a4Lew 14.1-32
c12Mat 22.13, 25.30, Luk 13.28
d17Ais 53.4

Matthew 8

Jisösnöŋ uzikuku azi kun mem solaniyök.

Mak 1.40-45, Luk 5.12-16

1Jisösnöŋ kunduŋi mi mosöta eri könagesö kambulelembe ketaŋan andöŋe wuataŋgöget. 2Mewö kagetka miaŋgöreŋ uzikuku azi kunöŋ kaba simin köla Jisösgö wösöŋe geba kewö jiyök, “O Kembu, göŋön sihimgan mem ölöwak niŋgimamgö mötzan ewö, mönö ni ölöp mem solanim niŋgiman.”

3Mewö jiiga böröŋi böraŋda sileŋi misiriba jiyök, “Nöŋön mi akŋamgö mötzal. Gi mönö solaniman.” Mewö jiiga uzikukuŋi mi miaŋgöreŋök solanii ölöwahök. 4Solaniiga kewö jim kutum waŋgiyök, “Mötnöŋ, kiaŋgö buzup keuŋi mi kun kude jinöŋ mötme. Qahöpmö, mönö jike nup galömgöreŋ anda silegi kondel waŋgiman aka Mosesgöreŋ jimkutukutuŋi wuataŋgöba solani-zanaŋgö saiwap nalukŋi ala jöwöwöl ohoman. Mi ohonöŋ ehiga ambazipnöŋ könaŋamgi möt kutume.” Mewö. a 

Jisösnöŋ suahö galöm kungö nup aziŋi mem ölöwahök.

Luk 7.1-10

5Jisösnöŋ Kaperneam taonöŋ kaŋgoriga Rom suahö galöm kunŋan yaŋgöreŋ kaba köuluköba kewö jiyök, 6“O Kembu, nöŋgö nup azinaŋgö sileŋi likepŋan kömukömuŋi aiga sihimbölö kanjamŋambuk möta mire ahöza.”

7Mewö jiiga kewö jii mörök, “Nöŋön mönö anda i mem ölöwakŋam.” 8Mi möta kewö meleŋda jiyök, “O Kembu, ni mewöröpŋan malbiga nöŋgö miri boŋan goalöŋmapkö gamuni mötzal. Miaŋgöra keu jitkanök jinöŋga welen azinan ölöwakŋa.

9“Mi kewögöra: Ni nanak mewöyök galömnaŋgö kukösum bapŋe al niŋgigetka maljal. Nöŋgö bapne yarö azi malgetka mi jim kutum eŋgimakzal. Yeŋgöreŋök kungöra ‘Anman,’ jim kutubi yaŋön anma. Kungöra ‘Kanöŋ,’ jim kutubi yaŋön kama aka welen azini kungöra ‘Nup ki meman,’ jibiga yaŋön mi mema.”

10Jisösnöŋ keu mi möta welipköba ambazip wuataŋgöba kageri, yeŋgöreŋ liliŋgöba kewö jiyök, “Nöŋön keu ölŋi kun kewö jibi mötme: Israel könagesö sutŋine mewöyök mötnarip ketaŋi mewöŋi mi kungö uruŋe qahö miwikŋaial.

11“Nöŋön keu kewö jibi mötme: Ambazip kambulelembenöŋ mönö wehön kotkotŋeyök aka wehön gegeŋeyök kaba Suepkö bemtohoŋ uruŋe kaŋgota Abraham, Aisak aka Jeikob yembuk nene sösöŋgai aka malme. 12Yeŋön mewö malmemö, bemtohoŋgö nahönböraturup mi mönö eŋgömosöta aköm eŋgigetka pandamanöŋ yaigep geme. Miaŋgöreŋ malmei, yeŋön mönö sahöt gigilahöba irimŋini yöhözömgögetka qetŋi qeri malme.”

13Mewö jiba suahö galömgöra kewö jiyök, “Gi mönö mirige anman. Mötnaripkahö dop mönö asuhum gihima.” Mewö jiiga welen aziŋan mönö aua miaŋgöreŋök ölöwahök. Mewö. b , c 

Jisösnöŋ kawöl ambazip gwötpuk meiga ölöwaket.

Mak 1.29-34, Luk 4.38-41

14Jisösnöŋ Pitögö mire anda Pitögö suhunŋan silekönöp kawöl yöhöi ahöiga ehök. 15I eka böröŋe misiriiga silekönöpŋan mosöri wahöta könahiba Jisös nene ohoba gumohom waŋgiyök.

16Mewö malgetka miri söŋauiga miaŋgöreŋ ambazipnöŋ alaurupŋini ömeŋinambuk mi gwötpuk eŋguaŋgita yaŋgöreŋ kaget. Kagetka ömewöröme mi keuŋan jiba közöl eŋgiiga kota anget aka kawöl ambazip pakpak mi mem ölöwak eŋgiyök. 17Mewö miaŋön Anutunöŋ keuŋi kezapqetok azi Aisaiagö uruŋe ali jii ahözawi, miaŋön ölŋambuk ahök. Keu mi kewö, “Yaŋön mönö neŋgö uzi kawölnini meiga qakŋe öŋgöiga bisiyök.” Mewö. d 

Jisös wuataŋgöbingö möndömöndö keuŋi

Luk 9.57-62

18Jisösnöŋ ambazip kambu ketaŋi liliköm waŋgiget eŋgeka nalö miaŋgöreŋ gwarekurupŋi yembuk o aŋgö kutuba likep aŋgotpingö jim kutuyök. 19Köna keugö böhi kunŋan Jisösgöreŋ kaba kewö jii mörök, “Böhi, gi denike denike anmani, nöŋön mönö miaŋgöreŋ gi guataŋgöba kamam.”

20Mi möta Jisösnöŋ kewö jii mörök, “Arökŋaŋgö kiam yeŋön köteŋine ahögetka könakemba nei yeŋön öŋgot jajöŋini memba malakzemö, Suep gölmegö azi ölŋan mönö denike anda nöröpŋi wani qömböŋnöŋ nariba luhut membawak?”

21Mewö jii gwarek yeŋgöreŋök kunöŋ kewö jii mörök, “Mi ölöpmö, iwinan kömumamgö aiga mutuk jinöŋga anda galöm kölbi kömui löm kölbigun.” 22Mewö jiyökmö, Jisösnöŋ meleŋda jiyök, “Mosötnöŋ, köhömuŋi yeŋön qamötŋini köhömuŋi mi ölöp löm kölmemö, göŋön mönö kaba ni nuataŋgöman.” Mewö.

Jisösnöŋ jiiga raidimbom göröŋ qeyök.

Mak 4.35-41, Luk 8.22-25

23Jisösnöŋ anda waŋge uruŋe öŋgöiga gwarekurupŋan wuataŋgöba yambuk mohotŋe anget. 24Angetka raidimbom ketaŋan ömtöröp (töröpŋanök) o aŋgönöŋ asuhuba gilök. Giliga sirinöŋ waŋge uruŋe geiga numbuŋe qemamgö ahökmö, Jisösnöŋ gaun ahöyök. 25Gaun ahöiga gwarekurupŋan anda möndöba jiget, “Hei Kembu, mönö bauköm neŋginöŋ. Nini aŋgönöŋ ayuhubingö akzin.”

26Mewö jigetka meleŋda kewö jim eŋgiyök, “O iŋini mötnaripŋini morörökŋi, mönö wuanöŋgöra keŋgöt mötmöt azia akze?” Mewö jiba wahöta luhut aka siri jim qetal etkiiga sirinöŋ nöŋ qeba ahöyök. 27Mewö aiga awöwöliba qesiba jiget, “Yei! Azi kia mönö denöwöŋan malja. Yaŋön mönö luhut aka köwet jim kutum etkiiga jitŋi tem köl waŋgizahot.” Mewö.

Ömenöŋ bau uruŋine gegetka azinöŋ ölöwahot.

Mak 5.1-20, Luk 8.26-39

28Mewö asuhuiga o aŋgö kutuba likepŋe Gadara yeŋgö gölmenöŋ aŋgorök. Miaŋgöreŋ aŋgota azi ömeŋirambuk yahöt yetkön qaksirinöhök kaba Jisös miwikŋaiyohot. Yetkön irimsesewöl azi urukönöpŋirambuk ahotka kunŋan köna miaŋgöreŋ anmamgö osiyök. 29Yetkön Jisös miwikŋaiba silata kewö qet gigilahöyohot, “Aek! Gi Anutugö Nahönŋi akzan. Gi mönö denöwö ak neŋgimamgöra kazan? Sihimbölö mötmöt nalöŋan qahö kam kuŋguiga qeljiŋe mi könöpŋambuk ak neŋgimamgö ki kazan me?”

30Miaŋgöreŋök köröwen qahöpmö, kösutŋine miaŋgöreŋ bau kambu ketaŋi kun gwözözak uruŋe kuluŋda malget. 31Miaŋgöra ömenöŋ kewö jiba Jisös ulet waŋgiget, “Göŋön nini közöl neŋgiman ewö, mönö melaim neŋginöŋga ölöp bau kambu mieŋgö uruŋine gebin.”

32Ulet waŋgigetka Jisösnöŋ “Mönö anda geget,” jiba jim kutuyök. Mewö jim kutuiga miaŋgöreŋök azi uruŋireyök kota anda bau uruŋine geget. Gegetka bau kambu körek yeŋön mönö luhuba nembönembönöŋ anda jororoŋgöba o aŋgönöŋ geba nemulahöba kömuget.

33Kömugetka bau galöm yeŋön ölöŋ unjurata taonöŋ anda keu buzupŋini pakpak jiget. Azi ömeŋirambuk yetköreŋ yuai asuhuyöhi, miaŋgö buzupŋi mewöyök jiget mötket. 34Jiget möta taon ambazip pakpak yeŋön mosöta Jisös miwikŋaiba ekingö kaget. Kaba eka Jisösnöŋ yeŋgö mindimindiri sel gölme mosöta anmapkö ulet waŋgiget. Mewö.

Copyright information for `BMU