a5-7Eks 20.11, Dut 32.40, Dan 12.7, Amos 3.7; 8-10 Eze 2.8-3.3

Revelation of John 10

Suep garata aka kimbi köpep moröŋi

Miaŋgö andöŋe Suep garata kukösumŋi oŋgotoŋgotŋi kun ekiga Suepnöhök kousunöŋ esuhum waŋgiiga erök. Nöröpŋi kiam nesilamŋan kutuba liliköba ahöyök. Jemesoholŋi wehön jeŋi ewö aiga könaŋi yahöt mi tandö könöp bölamŋirambuk yahöt ewö jeba kinök. Böröŋan kimbi köpep moröŋi meiga kötukötulŋi ahök. Könaŋi ölŋi köwetnöŋ ala qaniŋi mi gölmenöŋ ala kinök. Mewö kinda laion sömbupnöŋ görörökömakzawi, qetŋi mönö miaŋgö dop köhöikŋanök qerök. Qeriga wölpöndaŋgö giŋgururuŋ 7 mieŋön mönö meleŋda görörököba keuŋini qetketka möral.

Wölpöndaŋgö giŋgururuŋ 7 mieŋön qeta keuŋini jigetka mörali, nöŋön mi mönö miaŋgöreŋök papianöŋ ohomamgö ahal. Kimbi ohomamgö ahalmö, kouruk kun Suepnöhök mötpiga keu kewö jiyök, “Wölpöndaŋgö giŋgururuŋ 7 keu jizei, mi mönö nangohok ölöŋ mötnöŋ ahöma. Mi kude ohoman.”

Suep garata könaŋi köwet aka gölme qakŋire tiba kini ehali, yaŋön böröŋi ölŋi memba wahöta Suepnöŋ göröken alök. Jöjöpaŋ keu jimamgöra böröŋi mewö ala mi jim köhöiba alök. Kunöŋ Suep, gölme, köwet aka yuai pakpak mieŋgöreŋ ahözawi, mi miwikŋaiba kinda nalö dop teteköŋi qahö köhöiba mal öŋgömawi, mönö yaŋgö qetŋe jöjöpaŋ keu kewö jiyök, “Anutunöŋ mönö nalö kunbuk qahö qekörii öŋgöma. Mewö qahöpmö, Suep garata 7:ŋan tömunŋi qainŋi kun (biugel) uiga kourukŋi mötmei, nalö miaŋgöreŋök Anutugö keu areŋ asa-asambötŋan mönö ölŋambuk akŋa. Kezapqetok ambazip Anutugö nupŋi memba mala kotketka yeŋgöra Buŋa keuŋi ölöpŋi jim indel eŋgiiga möta kota malgeri, Buŋa keu miaŋgö dop mi mönö zilaŋ ölŋambuk akŋa.”

Miaŋgö andöŋe kouruk kun mutuk Suepnöhök mötpiga keu jiyöhi, miaŋön mönö dumŋe kunbuk keu jiiga kewö möral, “Suep garatanöŋ köwet aka gölme qakŋire tiba kinda kimbi köpep meiga böröŋe kötukötulŋi ahözawi, mi mönö anda meman.”

Mewö möta Suep garatagöreŋ anda kimbi köpep moröŋi mi niŋgimapkö qesial. Qesibiga nöŋgöra kewö jiyök, “Mi mönö memba nenöŋ! Nenöŋga gölömge geba meleŋniga kömbuk usukömapmö, numbuge mi mönö moroŋ oŋaŋgö nahömŋi ewö asuhuma.”

10 Mewö jiiga kimbi köpep moröŋi mi yaŋgö böröŋeyök memba neal. Nembiga numbune moroŋ oŋaŋgö nahömŋi ewö ahökmö, gwahötpi gölömne geiga meleŋniga kömbuk usuköyök. 11 Mewö aiga nöŋön keu kewö möral, “Gi mönö dumŋe kunbuk Anutugö kezapqetok keuŋi keuŋi jim sehiba malman. Kantriŋi kantriŋi aka bem isikŋi isikŋi keu tandök jijiŋinaŋgö dop maljei, mönö yeŋgö aka yeŋgö kiŋ kembuŋini mieŋgö kezapqetok keuŋini mi qeljiŋe jiba malman.” Mewö. a 

Copyright information for `BMU