba jöhöba gilgetka nup yaigepŋe geiga qeget kömuyök. 40Wain nup toŋan mi möta kaba nup galöm mi mönö denöwö ak eŋgima?”

41Jisösnöŋ mewö qesiiga kewö jiget mörök, “Galöm bölöŋi mi mönö köndeŋda yaijapaleleŋ mem eŋgima aka nup galöm dölökŋi miwikŋaim eŋgiba wain kösö nupŋi yeŋgö böröŋine alma. Yeŋön ölŋi ölimawaŋgö nalöŋe bahöŋi törörök waŋgimakŋe.” 42Jisösnöŋ mi möta kewö jii mötket, “Buŋa Kimbigö keu ki nalö kungen oyoŋget me qahö, ‘Miri meme yeŋön köt tandö kun andö qeba öne mosötket taröhi, miaŋön mönö tandö kömbönaŋi aiga miwikŋaiget. Miaŋön tiŋgiriga mirinöŋ gororoŋgöba eta kölma. Kembunöŋ tandö mi kuŋguiga jeninan ehinga qetbuŋabuk aiga welipkömakzin?’

43“Miaŋgöra kewö jibi mötme, Anutunöŋ mönö bemtohoŋi eŋguaŋgita ambazip kambu kun eŋgiiga yeŋön miaŋgö ölŋi ölöp kuŋgumakŋe. 44Kunŋan tandö bohonŋi miaŋgöreŋ tötöŋgata eta qemawi, mi mönö sileŋi kutumutumapmö, ain tandö miaŋön jöla tala kungö qakŋe eta kölmawi, mi mönö körek qözömözö-zamgöma.”

45Jisösnöŋ mewö jiiga jike nup galöm aka Farisi (Köna keugö kapaŋkölköl) yeŋön dopkeuŋi mi möta könaŋi möt asariba kewö jiget, “Mi mönö neŋgöra jiza.” 46Miaŋgöra i memba jöhöbingö mötketmö, ambazip kambu yeŋgöra keŋgötŋini möta osiget. Ambazip kambu yeŋön Jisösgöra mötketka kezapqetok azia ahök. Mewö. h , i 

Copyright information for `BMU